Read Pochuri Naga MATHI 22 Bible Online

MATHI 22 - Pochuri Naga bible

MATHI 22

¹Jümasevü nga Jisu nüh küüzhühiezhü wuori vi jümari vü küza lehü nti sanü,

²rügikaji thuoüji kajiri küsü nüh ma tsa avüvüh küüvi nü nyuri siekütsazhu kümüjiewiethuoh.

³Ma nüh ma siepe wuori küze taji kümünyute kütsazhu vü ru üti ji küsari wa küüji, thitü mari tü müru nti sa.

⁴Thinü ma nüh ma siepe küpa kürefü küsü küze lehü nü, nohri wa nü jiküsari vü, “Halie, hi nüh kütsazhu küchesavehthuoh; eh mieshüvori nga thi eh seshuh kümühieri fethe savehthuoh, jütisanü zanyo aveh küchesamüthuoh; jükenüh nohri kümünyute kütsazhu hala raluo,” ti küza.

⁵Thitü mari tü azhü jü müshe kühuophie nü tse mari mpa mari müshe vü tewakhe. Nyi küsü nüh ma mpa ma zhuh vü tewa, thi küpawa thuoüji ma mpa ma küüro vü tewa;

⁶thi küpari thuoüji ma sieperi re nü mari saküzükrü tsü taji fethemü.

⁷Thinü kajiwa nüh jüma thsüra taji ma rüshu nü ma thopahiri küze nü nyuri küfethe jümari poka khehmü, thi mari anyu tsomütü.

⁸Jütisanü ma tü ma siepe wuori vü, “Kümünyute kütsazhu küchesavehthuoh; thitü jiküsari mütsethuoh.

⁹Jükenüh nohri lekhuji küjiri vü wa tajinü nyiri küngu aveh vü kümünyute kütsazhu hala ru üti jiluo,” ti küza.

¹⁰Thinü siepe jüri tü lekhuji küjiri vü wa taji kümüsü kümühie küngura aveh jizhuhru sa; jütisanü kümünyute kütsazhupe jüla jiru küpro.

¹¹Thitü kaji jüma tü jiruküsari no nti wa ünü kümünyute kütsazhu vü nyi küsü kütsazhupe thsümünyi müvü nüh rupeküveh ngura.

¹²Jütiküsavü ma nüh, “Eh füwa noh tü mokenüh kümünyute kütsazhu thsümünyi müvü nüh hala ru peveh lo?” ti küna. Thinü ma tü azhü küsü nga müphrara nüh samü.

¹³ Thinü kajiwa nüh ma sieperi vü, “Nohri ma jih ma ke pheh tajinü ma vi alievü aküzo vü thsemü luo, jüla nüh krie thi aha hari penaveh,” ti küza.

¹⁴Jükümjie jiküsari thuoüji zhi shehmü, thitü rükaküsari thuoüji zülamü, ti küza.

¹⁵Jütiküsavü Farisi tü wa nü ma zhü kenüh ma re nti küsa müshe nü kürüchie.

¹⁶Jütisanü mari tü mari sehnyiri küze nü Herod nyiri nga sarü nü ma vü küze taji, “Küsosiewa, noh tü zhütsamü, thi küzhütsa vünüh hiri Saküüwuowa khuke küjo nyuri kütsatsa ti; thi noh tü nyi küsü wienga mükükrü hiri tü thsüwie veh, küpakenühnyunü noh tü no küümzeri thsümüküüpa kenüh.

¹⁷Jükenüh noh kümüshewa vi hiri vü küza jie, Kaesar khrü kükhrüh le ünü nyu lo?” ti küna.

¹⁸Thitü Jisu nüh mari luoveh kümüsü thsü nü, “Nohri küthseküsari, nohri mokenüh hi müteteti lo?

¹⁹Akhrü kükhrüh amehwa vi hi kütsaluo,” ti khuo. Thinü mari nüh duli küsü vi ma vü ru.

²⁰Jütiküsavü ma nüh, tsorhe hama thawa tsorhe lo? Thi hama tha nyowa lo? ti küna.

²¹Thinü mari nüh ma vü, “Kaesar wiethuoh,” ti küza. Thinü ma nüh mari vü, “Thinü Kaesar zhiri vi Kaesar tsümü luo, thi hiri Saküüwuowa zhiri vi hiri Saküüwuowa tsümü luo” ti küza.

