Read Pochuri Naga MARK 2 Bible Online

MARK 2 - Pochuri Naga bible

MARK 2

¹Rülo pike sevü Jisu nüh Kapernaum vü shele tu ünü ma azhelovü peveh ta küsa anyiri nüh thsünyuotewa.

²Jütisanü, müküthsü vünüh shiti anyiri ru azhe protewa nü amükhie vü nga kütsiepe münyie nüh satewa; thi ma nüh Zhülekümühie zhüwa vi nyiri sosie petewa.

³Jütisa küvehvü nyi müzü nüh wiechuküsüri küsü kha ma vüru.

⁴Thi anyiri nüh chiluokümüle kenüh ma kha nü ma vü shenyimüwara nüh sa, jükenüh ma küto vünüh azhe rügi vü phrüphie taji nü wiechuküsüwa küzeh nü Jisu küto vü khakürüshe küze.

⁵Thinü Jisu nüh mari kütsotü küji ngu nü wiechuküsüwa vü küüza, “Eh tsa, noh kükhiemuori nojatsü müthuoh,” ti küza.

⁶Thitü Khonyo küsuori wuori jüla nyi peküvehri nüh mari luoveh vünüh müshe taji,

⁷“Anyi hamatü mokenüh hakümjie phraveh lo, ma tü Saküüwuowa phrakümüsü müthuoh, Saküüwuowa wieküchie nüh thawa nüh kükhiemuo noja nyuri tsürana lo,” ti müshe pe.

⁸Thinü Jisu tü ma sietse vünüh mari nüh müshe küveh thsüra taji nü mari vü küüza, nohri mokenüh zanyo hakümjieri müshe veh lo,

⁹Thinü wiechuküsüwa vü, “Noh kükhiemuori nojatsümthuoh,” ti küsa küphratewa thi “Süra noh ze kha nü ale tsetewaluo,” ta küsa küphrazhü hamasü khiemawa küürüzi lo?

¹⁰Thitü anyi Tsawa tü azhih hala kükhra pe nü kükhiemuo nojakütsüra peveh ta küsa nohri küthsü naküsa kenüh, (Ma nüh wiechuküsüwa vü küüza),

¹¹Süra noh shiezeri vi nü tse noh zhe vü tewaluo, ti hi nüh küüzawie.

¹²Thinü ma tü müküzhikewiethuoh nüh shita ma shiezeri kha nü mari aveh atü vünüh alievü tsezhutewa; thinü mari aveh küzüla aküngo müsanüh sanü Saküüwuowa küthola phrate nü, “Hiri tü küsükeri wienga hakümjie müjie ngu tsatsawie,” ti sa.

¹³Jümase vü ma tse le Galilee juküji nato vü wa; thinü anyi ashieji aveh ru ma nato vü pro, thinü ma nüh mari sosietsü.

¹⁴Jütisanü ma nüh tseküwa vü, Alfius atsa Levi akhrükükhrüh küüro sapela nü ma nüh ma ngu taji nü ma vü küüza, “Noh eh senyi luo,” ti küza. Thinü ma süra nü ma senyitewa.

¹⁵Jüsevü Jisu nüh Levi azhe vü wa nü ashietsa nti shupevehünü mükünongüri kenüh akhrükükhrühri thi anyu vünüh zhejakümüri hozake ru Jisu thi ma sehnyiri sie shupe: mari anyi hozake ma senyi tekütsethuoh kenüh.

¹⁶Thinü Khonyo küsosieri thi Farisiri nüh anyu vünüh zhejakümüri thi akhrükükhrühri ma sie ashietsa küveh ngu nü ma sekünyiri vü, “Ma tü mokenüh akhrükükhrühri thi anyu vünüh zhejakümüri sie kütsaküzhu sapeveh lo?” ti küna.

¹⁷Thinü Jisu nüh azhü jüma thsüra nü mari vü küüza, “Kümütsari tü nahziküthsüri sie zanyoküsü küsa münyie, thitü künari kenüh wiethuoh; hi tü kümtseri ji nti müru, thitü kükhiemuori saküükhaphrü nti küru wie,” ti küza.

¹⁸Jüma tsotho vü Johan senyiri thi Farisiri tü assa sasati; thinü anyi wuori ru ma vü, “Mokenüh Johan sehnyiri thi Farisi sehnyiri nü assa sasati lo, tü noh sehnyiri nü assa mü sasatilo?” ti küna.

¹⁹Thinü Jisu nüh mari vü, “Anyi küsü avüvüh vi taji nyuri sie tsazhu küpevü kümünyutepawa mari siepeküveh vünüh ma fülüpuori tü assa samühie veh lo? Mari nüh kümünyutepawa mari sieküpe küju nü mari tü assa müsara.

²⁰Thitü marülo ru naveh, thi mari vünüh kümünyutepawa sieteküwa vü; jürülo vü thuoüji mari assa sanathuoh.

²¹Jümasevü nga, nyi küsü nga athsü kürüthe vi athsü küruwi vü khiekemüveh, jüta thuoüji kürüthewa tü kürüwiwa vünüh shokhri tewanaveh, thi kri küjitewa naveh.

²²Jüsevü nga, nyi küsü nga akha kürüthe vi sahu lehuokürüwi lovü zhimüveh: jüta thuoüji rhelivi kha kürüthewa nüh sahu lehuo kürüwiwa vühphumünaveh, thi akha nga thi sahulehuo nga poka münaveh; thitü rhelivikha kürüthe vi sahulehuo kürüthe lovü müthseji mümühie.

²³ Sabbath ti küji Judahri kümünyierülo küsü Jisu thi ma sehnyiri tü nyura zhu vehthuoh taji tse ünü, ma sehnyiri tü nyura khuozhi shi nti sa.

²⁴Thinü Farisiri nüh ma vü, “Halie, mari tü mokenüh Sabbath tiküji Judahri kümünyierülo vü awule mükünyu saveh lo,” ti küna.

²⁵Thinü ma nüh mari vü, “Khanavü David nüh mowa sanüh nohri müchiewie lo, ma thi ma senyikütseri nüh müviji mükümühievü thi rümakümüvü mütsa ülo?

²⁶ Abiathar levü küjiwa tsotho vü David nüh Saküüwuowa zhelovü tu nü alevüri wieküchie nüh akütsa wule mükünyu vi Saküüwuowa vü tsüküsawa tsa, thi vi ma senyikütseri nga mütsü ülo?” ti küza.

²⁷Thi ma nüh mari vü küüza, “Kümünyierülo tü anyiri kenüh sasatü veh, thitü anyiri tü kümünyierülo kenüh samüsa.

²⁸Jükenüh anyi Tsawa tü kümünyierülo nyia vü nga avü wiethuoh,” ti küza.