Read Pochuri Naga MARK 8 Bible Online

MARK 8 - Pochuri Naga bible

MARK 8

¹Jütiküsa tsothovü anyi riekhuo watü zhi küluole kümü kenüh thi moma tsanüh sakümüthuoh kenüh Jisu nüh ma sehnyiri ma vü jike taji mari vü küüza;

²“Hi nüh anyi riekhuowa no kümüze müthuoh, küpakenühnyunü mari rüloküche eh se nyitekütsethuoh kenüh, thi tsana küsa zanyoküsü nga münyiethuoh.

³Thi hi nüh mari kürüma taji mari zhe vü küzemüthüoüji lekhuji vünüh mari tü avo nüh phathemünanü, küpakenühnyunü mari wuori thuoüji aleküsuo vünüh küru kenüh,” üti küza.

⁴Thinü ma sehnyiri nüh ma rüle taji, “Khiela nüh areza hakümjie küsa vünüh nyi küsü nüh anyiri hazake avo sakümüwarana ülo?” ti küza.

⁵Thinü ma nüh mari vü, “Nohri alohse küzake peveh ülo?” ti küna. Thinü mari nüh, “Türü peveh,” ti küza.

⁶Thinü ma nüh anyiri vü tsuo azhih vü shupe khe ti küza, jütisanü ma nüh alohse türü jüri vi taji Saküüwuowa siaketsü taji küsuo anyiri vü tsü üti zokhuo nü ma sehnyiri vü tsü taji küsuo anyiri vü küütsükhe.

⁷Jümpa mükünyu mari tü anga nga küzah küütazüzü pike viru, thinü ma nüh tsia jümari vü nga thse taji küsuo mari tsü üti ma sehnyiri vü tsü taji küsuo anyiri vü tsükheh.

⁸Jütisanü mari tsa taji nü müwarakheh, thi mari nüh kütsatü amase phazhu nü akhuo küza türü phaküprora.

⁹Thi mari akütsari chieküwa mari anyi anyie müzü. Jütisanü ma nüh mari küze khemü.

¹⁰Thinü ma tü müküzhikewie thuoh nüh ma sehnyiri sie ajuhie küsü lovü tetu nü ajuhiewa hie Dalmanutha ti küsa azhih wuovü tewa.

¹¹ Thinü Farisiri rü ma müte nü rügi vünüh athsoshi küsü sa taji mari kütsa üti ma sieküproluo.

¹²Thinü ma tü ma sietse vünüh aluoveh küna jikhi sanü küüza, “Mokenüh khinyiri atsa tü athsoshi phapha tinü?” Hi nüh nohri vü küzatoke naveh, “Athsoshi sa taji khinyi kürhori vü mütsürathuoh,” ti küza.

¹³Jütisanü ma tü mari jamü taji nü ajuhie lovü tetu le taji ajuhiewahie anato küpa vü tewa.

¹⁴Jüsevü asehnyiri tü alohse müvi nüh kümamü, ajuhie lovü nga veh küsüküchie nüh jüma nyiavü vü mütse nüh samü.

¹⁵ Thinü Jisu nüh mari vü, “Farisiri amahzhi vünüh thi Herod amahzhi vünüh kükheke nü azhüzhüluo,” ti wurie nü mari vü küza.

¹⁶Thinü mari mpa mari jüle tajinü, “Ma nüh ha küzaküveh thuoüji küpakenühnyunü thitü hiri alohse münyie nüh saküvehthuoh kenüh wie,” ti küza.

¹⁷Jütisaküvehvü Jisu nüh jü thsüra taji mari vü, “Nohri alohse vimü kütse kenüh mokenüh haluo tse ülo? Nohri khinyi nga müthsü mümüshi nüh tsewie, nohri luoveh sakükhosheke müwiethuoh ülo?” ti küna.

¹⁸Nohri notha peh taji azanyo ngumüveh ülo? Thi nohri khüna pe taji azanyo künaramüveh ülo? Thi nohri kümüshe nga müsheramüveh wie ülo?

¹⁹Hi nüh anyiri anyie münga azhie vünüh alohse amase akhuo aküzaküzake phara ülo? ti küna. Thinü mari nüh ma vü, “Türakünyi,” ti küza.

