Read Pochuri Naga MARK 12 Bible Online

MARK 12 - Pochuri Naga bible

MARK 12

¹ Thinü ma nüh küzhühiezhü vi mari sosie tajinü, nyi küsü nüh rhelivi zhuh küsü tsa, thi jüma rüpe tajinü rheliviju küzhezhu kenüh azhih küsü phieke, thi akhajie küsü jüke ti sanü vi azhuküürori wuori tsotümü tajinü anyu aleküsuo vü tewa.

²Jümasevü ma zale kheti küsavü azhuküürori jümari vünüh rhelivi azhu jüla nüh rhelivi nguna küsa müshe nü ma nüh ma sieperi küsü azhuküüro jümari vü küze.

³Thitü mari nüh ma sho taji fe thi zanyoküsü nga vi ma mütsü nüh kürütso küzemü.

⁴Jüsevü ma nüh ma siepe küsü mari vü küzele, thinü mari nüh alohvi ma lü veh nü kümüsa münamü tajinü saküzükrü sheketsü.

⁵Jümasevü nga ma nüh küpa küze le, thinü mari nüh jüma fethemü, thi jümpa mükünyu küpa hozake nga küze thinü wuori fe thi wuori fethemü.

⁶Jüsevü ma tü nyi küsü pelehüveh, jüma thuoüji ma tsa ma nüh küümzetsawa, mari nga eh tsanü siakenatü nti ti sanü asekhe vünüh mari vü ma küze.

⁷Thitü azhuküüro jümaritü mari mpa kürüchie nü, hama thuoüji azhuh vüwa tsa wiethuoh, rah, hiri ma fethemü nüh, jütathuoüji ma zhehzhuhri ehzhiri saranaveh!

⁸Jüti sanü mari nüh ma sho tajinü ma fethemü nü ma vi rhelivizhu ajuosü vü jam.

⁹“Jütathuoüji rhelivizhu jüma avüwa tü mowa sa nta sana thuoh lo?” Ma tü ru taji azhuküro jümari fethemü naveh, jüta sanü rhelivizhuwa vi küpari vü tsümünaveh.

¹⁰ Nohri Zhütsazhü müchie lo; “Alozheküsari nüh aloh jakümüwa nüh ajüke vü alüwa samüthuoh.

¹¹Hamatü VÜWA nüh küsawie, thi hamatü hiri notha vü küükrükükraküsü,” ti küza.

¹²Mari tü ma re nta sa, thitü anyi riekhuowa krütewa, küpakenühnyunü ma nüh küzhühie taji mari phrakümüsü kenüh, jütisanü mari tü ma jamütaji zoti tewa.

¹³Jüsevü mari tü ma zhu vünüh ma küre aro phatajinü Farisiri thi Herod anyi wuori ma vü küze,

¹⁴thinü jümari turu nü ma vü, “Küsosiewa, noh tü küzhütsawa wie thuoh, thi nyi küsü nga mükükrü hiri nüh thsüveh, küpakenühnyunü noh tü anyiküsü nga noh külori küpa münyie, thi zhütsawie tajinü Saküüwuowa lekhuji küjo nyuri kütsa tsatsati thinü hiri tü Romri Küjiwa akhrü Kükhrüle nyu lo?” ti küna.

¹⁵Thitü ma nüh mari aküthse küsa thsüra nü mari vü, “Nohri mokenüh hi müra veh lo? Duli küsü viru hi küünoluo,” ti khuo.

¹⁶Thinü mari nüh jüma viru, thi ma nüh mari vü, “Hama thawa tsorhe thi thawa nyo rhüsa veh lo?” ti küna. Thinü mari nüh ma vü, “Romri Küjiwa tsorhe thi ma nyo,” ti küza.

¹⁷Thinü Jisu nüh mari vü, “Romri Küjiwa azhiri vi Romri Küjiwa tsümüluo, thi Saküüwuowa zhiri vi Saküüwuowa tsümü luo,” ti küza. Jütiküsavü mari tü ma vü ngo she.

¹⁸Jümasevü kürhole münyie ta küsa Sadusiri ma vü ru tajinü,

¹⁹“Küsosiewa, Mosa lasi rhü hiri vü kütsü, ajie nyimpari küsü nüh atsa münyie nüh ma vüvüh jamü tajinü süte huthuoüji ma nü nüh mavüvüh jüma vitaji ma jie küthsoküzhi sakümüwumüra üta küza.

²⁰Thi khanavü jününyi türü peh, thinü apowa tü avüvüh vi thitü ma küthsoküzhi küsü nga münyie nüh sütewa.

²¹Jütisa nü akünyiawa nga avüvüh jüma vi thitü kümüwumüra küsü nga müsanüh sütewa, jüsevü kücheawa nga jükümjie samü,

²²Jükümjie mari türü khürü nyimza jüma vi thitü atsa münyie nüh sükhemü. Thi wa asekhevü thuoüji nyimza jüma nga sümü.

²³Thinü rholeküsüra rülovü mari thawa vüvüh sanathuoh lo? Küpakenühnyunü mari türü khürü ma vi nü mari vüvüh küsa kenüh,” ti küna.

²⁴Jisu nüh mari zhü rüle tajinü, nohri Zhütsazhü thi Saküüwuowa kükhra müküthsü hama kenüh nohri sazih mütsetseti ülo?

