Read Pochuri Naga MATHI 23 Bible Online

MATHI 23 - Pochuri Naga bible

MATHI 23

¹Jüsevü Jisu nüh anyi riekhuowa thi ma sehnyiri vü zanyo küza nti sanü,

²wule küsosieri thi Farisiri Mosa ape rügivü pehpehti;

³jükenüh mari tü nohri vü zanyo küsüküsü küzawie nga jümari sah thi müzhe luo; thitü mari küüro kümüjie nü müsatümü; küpakenühnyunü mari tü küüro kümüjie nü müsathümü; küpakenühnyunü mari tü küüza nü küzaza ti, thitü müsa.

⁴Jüta tsawie, mari tü akhuo küüzho thi nyuri nüh müküvürari sanü nyura safü rügivü thsethse ti; thitü mari mpa nü mari tüjü wie nga viwa paküünga nta müsa.

⁵ Jütanyunü nyuri nüh küüngu na küsa kenüh mari tü zanyo sakütse wie, mari tü Zhütsazhü wa rhü nü mari safü thi atie rügivü hiekevü nü küüngu tsetse ti, thi mari thsümünyi nga sakürie shehke nü tsetseti;

⁶thi kütsazhu küsavü nga küsiake vü na küsa kenüh ape kümüsie rügivü pehpehti, thi künazizhe vü nga ape kümühietsari vü pehpeh ti.

⁷Thi asüküsaperi vü nyuri nüh mari küükhurü nta thi nyuri nüh mari vü küsosiewa ta küji mari müngu tsetseti.

⁸Thitü nohri nü nyuri nüh küsosiewa ti nohri vü müküüsatümü luo; küpakenühnyunü nohri küsosiewa tü küsüwie, jüma tü Khrista thi nohri thuoüji aveh nga ajienüri khehwie thuoh.

⁹Thi nohri azhih hala nyi küsü nga vi nohri pa müsatümü luo, küpakenühnyunü rügivü küpewa mpa nüh nohri Pawa küsa kenüh.

¹⁰Jümpa mükünyu nyuri nüh nohri vü küsosieri ti müküüsatümü, küpakenühnyunü nohri küsosiewa tü küsüwie, thi jümatü Khrista wiethuoh.

¹¹ Thitü nohri azhievü thawa nüh küjitsawa nüh jüma nüh nohri siepewa küsanaveh.

¹² Thi nyi küsüküsü nga mampa ma sakümüsie kütsewa thuoüji sakürünyie mütü naveh; thi anyi thari nüh mampa ma sakürünyie tse nüh jüma nü sakümüsie tsü naveh.

¹³Thitü Khonyo küsosieri thi Farisiri nohri küthseküsari, nohri tü nyuri rügikajipe lovü kütu khete pehküveh kenüh nohri tü amüngu kümüseri! Küpakenühnyunü nohri tü nohri mpa nga müsheramüveh, thi nyiri müshe nta küsari nga müküümüshe nta küsa kenüh.

¹⁴Khonyo küsosieri thi Farisiri nohri küthseküsari nohri tü amüngu kümüseri! Küpakenühnyunü nohri tü tünyivühri tüvü rhiehza thi mari zhi müratsatsati, thi rhieza nü kükhuo hothatha sasati; jükenüh nohri tü kümnomna aküzhi nguwie naveh.

¹⁵Khonyo küsosieri thi Farisiri nohri küthseküsari, nohri tü amüngu kümüseri! Küpakenühnyunü nohri tü nyi küsü mpa wie nga Judahri rühle küüvi nta juhküji thi azhih aveh vü küzhutsetseti; thi nyi küsü nüh jüüta sarathuoüji ma vi nü nohri nyia vünüh künyikeri nyisuozü atsa küüsamümüti.

¹⁶Nyi küsüküsü nga Kükhuhrüzhe phrate nü küshie thuoüji zhümünyie, thitü Kükhuhrüzhe lovü sunawa phrate nü küshie thuoüji anyi jümatü azhü küüshie kükhu lovü pehmüthuoh, hata sanü nohri notha küju taji nyura lehkhuji küjokütseri, nohri tü amüngu kümüseri!

¹⁷Nohri notha küju nü zhekütseri, halie, suna wa ünü suna sakümtse kümü Kükhuhrüzhe wa masü khiemawa küüji lo?

¹⁸Thi nyi küsüküsü nga kükhuhrüpe rügiwa phrahte nü küüshie nü azhümünyie, thitü nyi küsüküsü nga aküte viru kükhuhrüpe rügivü saküvehri phrahte nü küshie thuoüji ma tü mükülehthuoh.

¹⁹Nohri nothaküüjuri, halie, kükhuhrü sa nta zanyo viru küsawa küüji ünü kükhuhrüpe zanyo saküümütsepewa küüji lo?

