Read Pochuri Naga MATHI 25 Bible Online

MATHI 25 - Pochuri Naga bible

MATHI 25

¹ Jüsevü nga rügi kajipe thuoüji rülari türake anyihku vi nü kümünyutepawa siemütu nta küwa viküzhühiera naveh.

²Thi jüla mari münga thuoüji aro müthsü, thitü mari münga thuoüji aro mühie.

³Jütiküsavü aro müküthsüri tü mari nyihku küvi vü nyihjuh müvipheh nüh samü;

⁴thitü aro kümühie müngari thuoüji nyihjuh nga küütsa thi mari nyihku ti vi nü wa.

⁵Jütisanü kümünyutepawa münü ru ünü mari aveh küngu nü zehtewa.

⁶Thitü tsotüla vü zia taji, “Halie, kümünyutepawa tü tsethuoh, nohri ra nü ma mütu luo,” ti sa ru.

⁷Thinü rüla jümari aveh süra nü mari nyihkuri küche.

⁸Thinü aro müküthsüri nüh aro kümühieri vü, “Hiri nga nyihjuh tsü jie, küpakenühnyunü hiri nyihku tü kuonetewathuoh ünüh,” ti khuo.

⁹Thitü aro kümühieri nüh, “Jüüta thuoüji nohri nga hiri nga mütse nüh samü naveh, jükenüh nohri mpa wa nü küzhuri vünüh küsü nüh küümpha naveh,” ti küza.

¹⁰Jütiküsavü mari tü sü nti wa ünü kümünyutepawa tü teru nü kücheküsari sie nü kümünyute kütsazhu vü tewa; jütisanü mükhie kheketewa.

¹¹ Jümasevü nüh rüla mari münga nga ru nü, vüwa, vüwa, mükhie sanü hiri tsüjie, ti khuo.

¹²Thitü ma nüh, “Hi nüh nohri vü küzatohke naveh, hi nü nohri müthsü,” ti küza.

¹³Jükenüh nohri huopehwie luo, nohri tü ma rülo nyutü tsothowa müküthsü kenüh.

¹⁴ Jümpa mükünyu rügi Kajipe thuoüji nyi küsü nüh anyu lehküsuo küpa vü wa nti ma sieperi ji nü ma zanyori vi vü mari ke vü tsotü küsa kümüjie wiethuoh.

¹⁵Jütisanü mari papa küsara noh nü ame münga vi nyi küsü tsü, küpawa vü künyi, thi küpa küsüwa vü küsü vi ma tsü, jütisanü ma tü tsetewa.

¹⁶Jütiküsa vü ame münga künguwa tü müküzhikewiethuoh nüh viwa asü sanü ame azakütsa küpa münga nyiara.

¹⁷Thi jükümjie künyi küngurawa nga küpa künyi nyiara.

¹⁸Thitü küsü künguwa thuoüji wa azhih lovü chüke nü ma vüwa raka vi nü küthisamü.

¹⁹Thinü mari vüwa tü tsotho küsuo sevü nüh shele ru nü mari amewa mari sie kürüh nti sa.

²⁰Jütiküsavü ame münga künguwa tü ame münga küpa azakütsa vipheru nü, “Vüwa, noh nüh ame münga vi eh kevü thse, thi halie, hi nüh ame küpa münga nyiarathuoh,” ti küza.

²¹Thinü ma vüwa nüh ma vü, “Mühie shehthuoh, noh tü siepe kümühie künyitsa küsü; noh tü zanyo pike vü nga nyitsarathuoh, hi nüh noh zanyo hozake nyia vü küji küüsa naveh; noh vüwa vü ra nyi lozheluo,” ti küza.

²²Thi ame künyi küngurawa nga ru nü, “Vüwa, noh nüh ame künyi vi eh ke vü thse, thi halie, ame küpa künyi nyierathuoh,” ti küza.

²³Thinü ma vüwa nüh ma vü, “Mühieshehthuoh, noh tü siepe kümühie künyitsa küsü, noh tü zanyo pike vü nga nyitsarathuoh, hi nüh noh vi zanyo hozake nyia vü küji küüsanaveh, noh vüwa vü ra nyi lozheluo,” ti küza.

²⁴Thinü ame küsü künguwa nga ru nü, “Vüwa, noh tü anyi luoveh kükho nyi küsü, noh tü noh nüh mahtsü vüwa müküzhuhri vü nga mahwiewie ti, thi noh nüh we müküsari vü nga zhievü vü ti,

²⁵jükenüh hi tü krü nü noh nüh ame küsü kütsüwa viwa nü azhih lovü küthi sanü halie noh nüh kütsüwa tü,” ti küza.

