Read Pochuri Naga MATHI 17 Bible Online

MATHI 17 - Pochuri Naga bible

MATHI 17

¹Jütisanü rülo türo sevü Jisu nüh Pitor thi Jems thi ma nü Johan mari sie taji azhie küpa küzhiho kürügi küsü vü tewa.

²Thi ma nüh mari atüvü nüh ma tso saküpasheke tsü, ma nyia nga arünyi kümüjie wierake, thi ma thsümünyi nga müji huothethe nü aküwie kümüjie tewa.

³Thinü halie, mari atüvü Mosa thi Elijah nga küngu taji Jisu sie jüle.

⁴Jütiküsavü Pitor nüh Jisu vü, “VÜWA, hiri hala peküveh mühie sheh thuoh, noh kümüshe thuoüji, hi nüh hala nüh aphrü küche sanaveh, küsü thuoüji noh kenüh, thi küsü thuoüji Mosa kenüh, thi küsü thuoüji Elijah kenüh,” ti küza.

⁵ Ma azhü phrapeküveh vünüh halie, akülu kümüji küsü nüh mari külüwute tewa, thinü halie, akülu jüla nüh azhüphraru tajinü, “Hama thuoüji eh Tsa, hi nüh küümzetsawa, hi nüh ma vü eh loküzhe pemüthuoh, ma zhü künaluo,” ti küza.

⁶Thinü ma sehnyiri nüh azhü jüma künara nü mari tü krü sheh ketaji künyiatsuo zetewa.

⁷Thitü Jisu nüh ru mari pa tajinü, “Mükrütümü nü süraluo,” ti küza.

⁸Jüti küsavü mari tü tokenüh nono ünü Jisu mpa küchie nüh nyi küsü nga müngu nüh samü.

⁹Jütisanü mari küzhiho rügi vünüh shele tekütsevü Jisu nüh mari vü, “Anyi Tsawa aküsü vünüh müjiekürhoshele küju nü nohri nüh künguwa vi nyi küsü vü nga müküzatümü üti azhütsümü.

¹⁰ Thinü ma sehnyiri nüh ma vü, “Nyuji mokenüh Elijah nüh mürukhuji mümühie ta Wule küsosieri tü phrate lo?” ti küna.

¹¹Thinü Jisu nüh rüle tajinü, “Zhütsa, Elijah ru nü zanyo aveh sakümühie tsüwie naveh,” ti küza.

¹² Thitü hi nüh nohri vü küza naveh, Elijah tü ru müthuoh, thitü mari nüh ma müthsü nüh samü, thi mari nüh ma vü mowa sangü nüh jüma sawiethuoh, jükümjie anyi Tsawa nga mari ake vünüh münomünawie naveh, ti küza.

¹³Jüsevü nüh ma sehnyiri tü ma nüh Johan Baptist zhühku mari vü küzaküveh thsüra.

¹⁴Jüsevü mari tse nü anyi shiejiwa vü ru ünü, anyi küsü ru Jisu atüvü khotsü nü,

¹⁵“VÜWA, noh eh tsa nokümüze tsüjie; ma tü tsolemie sanü münomüna shehshehti, thi ma tü hozakeri wienga anyih lovü tsuotsake tetuthuoh thi hozakeri wienga aju lovü tsuotsake tetüthuoh.

¹⁶Thi hi nüh ma sie no sehnyiri vü wa thuoh, thitü mari tü ma samükümühietsüra nüh samü,” ti küza.

¹⁷Thinü Jisu nüh rüle taji, “Halie, kütsotü küzüla thi wule mükünyu vünüh tekütse nyiri, hi nüh küthake nohri siepe na lo? Hi nüh küthakele nohri sieküzhike na lo? Ma sieru hi tsüluo,” ti küza.

¹⁸Jütisanü Jisu nüh Tsuore kümüsüwa phra, thinü Tsuore kümüsüwa tü ma vünüh shuteru, thi jüla nüh atsawa tü sakümühiejutsü.

¹⁹Thinü ma sehnyiri tü küüzhe vünüh ma vü ru nü, “Hiri nü mokenüh zhemüjara nüh samü lo?” ti küna.

²⁰ Thinü ma nüh mari vü, küpakenühnyunü nohri kütsotü küzüla kenüh wiethuoh, hi nüh nohri vü küzatoke naveh, nohri kütsotü rhünyuowithari ke wienga küpewietüla, nohri küzhiho hama vü nga, “No kütsele hala nüh tuwuovü tewaluo,” tawie ketünga kütsele tewa wie naveh, thi nohri kenüh zanyoküsü nga müküsara münyie.

²¹Thitü hari tü kükhuo thi assa müküsanü müsara, ti küza.

²²Thinü mari Galilee vü peküveh vünüh Jisu nüh mari vü, “Nyi Tsawa tü re nyira kevü thsemünathuoh.

²³Thi mari nüh ma fethemü nü rülo kücheawa nüh rhosüratewa naveh,” ti küza. Thinü mari tü lorü sheh tewa.

²⁴ Jüti satajinü mari Kapernaum vü ru ünü kükhurüzhe akhrü kükhrühri Pitor vü ru nü, “Nohri Küsosiewa nü kükhurüzhe akhrü khrühkhrühti ünü nyu lo?” ti küna.

²⁵Thinü ma nga, “Ah, khrühkhrühti,” ti küza. Jüti satajinü azhe lovü ru ünü, Jisu nüh apokhu sanü ma jüle taji, “Simon noh nü mowa müshe veh lo? Azhih hala kajiri thawa vünüh akezhie nyutü akhrü vi vehlo? Ma mpa ma tsari vünüh vi veh ünü küpari vünüh vi veh lo?” ti küna.

²⁶Thinü Pitor nüh ma vü, “Küpari vünüh vi veh,” ti rüle tsü ünü Jisu nüh ma vü, “Jüta thuoüji atsari thuoüji mütsüketünga azhü münyiethuohnü ah?

²⁷Jütawie ketünga mari mükülo müsanüh sana küsa kenüh noh ajuküjivü wa nü müluokhu küsoke luo, thi anga kütiezhukhurawa sozhu nü ma po kho nü noh thuoüji noh raka küsü ngura naveh, thinü noh jüma viwa hisü amüthoh sanü mari tsümü luo,” ti küza.