²⁰Jükenüh nyi küsüküsü nga kükhuhrü pewa phrahte nü küshie thuoüji jüma nga thi zanyo jürügi vü küpehri aveh phrahte nü küshiemüwiethuoh.

²¹Jükenüh nyi küsüküsü nga Kükhuhrüzhe phrahte nü küshie thuoüji jüma nga thi jüma lovü küpehri nga vi küshiemüthuoh.

²² Thi thawa nüh thajüwu phrahte nü küshie naveh nüh Saküüwuowa kajipe thi jüla küpehwa nga vi küshiemüthuoh.

²³ Khonyo küsosieri thi Farisiri, nohri küthseküsari, nohri tü amüngu kümüseri! Küpakenühnyunü nohri nüh suope türake sanü suope küsü küthsea: hesa thi are arheküünguwa thi awih rühzo kütsawa ti thsepeh huoveh, thitü nohri tü Khonyo küsosie zhütsawa kulemüthuoh, jümari thuoüji: kümüshowa, küümze thi kütsotü ri jamüthuoh, thitü nohri tü hari küjavüh nyu thi küpari nga kümüzhe leh.

²⁴Nohri nothaküju nü lehkhuji küjokütseri, nohri awiezü thuoüji züjaja ti thitü ut thuoüji müzhumümüti.

²⁵Khonyo küsosieri thi Farisiri, nohri küthseküsari, nohri tü amüngu kümüseri! Küpakenühnyunü ahuo nga thi akhu nga alievü thuoüji khrükümtsemümüti, thitü alovü thuoüji nyuri sakükrü nü kütsa thi nyurazhi kütsangü mpa nüh protseveh.

²⁶Noh Farisiri nothaküüjuwa, ahuo nga akhu nga ma lovü khrükümtsekhumü luo, jütathuoüji alievü nga mütserura naveh.

²⁷ Khonyo küsosieri thi Farisiri, nohri küthseküsari, nohri tü amüngu kümüseri! Küpakenühnyunü nohri tü arüku künekümüji küsa khewiethuoh, jümari tü alievü nü nozü sheh mü, thitü ma lovü thuoüji küsüra rü thi kümüneh müküzüküzü nüh proküveh kenüh.

²⁸Jükümjie nohri nga alievü nyiri nüh küngu vü thuoüji ngu künyitsa, thitü luoveh lovü thuoüji küthseküzü thi zanyokümüsü nüh nohri protse veh.

²⁹Khonyo küsosieri thi Farisiri, nohri küthseküsari, nohri tü amüngu kümüseri! Nohri tü setsaküthsüra rüku huotsetseti, thi künyitsara rüku saküzü tsetseti; jütisanü,

³⁰“hiri nga hiri lahnyiri tsotho vü kürho tüla jümari sie setsaküthsüri küfethewanyu nü,” ta satsetseti.

³¹Jütisanü nohri mpa nohri tü khana vü setsaküthsüri küfethera tsa ta sasati.

³²Thinü nohri nga nohri lahnyiri kümüjie saluo.

³³ Nohri amüreri, nohri arehji tsari, nohri tü mokümjie vünüh nyihsuozü kümnomnawa vünüh kari nti saveh lo?

³⁴Jükenüh halie, hi nüh setsaküthsüri thi Khonyo küsosieri nohri vü küze naveh; thi nohri tü jümari wuori fethe thi zeke naveh, thi nohri künazizheh vünüh wuori fe thi mari müküchie sanü wuori thuoüji küzhiluo anyunyu vü nga küze naveh.

³⁵ Jütisanü Abel künyitsahwa azüh vünüh wa Kükhuhrüzhe thi kükhuhrüpe masü azhie vünüh nohri nüh fethekümüwa Barakhia tsa Zekharia azüh küju azhih hala künyitsari aveh azüh tü nohri alü vü ru naveh.

³⁶Hi nüh nohri vü küzatohke naveh, zanyo jüri aveh khinyi kürhora nyi vü rukheh wie naveh.

³⁷Halie! Jerusalem, Jerusalem, setsaküthsüri küfethewa thi no vü küüzeri aloh nüh küvehwa, awi avüh nüh ma tsari ma küsa kükhu lovü küjizhuh kümüjie hi nüh küzakele nga no tsari jizhuh nti sa lo! Thitü nohri mpa nüh mamüthuoh.

³⁸ Halie nohri azheh tü küürütso münathuoh thi jamünathuoh.

³⁹ Küpakenühnyunü hi nüh nohri vü küza naveh, nohri nüh “VÜWA nyo vi nü kütsewa kümüngatsahwa ta müjie küphrahte küju nü nohri hi müngulerathuoh,” ti küza.