Read Pochuri Naga MARK 10 Bible Online

MARK 10 - Pochuri Naga bible

MARK 10

¹Jüsevü ma tü jüla nüh süra tajinü tse Judea anyokhie vünüh mürhü Jordan rüku nato wuovü tewa, thinü anyiri ariekhuo watü tse ma vü ru le, thi ma wule sakümüthuoh kenüh ma nüh mari sosie lehü.

²Jütisapeküveh vü Farisiri nüh ma vü ru tajinü, “Nyimpari tü avüvühri sie küürüsuo kümü awule ülo?” ti sanü ma müte tajinü ma vü küna.

³Thinü ma nüh mari vü, “Mosa nüh khana mokümjie nohri vü küza lo?” ti küna.

⁴Thinü mari nüh, “Mosa thuoüji kürüsuokümü lasi küsü rhütsü taji nyimza jüma jamü üta küza,” ti küza.

⁵Thitü Jisu nüh mari vü rüle tajinü, “Jümatü nohri luoveh kükhokenüh arüle hama rhü nohri tsüsa veh,” ti küza.

⁶Thitü sakürhokütsü atükhu vü thuoüji nyimpari küsü thi nyimzari küsü ti sakütsü wie.

⁷ Hama kenüh nyimpa watü ma pa ma zah jamü tajinü ma vüvüh vü küpeketewanathuoh.

⁸Thi masü tü satsa küsü samünathuoh, jüta satajinü masü tü künyi ta nyuthuoh nü satsa küsüwiethuoh.

⁹Jükenüh Saküüwuowa nüh mowa sakütsarütsü nüh anyiri mpa nüh phrürie kümü müsatümü, ti küza.

¹⁰Thinü wa azhe vünüh ma sehnyiri tü azhünyo jüma ma vü küna le.

¹¹Thinü ma nüh mari vü, “Nyi küsüküsü nga ma vüvüh jamü taji nü küpa vile thuoüji ma tü ma vüvüh tüvü küüphroküphrie samüthuoh.

¹²Jükümjie nyimzari nga ma vüpa jumü taji nü küpari vü za lethuoüji ma nga küüphroküphrie samüwiethuoh,” ti küza.

¹³Jütiküsavü Jisu nüh küüpa nti anyiri nüh kürünguori sie ma vü ru, thitü ma sehnyiri nüh kürünguori sieküruri phra.

¹⁴Thitü Jisu nüh jü künguvü, ma mülo nüh satajinü mari vü, “Rünguo kütazüri mükhetetü hi vü küüru luo, küpakenühnyunü Saküüwuowa kajipe tü hakümjie küsara-a zhi küsa kenüh,” ti küza.

¹⁵Hi nüh nohri vü küzatoke naveh, anyi küsüküsü nga rünguori küsü kümüjie Saküüwuowa kajipe müvi thuoüji ma jüla mükütura kenüh.

¹⁶Jütisanü ma nüh rünguori küruo ma pie rügi vü satajinü ma kekünyi nüh mari pa taji tsia mari tsü.

¹⁷Jüsevü ma tü lekhuji vü tsetse ünü nyi küsü zhü ma vü ru tajinü tsuo ma tüvü khotsü peh nü, “Küsosie kümühiewa, hi tü küsuokürhowa eh zhi sana küsa kenüh mowa müsaji mümühie lo?” ti mavü küna.

¹⁸Thinü Jisü nüh ma vü, “Noh tü mokenüh hi vü kümühiewa ti ji veh lo? Kümühiewa thuoüji küsü mpa küchie nüh küpa münyie, thi jüma thuoüji Saküüwuowa wie,”

¹⁹ noh nga azhü tsü küsa hamari thsüveh tü nüh: noh nyuri küfethevühnyu; küüphroküphrie küsavühnyu; kürühuvühnyu; küzhüja povüküsavühnyu; nyuri mürakütsavühnyu; noh pa noh za siakeluo, ti küza.

