Read Pochuri Naga MATHI 21 Bible Online

MATHI 21 - Pochuri Naga bible

MATHI 21

¹Jütisanü mari Jerusalem shenyi ru ünü tse Olive küzhiho rügivü Bethfage vü ru, thinü Jisu nüh ma sehnyi nyi künyi atüvü küze,

²jütisanü masü vü, nohsü tse anyu nosü atüvü peküvehvü waluo; thi wajura thuoüji nyuri nüh rawuküzawa avüh küsü thi ma tsa; ti hute küsala ngu naveh nüh jümasü le taji hi vü sie ru luo.

³Thi nyuri nüh nosü vü azhü küza thuoüji; “VÜWA nüh hamasü müviji mümühie nüh saveh lie, ma nüh masü küze mülewie nata,” ti nosü nüh küza luo, jütathuoüji tsü naveh nüh, ti küza.

⁴Hama tü küpakenühnyunü, thitü setsaküthsüwa nüh küza küsa:

⁵ “Nohri wa Zion atsa rülawa vü küza luo, halie, noh Kajiwa tü ma khuke mühie nü rawu küzawa avüh küsü, mazhünyo arawuh küzawa rügivü peh nü noh vü tse nüh, ta küsa zhüwa ju na küsa kenüh jüta küsa wie,” ti küza.

⁶Thinü ma sehnyi jümasü tü wa nü Jisu nüh masü vü küüza kümüjie sa.

⁷Jütisanü masü tü rawu küza avühwa thi ma tsawa shoru tajinü mari tü rawu künyi rügivü athsü shieke taji ma jürü givü kuo küshupe.

⁸Thi anyi riekhuowa aküzhi vünüh athsü vi lekhuji vü shieketü; thi wuori thuoüji athso vünüh ma tsuonari zahru lekhujivü shieketü.

⁹ Jütisanü nyiri ma tüvü kütseri thi ma se vü kütseri zia taji, “Hosanna, David Tsa tü kükhrarawa saluo; VÜWA nyo vi kütsewa kümüngatsawa, Hosanna kürügitsawa,” ti zia.

¹⁰Thinü ma Jerusalem vü ru ünü nyuküji jüla aveh künga taji, “Hatü thawa thuoh lo?” ti sa.

¹¹Thinü nyi riekhuowa nüh, “Hama tü Galilee azhih vü Nazareth setsaküthsüwa Jisu wiethuoh,” ti küza.

¹²Jümasevü Jisu tü Saküüwuowa Kükhurüzhe[7] lovü tu ünü kükhurüzhuh lovü zanyo sü thi zanyo zhuküperi aveh zhejamü, thi raka müzhi küvehri zanyo küsape nga thi mükhrietü zhuküperi ape nga khajakhehmütü.

¹³ Jütisanü ma nüh mari vü, “Eh zhe tü kükhuozhe ti sa naveh, ta küsa rhüsawie veh, thitü nohri nüh hama vi rühukütsara zheh samütü thuoh,” ti küza.

¹⁴Jütiküsavü nothaküüjuri thi jiküjiri Kükhurüzhe vü tse ma vü ru; thi ma nüh jümari sakümühie tsü kheh.

¹⁵Thitü kükhruoküjiri thi Wule küsosieri tü ma nüh sakütsü küngo küürori, thi rünguori Kükhurüzhe vünüh zia taji; David Tsa Hosanna ti sakütseri nga ngu nü mari luoveh mütho nü mari nüh ma vü,

¹⁶“Noh tü hamari nüh mowa küza tseveh nüh künara veh ünü nyu lo?” ti küna. Thinü Jisu nüh mari vü, “Ah, rünguori thi kürünyiri apo vünüh nga noh küsiake sajuwie naveh; ta küsa nohri khanavü zanyoküsü nga müchiewie ülo?” ti küza.

¹⁷Jütisanü ma tü mari jamünü nyuküji jüla nüh tse Bethani vü tewa nü jü rüza jüla zetewa.

¹⁸Jümasevü rüne vü ma tü nyuküji jüla shele tse ünü ma vo rüma tewa.

¹⁹Thi lekhuji natovü jichuo rhu küsü küpela ngura nü tse jüma kütuovü wa thinü manyawa küchie nüh zanyoküsü nga mpehla nüh sa, thinü ma nüh jichuorhuwa vü, “Nohsü nüh tuvü küsuokürho noh vünüh noh vi küsü nga müküthuoh tümü luo,” ti küza. Thi jüti kephratethuoh nüh jichuo rhu wa tü wazhütewa.

²⁰Thinü ma sehnyiri nüh jü ngu tajinü, “Jichuo rhu wa tü mokenüh shita wazhütewa thuoh lo?” ti phrate.

²¹ Thinü Jisu nüh mari vü, hi nüh nohri vü küzatoke naveh, nohri luoveh künyi müsanüh kütsotü peh tsathuoüji, nohri tü jichuo rhu vü hakümjie küsara mpa nyu nü thitü nohri küzhiho hama vü nga, “Noh hala nüh tse juküji lovü tetu luo,” ta wie ketünga jüwienga sarawie naveh.

²²Jümpa mükünyu nohri nüh tsotü phake nü zanyo küsüküsü nga khuo thuoüji ngurawie naveh, ti küza.

²³Jümasevü Jisu tü Kükhurüzhe lovü tu nü nyuri sosie peküvehvü kükhruo küjiri thi nyiri azhie vü sierhüri ma vü ru nü, “Noh tü mowa kükhra vi nü zanyo hari satse veh lo? Thi thawa nüh kükhra hama vi no tsü lo?” ti küna.

