Read Pochuri Naga MATHI 8 Bible Online

MATHI 8 - Pochuri Naga bible

MATHI 8

¹Jümasevü Jisu tü küzhiho vünüh turu ünü nyiri riekhuo küji küsü ma se nyi müzheru.

²Thinü halie, wupie künari küsü ma vü ru ma khurütaji nü ma vü, “VÜWA, noh nüh no kümüshe thuoüji notü hi sakümühie tsüwienanü,” ti küza.

³Thinü Jisu nüh ma ke thsuowa ma pa taji nü, “Eh müshewiethuoh; noh küna mütsemü luo,” ti küza, thinü müküzhikewiethuoh nüh ma wupie künawa tü shiti mütsetewa.

⁴ Thinü Jisu nüh ma vü, “Noh nyi küsüvü nga müküzatümü üti küsa thsüluo, thitü wa nü levüwa vü kütsa tajinü nyiri nüh küüthsü na küsa kenüh Mosa zhütsüküsa müzhe nü küsathuoh küürowa samü luo,” ti küza.

⁵Jüti sataji nü Jisu tü Kapernaum vü tsuo ünü arienyiri müzake nyia nüh küji küsü ma pharu tajinü,

⁶“VÜWA, eh siepewa wiechuküsü küna nataji ma luoveh küraküpre tajinü ma zheh vü ze pewievehthuoh,” ti küza.

⁷Thinü Jisu nüh ma vü, “Hi nüh ru tajinü ma sakümühietsü naveh,” ti küza.

⁸Thinü arienyiri müzake nyia küjiwa nüh ma vü, “VÜWA, hi nüh noh tü eh zheh lovü turumo ta küsanga mükütse küsü lie, thitü noh nüh zhühnyo küsüwie nga phratetsü thuoüji eh siepewa tü mühiera wienaveh,” ti rületsü.

⁹Hi nga kükhra küviri kükhu vü peveh, eh kükhu vü nga thopahiri peveh. Thi hi nüh nyi küsü vü, noh tsewaluo, tathuoüji ma tü tsewawati, thi hi nüh nyi küsüwa vü, havü raluo, ta thuoüji, ma tü ruruti; thi hi nüh eh siepewavü, “Noh zanyo hama saluo, ta thuoüji ma tü sasati,” ti küza.

¹⁰Thinü Jisu tü azhü jü thsü nü ma ngo she tajinü, mase nyikütseri vü, hi nüh nohri vü küzatoke naveh, hi nüh kütsotü küji harike müjie ngu wie, küpakenühnyunü Israelri zhievü nga müngu wie.

¹¹Hi nüh nohri vü küza naveh, rünyiküshupe vünüh thi rünyi kütupe vünüh anyi khielota ru nü Abraham thi Isaac thi Jacob sie taji rügi kajipe vü petewa nathuoh.

¹²Thitü kajira tsa kürhiezari thuoüji nü vi alievü kütsozovü thsemünathuoh; jüla nüh krie thi aha hari tajinü petewanathuoh.

¹³Jüti satajinü Jisu nüh müzake nyia nüh küjiwa vü, “Tsewaluo, thi noh nüh tsotü kümü kümüjie vünüh küsawa saluo,” ti küza. Thinü siepe jümawa tü tsotho jüla kheti küsavü mühiera.

¹⁴Jüsevü Jisu tü Pitor azheh lovü tu ünü, Pitor anyitü mühi latajinü ngu.

¹⁵Thinü Jisu nüh ma ke pa ünü ma kümühiwa tü letewa, thi ma nüh süra tajinü kütsaküzhu küche taji mari tsü.

¹⁶Thi münüle ru ünü nyiri sietsekümüsüwa nüh mürü taji kütseri hozake sie ma vü ru, thinü ma nüh ma zhü vünüh sietse jüri zheja khehmütü, thi künari aveh sakümühie tsükheh.

¹⁷Jütisanü khanavü Isaya setsaküthsüwa nüh, “Ma mpa hiri satsazüh küüchu mükümühieri thi künari aveh vi vümütüthuoh,” ta küüzawa sajutsü.

¹⁸Jümasevü Jisu nüh nyiri shieji küsü ru ma mükieshe peküveh ngu ünü ma tü ma zhü tsü taji juküji küpawuo vü tewa nti sa.

¹⁹Jüti küsavü Wule küsosieri küsü ru taji ma vü, “Küsosiewa, noh nüh wuovüwuovü nga wa tü hi nga no senyiwa wie naveh,” ti küza.

²⁰Thinü Jisu nüh ma vü, “Jiperü nga mari aku peveh, thi müwari nga aphra peveh, thitü anyi Tsawa thuoüji ma lü küüthipe nga münyie luo,” ti küza.

²¹Thinü ma sekünyiri küpa küsü nüh ma vü, “VÜWA, noh tü hi küze taji eh pa küüchowu khumüjie,” ti khuo.

²²Thinü Jisu nüh ma vü, “Eh se nyi luo, thi aküsüri mpa mari kümo küüchowu mü luo,” ti küza.

²³Jüti satajinü ma tü juhie lovü tetu ünü ma sehnyiritü ma se müzheh ru.

²⁴Thinü halie, juküji vü mürhü khieloti mürhüterünü ajuküshü taji juhiewa müzhiewuotewa, thitü Jisu thuoüji zapewie.

²⁵Thinü mari tü wa taji ma müchüke nü, “VÜWA, noh tü hiri rükietsüluo, hiri tü sümüna savehthuoh nü,” ti küza.

²⁶Thinü ma nüh mari vü, “Halie, nohri kütsotü küzülari, nohri mokenüh krüveh lo?” ti satajinü ma tüsüra nü mürhü thi juküjiwa phra, thinü zomti petewa.

²⁷Jütiküsavü nyiri nüh khieloti ngo tajinü, “Mürhü thi juküji tsatsawienga ma zhü künaküveh hatü moranyi thuoh lo?” ti phrate.

²⁸Jüti satajinü ma tü azhie jüma kari tajinü anyu küpa Gadara ti küsa vü ru ünü sietse kümüsü nüh küprütekütse nyi künyi rüku lo vünüh shuru tajinü ma sie mütu, masü akhuke tü müsü sheh kümü kenüh nyi küsü nga ale jü wuo vü kükashukari küsa khomü.

²⁹Thinü halie, masü tü zia tajinü, “Jisu, Saküüwuowa Tsa, noh tü hisü vü mowa sa nti tse lo? Tsotho müjieküju vünüh noh tü kümnomna vi hisü tsü nti tse ülo?” ti küza.

³⁰Thinü awu kürefü küsü tü kületsuo zah vünüh ashie chütsa tse ünü,

³¹sietsekümüsüri nüh ma vü, “Noh tü hiri zhezhu nta thuoüji hiri zhezhu awu tumari aza vü küze luo,” ti khuo.

³²Thinü ma nüh mari vü, “Shuwaluo,” ti küza ünü mari tü shutewa awu aza lovü tetu, thinü, halie, awu aveh rüshe taji pothuoh vü tewa nü ajuküji lovü tetu nü kürhothe khehmü.

³³Thinü awu kühuori tü nyuküji vü zhüwa taji awuri momota samüthuoh nüh thi sietse kümüsüwa nüh mürütekütse künyi mota samüthuoh nüh aveh viküzakheh.

³⁴Thinü halie, nyuküji jüla küperi aveh nüh Jisu siemütu nti shuhru, thinü mari tü ma ngu nü, mari anyu tsekari tewa üti ma vü khuo.