Read Pochuri Naga MARK 14 Bible Online

MARK 14 - Pochuri Naga bible

MARK 14

¹ Rülo künyi sevü tsekükari thi ahzhi müthse nüh alohse kütsa khu kükhuna peveh, jütiküsavü levüri küjiri thi Khonyo küsosieri nüh rie tajinü Jisu re nü fethekümü müshepe.

²Thitü mari mpa jüle tajinü, anyiri thama küüjakünya kenüh akhu rülovü müsatümü üti küza.

³ Thinü ma Bethani vü wupie künawa Simon zhe vü nüh ashie tsapeküveh vü nyimzari küsü avüju kümhie arhe küüngu amekükhotsawa alabaster mürüku küsü viru nü zokhuo taji nü ma lü rügivü thsetü.

⁴Thitü anyi wuori nüh arüshu tajinü küphrate, “Mokenüh avüju zorie hati sa veh lo?

⁵Avüju ha zhu tajinü tuli müza küche anyia vü nga nüh zhu taji vikümükhuori tsürana nü,” ti küza. Jütisanü mari tü nyimzawavü jazhi.

⁶Thinü Jisu nüh, ma mpa jüti küsamü luo, mokenüh nohri ma saküjakünya veh lo? Ma nüh hi vü zanyo kümühie sa tsümüthüo.

⁷ Küpakenühnyunü kümükhuori thuoüji nohri siepehuoveh, thi nohri tü tsotho muomuovü nga jümari vü zanyo kümühie sangü thuoüji nü saranaveh, thitü hi thuoüji nohri siemüpehuora.

⁸Ma nüh küsarawa samüwiethuoh, ma nüh Hi küchowu kenüh küütü vünüh avüju vi hi künemthuoh.

⁹Thi hi nüh nohri vü küzatoke naveh, “Azhih aveh vü khiekhiela zhülekümhiewa phrate naveh nüh nyimza hama müshena küsa kenüh ma nüh saküsawa nga vi küza wie naveh,” ti küza.

¹⁰Jüsevü Iskariot Judas türakünyiri azhie nüh nyi küsü Jisu re nü levü küjiri vü kütsü müshe nü mari vü wa.

¹¹Thinü mari ju thsü nü lozhe nü raka vi ma tsü nti zhüthuohtsü. Thi mokümjie küsavü ma retsüranaveh nüh ti lekhuji phah.

¹²Thinü Ahzhi müthse nüh alohse kütsa khu rülo apowa mari kütseshukari akhu kenüh anyizhü küfethe rülovü ma sehnyiri nüh mavü, “Noh tü hiri küze nü khiela nüh nyihzhü fethe nü kütsakhü küüche kümüshe lo?” ti küna.

¹³Jüti küünavü ma nüh ma sehnyiri nyi künyi küze tajinü masü vü, nohsü anyuküjiwavü waluo, thi küwavü nosü ajulosüza küsüvikütseri küsü sie mütünaveh nüh, ma se nyi waluo,

¹⁴Jütisanü ma khiela tunaveh nüh nosü nga nyi tu tajinü azhe avü anyi kümühiewa vü, Küsosiewa nüh, “Hi tü eh sehnyiri sie kütseshukari khu nyihzhü fethe nü tsana küsa küzerazhe khielapeveh lo? ti künaluo.

¹⁵Jütathuoüji ma nüh azhe rügi küshothuoh lovü kücheju kümühieküsa aküji küsü küjo nosü kütsanaveh nüh, thinü nosü jala nüh hiri kenüh küche luo,” ti küza.

¹⁶Küüza kümüjie ma sehnyi künyi tü tse anyuküjiwavü ru, thinü ma süvü küüza kümüjie pela nü ngura, jütisanü kütseshukari ashieküche.

¹⁷Thinü münüleh ru ünü ma sehnyi ma siepeküvehri toku ri sie taji küche küsape vü ru.

¹⁸ Jütisanü mari tsapeküveh vü Jisu nüh, “Hi nüh nohri vü küzatokenaveh, nohri hi sietsapeküvehri küsü nüh hi zhutsanaveh,” ti küza.

¹⁹Thinü mari tü alorü nü ma vü, hi ülo? hi ülo? ti küna khe.

²⁰Thinü ma nüh mari vü rüle taji, “Ake akhu lovü thse taji hi sie kürüwietsa küveh nyi türakünyiri azhie nüh nyi küsüwiethuoh.

²¹Küpakenühnyunü anyi Tsawa tü tewanata khanavü ma zhüku rhüküsakenüh; thitü anyi Tsawa re nyuri vü küthsewa thuoüji müzümünathuoh, anyi jümatü müwuotsatsanüh sakümüwa nüh ma kenüh kümphatsawienaveh,” ti küza.

²²Thinü mari tsapeküvehvü Jisu nüh alohse vi nü tsiatsü taji zokhuonü marivü küsuotsütaji küüza, “Nohri vi nü tsaluo, hamatü ehsatsawiethuoh,” ti küza.

