Read Pochuri Naga MATHI 18 Bible Online

MATHI 18 - Pochuri Naga bible

MATHI 18

¹ Jüma tsothovü ma sehnyiri tü ma vü ru taji, “Rügi kajipe vü thawa nüh küjitsahwa sana lo?” ti küna.

²Jütiküsavü ma nüh kürünguori küsü ma vü jike nü mari azhie vü sataji,

³ “Hi nüh nohri vü küzatoke naveh, nohri shele kürünguori kümüjie müküsale nü rügi kajipe lovü mütura wie,” ti küza.

⁴Jükenüh thari nüh ma mpa ma sakürünyie taji rünguo hamawa kümüjie sa tse nüh jüma thuoüji rügi kajipe lovü küjitsawa wie thuoh.

⁵Thi thari nüh eh nyo vünüh rünguo hakümjie küsari siekeveh nüh jümari thuoüji hi nga siekewievehthuoh.

⁶Thitü thari nüh hi tsotükütse kürünguo hamari azhie vünüh küsüwienga sakükhiemuo naveh nüh ma thuoüji aloh küji küsü ma ku vü huke nü juküji küshe lovü thsekümü nüh ma kenüh küümpha naveh.

⁷Müjimüra taji kükhiemuo vü thsekümü kenüh azhih hama thuoüji jie, saranathuoh! Zanyo saküümüsü nü müru ta küsawanyu, thitü thawa vünüh kümüjimüra ru veh nüh jie jümawa nü saranathuoh!

⁸ Thi noh ke nüh nyutü noh jih nüh noh sakükhiemuo thuoüji noh vünüh jüma tethuohjamü luo, noh ke künyi thi noh jih künyi vü nü küsuokürho anyih lovü shothsemüna küsanü no ke wuochuwuovü mpa nyutü noh jih wuochuwuovü mpa künyi nü akürho vü küwa wa nüh noh kenüh küümpha naveh.

⁹ Thi noh notha nüh noh sakükhiemuo thuoüji noh vünüh jüma khrüzhujamü luo; noh notha künyi vü nü nyihsuozü lovü tu na küsanü noh notha küsü mpa vü nü akürho lovü kütunüh noh kenüh küümpha naveh.

¹⁰Nohri kürünguo hamari küsü vü nga müküchie müsanüh sana küsa müshe wie luo; küpakenühnyunü hi nüh nohri vü küza naveh, rügi vünüh mari zhüleri rügivü küpe eh Pa anyia no pe huo veh.

¹¹Küpakenühnyunü anyi Tsawa tü kümiekümüri phah nta küru wie kenüh.

¹²Nohri mowa müshe veh lo? Nyi küsü nüh nyihzhü müzake peh nü jümari azhie vünüh küsü kümiemü thuoüji ma tü gurake nü tüguri küzhiho vü sa mütajinü kümiekümüwa wa mphatü le naveh lo?

¹³Thi ma nüh jüma ngura thuoüji, hi nüh nohri vü küzatoke naveh, ma tü mükümie nüh peküveh gurake nü tüguri nyia vünüh jüma kenüh ma tü lozhe naveh.

¹⁴Jükümjie rügivü küpeh eh Pa nga kürünguo hamari azhie vünüh küsüwienga kümiekümü ma kümüshe nyu.

¹⁵ Thi noh nü nüh noh vü müküle kükhiemuo sa thuoüji; wa nosü mpa peh nü ma müküle phrate kütsaluo, ma nüh noh zhü küna thuoüji noh tü noh nü külolera thuoh.

¹⁶ Thitü ma nüh noh zhü müküna thuoüji, noh tü nyi küpari nyi küsü nyutü künyi sie noh nyina saluo, jütathuoüji nyi künyi nyutü nyi küche apovü zhü vünüh sara naveh.

¹⁷Thitü ma nüh jümari azhü nga mükünawie nta thuoüji vi kümühuwa vü küza luo, thi ma nüh Kümühuwa zhü wienga mükünawie nta thuoüji, ma tü mükütsotüri nyutü atheküviri kümüjie küsamü luo.

¹⁸ Hi nüh nohri vü küzatoke naveh, nohri nüh azhih hala zanyo küsüküsü nga kheh thuoüji, rügivü nga kheh wie naveh; thi nohri nüh azhih hala küsüküsü nga sa thuoüji rügivü nga satsüwie naveh.

¹⁹“Hi nüh nohri vü küzalehü naveh; azhih hala nyi künyi nüh azhü küsüküsü nga tsarü nü kükhuo sa thuoüji, rügivü küpe eh Pa nüh sa masü tsüwie naveh.

²⁰Küpakenühnyunü nyi künyi nyutü nyi küche eh nyo vünüh sehzhu küpevü hi nüh mari azhievü pewie naküveh kenüh,” ti küza.

²¹ Thinü Pitor tü ma vü ru nü, “VÜWA, eh nü tü küzakeri hi vü müküle kükhiemuo küüsa taji hi tü ma müküle noja naveh lo? Türü keri naveh lo?” ti küna.

²² Jisu nüh ma vü, hi nüh türü keri ti noh vü müküza, thitü rürakeri türü nomüjaji mümühie.

²³Jükenüh rügi kajipe thuoüji kajiri küsü nüh ma sieperi vü azhüke vi na küsa viküümüjiera küsü.

²⁴Ma nüh sana saküvehvü nyi küsü ma shewi raka anyie türake küvüri küsü sie ma vü ru.

²⁵Thitü ma tü ma shewi müthuohkhera nüh küsa kenüh ma vüwa nüh ma vü ma mpa ma zhumü, ma vüvüh nga thi ma tsari nga; thi ma zhi küperi aveh zhuru nü ma shewi thuohmü üta küza.

²⁶Thitü asiepe jümawa tü künyietsuo khotsü nü ma khurü taji, “VÜWA, küzhike tüluo, hi nüh no shewi aveh thuohkhehwie naveh,” ti küza.

²⁷Thinü siepe jüma vüwa nüh ma nokümüze taji ma jaküze thi ma shewi nga noja ma tsü.

²⁸Thitü siepe jüma tü mari kürü taji siepe sakütse küsü ma shewi pike vüküvehwa siemütu ünü, ma tü jüma khuhru vünüh künyi tajinü ma vü, “Noh nüh eh shewi vü küvehri tsüluo,” ti khuo.

²⁹Thinü masü kürü siepe sakütsewa tü tsuo khotsü nü ma vü khuo taji, “Küzhike tüluo, hi nga no shewi satsüwie naveh,” ti küza.

³⁰Thitü ma tü ma müjawie nti ma shewi müjie küthuoh küju nü ma re küsizhe vü thsemü.

³¹Jükenüh mari kürü siepe saküperi nüh amüke jüma ngu nü mari luoveh müsü sheh tewa, jütisanü momoti samüthuoh nüh wa mari vüwa vü aveh küzakheh.

³²Thinü ma vüwa nüh ma jike taji ma vü, “Noh siepe arokümüsüwa, noh nüh hi vü küzhiekezhiekhri kenüh hi nüh ashewi aveh nojatsü.

³³Jükenüh hi nüh no kümüze kütsü kümüjie noh nga nohri kürü siepe sakütsewa noküümze lenyu ülo? ti küna.

³⁴Jütisanü ma vüwa tü arüshu nü ma shewi müjie küthuoh küjunü ma vi küsizhe vü kühuori ke vü thsemü,” ti küza.

³⁵Jükümjie nohri küsüküsü nga nohri luoveh lovü nüh nohri anü müküle nomüja thuoüji rügivü küpe eh Pa nga nohri vü jükümjie sawie naveh, ti küza.