Read Pochuri Naga MATHI 9 Bible Online

MATHI 9 - Pochuri Naga bible

MATHI 9

¹Jüsevü ma juhie küsü lovü tu nü tseshu ma mpa ma nyu vü teru.

²Thinü anyi wuori nüh nyi küsü wiechusümü nü na taji aze vü zeküperi küsü kha nü ma vü ru, thinü Jisu nüh mari kütsotü ngu tajinü wiechusükümüwa vü “Eh tsa, noh nyiepha müza luo, no kükhiemuori nojamütsüthuoh nüh,” ti küza.

³Thinü halie, Wule küsosie wuori nüh mari mpa mari luoveh lo vünüh, “Anyi hamatü Saküüwuowa küjoveh nü mo,” ti sa.

⁴Thitü Jisu nüh mari luoveh lovü müshe küpe thsü nü, hohri mokenüh nohri luoveh lovü zanyokümüsü müshe veh lo?

⁵Noh kükhiemuori nojamütüthuoh nüh, ta küsari, süra nü aletse luo, ta küüzawa masü khiema nüh küüruzi na lo?

⁶Thitü anyi Tsawa tü azhih vü kükhiemuo noküjara kükhra pehveh ta küsa nohri küüthsü na küsa kenüh, ma nüh wiechuküsüwa vü, “Süra tajinü no ze kha no zhe vü waluo, ti küüzawa wiethuoh,” ti küza.

⁷Jütisanü anyi jümatü süra nü tse ma zheh vü tewa.

⁸Thinü anyi riekhuowa nüh jü ngu tajinü krü sheh, thi Saküüwuowa nüh kükhra jükümjie vi nyiri vü kütsü kenüh ma siake.

⁹Thinü Jisu tü jüla nüh tseshu tse ünü Mathi ti küji akhrükükhrüpe vü pehlanü ngu. Thinü ma nüh ma vü, “Eh se nyi luo,” ti küza. Thinü ma tü süra nü ma se nyitewa.

¹⁰ Jüti sataji nü Jisu tü ashie tsa nti azheh lovü wa ashiekütsapevü pehveh ünü, halie, mükünongüri kenüh akhrükükhrühri thi anyu vünüh zhejakümüri hozake ru ma thi ma sekünyiri vü nyipe.

¹¹Jüti küsavü Farisiri nüh jü ngu nü ma sehnyiri vü, “Nohri küsosiewa tü mokenüh akhrükükhrühri thi anyu vünüh zhejakümüri sie ashietsaveh lo?” ti küna.

¹²Thinü Jisu tü jü thsüra tajinü mari vü, “Kümütsari tü nahziküthsüri moma vi sa, thitü nahziküthsüri tü künari kenüh wie,

¹³ Nohri wa tajinü hi thuoüji zanyo viküsahthuoh nyia vünüh küümze nüh küülokhe, ti küsawa zhünyo thsüluo. Küpakenühnyunü hi tü künyitsari ji nti müru nü kükhiemuori luoveh küükhaphrü nti küru wie,” ti küza.

¹⁴Jüsevü Johan sekünyiri tü Jisu vü ru tajinü, “Hiri thi Farisiri nü mokenüh assa saveh thitü noh sekünyiri nü mokenüh assa müsa lo?” ti küna.

¹⁵Thitü Jisu nüh mari vü, kümünyutepawa peküveh vünüh kümünyute kenüh kütsaküzhu vü jiruküsa ma füri tü luoveh na pemühieveh ülo? Jütanyunü tsotho ru naveh, kümünyutepawa tü ma füri vünüh sietewaluo nta küsa vü mari tü assa sanaveh.

¹⁶“Thi nyi küsüwienga athsü kürüthe küsü viwa tajinü athsü kürüwiwa vü kürüke müveh, küpakenühnyunü jüta thuoüji kürüthe viwa kürüke küsawa nüh shokhrimü naveh, thi kümüsütsa krimü naveh.

¹⁷Jümpa mükünyu nyi küsüwienga rhelivi kha kürüthe vi sahu lehuo kürüwi lovü mümüzhi, jütathuoüji sahu lehuowa tü zhiphumü naveh, thi rhelivi kha tü lizhutewa naveh, thi sahu lehuowa nga krimü naveh, thitü rhelivi kha kürüthewa tü vi sahulehuo kürüthe lovü müthseji mümühie, jütathuoüji masü khürü nga pehra naveh,” ti küza.

