Read Pochuri Naga MARK 15 Bible Online

MARK 15 - Pochuri Naga bible

MARK 15

¹Jütisanü thoru ünü levü küjiri nüh kükhruori thi Wule küsosieri thi kümühu aveh sie kürüchie nü Jisu phete thi masie wa nü Pilate vü tsüküzemü.

²Thinü Pilate nüh ma vü, “Noh tü Judahri Kajiwa wiethuoh ülo?” ti küna. Thinü ma nüh rüle taji ma vü, “Ah, noh nüh küüza kümüjiewiethuoh,” ti küza.

³Jütiküsavü levü küjiri nüh azanyo hozake phrate nü ma müte, thitü ma nüh zanyo küsü nga rüle mari mütsü.

⁴Thinü Pilate nüh ma küna taji nü, “Noh tü zanyoküsü nga rületsü nti samüvehwiethuoh ülo? Halie, mari nüh zanyoküzakele phrate nü no müteveh lo?” ti küza.

⁵Thitü Jisu tü zanyo küsü nga rüle mütsüwie, jükenüh Pilate tü ngoshe.

⁶Thi akhu jula mari nüh küsizhe vü küperi thawa khuonaveh nüh Pilate nüh küshushuti.

⁷Jütiküsa tsothovü Barabas ti küsa sorkari münongü nüh sataji nü anyiri fethekümü küsü nyuri sie küsi sapeveh.

⁸Thinü anyi riekhuowa nüh ma nüh khanavü mowa wule vünüh sarü nüh jükümjie vünüh mari vü sa tsü üti ma vü khuo.

⁹Jütiküsavü Pilate nüh mari vü, “Hi nüh Judahri Kajiwa vi nohri vü küütsü nthe ünü nyu lo?” ti küna.

¹⁰Küpakenühnyunü levü küjiri tü ma noküüjizhi kenüh ma virü ma kevü küthse küthsü kenüh.

¹¹Thitü ma nüh Barabas vi mari küütsü na küsa kenüh levü küjiri nüh anyi riekhuowa küchü.

¹²Thinü Pilate nüh mari vü shele, “Thinü hitü nohri nüh Judahri Kajiwa ta küsawatü vi mowa sa üti lo?” ti küna.

¹³Thinü mari tü ziele nü, “Ma zekemüluo,” ti küza.

¹⁴Thinü Pilate nüh mari vü, “Mokenüh lo? Ma tü kümüsü mowa samülo?” ti küna. Thitü mari tü kümüsütsa zie kürügi she taji nü, “Ma zekemü luo,” ti küza.

¹⁵Jüti sataji nü Pilate tü anyiri külo sangü taji nü Barabas vi mari tsümü. Jütisanü ma nüh alikümülah nüh vi Jisu fetsü nü zekemü üti vi mari vü tsümü.

¹⁶Thinü arienyiri nüh ma sie müzazhe nyula vü wa nü arienyiri refü aveh jiru küsehzhu khe.

¹⁷Jütisanü mari nüh athsü küsüma küsü vi ma kümüphie, thi arüzhünüh mükie taji nü kaji lüwe kümüjie küsa küsü sah nü ma lü rügivü thse.

¹⁸Thi mari nüh, “Judahri kajiwa, halie salam ti sanü ma khurü.

¹⁹Thinü mari nüh amühshüh küsü vi ma lü fe tsü, thi ma vü amütsemüshüke nü khotsütsuo ma khurü.

²⁰Jütisanü mari nüh ma vi mürümüle kümü sevü, ma vünüh rüwuomo athsüküsümowa phremütü nü ma thsümünyi vi küvü le taji zekemüluo nti sietewa.

²¹ Thinü Simon Sirenri küsü Alexander apa thi Rufas masü anyu vünüh tse ünü wurie taji ma khieluothso küükha.

²²Jütisanü mari nüh Jisu sie Golgotha, mazhünyo, alürü azhie ti küsa vü wa.

²³Thinü mari nüh akhah thi thsokhaju sarü nü vi ma küzhu thitü ma nüh müzhu nti sa.

²⁴Jütisanü mari tü ma zekekümüsevü, thari nüh küzake küvile nüh ti aküze sanü ma thsümünyi küsuo.

²⁵Thi münühu küche vü mari ma vi khieluothso vünüh zekemü.