²³Jüsevü ma nüh ahuowa nga vi nü tsiatsü thi küsuo mari vübtsü nü mari aveh jüma zhükheh.

²⁴Jütisanü ma nüh mari vü, hamatü anyiri hozake kenüh küthü kütsü zhühthuo küsa kürüthe azühwa wiethuoh.

²⁵Hi nüh nohri vü küzatoke naveh, “Hi tü Saküüwuowa kajipe vünüh rhelivijü kürüthe müjie küzhu atüvü nü hi tü rheliviju müzhulerathuoh,” ti küza.

²⁶Jütisanü mari aza küsü riehi mütaji tse Olive küzhiho rügivü tewa.

²⁷ Jüsevü Jisü nüh mari vü, “Sütavü nohri aveh hi jamü tajinü tewakheh naveh, küpakenühnyunü hi nüh nyihzhü kühuowa fethemünaveh thi anyihzhüri tü vorie tekhehwa naveh ta rhüküsa kenüh.

²⁸Thitü jümasevü thuoüji hi tü rhosürale taji nohri atü vünüh Galilee vü tewa lanathuoh,” ti küza.

²⁹Thitü Pitor nüh ma vü, “Mari aveh nüh noh jamü taji tewawie ketünga hi thuoüji noh küja wanyu,” ti küza.

³⁰Thinü Jisu nüh ma vü, hi nüh noh vü küzatoke naveh, “Sütavü awi künyi keri müjie kükhu atüvü noh hi müthsü ta küchekeri kerü wienaveh,” ti küza.

³¹Thitü ma tü wurie küza kümüzho tajinü, “Hi nüh noh sie nü sü üta wie ketünga hi tü noh kürho müphrate nüh küsawanyu wie,” ti küza. Thinü küpari nga jükümjie phrate kheh.

³²Jümasevü mari tse Gethsemane ti küsa azhie küsü vü ru nü ma nüh ma sehnyiri vü, “Hi nüh khuope küveh vü nohri hala pela luo,” ti küza.

³³Jütisanü ma nüh Pitor thi Jems thi Johan sie ma sevü wa taji ma luoveh na she thi küzho she nü peh.

³⁴Thinü ma nüh mari vü, “Hi tü süna küsa aluovehküna namüthuoh, tinü nohri hala petaji no pe luo,” ti küza.

³⁵Thinü ma nüh pike atüvü tsezhüwa nü azhih vü fephoh kenüh khuo taji, saranavehji nü atsotho watü ma küüthoriemtü üti khuo.

³⁶Jüti küsavü ma nüh, “Abba, eh Pa, noh vü thuoüji azanyo veh saranaveh, hi vünüh ahuo hama vimütüluo, thitü eh müshe nyu nü nomüshe vünüh saluo,” ti küza.

³⁷Jütisamü taji ma ru ünü, mari zeküpela ngu taji ma nüh Pitor vü, “Simon noh tü zeveh lo? noh tü münühu küsü nga huomüperathuoh ülo?” ti küna.

³⁸“Nohri kümüji müra vü mütü nüh sana küsa kenüh nope luo thi khuopeluo; sietse thuoüji nü sangüwieveh thitü asatsa thuoüji küchuveh,” ti küza.

³⁹Jütisanü ma tü tsewale nü shientü küphrate kümüjie phrate nü khuo le.

⁴⁰Thi ma tü shele marivü ru ünü mari tü zepelata ji ngu, mari notha tü mükora nüh samü thi mari tü ma vü mozhüma rüle tsü nüh sa.

⁴¹Thinü ma tü kücheawa shele marivü rü nü, “Khinyi nü ze luo thi nohri kümünyie saluo, khinyi nü walethuoh, atsotho jumthuoh, halie, anyi Tsawa tü kükhiemuori ke vü retsümüthuoh.

⁴²Süraluo, tewaluo nüh raluo, halie, hi zhutsamüna küsawa shenyishe vehthuoh,” ti küza.

⁴³Thinü müküzhikewiethuoh nüh ma azhüphrapeküveh vünüh türakünyiri azhie nüh nyi küsü Judas tü levü küjiri thi Khonyo küsosieri thi kükhruori vünüh anyi khielota sie nü anyuchuwa thi akütsü vinü ru.

⁴⁴Ma zhü nyuri vü tsümüna küsawa nüh jüma atü vünüh jümari vü athsoshi tsükümüthuoh kenüh mari vü küüza, “Hi nüh thawa kümetsünaveh nüh jümawiethuoh, nohri ma sie nü kümühieti waluo,” ti küza.

⁴⁵Thinü ma tü ma vü ru nü müküzhikewiethuoh nüh külesho ma vü watajinü, “Küsosiewa, ti ji nü ma küme tsü.”

⁴⁶Jütisanü mari ma sho nü sietewa.

⁴⁷Thinü türakünyiri azhievü nyi küsü nüh anyuchuwa shozhu nü vi Levü Kümüsiewa siepewa müwie nüh ma khüna taja mütü.

