Read Pochuri Naga MATHI 24 Bible Online

MATHI 24 - Pochuri Naga bible

MATHI 24

¹Jüma sevü Jisu tü Kükhurüzhe vünüh shutetsethuoh ünü; ma sehnyiri tü ma vü ru nü Kükhurüzhe saküsa tsokrüri küjo ma kütsa.

²Thitü ma nüh mari vü, “Nohri tü zanyo hari ngu kheveh ünü nyu lo? Hi nüh nohri vü küzatohke naveh, aloh hari tü mükhaja nüh küsü nga khahkeluo nü müpehra,” ti küza.

³Jümasevü ma wa Olive küzhiho rügi vü pehveh ünü ma sehnyiri tü küüzhe vünüh ma vü ru taji, “Zanyo hari tü küsie sarunathuoh lo? Thi mothsoshi vi noh küru thi kürho sehkhe sana lo? jüma vi hiri vü küza luo,” ti khuo.

⁴Thinü Jisu nüh mari vü, nohri nyuri nüh nohri müküümüratümü nta küsa kenüh nohri riehzi peh luo.

⁵Küpakenühnyunü nyiri hozake eh nyo viru nü, “Hi tü Khrista wa wiethuoh,” ta sanü nyiri hozake müratewa na küveh kenüh.

⁶Jümpa mükünyu nohri arie küsa thi arie khielota sapehküveh zhühku küphrahte thsüra naveh; jüvü, nohri luoveh lalata müsanüh sana küsa müsheluo; küpakenühnyunü zanyo hari tü sawie naküveh kenüh, thitü jü nüh sehkhe nyu.

⁷Jütiküsavü akuoh küsü nüh akuoh küpawa münongü nüh sanaveh; thi kaji küsü nüh kaji küpawa münongü nüh sanaveh, thi luowie vü kümükhuojih sanaveh, thi mükhrüküüzhüh ru naveh.

⁸Thitü zanyo jüri aveh kümnomna pokhuri wie.

⁹ Jütiküsavü nyuri nüh nohri re nü kümnomna vü thse naveh, thi nohri fethe naveh; thi eh nyo kenüh akuoh aveh nüh nohri mürhü naveh.

¹⁰Jütiküsa vü nyiri hozake asevü tseketewa naveh, thi küsü nüh küsü retsü naveh, thi mürhüluo naveh.

¹¹Thi setsaküthsü küzhühja hozake shuru nü nyiri hozake müramü naveh.

¹²Thi khuoke kümüsü nüh küzhile kenüh küümze tü küjitewa naveh.

¹³ Thitü küzhike wa sehkhe küjuwa nüh külole naveh.

¹⁴Thi azhih aveh vü Kajipe Zhühthe Kümühiewa povü akuoh aveh vü küzawajuwie naveh, jüsevü nüh sehkhewa ru naveh.

¹⁵ Jükenüh Daniel setsaküthsüwa nüh khanavü küzaküsa zanyo sakümüne sheh na küsa mükümüshera akükre ru ape kümtsewa vü rupehküveh nohri nüh küngu vü

¹⁶jütiküsavü Judea vü küpehri tü zhü küzhiho vü tewaluo,

¹⁷ thi azheh rügi vü küpehri tü ma zanyo vi nti ma zheh lovü müküütule tümü luo;

¹⁸nyutü azhuh vü wa pehküvehri tü ma thsü vi nti shele müküühutümü luo.

¹⁹Thi jü tsotho vü atsakümori thi atsakünü küpehri tü münomüna sheh naveh.

²⁰Thi nohri zhüteküwa tü küsosa vü nyutü Sabbath, Judahri kümünyierülo vü müsanüh sana küsa kenüh kükhuo sa peh luo;

²¹ küpakenühnyunü jüma tsotho vü tü münomüna sheh nü azhih küsate vünüh ru khinyi küju, nyutü jüma asevü nga jükümjie müküsa saru na küveh kenüh.

²²Thi rülo jüri sakümülu mükütsü nü nyi küsü nga küülolewa müngura nüh samü naveh, thitü rükaküsari kenüh tsotho jüma sakümülu mütü naveh.

²³Jüvü nyuri nüh nohri vü, ‘halie, Khrista hala pehveh,’ nyutü, ‘tula pehveh,’ ta küzawie ketünga nohri jü mütsotü tümü luo.

²⁴Küpakenühnyunü akürie Khristari thi akürie setsaküthsüri shuru nü thsoshi küngo küürori thi küükrükükrari sanü nyiri kütsanaveh, jütisanü rüka küsari nga müra nü sietewa mühie veh.

²⁵Halie, hi nüh küütü vünüh nohri vü küzamüthuoh.

