Read Pochuri Naga MATHI 2 Bible Online

MATHI 2 - Pochuri Naga bible

MATHI 2

¹Thinü Herod kajiwa tsothovü Judea azhih Bethlehem anyu vünüh Jisu küwuora vü, halie, rünyiküshupe wuo vünüh zanyoküthsüri ru taji nü,

²“Judahri Kajiwa wuo küsawa khiela peveh lo? Küpakenühnyunü hiri tü rünyiküshupe vünüh ma wutsi ngu nü ma khurü nti tse,” ti küna.

³Thinü kajiwa Herod tü azhü hamari thsü nü ma thi Jerusalem vü küperi aveh ma sie luoveh küraküpre.

⁴Jütisanü ma nüh levü küjiri thi Wule küsosieri jizhu tajinü Khristawa tü khiela nüh wuo nasaveh lo? ti mari vü küna.

⁵Thinü mari nüh ma vü, “Judeari azhih Bethlehem vünüh wuo naveh, küpakenühnyunü setsaküthsüwa nüh hakümjie rhükesaveh:

⁶ “Thi noh Judea azhih vü Bethlehem, noh Judea azhih vü kajiri atsa azhie nüh küzatsawa nyuthuoh, küpakenühnyunü noh vünüh sierhü küsü shuru naveh, thi ma mpa nüh eh nyi Israelri kete nü sierho naküveh kenüh,” ta rhü saveh.

⁷Thinü Herod nüh küüzhe vünüh zanyoküthsüri jizhu taji nü wutsi jüma shukümü rülo küzakethuoh nti küsa kümühieti künatora.

⁸Thinü ma nüh mari Bethlehem vü küze taji nü, “Nohri wa taji nü kümühieti Tsa kürünguowa phah luo, thi nohri ma ngura thuojinü hi nga wa nü ma khurüna küsa kenüh azhülewa vi sheleru hi nga tsüluo,” ti küza.

⁹Jütiküsavü mari tü kajiwa zhü thsüra taji nü tsetewa, thinü halie, rünyiküshupe wuo vünüh mari nüh wutsi künguwa mari atüvü tsewawie tajinü wa Tsawa küpepevü jura nü kheti jüma alü vü petewa.

¹⁰Thinü mari tü wutsiwa ngu tajinü lozhe tü mükülozherhüra sanü lozhe.

¹¹Jütisanü mari azhe lovü tu ünü Tsawa tü ma zah Maria siepelanü ngura; thinü mari tü kükietsuo ze nü ma khurü; jütisanü mari tü mari nüh zanyo tie vikütseri: suna, thi athso arheküünguri, thi akürhethsoju küünguri lezhu tajinü vi ma tsü.

¹²Thi amoh vünüh VÜWA nüh mari Herod vü shele müküwa na küsa zhü kütsü kenüh lekhuji küpa vünüh tse mari anyu vü tewa.

¹³Thinü mari teküwa ase vünüh, halie, Josef moh vünüh VÜWA zhüleri küsü ma vü ru nü, “Süra tajinü Tsawa thi ma zah sie tajinü zhü Egypt vü tewaluo, thi hi nüh azhü vi noh vü müjieküru küjunü noh jüla pe luo, küpakenühnyunü Herod nüh Tsa kürünguowa zothemü nta ma phanaküveh kenüh,” ti küza.

¹⁴Thinü ma süra nü Tsawa thi ma zah sie arüza vünüh Egypt vü tewa

¹⁵ Jütisanü Herod müjie küsü küjunü jüla petewa: VÜWA setsaküthsüwa nüh, “Egypt vünüh eh Tsa jira,” ta küsa azhüwa juna küsa kenüh jüta küsawiethuoh.

¹⁶Jütiküsavü Herod tü zanyoküthsü jümari nüh ma mürakümü thsüra nü ma rüshu she taji nyiri küze tajinü zanyoküthsüri vünüh ma tsothowa tota küthsüra kümüjie Bethlehem thi jüma natonahuo vü küperi aveh vü atsa nyimpari mahvi künyi nüh lavü aveh fethekhehmü.

¹⁷Hakümjie setsaküthsüwa Jeremia nüh küzaküsawa sajura. Ma nüh küüza,

¹⁸ “Ramah vünüh jikhi küsü thsüra, Lorüshe, thi krie nü küüzo sa, Rachel tü ma tsari kenüh krie, thinü ma luoveh mürüzi nüh samü, küpakenühnyunü ma tsari tü mükünyiethuoh kenüh,” ta küsa setsaküthsüwa Jeremia nüh küza küsa zhüwa juthuoh.

¹⁹Thitü Herod sümü ünü, halie, Egypt vünüh Josef moh vünüh VÜWA zhüleri küsü ma vü ru nü,

²⁰“Noh süra nü Tsawa thi ma zah sie taji Israelri azhih vü tewaluo; küpakenühnyunü Tsawa zothe nta phaküvehri tü sükümüthuoh kenüh,” ti küza.

²¹Thinü ma tü süra nü Tsawa thi ma zah sie taji Israelri azhih vü teru.

²²Thitü ma tü Arkheleus nüh ma pa Herod amüthoh sanü Judea azhih vü kaji küveh thsüra taji nü ma tü jüla küwa krü: thi jüti küsavü ma moh vünüh Saküüwuowa nüh azhükütsü kenüh tse khaphrü le Galilee azhie vü tewa.

²³ Jütisanü wa anyu küji Nazareth ti küsa vü petewa; jüti küsatü küpakenühnyunü ma tü Nazaren küsa naveh ti saküsa khana setsaküthsüri nüh küza küsa zhüwa ju naküsa kenüh wiethuoh.