Read Pochuri Naga MATHI 5 Bible Online

MATHI 5 - Pochuri Naga bible

MATHI 5

¹Jisu tü anyi shiejiwa ngu tajinü küzhiho rügi vü tewa. Thinü ma wa shupeveh ünü ma sehnyiri ma vü ru.

²Thi ma po poka taji mari küsosie hakümjie:

³Sietse kenüh küthotsari thuoüji kümünga[4] tsahri, küpakenühnyunü rügi kajipe thuoüji jümara zhi küsa kenüh.

⁴ Thari nüh lorü tse nüh, kümüngatsahri, küpakenühnyunü jümari tü luoveh rüzi wienaküveh kenüh.

⁵ Azhükünyiri[5] thuoüji kümüngatsahri, küpakenühnyunü azhih vi mari azhi sanaküveh kenüh.

⁶ Künyitsa kürho küpha kenüh rüma kürie kütseri kümüngatsahri, küpakenühnyunü jümari tü müwawiena küveh kenüh.

⁷Küümüze küperi thuoüji kümüngatsari, küpakenühnyunü mari tü küümze nguwiena küveh kenüh.

⁸ Luoveh kümtseri thuoüji kümüngatsahri, küpakenühnyunü mari tü Saküüwuowa nguwie naküveh kenüh.

⁹“Nyiri sakütsarü kütseri kümüngatsahri, küpakenühnyunü mari tü Saküüwuowa tsari ta jinaküveh kenüh.

¹⁰“Künyitsa kürho kenüh nyuri nüh kümnomna tsüküvehri kümüngatsahri, küpakenühnyunü rügi kajipe thuoüji ma zhiri küsa kenüh.

¹¹ “Eh kenüh nyiri nüh nohri vü azhükümüsü phra thi nohri vü kümnomna tsü thi rie taji nohri vü kümüsü müküzüküzü sa thuoüji, nohri kümüngatsahri wiethuoh.

¹² Nohri lozheluo thi alo wie she luo, küpakenühnyunü rügi vü nohri jisuowa ji she na küveh kenüh.” Thi jükümjie nyiri nüh khana nohri atüvü küru setsaküthsüriwie nga kümnomna kütsü kenüh.

¹³ Nohri tü azhih mütsüwa wiethuoh, thitü mütsü wienga ma küshe münyie thuoüji mowa vi nü saküshe le na lo? Jütathuoüji zanyoküsü vü nga kümühie münyiethuoh nüh viwa jamü taji nü nyiri nüh ajinyi[6] sakümüwiethuoh.

¹⁴ Nohri tü azhih küwiewa wiethuoh. Küzhiho rügi vü anyuküji sakütoke küsa tü piketü müküthira.

¹⁵ Jümpa mükünyu anyiri nüh anyihku tso taji nü azekhu lovü samüveh, thitü vi alati rügi vü saveh, jüta thuoüji azhelovü küperi aveh wieke raveh.

¹⁶ Nohri küwiewa nyiri vü wieketüluo, jüta thuoüji nyuri nüh no küürori kümühie ngu naveh, thi nohri Pa rügivü küpewa saküthola tsüra naveh.

¹⁷Nohri hi tü Mosa Wuleri thi setsaküthsüzhüri zoriena tseveh ti küsa mümüshetümü luo, hi nü jümari zorie nti küsanyunü sajutsü nti küru wie.

¹⁸ Hi nüh nohri vü küzatoke naveh, azhih thi thajüwu müjie küra küju nü thi azhüri müjie küsaju küju nü Wule vünüh lasi khuh küzatsa nyutü kütüke küsü nga piketü mükümiera.

¹⁹Jükenüh anyi küsüküsü nga azhü tsüküsa azhia nüh küzah küsü phrürie taji nyiri sosie thuoüji rügi kajipe vü ma nüh küzatsawa sanaveh: thitü anyi küsüküsü nga azhü jüri sanü müzhe thi vi nyiri sosie ti sathuoüji ma tü rügi kajipe vü ma nüh küjiwa ta ji naveh.

²⁰Küpakenühnyunü hi nüh nohri vü küza naveh; nohri künyitsa thuoüji khonyo küsosieri thi Farisiri anyia vünüh mümühie thuoüji nohri zanyoküsü nga sataji rügi kajipe lovü mütura.

²¹ Noh nyiri küfethevühnyu; thi anyi küsüküsü nga nyiri fethe thuoüji ashih küsavü kükrü peveh ta küsa khana atükhuri vü küza küsa nohri künarathuoh tünü?

²²Thitü hi nüh nohri vü küza naveh, anyi küsüküsü nga ma jie ma nüri vü zhünyo münyie nüh arüshu thuoüji ashi küsa vü kükrü peveh; thi anyi küsüküsü nga ma jie ma nüri vü müküchie sanü no momaküsawa ta saküzükrü thuoüji müza kümühu atüvü akükrü peveh, thi anyi küsüküsü nga ma vü noh küzhewa ta phra thuoüji nyihsuozü vünüh kümnomna küngu krü.

²³Jükenüh noh nüh kükhurüpe vü zanyo kütsü vi küru vü, noh jie noh nü nüh noh vü lomüküra peküveh müshekeraji,

²⁴noh nüh khurü nta zanyo vikütseri kükhurüpe atüvü samüla tajinü wa noh jie noh nü sie kürü mühierachi nüh jüsevü nüh ru nü vi khurü luo.