¹⁸Ma nüh azhü hari vi mari vü küzapeveh ünü, halie, sierhüri küsü ru ma vü khotsü tajinü ma khurü nü, “Eh tsa rüla küsü khintü tsatsanüh sümü nü, thitü no ru nü no ke thsuo taji ma vü thsejie, jütathuoüji ma tü rholera naveh nü,” ti khuo.

¹⁹Thinü Jisu tü ma sehnyiri sie taji süra ma se nyiwa.

²⁰Thinü halie, mavi türakünyi azüh vü tekütse vüh küsü ma se vünüh ru nü ma küüzhuvüh apote vü pa;

²¹küpakenühnyunü nyimza hamatü ma mpa ma jüle tajinü, “Hi tü ma küüzhuvüh keküparavü wienga nüh mühierana nü,” ti müshe.

²²Thinü Jisu tü süle künovü ma ngura tajinü, “Eh tsavühwa, no nyiapha müza luo, noh kütsotü mpa nüh noh sakümühiemüthuoh,” ti küza. Thinü kheti jüma tsotho vünüh nyimza jüma tü mühiera.

²³Jütisanü Jisu tü ru sierhü jümawa azhe ju ünü pilechu kükhukhi thi nyiri azhü khieloti küphrala künara;

²⁴thinü ma nüh, “Aleküpie luo, rüla hamatü sümüveh, thitü zepeküvehwie,” ti küza. Thinü mari tü ma riesa tajinü ma müküchie sa.

²⁵Thinü anyi jümari anyulavü zheküzemü tajinü ma tü azheh lovü tu nü rüla jümawa ake si ünü rüla jümawa tü tesüra.

²⁶Thinü azhie jüla aveh vü azhü hama tholah nyuotewa.

²⁷Jüti satajinü Jisu tü azhie jüla nüh tsezhu tse ünü nothaküüjuri künyi tü ma se nyimüzheh nü zia taji, “David Tsa, Noh tü hisü nokümüze tsümo,” ti khuo.

²⁸Thinü Jisu tü azheh küsü lovü tetu ünü nothaküüju masü nga ma se nyi tetu, jütiküsavü Jisu nüh ma sü vü, “Hi nüh nosü sakümühierawie naveh ti küsa nosü tü tsotü veh ülo?” ti küna. Thinü masü nga ma vü “Ah, VÜWA,” ti rületsü.

²⁹Jütiküsavü ma nüh masü notha pa tajinü, “Nosü nüh kütsotü kümüjie vünüh saluo,” ti küza.

³⁰Thinü masü notha tü koteru, jütiküsavü Jisu nüh wurie masü khe tajinü, “Nyi küsü nga müküüthsü naküsa kenüh küthi luo,” ti küza.

³¹Thitü masü tü ape jüla nüh tsezhuwa tajinü anyu jüla aveh vü ma azhükuwa phrate küthola she tsü.

³²Jüti satajinü mari tü jüla nüh tetse ünü, halie, nyi küsü sietse kümüsüwa nüh mürü taji zhümüphrara nüh tekütseri küsü mari nüh sie ma vü ru.

³³Thinü sietse kümüsüwa zhezhujamünü anyi zhümüküphrawa tü azhü phrara; jütiküsavü anyi riekhuo wa tü ngo nü, khinyi küju wienga Israelri azhievü küsü nga hakümjie müjie nguwie, ti küza.

³⁴ Thitü Farisiri nüh, “Ma tü sietsekümüsüri kajiwa sie taji sietsekümüsüri zhekütsewie,” ti küza.

³⁵ Jümasevü Jisu tü anyu küzah thi küji aveh vü wa tajinü nazizheri vü tu nü nyuri sosie, thi Kajipe Zhühthe Kümühiewa vi nyuri küza, thi küsaküna aveh thi satsa vü mükümtse aveh sakümühie tsü kheh.

³⁶ Thi ma nüh nyiri riekhuowa künguvü ma luoveh natewa, küpakenühnyunü anyi jümari tü münomüna thi nyi küsü nga mari küükra münyiethuoh nüh anyihzhü ma kühuo mükünyie üta luo wie vü porievorie tekütse kenüh.

³⁷ Jükenüh ma nüh ma sehnyiri vü, “Atsuo thuoüji khielo ta nevehthuoh, thitü küürori thuoüji zülamü.

³⁸Jükenüh azhu vüwa nüh azhu küürori azhu vü küze na küsa kenüh nohri khuo luo,” ti küza.