²⁶Thinü ma vüwa nüh ma vü, noh khuke kümüsü küüchu siepewa, hi nüh mahtsü vüwa müküzhuhri vü mawiewie ti ta küsa, thi hi nüh we müküsari vü nga zhievü vü ti küza nti la?

²⁷Noh tü ame künari vü tsüküsaleh thi hi küru vü ame thi ma zahkütsa nga küngule nü.

²⁸Jükenüh ame ma ke vü pehküvehwa viwa nü ame türake viküvehwa tsümü luo.

²⁹ Küpakenühnyunü nyi küsüküsü nga aküpehwa thuoüji thsephe tsü naveh, thi ma tü hozake pehra naveh; thitü mükünyiewa vü thuoüji ma ke vü pike küpehri nga vitewa naveh.

³⁰ Thi siepe ame mükünyiewa alie aküzo vü shojamü luo, jüla nüh krie; thi aha hari peh naveh.

³¹ Thitü Nyi Tsawa küthohlathovü sanü rügizhühleri aveh sie nü ru naveh, thi jüvü ma tü ma kajipe küthohlathovü rügi vü peh naveh.

³²Thi ma tüvü akuoh aveh ru sehzhuh naveh, jüti sanü nyihzhükühuowa nüh nyihzhü aza vünüh nyihsü chithuohzhukümü kümüjie ma nüh mari küsü nüh küsü vünüh chithuoh küpamü naveh.

³³Jütisanü ma nüh nyihzhüri vi ma zhie wuovü küpeh naveh, thitü nyihsüri thuoüji vi ma zhu wuovü küzemü naveh.

³⁴Jütiküsa vü Kajiwa nüh ma zhie wuovü küpehri vü, raluo, eh Pa nüh tsia tsüküsari, azhih küsate vünüh nohri kenüh kücheküsari vü ra avü saluo.

³⁵Küpakenühnyunü hi rüma nü tse ünü ashie vi hi tsü, hi jühkürie nü tse ünü hi küzhu, hi tü küzehri satse ünü nohri nüh hi sieküzeh;

³⁶müsühsüh tse ünü nohri nüh athsü vi kümphie; hi na zehveh ünü nohri nüh hi roza, hi tü küsi satse ünü nohri nüh hi vü ru.

³⁷Jütiküsa vü künyitsari nüh ma vü, “VÜWA, hiri tü küsie noh rüma kütse ngu nü ashie vi noh tsü lo? Nyutü no juhkürie kütse ngu nü ajuh vi no tsü küüzhu lo?

³⁸Thi hiri tü küsie noh aküzeh sakütse ngu nü noh sie küzeh lo? Nyutü noh müsühsüh kütse ngu nü athsü vi noh kümphie lo?

³⁹Thi hiri küsie noh na zehla nü noh roza lo? Thi küsi sala nü noh vü ru lo?” ti sanaveh.

⁴⁰Jütiküsa vü Kajiwa nüh hakümjie rüle naveh, “Hi nüh nohri vü küzatohke naveh, nohri nüh anyi küriepetsa hamari vü sakütsü tü hi vü sakütsü kümüjie wiethuoh,” ta küza naveh.

⁴¹Jütisanü ma nüh ma zhu wuovü küpehri vü, “Nohri müzükümüri, hi vünüh kietuo Tsuore thi ma sehnyiri kenüh kücheküsa küsuokürho nyihsuozü vü tewaluo.

⁴²Küpakenühnyunü hi rüma kütse vü zanyoküsü nga vi hi mükütsa; hi juhkürie kütsevü pike nga juh vi hi müküzhu;

⁴³hi küzehri sakütse vü nohri tü hi sie müküzeh; müsühsüh tse ünü athsü vi hi müküümphie, hi tü na; thi küsi satsewie ketünga ru hi müno,” ta küza naveh.

⁴⁴“Jütiküsa vü mari nga rüle naveh, VÜWA, noh tü küsie rüma, thi kürie tse taji thi aküzeh sakütse; thi rütso kütse thi nazeh küveh thi küsi saküveh ngu nü hiri tü noh müno nüh samüthuoh lo?” ta sanaveh.

⁴⁵Jütiküsa vü, ma nüh mari vü rüle nü, “Hi nüh nohri vü küzatohke naveh, nohri nüh hamari azhie vü küzahtsahwa vü müküsa kümüjie hi vü nga müsawiethuoh” ti sa naveh.

⁴⁶ Thi mari thuoüji küsuokürho kümnomna pe vü tewanathuoh, thitü künyitsari thuoüji küsuokürho ape vü tewa nathuoh, ti küza.