Read Pochuri Naga MATHI 26 Bible Online

MATHI 26 - Pochuri Naga bible

MATHI 26

¹Thinü Jisu nüh azhü jüri aveh küzaju kümüse vü ma nüh ma sehnyiri vü,

² “Rülo künyi se vü tsekükari akhu kükhu na saküveh nohri nga thsülanathuoh, thi jüma tsotho vü Nyi Tsawa vi khieluothso rügi vünüh zekemü üta retsümunathuoh,” ti küza.

³Jütiküsa vü levü küjiri thi nyiri azhie vü kükhruori wa nü Kaifa ti küsa Levü Kümüsiewa zheh vünüh sehzhuh nü,

⁴Jisu re nü fethe na küsa kenüh kürüchie.

⁵Thitü mari nüh, “Akhu tsotho vü küsawa nyu, nyiri azhie vü küüjakünya shuteküru kükrü kenüh,” ti sa.

⁶Thinü Jisu tü Bethani vü Simon wupiekünawa zheh vü wa pehküveh vü.

⁷ Nyimzari küsü vüjuh ame kükhra tsahtsah ku küsü vi ma vü ru nü ma tsazhu küpeh vü ma lü rügi vü züketsü.

⁸Thitü ma sehnyiri nüh jü nokürüpa taji, “Mokenüh zanyo ha zorie veh lo?

⁹Zanyo hatü ame hozake nüh zhu nü kümükhuori tsüra na nü,” ti küza.

¹⁰Thitü Jisu nüh jü thsü tajinü mari vü, nohri mokenüh nyimza hama saküjakünya veh lo? Ma tü hi vü zanyo kümühie satsüveh nü.

¹¹ Küpakenühnyunü kümükhuori thuoüji nohri siepeh huo veh; thitü hi nü nohri sieküpehuowa nyu.

¹²Ma nüh vüjuh eh satsa vü küzüke hatü hi küchowu kenüh küche na küsawie.

¹³Hi nüh nohri vü küzatohke naveh, khiekhiela zhühlekümühie hama azhih aveh vü phrahte naveh nüh nyimza hama kürho müshe naküsa kenüh ma nüh küsa hama nga vi nü küza naveh.

¹⁴Jütiküsa vü türakünyiri azhie vünüh nyi küsü Iskariot Judas ti küsawa nüh levü küjiri vü wa nü;

¹⁵ “Nohri mowa vi hi tsü naveh lo hi nüh ma re nohri ke vü thse thuoüji,” ti küna. Thinü mari nüh raka cherake chie nü ma tsü.

¹⁶Thi jü rülo vünüh tu vü ma tü Jisu re nü mari tsü nti lehkuji phah.

¹⁷Jüsevü ahzhi müthse nüh lohse kütsa khu rülo apowa vü ma sehnyiri Jisu vü ru nü, “Noh tü hiri khiela nüh tsekükari ashie küche nü noh küütsa noh kümüshe lo?” ti küna.

¹⁸Thinü ma nüh, nohri nyuküji vü wa nü nyi küsü vü, “Küsosiewa nüh e tsotho jumthuoh ünüh hi tü e sehnyiri sie noh zheh vünüh tsekükari khu kükhu nta lie ti küza luo,” ti küza.

¹⁹Thinü sehnyiri tü wa nü Jisu nüh mari vü küüza kümüjie sa, jütisanü tsekükari kenüh kütsaküzhuwa küche.

²⁰Jütisanü arüza teru ünü ma sehnyi türakünyiri sie shupe nü ashietsa,

²¹thinü mari ashie tsapehküveh vü ma nüh, “Hi nüh nohri vü küzatohke naveh, nohri nyi küsü nüh hi retsü naveh,” ti küza.

²²Thinü mari tü lorü sheh taji, VÜWA, jütü hi ülo? hi ülo? ti sa khe.

²³ Thinü ma nüh, “Nyi küsü hi sie akhu küsü lovü nüh kürüwietsa küvehwa nüh hi retsü naveh,” ti küza.

²⁴Nyi Tsawa thuoüji ma zhühku rhüküsa kümüjie tewa na savehthuoh; thitü Nyi Tsawa rekütsüwa nü amüngu kümüseri! anyi jüma tü azhih hala wuo müküruwa nüh ma kenüh küümpha naveh, ti küza.

²⁵Jütiküsa vü ma retsü na küsawa Judas nüh ma vü, küsosiewa jümatü hi ülo? ti küna. Thinü ma nüh ma vü “ah wiethuoh,” ti küza.

²⁶Thi mari ashietsapehküveh vünüh Jisu nüh lohse vi nü tsia jüma nyia vü thse taji zokhuo nü vi ma sehnyiri tsü taji, “Vi nü tsaluo; hamaha eh satsa wiethuoh,” ti küza.

²⁷Jüma sevü ma nüh ahuowa nga vi taji tsia jüma nyia vü thse nü vi mari vü tsü taji, “Nohri aveh hama vi zhu luo;

²⁸ küpakenühnyunü hama tü nyiri hozake kükhiemuo noja na küsa kenüh liküru kütsathuoh e zühwa wie thuoh.

