Read Pochuri Naga MATHI 28 Bible Online

MATHI 28 - Pochuri Naga bible

MATHI 28

¹Sabbath ti küji Judahri kümünyie rülo jumü taji Jüasekhe rülo saluo nta küsa ashu vü Magdalene Maria thi Maria küpavühwa masü rüku no nti ru;

²thinü halie, mükhrü khieloti küzhüh, küpakenühnyunü VÜWA zhühleri küsü rügi vünüh turu nü alohwa khaküprimü tajinü wa jü rügi vü pehteküwa kenüh.

³Ma tso tü atsorie kümüjie, thi ma thsümünyi tü amüra kümüji kümüjie müji.

⁴Thi ma kükrü kenüh rüku kühuori tü khekhe ti küshü nü aküsüri kümüjie satewa.

⁵Thitü rügizhülewa nüh nyimzari vü, “Nohri mükrütümü luo, nohri nyi küsü khieluothso rügivünüh zekekümüwa Jisu phakütse hi nüh thsüvehthuoh.

⁶Ma tü hala pehmüvehthuoh, küpakenühnyunü khana küüza kümüjie ma rhoshele tewathuoh. Ra nü VÜWA khiela küzehünü noluo.

⁷Thi shita wa nü ma sehnyiri vü ma nü aküsü vünüh rhosüra tewathuoh nüh ti küza luo, thi halie ma tü nohri atü vünüh Galilee vü tewathuoh nüh, halie, hi nüh nohri vü küza veh, nohri jüla nüh ma mütu naveh,” ti küza.

⁸Jüti satajinü mari tü krü thi khieloti lozhe nü shishiti rüku vünüh zhüwa nü ma sehnyiri vü küza nti tewa.

⁹Jütisanü ma sehnyiri vü küza nti wa ünü halie, Jisu tü mari mütu nü, “Kümühiewa saluo,” ti küza! Thinü mari tü ru nü ma jih kheke nü ma khuhrü.

¹⁰Thinü Jisu nüh mari vü, “Mükrütümü luo, wa nü ehnüri tü Galilee vü ru üti küza luo, mari jüla nüh hi siemütura naveh nüh,” ti küza.

¹¹Jütisa taji mari tü kuotsewa ünü halie, momo kümüjie sathuoh ünüh rüku kühuo wuori tü nyuküjiwa vü wa nü levü küjiri vü küza kheh.

¹²Thi mari tü wa nü kükhruori sie sehzhuh nü kürüchie taji mari nüh raka hozake vi nü arienyiri tsü taji,

¹³“Hiri zehküveh vünüh ma sehnyiri nüh ru ma kümo wa rüza vünüh rühutewathuoh ti küza luo,

¹⁴thi azhü hama Kümükhrüwa nüh thsü tewa thuoüji nohri müküümünomüna nah küsa kenüh hiri mpa ma jüle naveh,” ti küza.

¹⁵Thi mari tü raka vi nü mari vü küüza kümüjie sa; thi zhühku hama tü khinyi küju nga Judahri azhie vü küzanyuo tsewie.

¹⁶ Jütisanü sehnyi türaluokeri tü Jisu nüh mari vü küüza kümüjie Galilee vü küzhiho rügi vü tewa.

¹⁷Thinü mari tü ma ngu ünü ma khurü khe, thitü wuori thuoüji mütsotü nüh sa.

¹⁸Thinü Jisu nüh mari vü, “Kükhra aveh, thajüwu vü nga satü azhih vü nga satü hi vü tsükhehmüthuoh.

¹⁹Jükenüh wa nü akuoh aveh eh sehnyi küüsaluo, Pawa thi Tsawa thi Kümtse Sietsewa nyo vünüh baptis küüsaluo.

²⁰Hi nüh nohri vü momowa küza nüh vi mari vü sosietsü nü mari küümüzhe luo; thi halie, hi nüh nohri sietsehuowie naveh, tsotho sehkhe küju sietsewie naveh,” ti küza.