Read Pochuri Naga MATHI 3 Bible Online

MATHI 3 - Pochuri Naga bible

MATHI 3

¹Jütiküsa tsothovü Johan Baptistwa tü ru nü Judea reza vünüh nyuri sosie tajinü,

² “Nohri luoveh khaphrü luo, rügi kajipewa tü shenyi kümüthuoh kenüh,” ti küza

³ Küpakenühnyunü khanavü Isaya setsaküthsüwa nüh, Reza vünüh nyi küsü azhü zie nü, “Nohri VÜWA lekhuji küche luo, ma lekhujiri küche luo, ta küza küsa kenüh,” ti küza.

⁴ Thi Johan jüma tü ut küneh vi nü ma thsümünyi sa, thi asahu nüh ma kütsekevüh sa, thi ma shie thuoüji ashukrie thi awejuh nüh vi sa.

⁵Jüti küsavü Jerusalem vünüh thi Judea aveh vünüh thi Jordan rügu natonahuo aveh vünüh anyiri ma vü ru khe;

⁶jütisanü mari tü mari mpa mari kükhiemuo phrazhu taji nü Jordan rügu vünüh ma ke vünüh baptis sa.

⁷ Thitü ma nüh Farisiri thi Sadusiri hozake ajuvü nta küru ngu nü mari vü, nohri amüre areji akuori, thuohtüvü VÜWA vünüh arüküshu runa saküvehwa vünüh tsekaritewaluo ta thawa nüh nohri vü akükrü zhü tsü lo?

⁸Jükenüh luoveh khaphrümüthuoh ta küsa küthsüra aviwa pe luo.

⁹ Thi Abraham thuoüji hiri pawa ti küsa nohri azhie vünüh phrateluo tajinü nohri müküle noküjara lekhuji mphatümü, hi nüh nohri vü küza naveh, nohri Saküüwuowa nüh aloh hamari vünüh nga kümüwumüra sanü Abraham tsüra naveh.

¹⁰ Thi khinyi wienga amüvüwa tü athsotütsori vü pewieveh, jükenüh athso küsüküsü nga avi kümühie müküperi nü müjethuoh taji nü mürhühzhu nü anyih lovü thsemü naveh.

¹¹Hi thuoüji nü nohri luoveh khaphrümüthuoh ta küsa thsü naküsa kenüh aju vünüh nohri baptis saveh, thitü eh se vü kütsewa thuoüji eh nyie vünüh ji, thi hi nü ma jiküükruvüh nga müvitse, ma thuoüji Kümtse Sietse vünüh thi anyih vünüh nohri baptis sanaveh.

¹²Ma ke vü alahe peveh, thi jüma vi nü ma tsuo hekümtse naveh, thi jüti sanü ma tsuo atsari thuoüji vi nü ma luo lovü thse naveh, thitü aguri thuoüji vi mükünera anyih lovü thse nü tsomü naveh.

¹³Jütiküsavü Jisu tü Johan ake vünüh baptis nti Galilee vünüh tse Jordan rügu vü ru.

¹⁴Thitü Johan tü ma kheh taji nü, “Hi tü no ke vünüh juküvülewie nü noh tü mokenüh hi vü tse lo?” ti küza.

¹⁵Thitü Jisu nüh ma vü, “Nosü hama kenüh thuoüji jüti sala luo, küpakenühnyunü hiri tü künyitsa küüro aveh küüsaju nta küze küsathuoh kenüh,” ti küza. Thinü Johan nga satsüluo nti küza.

¹⁶Thinü Jisu tü baptis sataji müküzhikewiethuoh nüh aju lo vünüh shiti alie vü shutewa, thinü halie, thajüwu saphie taji ma tsü, thi jütiküsavü, Saküüwuowa Sietse mükhrietü kümüjie küsa turu ma vü küpeh ma nüh ngu, thi ma rügivü aküwie turu;

¹⁷ thinü halie, rügi vünüh ajikhi küsü, “Hama ha eh Tsa hi nüh küümzetsawa, hi nüh ma ngu nü loküzhetsawa wiethuoh,” ti küza.