²⁹Thitü hi nüh nohri vü küza naveh, hi eh Pa Kajipe vünüh rhelivijuh kürüthe müjie küzhu sevü nü hi tü nosü nüh tuvü rhelivi thso hama vünüh müzhu lethuoh,” ti küza.

³⁰Jütisanü mari aza küsü riehi nü Olive küzhiho vü tewa.

³¹ Thinü Jisu nüh mari vü, süta vü nohri aveh hi jamü tajinü zhütewa khe naveh, küpakenühnyunü zhütsazhü vü rhü küsa, “Hi nüh nyihzhükühuowa fethemü naveh, thi nyihzhüri tü vorietewa naveh,” ta küza saveh.

³² Thitü hi rhosheletesüra thuoüji nohri atüvü nüh hi tü Galilee vü tewa naveh, ti küza.

³³Thinü Pitor nüh ma vü, “Mari aveh nüh no jamü nü tewa wieketünga hi nü no küjawa nyu,” ti küza.

³⁴Thinü Jisu nüh ma vü, “Hi nüh noh vü küzatohke naveh, süta vü awi müjie kükhu atüvü noh küche keri hi kürü naveh,” ti küza.

³⁵Thinü Pitor nüh ma vü, “Hi noh sie küüsü nta wie ketünga hi nüh noh küürüwa nyu,” ti küza le. Thinü ma sekünyiri aveh nga jüüti phrahte khe.

³⁶Jüsevü Jisu tü mari sie nü Gethsemane ti küsa azhie küsü vü wa nü ma nüh ma sehnyiri vü, “Hi wa tula nüh kükhuo sapehküveh vü nohri hala pehla luo,” ti küza.

³⁷Jütisanü ma tü Pitor thi Zebedee tsa künyi sie wa nü ma lorü sheh thi ma luoveh küraküpre sheh.

³⁸Jütiküsa vü ma nüh mari vü, “Eh luoveh küraküpre taji sü nta savehthuoh, nohri hala peh nü hi huo pehla luo,” ti küza.

³⁹Jütisanü ma tü pike tsekewa nü ma nyia azhih vü lowe ünü kükhuo sataji, “Eh Pa, sara naveh üji ahuo hama tü hi küüthoriemümo; thitü eh müshe kümüjie vünüh nyu nü noh mpa noh müshe saluo,” ti küza.

⁴⁰Jütisanü ma tü shele ma sehnyiri vü ru ünü mari zehküpehla ngu nü ma nüh Pitor vü, “Khielo, nohri münühu küsü nga hi huompehrawiethuoh ülo?

⁴¹Nohri kümüjimüra vü mütu nüh sana küsa kenüh zipeh luo thi kükhuo sa peh luo, sietse vü thuoüji sangü shehke pehveh thitü satsa wuovü thuoüji küchu pehveh,” ti küza.

⁴²Jütisanü ma tü akünyiawa nga tsewa le kükhuo sataji, “Eh Pa, hi tü hama müzhu nüh mükulerawie thuoüji noh mpa noh müshe saluo,” ti küza le.

⁴³Jütisanü ma tü shele ru ünü mari zehküpehla ngu le hü, küpakenühnyunü mari notha tü mükora nüh rühveh kümü kenüh.

⁴⁴Jütisanü ma tü kücheawa mari jamü tajinü wa shientü kümüjie kükhuo sa le hü.

⁴⁵Jüsevü ma tü ma sehnyiri vü ru nü mari vü, “Khinyi nü nohri zeh thi münyie luo; halie, tsotho jumthuoh, thi Nyi Tsawa tü re nü kükhiemuora ke vü thsemüna savehthuoh!

⁴⁶Süraluo, hiri tewaluo nüh, hi re nü nyurake vü thsemüna küsawa shehnyi müthuoh,” ti küza.

⁴⁷Thinü ma azhüküza pehküveh vünüh, halie, türakünyiri azhie vünüh nyi küsü Judas nüh levü küjiri thi kükhruori vünüh anyuchuwa thi athsofe küviri anyi shieji küsü sie nü ru.

⁴⁸Jümatü vü ma re nü nyura kevü thsemü na küsa thsoshi küsü sa mari kütsanü, “Hi nüh thawa kümetsü naveh nüh jüma wiethuoh nüh ma re luo,” ti küza.

⁴⁹Jütisanü ma shita Jisu vü ru nü, “Kümühiewa saluo Küsosiewa,” ti küza nü ma kümetsü.

⁵⁰Thinü Jisu nüh ma vü, “Eh füwa, noh tü mokenüh hala tse lo? Noh nüh sa nti kütsewa sawie luo,” ti küza. Thinü mari tü mari ke thsuoru nü Jisu shoh thi rete.

⁵¹Thi halie, Jisu se nyikütseri küsü nüh ma ke vitu ma nyusuowa shozhuru nü vi Levü Kümüsiewa siepe müwie ünü ma khüna taja mütü.

⁵²Jütiküsa vü Jisu nüh ma vü, “Noh nyusuowa vi ma küthseku lovü thsemü luo, küpakenühnyunü anyusuowa küviri aveh thuoüji anyusuowa vünüh kümiewie naküveh kenüh.