²⁰Jümpa mükünyu alohse türü vi anyi anyie müzü azhie küsuokütsüvü nohri amase akhuo küzake phara ülo? ti küna. Thinü mari nüh mavü, “Türü,” ti küza.

²¹Thinü ma nüh mari vü, “Nohri tü mokümjie khinyi nga mümüshera nüh tsewie ülo?” ti küna.

²²Jüsevü mari tse Bethsaida vü ru. Thinü anyiri nüh nothaküüjuri küsü sie Jisu vü ru nü anyi jüma pa tsü üti wurie ma vü khuo.

²³Thinü ma nüh ma ke si taji anyu alievü sie tsezhutewa; jütisanü ma notha künyi vü amütse müshüke nü ma ke nüh pataji nü, “Noh azanyo wuori nguveh ünü nyu ülo?” ti küna.

²⁴Thinü nothaküüjüwa nüh ma lü toke nü no taji küüza, “Anyiri athso kümüjie toke nü aletseküveh ngu veh,” ti küza.

²⁵Thinü ma nüh ma ke künyi vi ma notha palehü tajinü ma küüno ünü ma notha tü mühie jüra üta ji azanyo veh ngu mütsera.

²⁶Jütisanü ma nüh ma zhe vü tewa üti küza küze nü ma vü, anyu vünga shele müwa tümü thi anyi küsü vü nga müküzatümü üti ma vü küza.

²⁷Thi Jisu nüh ma sehnyiri sie Kaesaria Filipi anyuri vü tse wa, jütisaküwa vü ma nüh aletsa vünüh ma sehnyiri vü küna taji, “Nyuri nüh hi tü thawa üta phrateveh ülo?” ti küna.

²⁸Thinü mari nüh ma vü, Johan Baptistwa ti sa, thi küpari wuori nüh, “Noh tü Elijah üta, thi wuori nüh asetsaküthsüri azhie nüh küsü ta küzü vü,” ti küza.

²⁹Thinü ma nüh mari vü, “Jüta thuoüji nohri nü hi tü thawa ti saveh ülo?” ti mari vü küna. Thinü Pitor nüh ma rüle taji, noh tü Khrista wa wiethuoh! ti küza.

³⁰Jütiküsavü ma nüh mari vü, nyi küsü vü nga ma zhükuwa vimüküzatümü üti küzaphoketsü.

³¹Thinü ma nüh mari sosie tajinü, Anyi Tsawa tü arüle hozake vünüh münomüna wienathuoh; thi asierhüri thi kükhruo küjiri thi Khonyo küsosieri nüh ma küle taji nyuri nüh ma küfethe na, jütisataji nü rülo küche ase vünüh rhosürale naveh.

³²Ma nüh hama mari vü phrate kümtse sheke tsü, Thinü Pitor nüh masie küpavü wa üta jinü ma phra.

³³Thitü ma nüh kürele ma sehnyiri no taji Pitor phra nü, “Tsuore noh eh se vü tewaluo, noh tü Saküüwuowa zhi kümüshe vünüh nyu nü anyiri zhi kümüshe vünüh wie,” ti küza.

³⁴ Thinü ma nüh anyiri ashiejiwa nga thi ma sehnyiri nga ti ma vü jike taji, “Anyi küsüküsü nga eh sekünyingüri thuoüji ma mpa ma kükheke thi ma khieluothso kha taji eh senyi luo,” ti küza.

³⁵ Küpakenühnyunü thari nüh ma mpa ma kürho müshie naveh nüh jüma nü kriamü naveh, thitü thari nüh eh kenüh thi Zhüle kümühiewa kenüh akürho kümie naveh nüh jümari nü akürho wa küülole wie naveh.

³⁶Nyi küsü nüh azhih aveh vi ma zhi sara taji ma kürhowa kümie müthuoüji ma künyia mowa peveh ülo?

³⁷Nyutü anyi watü mowa vi nü ma kürhowa müzhile na ülo?

³⁸Thi anyi küsüküsü nga müsarüla sanü thi kükhiemuo sanü khinyi anyi hala rhoküvehri atü vü eh zhüku thi eh zhü kenüh zükrü müthuoüji anyi Tsawa nga ma Pa nüh rügizhüleri sie nü kütholathovü sanü küru vü anyi jüma kürho phrate zükrüm naveh, ti küza.