Read Pochuri Naga MATHI 7 Bible Online

MATHI 7 - Pochuri Naga bible

MATHI 7

¹Nohri nyuri müküjo tümü, jütathuoüji nyuri nga nohri küüjowa nyu.

²Küpakenühnyunü nohri nüh mowa nüh vi nyuri küjo naveh nüh nyuri nga jüma nüh vi nohri küjowie naveh, thi nohri nüh mowa vünüh küto nü nyuri tsü naveh nüh nyuri nga jüla nüh küto le nü nohri tsü naveh.

³Thi nohri tü mokenüh noh mpa noh notha lovü kümüneh kütüwa mümüshekhu nüh noh nü notha lovü kümüneh kütüwa nono ti lo?

⁴Nyutü noh tü noh mpa noh notha lovü kümüneh kütüwa mümüshe nüh noh nü vü, “Eh nü, no notha lovü kümüneh tüküvehwa hi küükhezhumü luo,” ti küzamühie veh lo?

⁵Noh küthse küsawa, noh mpa noh notha vünüh kümüneh wakhezhu khumü luo, jütathuoüji noh nü notha lovükümüneh tüküvehwa nga ngu mütsemüra naveh.

⁶Zanyo mowa mütseveh nüh vi ashuh mütsü tümü, nyutü zanyo ame kükhowa vi taji awu atüvü müjake tümü, küpakenühnyunü mari nüh jümari nyi kümünehmü naveh, thi jü mpa mükünyu ase vünü nohri nga müko mühiemü.

⁷Khuo luo, khuo thuoüji vi nohri tsü naveh, phah luo, phah thuoüji nohri ngura naveh; kütü thuoüji sa nohri tsü naveh.

⁸Küpakenühnyunü küsüküsü nga khuo thuoüji tsütsüti, thi küphari nga ngurarati, thi thari nüh kütü veh nüh mükhie sataji mari tsütsüti.

⁹Nyutü nohri zhie vü anyi thawa nüh ma tsanüh alohse khuothuoüji aloh vi ma tsü veh lo?

¹⁰Nyutü ma nüh anga khuo thuoüji müre vi ma tsü veh lo?

¹¹Jükenüh nohri anyi kümüsüri wie nga zanyo kümühie vi nohri tsa kütsü aro thsüveh üji, nohri Pa rügivü küpehwa thuoüji thari nüh ma vü zanyo kümühie khuo naveh nüh jüma nyia vünüh küjake taji mari vü mütsünüh sanaveh lo?

¹²Jükenüh nyuri nüh nohri vü mokümjie sakütsü loveh nüh jükümjie nohri nga nyuri vü satsüluo, küpakenühnyunü hamatü wulewa wiethuoh thi setsaküthsüri zhütsowa wiethuoh.

¹³Nohri shieku kümünyiewa vünüh müzhe tu luo, küpakenühnyunü kükria vü küwa shieku thuoüji müza thi lekhuji nga rüzihmü, thi nyiri hozake wienga jüma müzhetututi küsa kenüh.

¹⁴Küpakenühnyunü kürho vü küwawa shieku thuoüji münyiemü thi lekhuji jüla küwa khomü thi jüma küngura anyi zülamü.

¹⁵Küzhühja setsaküthsüri vünüh nohri azhüzhüluo, jümari tü nyihzhü thsümünyi vü taji nohri vü tseveh, thitü mari luoveh lovü thuoüji nyuri rekütsa rezanyihnyih riekhuo wiethuoh.

¹⁶Mari avi vünüh nohri mari thsüra naveh. Nyi küsü nga rüzhü rhu vünüh rhelivi lara müveh, nyutü kawurüzhü rhu vünüh jichuo lara naveh lo?

¹⁷Jükümjie athso kümühie aveh thuoüji avi kümühie peraveh, thitü athso kümüsü aveh thuoüji avi kümüsü pepeti.

¹⁸Athso kümühieri thuoüji avi kümüsü piketü küpewanyu, thi athso kümüsüri tü piketü avi kümühie müpera.

¹⁹Athso mavi kümühie müküperari aveh thuoüji jethuoh nü anyih lovü thsemümüti.

²⁰ Jükenüh maviri vünüh nohri tü mari thsüra naveh.

²¹Hi vü VÜWA, VÜWA ta küsari aveh rügi kajipe lovü mütu khehra, thitü thari nüh rügi vü peküvehwa eh Pa külo sanaveh nüh jümari nüh tu naveh.

²²Jü rülovü nyiri hozake nüh hi vü, “VÜWA, VÜWA, hiri tü noh nyo vünüh setsaküthsüzhü müphra ülo? Thi hiri tü noh nyo vünüh Tsuore kümüsüri zhemüja ülo? Thi hiri tü noh nyo vünüh küükrükükra küüro hozake müsa ülo?” ta phrate naveh.

²³Thitü hi nüh mari vü, “Hi nü nohri piketü müthsüwie, nohri zanyokümüsü küsari, nohri tse hi kari tewaluo,” ti küza naveh.

²⁴“Jükenüh anyi küsüküsü nga hi nüh küüza zhüri thsü nü jümari sa thi kümüzheri thuoüji kümütsari alokrü rügi vünüh azheh küsa kümüjie wiethuoh.

²⁵Atso nga rüru, aju nga jiru amürhü nga mürhüru nü azhejüma küchie, thitü samüsü, küpakenühnyunü azheh jümatü alokrü rügi vünüh sakümüthuoh kenüh.

²⁶“Thi anyi küsüküsü nga hi nüh küüza zhüri thsünü müküsari thuoüji zanyomüküthsüri thi küzheri nüh shünyi rügi vünüh azheh küsa kümüjie wiethuoh.

²⁷Atso rüru, aju nga jiru thi amürhü nga mürhüru nü azheh jüma küchie taji nü aveh zochiekhemü,” ti küza.

²⁸ Thinü Jisu tü azhü jüri küzatuo ünü anyi riekhuowa tü ma nüh küsosiezhüwa küna ngo sheh.

²⁹Küpakenühnyunü ma tü mari azhievü Wule küsosieri kümüjie vünüh nyu nü kükhra küviri kümüjie vünüh mari küsosie kenüh.