²⁶Thinü ma lü rügi vü “JUDAHRI KAJIWA” ti ma phraküümüsü zhünyo vünüh rhüke mütü.

²⁷Thi rühukütsari künyi: küsü ma zhiewuovü thi küsü ma zhu wuovü ti zeke.

²⁸Zhütsazhü wa juna küsa kenüh hakümjie ma vi awule küphrürie vü chiekemütü.

²⁹Jütiküsavü ale jüla kütsuokükhru küsari nüh ma rünyie thi mari alü küngo nü, “O, noh nazizheh zoriemü taji nü rülo kücheazhie vünüh küsalewa tü,

³⁰Noh mpa noh külole taji khieluothso vünüh teturuluo mo,” ti küza.

³¹Jükümjie levü küjiri nga Khonyo Küsosieri sie ma rie sataji nü, “Ma tü küpari nü küloleraveh, thitü ma mpa ma nü mükülolera.

³²Hiri nga ngu taji nü tsotü na küsa kenüh Israel kajiwa Khrista tü khieluothso vünüh küütüruluo,” ti haluo pe. Thi ma sie khieluothso vünüh küzeke künyi nga ma vü azhükümüsü phrate.

³³Jütiküsavü münühu türo vünüh wa tügu küju azhi jüla aveh vü zosheke pe.

³⁴Thinü münühu tügu vü Jisu tü zie kürügi she taji, “Eloi, Eloi, lama Sabakthani,” mazhünyo thuoüji nü, “Eh Saküüwuowa, eh Saküüwuowa, Noh mokenüh hi jamüthuoh lo?” ti phrate.

³⁵Jütiküsavü jüla küpe anyi wuori nüh jü thsütaji nü, “Halie, matü Elijah jivehthuoh,” ti sa.

³⁶ Thinü nyi küsü nüh zhüwa achieshu vi rheliviju lovü tehke tajinü viru amüshüh küsü lovü shoke nü ma küzhu taji nü, “Pelachi, Elijah turu nü ma vi azhih vü teru na ünü nyunüh nonoluo,” ti küza.

³⁷Thinü Jisu tü azhü rügi vünüh zie taji nü ma sietse jaküzemü.

³⁸Jütiküsavü Kükhurüizhe vü athsü thuohteküsawa alü vünüh ajih küjukükri künyi sanü kritewa.

³⁹Thinü ma nüh azhü zie taji ma sietse küzekümü arienyiri müzake anyia nüh küjiwa ma tüvü tsie taji nü peküvehwa nüh ngu taji, “Anyi hamaha Saküüwuowa Atsa tsahwiethuoh,” ti küza.

⁴⁰Thi jütisapeküvehvü nyimzari küriekhuo küsü nga kületsuo vünüh nopeveh: jümari azhie nüh Magdalene Maria thi Jems kürünguowa thi Joses masü aza Mari avühwa thi Salomi nga tsiepeveh.

⁴¹Jümaritü ma Galilee vü küpevü ma senyi taji nü ma küchekütsüsa, hamari mpa mükünyu ma sie Jerusalem vü kükhru nyimzari hozake nga tsie peveh.

⁴²Jütiküsavü münüle ru ünü, zanyoküüche rülo sakümüthuoh kenüh, mazhünyo Judahri kümünyierülo sabbath ti küjiwa rülo atüvü sakümükethuoh kenüh,

⁴³Saküüwuowa kükaji küru huo peküveh ma nyo Josef ti küsa Arimatheari zanyoküthsü küsieke küvüri küsü mükrüwiethuoh nüh aluoveh jisheke nü Pilate vü ru nü Jisu kümo khuo.

⁴⁴Thinü Pilate tü ngo nü, ma küsie vünüh sümüthuoh nüh thsüna küsakenüh küna nti arienyiri müzake nyia nüh küjiwa ji.

⁴⁵Thinü ma tü müzake nyia nüh küjiwa vünüh thsüra nü Jisu kümo vi Josef tsümü.

⁴⁶Thi Josef nüh linen thsü kümühie küsü sünü Jisu kümo vituru jülovü thse nü küzhu nü viwa alohphieke nü arüku saküsa lovü thse taji aloh küsü küprirü arükuwa sotemü.

⁴⁷Thinü Magdalene Maria thi Joses aza Maria masü nüh ma viwa küthsepe ngu.