²⁵Küpakenühnyunü mari aküsü vüvüh rholeküsüra vü vüvüh vüpa münyiethuoh thi nyivühnyipa kümünyute nga münyiethuoh, jütisanü azhüleri arügivü küperi kümüjiewiethuoh.

²⁶ Thitü küsüri rhoküsürale zhüku khanavü Saküüwuowa nüh arekujepukeküsü vünüh Mosa sieküjüle müchie ülo? Ma nüh Mosa vü, “Hi Abraham Saküüwuowa, thi Isaac Saküüwuowa thi Jacob Saküüwuowa wiethuoh,” ta küüza nohri Mosa lasipha lo vünüh jüma müchiewie ülo?

²⁷Ma tü sükümüra Saküüwuowa mpanyunü rhoküpera Saküüwuowa ngawiethuoh, nohri hama müküthsü kenüh hozake sazih tseveh, ti küza.

²⁸Jütiküsavü Khonyo küsosieri küsü ru nü mari rüluo küveh künara thi ma nüh kheta kümühieta rüle mari tsüküveh thsüratajinü, “Khiemawa nüh azhükütsü aveh zhie nüh apokhuwa lo?” ti küna.

²⁹ Thinü Jisu nüh ma vü, “Azhükütsü aveh zhie nüh apokhuwa thuoüji nü, künaluo, halie Israel, VÜWA hiri Saküüwuowa thuoüji VÜWA ma mpawiethuoh.

³⁰Thi noluoveh aveh vi thi no kürholi aveh vi thi no kümüshe aveh thi no kükhra aveh vi VÜWA no Saküüwuowa kümüze luo, azhükütsü hama nüh apokhuwa wiethuoh.”

³¹ Künyiawa thuoüji nü hakümjie, noh mpa no küümze kümüjie nozhephrüri kümüze luo, ti küsawa wiethuoh. Azhükütsü küpa küsü nga hamasü anyia vü küji münyie, ti küza.

³² Thinü Khonyo küsosiewa nüh ma vü, “Mühie she, Küsosiewa, noh nüh azhütsawa phrate tsathuoh, VÜWA vehküsü mpawie, küpa küsü nga münyie, ma mpa wie.

³³Thi aluoveh aveh vi thi küthsükümüshi aveh vi thi kükhra aveh vi thi kürholi aveh vi ma kümüze üta küsa, thi ma mpa ma küümze kümüjiema zhephruri kümüze üta küsa tü akütso kükhurü thi küsahthuo anyia vünüh ji veh,”

³⁴Thinü ma nüh zanyo thsüshe taji rüle kütsü Jisu nüh thsüra taji ma vü, “Noh tü Saküüwuowa kajipe vünüh kietuomüveh,” ti küza. Jümasevü thuoüji nyi küsü nga ma vü zanyo küüna sürotewa.

³⁵Jüsevü Jisu nüh Kükhurüzhe vünüh nyuri sosie küpevü kürüle, Mokümjieküsa vünüh Khonyo küsosieri nüh Khrista tü, David atsa ti küzaveh lo? ti küna.

³⁶ David nüh ma mpa khana Kümtse Sietse vünüh, VÜWA nüh eh VÜWA vü küüza, “Hi nüh noh mükünongüri vi noh jihkükhu lovü müjie küthse küju nü, noh eh zhie wuovü pewie luo,” ta küza wiethuoh.

³⁷David wie nga ma vi VÜWA ta ji thuoüji, mokümjie Messiah tü David atsa ta sana lo, ti küza. Thinü anyiri jüla küperi aveh ma zhüküna nü lozhe she.

³⁸Thinü Jisu nüh nyuri sosie tajinü küüza, “Athsümünyi aküsuo sataji kütseri, asüküsapevü nyuri nüh kükhurü külori,

³⁹thi kükhurüzhe vü ape kümühietsari vü küpengüri thi kütsaküzhuküsavü anyi kümüsierape vü küpe ngüri vünüh azhüzhüluo.

⁴⁰Mari tü tünyivühra zhi müratsa thi aküthse sanü akükhuo küsuosuo sataji nü kütse wie. Jükenüh hamari anyi küpari anyia vünüh kümnomna aküji ngunaveh,” ti küza.

⁴¹Jüsevü ma tü wa taji nyuri nüh zanyo thseküveh aku atüvü shupe tajinü anyiri nüh künyirhie vi azanyo küvizhukü lovü küthse nope; jüüti küsavü künyirhieri hozake ru zanyo hozake thseküpe sa.

⁴²Thinü tünyivüh kümükhuori küsü ru nü pesa küsü zanyoküvizhuku lovü vehjake.

⁴³Thinü ma nüh ma sehnyiri ma vü jike tajinü mari vü, “Hi nüh nohri vü küzatoke naveh, anyiri nüh zanyo vi zanyoküvizhuku lovüthseküvehri aveh zhia nüh tünyivüh kümükhuo hama nüh zanyo küüzhi thsewiethuoh.

⁴⁴Küpakenühnyunü küpari thuoüji khielota küpeh kenüh thseveh, thitü tünyivüh hama thuoüji ma nüh müviji mükümühie küpe ma kürho aveh viküthse kenüh,” ti küza.