²⁶ Jükenüh nyuri nüh nohri vü, ‘halie, ma tü aküze vü pehveh’ ta wie ketünga müwatümü luo, halie, ma nü azheh lovü pehveh ta mari nüh küzawie ketünga jüma mütsotü tümü luo.

²⁷Küpakenühnyunü rünyiküshupe vünüh atso kürie thuoüji rünyikütupe wuovü nga wieküwa kümüjie, nyi Tsawa küru nga jükümjie sawie naküveh kenüh.

²⁸ Khiela aküsü kümo pehveh ünüh jüla tü aluomü nga pehwie naveh.

²⁹ Thitü kümnomna tsotho jüri asevü rünyi shita zotewa naveh, thi asah nga wiemütsü nüh sanathuoh, jümpa mükünyu awutsiri nga rügi vünüh kretewanathuoh;

³⁰ Jütiküsa vü rügi vünüh nyi Tsawa thsoshi sanü kütsanaveh, thi azhih vü akuoh aveh krietewa naveh, thi mari nyi Tsawa külu rügi vünüh kükhra thi kütholathovü sa sheh nü küturu ngu naveh.

³¹Jütiküsa vü ma nüh ma zhühleri küze nü atütü akhi khukümüsie shehke tsü nü mari nüh rügi wuochuwuo vünüh wa wuochuwuo vü küju ajühke müzü vünüh ma nüh rükaküsari phahzhu naveh.

³²Thi jihchuo rhuwa vünüh nohri mazhühnyo thsüluo, küsie nüh ma tsuonari vünüh awathe shizhuru naveh nüh küzhesa tetsethuoh ta küsa nohri nga thsülanathuoh;

³³jükümjie nohri nga zanyo jüri aveh küngura vü ma shehnyi vehthuoh; amükhie vü pehvehthuoh ta küsa thsüluo:

³⁴Hi nüh nohri vü küzatohke naveh, zanyo jümari aveh müjieküsaju nü khinyi kürho hamari kürawa nyu.

³⁵Thajüwu thi azhih thuoüji ramünaveh, thitü eh zhüri thuoüji mürarah wie.

³⁶Thitü jüma rülo thi tsotho tü eh Pa nüh küchie nüh rügi vü zhühleri nga nyutü Tsawa nga müthsü.

³⁷ Thi Noah tsotho vü kümüjie nyi Tsawa küruvü nga jüüta sawie naveh.

³⁸Küpakenühnyunü ajuhwa müjie zhiküru küju thi Noah juhie lovü müjie tekütu küju nü nyiri tü tsa; thi zhu, vüvüh vüpa sa thi vüvüh vüpa vitsü ti sawie.

³⁹ Jüti sanü ajuh jiru nü mari aveh müjie küürhothe küju nü mari tü müthsü nüh sa wie; nyi Tsawa küru vü nga jüüta sawie naveh.

⁴⁰Jüta küsa vü nyi künyi azhuh vü tsela naveh, masü nyi küsü sie tekuo naveh, thi nyi küsü jamü naveh,

⁴¹nyimzari künyi atsuoshü küpeh vü masü nyi küsü sie tekuo naveh, thi nyi küsü jamü naveh.

⁴²Jükenüh huopehlawie luo, küpakenühnyunü nohri VÜWA tü küsie ru naveh nüh nohri tü thsümüküveh kenüh.

⁴³ Thitü hama thsüluo, mükütüküzü azheh vüwa tü rüza bafe küzake vü kürühuri ru naveh nüh thsü thuoüji ma zheh tü fekhuo nü küütuwa nyu nü.

⁴⁴Jükenüh nohri nga küche mpehlaji mümühie, küpakenühnyunü nohri nüh müshe müküveh tsotho vünüh nyi Tsawa tü ru wie naküveh kenüh.

⁴⁵Tinü thawa nüh siepe küzhütsa thi arokümühiewa sanü ma vüwa nüh ma vi küjiwa küüsanü tsotho kheti küsa vü kütsaküzhu vi mari tsü üta sana lo?

⁴⁶Ma vüwa küru vü jükümjie sala nü künguwa nü kümüngatsahwa.

⁴⁷Hi nüh nohri vü küzatohke naveh, ma nüh siepe jüma tü ma zanyo aveh nyia küjiwa küüsanaveh.

⁴⁸Thitü siepe kümüsüwa thuoüji ma mpa ma luoveh lovü nüh, eh vüwa tü münü ru naveh,

⁴⁹ta sanü mari kürü siepe sapehküvehri fe, thi kümüshe shie tsa thi zhu ti sapeh thuoüji,

⁵⁰siepe jümawa vüwa tü ma nüh tsotü pehmüküveh rülo thi ma nüh müküthsü tsotho vü ru nü,

⁵¹ma renyarenya nü ma vi küthseküsari aza lovü thsemü naveh, jüla nüh krie thi aha hari nü peh naveh.