²⁰Thinü ma nüh ma vü, “Küsosiewa, hi tü hi kürünguo vünüh zanyo hari aveh müzhe tetsethuoh nü,” ti küza.

²¹Ma nüh jüti küüzavü Jisu nüh ma no taji ma kümüze tajinü küüza, “Noh zanyoküsü müjieju nüh peveh, wa nü no zhi momowa peveh nüh zhumü taji kümükhuori tsümüluo, jütathuoüji nü rügi vü nokünyirhie peranaveh, jütisanü ru no khieluothso khanü eh se nyiluo,” ti küza.

²²Thinü jü küüza kenüh ma lorütewa thi ma luoveh sakümüsümü taji nü tewa, küpakenühnyunü ma tü künyirhie pe she kümü kenüh.

²³Thinü Jisü tü kürele tüwuoh hawuo no nü ma sehnyiri vü, “Künyirhieri tü Saküüwuowa kajipe lovü tuna küsa küzakele kho lo,” ti küza.

²⁴Jütiküüzavü ma sehnyiri tü azhü jüri kenüh mari ngo, thitü Jisu nüh mari rüle tajinü, “Kürünguori, anyiri ma mpa ma künyirhie tsotü kütseri tü Saküüwuowa kajipe lovü tüna küsa küzakele kho lo,”

²⁵Künyirhieri küsü nüh Saküüwuowa kajipe lovü tuna küsa nü ut nüh arüje ku lovü mürikütu nüh küürüzikhe, ti küza.

²⁶Thinü mari tü ngo küluo tajinü mari mpa mari azhie vünüh, “Thinü thawa nüh küülole ngu nathuoh lo?” ti sa.

²⁷Jütiküsavü Jisu nüh mari no taji, “Anyiri wuo vü thuoüji jüma khoveh, thitü Saküüwuowa wuovü nü jüütanyu, Küpakenühnyunü Saküüwuowa wuovü thuoüji nü azanyo aveh sarana küveh kenüh,” ti küza.

²⁸Thinü Pitor nüh ma vü, “Halie, hiri tü azanyo aveh jakhemü taji nü no senyitetsethuoh,” ti küza.

²⁹Jüti küüzavü Jisu nüh rüle taji, “Hi nüh nohri vü küzatoke naveh, nyi küsü nüh eh kenüh thi Zhülekümühiewa kenüh azhe, nyutü atsari, nyutü azhih jamü nü,

³⁰khinyi azhih hala kürho vü nga nyuri nüh kümnomna kütsü vünüh; azheri nga jünütharuo nga, atsehvüri nga, azari nga, atsari nga, azhih nga, jamü tajinü tse thuoüji jüzake müküngulera münyie, thi thuohtü vü kürho vü nga küsuokürho ngu naveh.

³¹Thitü apori hozake ase vü tewa naveh, thi aseri nüh apo sanaveh,” ti küza.

³²Jümasevü mari tse Jerusalem vü wanti khru, jüvü Jisu tü mari atüvü tewa, thinü mari tü ngo, thi kürükütse küpari nga krü, jütiküsavü ma nüh ma sehnyi türakünyiri sie le tajinü ma vü momowa müsaji mümühie nüh jümari azhü vi mari vü küza nü,

³³“Halie, hiri tü Jerusalem vü khru nti tse, thi nyuri nüh anyi tsawa re nü kükhruo küjiri thi Khonyo küsosieri vü thsemünaveh, thi mari nüh ma müshemüsü nü ma fethemü luo ta sanaveh, jütisanü mavi Judahmükünyuri ake vü thsemü naveh,

³⁴jütisanü mari nüh ma vi küjokujozhie naveh, thi ma vü amütse nga müshüke naveh, thi ma fenaveh, jüti satajinü ma fethemü naveh, thi rülo küche ase vünüh ma rhole naveh,” ti küza.