⁴⁸Thinü Jisu nüh mari vü, “Nohri kürühuri sieküsaluo kümüjie anyuchuwa thi akütsü vi tajinü hi sie nti tse ülo?

⁴⁹Hi nüh rülotsotho nohri sie Kükhurüzhe lovü pe nü sosie pe, thitü jüvü nü nohri hi müre, thitü Zhütsazhü tü müjüwieji mümühie,” ti küza.

⁵⁰Thinü mari aveh ma jamü nü zhutewakheh.

⁵¹Jütiküsavü vizari linen ti küsawa athsü küsü vi ma satsa küzhunü ma se nyi tse ünü mari nüh ma re.

⁵²Thitü ma tü ma linen thsüwa jamü tajinü kürütso zhütewa.

⁵³Jüsevü mari nüh Jisu sie Levü Kümüsiewa vü wa, thinü alevü küjiri thi kükhuori thi Khonyo küsosieri wa tü ma nü siesehzhü pela.

⁵⁴Thi Pitor ma siekietuo wietaji ma se nyi tse Levü Kümüsiewavü wa nü jüla akütsüküünari sie anyih küho pe.

⁵⁵Jütiküsavü levü küjiri thi müza kümühu aveh nüh Jisu fethengü nü ma müküle thsü thi künguto apovü phah, thitü müngura nüh samü.

⁵⁶Küpakenühnyunü anyiri hozake nüh küzhüja phrate ma müte, thitü mari azhü mükato nüh samü.

⁵⁷Thinü wuori süra tsie taji küzhüja povü phrate ma müte nü,

⁵⁸“Hiri nüh küünara, kenüh saküsa Kükhurüzhe hama ma nüh zorie mütajinü rülo küche azhie vünüh ma nüh ake nüh müsanüh küpasatsüle naveh ta küzalie,” ti küza.

⁵⁹Thitü jütawie ketünga mari povü watü mütsarü nüh sawie.

⁶⁰Thi nüh Levü Kümüsiewa nüh süra mari azhie vü tsie tajinü, “Hamari nüh azhü mowa vi no müteveh nüh notü zanyo küsü nga küphratele münyiethuoh ülo?” ti Jisu vü küna.

⁶¹Thitü ma tü zohmti petewa nü zanyo küsü nga rülemütsü nüh sa. Thinü Levü Kümüsiewa nüh ma vü, “Noh tü Khrista, Akütsia Tsawa wiethuoh ülo?” ti küna.

⁶²Thinü Jisu nüh, “Ah wiethuoh, thi nohri tü anyi Tsawa kükhratsa azhie wuovü shupeküveh thi rügi vü akülu vünüh küturu ngu naveh,” ti küza.

⁶³Jüti Jisu nü phrate ünü, Levü Kümüsiewa tü arüshu nü ma thsü zokhri tajinü, “Hiri povü küpa phale nü mowa sana lo?

⁶⁴ Nohri mpa nga ma nüh Saküüwuowa küüjo zhü küphra thsürathuoh nü, nohri mowa müsheveh lo?” tisa Jütisanü mari aveh nüh ma tü küsükümü arüle vü pevehthuoh ti müshe müsümü.

⁶⁵Jüti satajinü mari wuori nüh ma nyia vü amütsemüshüke thi ma nyia tietemütü nü ake shekürülo taji ma to nü ma vü, “Noh setsaküthsüzhü küzamo,” ti sa. Thi riehuori nüh ma siewa nü ma je tsü.

⁶⁶Thinü Pitor tü nyula kükhuvü tsieveh nü Levü Kümüsiewa siepevühküsü rü nü;

⁶⁷Matü Pitor anyi küho peküveh künguvü ma nü ma no taji, “Noh nga Jisu Nazareth sietse nü ah?” ti küna.

⁶⁸Thitü ma tü kürü taji, “Hi nü müthsü, jü mpa mükünyü noh nüh mowaküzaveh nüh hi nü mümüshera,” ti sanü ma tse alepie vü wa ünü awi khuru.

⁶⁹Jümase vü nga asiepevüh jümatü ma ngu lehü nü ma kütuo vü tsie peküvehri vü, “Hama nga ma refüri azhie nüh küsü wie lie,” tisa lehü.

⁷⁰Thitü ma tü kürülehü. Jüsevü nga pike peveh ünü jüla tsiepeküvehri nüh Pitor vü, “Noh nga ma refüri küsü tsawiethuoh, küpakenühnyunü no tü Galileeri küsü wiethuoh nü,” ti küza. Jütisanü mari zhüküsü satewa.

⁷¹Thitü ma tü küshiephokewie taji, “Hi tü no nüh phrate peküveh anyiwa tü müthsütsawielie,” ti küza.

⁷²Jüti phrate ünü awi akünyiawa khuteru. Thinü Pitor tü Jisu nüh jüma tüvü ma vü küüza, “Noh tü awi künyi keri müjie kükhu atüvü küchekeri hi kürü naveh,” ta küsa azhüwa ma se müshera. Thinü matü azhü jüma müshekera nü krietewa.