⁵³Noh kümüshe vü hi nüh eh Pa vü khuo thuoüji ma nüh khinyi wienga rügizhühleri anyie türakünyi nyia vü nga müküzera ti müsheveh ülo?

⁵⁴Jüta sa nta thuoüji khiela nüh Zhütsazhüri tü sajura na lo?” ti küza.

⁵⁵ Jütiküsa vü Jisu nüh anyi riekhuowa vü, “Nohri tü rühukütsari küre kümüjie anyusuowa thi athsofe vi nü hi re nti tse la? Hi nüh rülotsotho Kükhurüzhe lovü peh nü nyuri sosie pehwie ketünga jü vünü nohri tü hi müre.

⁵⁶Thitü Zhütsazhüri setsaküthsüri nüh rhüke küsari ju na küsa kenüh hakümjie küsa kheh wie,” ti küza. Thinü ma sehnyiri aveh tü ma jamü tajinü zhütewa khe.

⁵⁷Thi Jisu rekütseri tü Jisu re Levü Kümüsiewa Kaifa azheh vü tewa; jüla tü Khonyo küsosieri thi kükhruori wa sehzhuh pehlakhe.

⁵⁸Thinü Pitor tü ma mphakewiethuoh nüh ma se nyi müzhehwa Levü Kümüsiewa nyula vü ju, jüütisanü mowa sanaveh nüh ti no nti tu ariekühuori vü nyipeh.

⁵⁹Jütiküsa vü levü küjiri thi kümühu aveh nüh Jisu küfethe lehkhuji müküle povü hozake phah,

⁶⁰thi küzhühja povü hozake ruthuoh tü azhü kükato küsü nga mphahra nüh samü. Ase vünüh nyi künyi rutajinü,

⁶¹ “Nyi hamatü khana, ‘hi nüh Saküüwuowa Kükhurüzhewa phrümü tajinü rülo küche vünüh sa lera naveh’ ta küza lie,” ti küza.

⁶²Thinü Levü Kümüsiewa nüh süra tsie nü ma vü, “Noh tü zhühnyo küsü nga rületsü nti samüvehwiethuoh ülo? Hamari nüh mowa küza nü no müte veh lo?” ti küza.

⁶³Thitü Jisu tü zoti pehtewa. Thinü Levü Kümüsiewa nüh ma vü, “Hi nüh rhopeh huoküvehwa Saküüwuowa nyo vü nüh no küüshie nü küza naveh, noh tü Saküüwuowa Tsa Khrista ünü nyu? Vi hiri vü küza luo,” ti khuo.

⁶⁴ Thinü Jisu nüh ma vü, “Noh nüh küüza kümüjie wiethuoh, thitü hi nüh nohri vü küzatohke naveh, thuohtüvü nohri Nyi Tsawa Kükhrawa zhie wuovü küpeh thi rügivü külu rügi vünüh küru ngu naveh,” ti rületsü.

⁶⁵ Thinü Levü Kümüsiewa nüh ma thsümünyi zokhri nü, “Ma tü Saküüwuowa küüjo zhü phrahtemüthuoh; hiri tü povü küpa phah le mowa sanathuoh lo? Halie, nohri mpa nga ma nüh Saküüwuowa küüjo zhü thsürathuoh nü.

⁶⁶Nohri tü mowa müshe veh lo?” ti küna.

⁶⁷ Thinü mari tü ma nyia vü mütse müshüke nü ake shekürülo nü ma toh, thi wuori nüh amüza nüh ma je nü,

⁶⁸ma vü, “Messiah, thawa nüh no fe nüh setsaküthsüzhü vünüh hiri vü küza luo,” ti küza.

⁶⁹Jütiküsavü Pitor tü nyula vü pehveh ünü rülari küsü ma vü ru nü, “Noh nga Galilee wa Jisu sietse ah,” ti küna.

⁷⁰Thitü ma nüh mari avehveh atüvü nüh nyu ti sanü, “Hi nü noh zhü müthsü,” ti küza.

⁷¹Jütisanü ma tü tse awiepa vü khru ünü rüla küpa küsü nüh ma ngu nü jüla kütsieri vü, “Nyi hama nga khanavü Jisu Nazareth sietsewie,” ti küza.

⁷²Thitü ma nüh nyuwie ti sanü küshie taji, “Hi nü nyi jüma müthsü,” ti küza.

⁷³Jüsevü nga jüla tsieküveh wuori ru nü Pitor vü, “Noh nga anyi jüma refü küsütsahwiethuoh, noh zhü vünüh thsüramüwiethuoh,” ti küza.

⁷⁴Thinü ma tü küshiephokewie tajinü, “Hi nü anyi jüma müthsüwie,” ti küza le. Jütiküsa vü müküzhikewiethuoh nü awi khuteru.

⁷⁵Jüsevünüh Pitor tü Jisu nüh ma vü, noh awi kükhu atüvü küchekeri hi kürü naveh ti küsa azhüwa müshekera. Jütiküsa vü ma tü anyula vü wa nü khielo ti krie.