²⁵Noh lekhuji vünüh noh lü vü müküle phaküvehwa sie shiti kürü mühiemü luo; jüta nyuthuoüji noh mükülephaküvehwa nüh noh re nü ashihküsawa ake vü thsemü naveh, thi ashih küsawa nüh noh re nü ashihküsa küjiwa vü tsümü naveh, thi ma nüh noh vi küsizhe lovü thsemü naveh.

²⁶Hi nüh noh vü küzatoke naveh, noh nüh pesa vi nü müküthuoh asevü nü piketü noh tü jüla nüh shumürura nüh samü naveh.

²⁷ Noh küüphroküphrie küsavühnyu ta küsa khanavü kürhokhuri vünüh küza küsa thsüvehthuoh tünü?

²⁸Thitü hi nüh nohri vü küza naveh, anyi küsüküsü nga kümüngu vünüh nyimzari no thuoüjinü ma luoveh lo vünüh ma sie küüphroküphrie samüwiethuoh.

²⁹ Jümpa nyunü noh notha azhie wuo vünüh no sakükhiemuo mü thuoüji noh vünüh jüma tü khrüzhujamü luo, küpakenühnyunü jüma nüh noh satsa aveh sie nyihsuozü vü wa na küsanü noh satsa vü mahnyo küsü kümiekümü nüh küünyie khe.

³⁰ Thi jümpa mükünyu noh ke azhie wuo vünüh no sakükhiemuomü thuoüji noh vünüh jüma tü tethuohmü luo, küpakenühnyunü jüma nüh noh satsa aveh nyihsuozü vü sie wa naküsanü noh satsa vü mahnyo küsü kümie kümü nüh küünyiekhe.

³¹ Thi anyi küsüküsü nga ma vüvüh jamü nta thuoüji, ma jakümü lasi küsü rhü ma tsümü luo ta küsanga küzake saveh.

³² Thitü hi nüh nohri vü küza naveh, anyi küsüküsü nga küüphroküphrie küüro vünüh ma vüvüh jamü thuoüji ma tü küüphroküphrievühri wiethuoh, thi anyi thawa nüh jüma vinaveh nüh ma nga küüphroküphrieri wiethuoh.

³³ Jüsevü nga, noh rie taji müküshie tümü luo, thitü noh nüh VÜWA vü mowa phrazhu saveh nüh jüma saluo ta khana kürhokhuri vü küzake küsa künarathuoh tünü.

³⁴ Thitü hi nüh nohri vü küza naveh, zanyoküsü nga vi müküshie tümü luo, thajüwu nga vi nü müküshie tümü, küpakenühnyunü jütü Saküüwuowa kajipe küsa kenüh.

³⁵ Nyutü azhih nga vi müküshie tümü, küpakenühnyunü jüma tü ma jinyipe küsa kenüh, nyütü Jerusalem nga vi müküshie tümü, küpakenühnyunü jüma tü Kaji küjiwa anyuküjiwa küsa kenüh.

³⁶Jümpa nyunü noh lü nga vi nü müküshie tümü, küpakenühnyunü noh tü alüshe küsü nga sakümüji nyutü samüküünyira kenüh.

³⁷Thitü noh zhü ah üji ah nyuji nyu ti saluo, küpakenühnyunü jüma anyia vünüh küluotewa thuoüji kümüsüwa vünüh küruthuoh kenüh.

³⁸ Khana kürhokhuri vü thuoüji notha küsü nüh notha küsü, thi aha küsü nüh aha küsü, ta rhüküsa nohri thsürathuoh.

³⁹Thitü hi nüh nohri vü küza naveh, nohri tü müküle küsari müthoh müsa tümü, thitü jüta nyunü anyi küsüküsü nga anyi wuori nüh no nakie azhie wuo vü je thuoüji kürele wuochuwuovü nga tsüluo.

⁴⁰Thi anyi wuori nüh noh satsaküüzhuvüh küvingü vünüh noh sie ashih küsavü wa thuoüji noh thsü nga phre ma tsümü luo.

⁴¹Thi anyi wuori nüh wurie taji noh sie mile küsü wa nta thuoüji ma sie nü mile künyi nga waluo.

⁴²Nyuri nüh noh vü zanyo khuo thuoüji tsüluo, thi nyuri nüh noh vünüh zanyo na nta thuoüji mükule tümü luo.

⁴³Noh zhephruri kümüze luo, thi noh mükünongüri mürhü luo ta khana küzake küsa künarathuoh tünü.

⁴⁴Thitü hi nüh nohri vü küza naveh, noh mükünongüri kümüze luo, thi noh sakümnomna küvehri kenüh kükhuo saluo.

⁴⁵Jüta thuoüji rügivü küpeh nohri Pa atsari sara naveh; küpakenühnyunü ma nüh kümüsüri vü nga thi kümühieri vü nga rünyi kuoke tsüküveh kenüh, thi ma nüh tsorü künyitsari vü nga thi mükünyitsari vü nga tsüküveh kenüh.

⁴⁶Hakümjie müsanüh noh küümzeri mpa kümüze thuoüji nohri mojisuowa ngu na lo?

⁴⁷Thi nohri nüh nohri jienüri mpa siakeveh üji nohri tü nyuri nyia vünüh mowa küütsa kümühie saveh lo? Küpakenühnyunü mükütsotüri wie nga jükümjie samüveh ülo

⁴⁸ Jükenüh rügivü küpeh nohri Pa nüh kümühieju kümüjie nohri nga mühieju luo.