²²Jütiküsavü mari tü azhü jüri thsü taji mari ngo kümü kenüh ma jamü taji tewa.

²³ Jüma rülo küsüri rhomüsüra le ta küsa Sadusiri ru ma küna nü,

²⁴ “Küsosiewa, Mosa nüh, nyi küsü nüh ma tsa münyie nüh sümüthuoüji, ma nü nüh ma vüvüh küvi nü ma jie küshuküra saküshu luo,” ta küza.

²⁵Thinü khanavü ajienü mari türü peh ünü apowa ma vüvüh vi nü ma küthsoküzhi münyie nüh sümü nü ma vüvüh ma nü vü tsü mü;

²⁶thi künyiawa nga thi kücheawa nga jükümjie sasawa türüawa wa ju.

²⁷Thi mari aveh asevü thuoüji nyimzawa nga sütewa.

²⁸Jükenüh rhoküsüra le vü nyimzawa jümatü mari nyi türü azhie thawa vüvüh sana lo? Mari aveh nga ma küvi khehthuoh kenüh, ti küna.

²⁹Thitü Jisu nüh mari vü, nohri zhütsazhü nga thi Saküüwuowa kükhra nga müthsü nüh müküle satetsethuoh.

³⁰Küpakenühnyunü rholeküsüra vü vüvüh nga müvi nyutü vüpa nga müsa thuoh nüh thajüwu vü zhüleri kümüjie satewa küvehthuoh kenüh.

³¹Thi küsüri rhole küsüra zhüku thuoüji Saküüwuowa nüh nohri vü mowa küza saveh nüh nohri jüma müchie ülo?

³² Khanavü Saküüwuowa nüh nohri vü, “Hi thuoüji Abraham Saküüwuowa wie, thi Isaac Saküüwuowa wie, thi Jacob Saküüwuowa wie. Ma thuoüji aküsüra Saküüwuowa nyu nü akürhora Saküüwuowa,” ti küza.

³³Thinü anyi riekhuowa tü azhü jü thsü nü ma küsosisezhü kenüh mari ngo tewa.

³⁴Thitü Farisiri tü Jisu nüh Sadusiri azhü vehriekümü thsüra nü mari wa sehzhu.

³⁵Thi mari azhievü wule küthsüri küsü ma müte nti ma vü zanyo küsü küna nü,

³⁶“Küsosiewa, wule vü azhü küsü khiemawa nüh küjitsawa lo?” ti küna.

³⁷ Thinü ma nüh jüma vü, “Noh luoveh aveh vi thi noh kürholi aveh vi, thi noh kümüshe aveh vi VÜWA noh Saküüwuowa kümüze thi siakeluo.

³⁸Azhü hama azhü kütsü küji apokhuwa wiethuoh.

³⁹ Thi jükümjie künyiawa nga, noh mpa noh küümze kümüjie noh zhephruri kümüze luo ta küza küsawa wiethuoh.

⁴⁰ Wule aveh thi setsaküthsüri azhü aveh azhü hamasü nüh vi zhütso sakheh,” ti küza.

⁴¹Thi Farisiri ru sehzhuküpevü Jisu nüh mari vü küna nü,

⁴²“Khrista zhühku tü nohri nü moti müsheveh lo? Ma tü thawa atsa lo?” ti küna. Thinü mari nüh ma vü, “David atsa wiethuoh,” ti küza.

⁴³Thinü ma nüh mari vü, thinü, David tü mokenüh Sietsewa sie nü khanavü ma tü, “VÜWA,” ti sanü,

⁴⁴ “VÜWA nüh eh VÜWA vü, hi nüh noh mükünongüri; vi noh mphakhu lovü müjie küthse küju nü noh eh zhie wuovü peh wie luo!

⁴⁵David nüh jüla ma vü eh VÜWA ta ji thuoüji ma tü khiela nüh ma tsa sana lo?” ti küza.

⁴⁶Jütiküüza vü nyi küsüwienga ma vü zanyo küsü nga müküzara nüh sa mü; thi jü mpa mükünyu jü rülo vünüh tuvü nü nyi küsü nga ma vü azhü küüna krütewa.