²⁴Thinü Jisu nüh mari vü, “Hi nga nohri vü zanyoküsü küna naveh, nohri nüh jüma hi vü küza thuoüji hi nga nohri vü hi tü mowa kükhra vünüh zanyo hamari satse nüh küza naveh.

²⁵Johan Baptist tü khievünüh ru lo? Rügi vünüh ru ünü nyiri vünüh ru lo?” ti küna. Thinü mari mpa kürüchie nü, rügi vünüh ti hiri nüh küza nti ünü ma nüh, thinü mokenüh ma mütsotü lo, ta küza naveh.

²⁶Thi nyiri vünüh ru ti hiri nüh küza nti ünü nyi riekhuowa krü, küpakenühnyunü nyiri aveh nüh Johan tü setsaküthsüwa ta satetsewiethuoh.

²⁷Jüti sape nü mari nüh Jisu vü, “Hiri nü müthsü,” ti küza. Thinü ma nga mari vü, “Hi nga mowa kükhra vi nü zanyo hari satseveh nüh nohri vü küüzawa nyuthuoh,” ti küza.

²⁸Nohri tü mowa müshe veh lo? Nyi küsü ma tsa nyimpari künyi peh; thi ma tü ma tsa kükhruowa vü ru nü, “Eh tsa no nosü wa nü rhelivi zhuh vü küüro saluo,” ti küza.

²⁹Thinü Ma nüh, “Hi nü müwara,” ti rületsü; thitü asevü nüh ma luoveh khaphrü le nü wa.

³⁰Jüsevü ma tü atsa kürünguowa vü wa taji jükümjie küza, thinü ma nüh, “Nyia, eh pa wa naveh,” ti küza, thitü ma tü müwa nüh samü.

³¹Thinü jüma masü khiemawa nüh ma pa külo sa lo? ti küna. Thinü mari nüh, “Apowa wiethuoh,” ti küza. Thinü Jisu nüh mari vü, “Hi nüh nohri vü küzatoke naveh, atheküviri nüh thi küüphroküphrievühri nüh nohri atüvü apo sa Saküüwuowa kajipe lovü tu naveh.

³² Küpakenühnyunü Johan tü künyitsa lekhujiwa müzhe nü nohri vü ru, thitü nohri nüh ma mütsotü nüh samü, thitü atheküviri thi küüphroküphrievühri ma tsotüra thi nohri tü jü nguwie ketünga asevü nga nohri luoveh tsaza taji kükhaphrü müsa,” ti küza.

³³ Küüzhühie zhü küpa küna lehü luo, khanavü nyi küsü nüh ma rhelivizhuh küsü tsa, thi arüpe sa jüma mükieshe, jütisanü rheliviju kütsüzhu kenüh azhih küsü phieke, jütisanü azie küsü jüke taji vi azhu küüro wuori tsotü münü tse anyu aleküsuo vü tewa.

³⁴Jütisanü ma küüro avi küpe tsotho juru ünü ma nüh ma küüro aviri phazhuh nti küsa kenüh asiepe wuori zhuküro küveh jümari vü küze;

³⁵thinü azhuküüro jümari tü ma siepe jümari re taji nü nyi küsü femü, thi küpa küsüwa thuoüji fethemü, thi aloh vi küpa küsüwa vethemü.

³⁶Jüsevü nga apokhuwa nyia vünüh siepe küzhi küpa küze lehü; jüla nga atükhuvü kümüjie mari vü salehü.

³⁷Thitü asevü thuoüji ma mpa ma tsa küze taji mari vü, “Mari nga eh tsanü küsiake tsüra naveh,” ti sa.

³⁸Thitü azhuküüro jümari tü tsawa ngu ünü mari mpa kürüchie nü, “Hama thuoüji azhu vüwa tsa wiethuoh; rah, hiri ma fethemü nü ma zhezhu vi ünü,” ti sa.

³⁹Jütisanü mari ma re nü ma sho rhelivizhu tsuosü vü wa nü ma fethemü.

⁴⁰“Jükenüh rhelivizhu vüwa ru thuoüji azhuküüro jümari vü mowa sana lo?” ti küna.

⁴¹Thinü mari nüh ma vü, “Ma nüh anyi khuke kümüsü jümari zoriejamnathuoh, jütisanü rhelivi zhu jüma vi tsotho khemta küsa vü ma küüro aviri küpe nü ma tsü na küsa kenüh zhuküüro küpari tsümü naveh,” ti küza.

⁴² Thinü Jisu nüh mari vü, nohri khanavü zhütsazhü vü: “Aloh küsari nüh Jakümü alohwa nyuri nüh jüma vi ajühke vü aküjiwa küüsamüthuoh; jümatü VÜWA vünüh wiethuoh; ta rhüküsa müchierhuowie ülo? ti küna”

⁴³Jükenüh hi nüh nohri vü küza naveh, “Nohri vünüh Saküüwuowa kükaji vitewa avi küüpera na küsa akuoh küsü vü tsümünathuoh.

⁴⁴Thi nyi küsüküsü nga aloh hama rügivü tsuotsa küwari thuoüji külorie khemüwienathuoh; thi aloh jümatü tsuotsa külorie nü azhitho jemü naveh,” ti küza.

⁴⁵Kükhruo küjiri thi Farisiri nüh ma küzhühiezhü jümari thsüra nü ma nüh mari zhüku küzaküveh müshera.

⁴⁶Jütisanü mari tü ma re nti sa ünü anyi riekhuowa nüh ma tü setsaküthsüri küsü ta sakümü kenüh jümari krü tewa.