³⁵Jüsevü Zebedee atsa Jems thi Johan masü mavü ru nü, “Küsosiewa, hisü nüh noh vü momowa münguveh nüh jümari noh nüh sa hisü küütsünthe lie,” ti khuo.

³⁶Thinü ma nüh masü vü, “Nohsü tü hi nüh mowa sa nosü küütsü nthelo?” ti küna.

³⁷Thinü masü nüh ma vü, “Noh küthola kümühie kajipe vü wa küpevü hisü nyi küsü nüh noh zhie wuovü thi nyi küsü nüh noh zhü wuovü ti küpera vi hisü tsümo,” ti khuo.

³⁸Thitü Jisu nüh masü vü, “Nohsü nüh khuo küpewa thsü nü khuomüveh, nosü tü hi nüh kümnomnawa nyi saranaveh ülo? Thi hi nüh baptis küsa baptistwa nüh vi baptis saranaveh lo?” ti küna.

³⁹Thinü masü nüh ma vü, “Hisü nüh sarawienaveh,” ti küza. Thinü Jisu nüh masü vü, “Nohsü hi nüh münomüna nah saküvehwa nü nyi saranaveh thi hi nüh baptis sana küsa baptistwa vi baptis sarawie naveh,

⁴⁰thitü eh zhie wuovü thi eh zhu wuovü pena küsanü tsüna küsa eh zhinyu, tü Saküüwuowa nüh vi thari tsü nta küche saveh nüh jümari tsünaveh,” ti küza.

⁴¹Thinü mari türakeri tü jüma thsüra nü Jems thi Johan masü alü vü hozake alomüzhe nüh samü.

⁴²Jütiküsavü Jisu nüh mari mavü jike tajinü, “Anyi küpari nüh Judahmükünyuri keteveh taküsari nüh mari anyia vü jijiti, thi mari küjiri nüh mari anyia vü avü küsa nohri thsülanathuoh.

⁴³Thitü nohri azhie vü thuoüji jüüta küüsawanyu; tü küsüküsü nga nohri azhie vü küji ngüri thuoüji nohri akütsüküünawa müsaji mümühie.

⁴⁴Thi küsüküsü nga nohri azhie vü küjitsawa küsangüwa thuoüji avehvehsiepe müsaji mümühie.

⁴⁵Küpakenühnyunü anyi Tsawa nga nyuri nüh ma kütsüküüna nta müru nü, nyuri kütsüküna nta ma kürho tsü nü anyi hozake rhesa nta küruwiekenüh,” ti küza.

⁴⁶Jüsevü mari Jeriko vü ru, thi ma Jeriko vünüh ma sehnyiri thi anyiri ashieji küsü sie tseküwavü Timeus atsa Bartimeus ti küsa nothaküüju küsü ale küji nato vü pe nü khrütsa pela.

⁴⁷Thinü anyi jüma nüh ma tü Jisu Nazareth vü küpewa ti küsa thsüranü zie taji, “David atsa Jisu, Noh hi nokümüze tsüluo,” ti khuo.

⁴⁸Jütiküsavü anyiri hozake ma tü zoti petewa üti ma sakükrü.

⁴⁹Thinü Jisu tü zoti süra tsie tajinü, “Nohri ma ji luo,” ti mari vü küza, thinü mari nüh nothaküüjuwa ji tajinü, “Noh lozheluo, thi süraluo, ma nüh noh jivehthuoh,” ti küza.

⁵⁰Thinü ma tü ma thsümünyi fojamü nü süra taji Jisu vü ru.

⁵¹Thinü Jisü nüh ma vü, “Noh tü hi nüh mowa sa noh kütsü müngu vehlo?” ti küna. Jütiküsavü nothaküüjüwa nüh, “VÜWA, hi tü azanyo raküüngu mo,” ti khuo.

⁵²Thinü Jisu nüh ma vü, “Tse waluo, noh kütsotü mpa nüh noh sakümühiemüthuoh,” ti küza. Thinü ma notha tü shita mühiera taji Jisu ase nyi nü tsetewa.