Read Pochuri Naga LUKE 13 Bible Online

LUKE 13 - Pochuri Naga bible

LUKE 13

¹Jütsothovü nyi wuori nüh Galileeri nüh Saküüwuowa vü küsah thuoh saküveh vi Pilate nüh fethe kümü Jisu vü küza.

²Thinü ma nüh mari vü, “Nohri kümüshe vü Galilee hamari tü jükümjie fethe kümü kenüh Galilee küpari aveh nyia vünüh khiemuoveh ti müshe veh ülo?

³Hi nüh küza naveh, nyuzhima, thitü nohri nga nohri luoveh mükükhaphrü asevü nü jükümjie süwie naveh.

⁴Nyutü nohri kümüshe Siloam vü akhajiewa küneh vü nyiri türa tüze vehthe kümüri tü Jerusalem vü küpe anyiküpari nyia vü müküle sazih ti küsa müshe veh ülo?

⁵Hi nüh küzananü nyuzhima, thitü nohri nga nohri luovehmükhaphrü thuoüji jükümjie süwie naveh,” ti küza.

⁶Thinü ma nüh küüzhühie zhü hama küza tajinü, nyi küsü nüh ma rhelivi zhuh vü jichuo rhu küsü shie sataji avi peveh ünü nyu nüh ti no nti wa, tü küsünga müpela nüh sa.

⁷Jütiküsavü ma nüh rhelivi künowa vü, “Halie, hi nüh mavi küche jichuo hama avi no tsethuoh, thitü küsü nga müngu, jükenüh shüchie mü luo, sataji mokenüh azhieküükierie sana lo?” ti küza.

⁸Thinü ma nüh, “Küjiwa hi nüh azhih ma rhu chümükiele taji azhih kümühie müjie küthse küju nü jüti samülawie luo,” ti rületsü.

⁹Jütisanü wiethuoh avi pera thuoüji mühie she thi lo she thuoh, thitü mpe thuoüji noh mpa shüjamü luo, ti küza.

¹⁰Sabbath ti küji Judahri kümünyierülo küsü vü ma tü künazizhe küsü vü sosie peveh ünü,

¹¹nyimzari küsü amahvi türa tüze kümüsü sietse nüh ma vü pe taji aküshi mütokera thuoh nüh küsa küükhoküsü jüla ru.

¹²Thinü Jisu nüh ma ngu nü ma ji taji, “Nyimzawa, nomünomüna kütsewa tü lejamütü thuohnü,” ti küza.

¹³Ma nüh ma ke ma lü rügi vü thse ünü shita maküshiküükhowa tü mühiera taji Saküüwuowa siake.

¹⁴ Thitü künazizhe vü küjiwa nüh arüshu, küpakenühnyunü Jisu nüh kümünyierülo vü saküümühie kenüh, thi ma nüh nyiri vü, “Küüro sana küsa kenüh rülo türo savehthuoh, jükenüh rülo jürivü nohri ru nü sakümühie luo, thitü kümünyierülo vünü müsara,” ti küza.

¹⁵Jütiküsavü VÜWA nüh, “Nohri küthseküsari, nohri küsüküsü nga kümünyierülo vü nohri mieshü thi nohri rawu kuli le taji siewa aju zhu müveh ülo?

¹⁶Jütathuoüji nyimza hama tü Abraham atsa küsü sataji Tsuore nüh mahvi türatüze ma phetekütse kümünyierülovü leküja alenyu ülo?” ti küza.

¹⁷Ma nüh hama küüza vü ma mükünongüri saküzükrüshe tsü, thi ma nüh küthola küüro hamari küsa kenüh nyiri aveh nüh lozhe she.

¹⁸Jükenüh ma nüh, “Saküüwuowa kajipe tü mokümjielo? Thi mowa nüh vi kümüjie mühie veh lo?

¹⁹Jümatü nyi küsü nüh rhünyuowitha küsü viwa maphari vü thse nü jiru taji athsorhu sara taji amürhü vü prükütse amüwari nüh ma tsuonari vünüh aphra küsakümüjie wiethuoh,” ti küza.

²⁰Jüsevü nga ma nüh, “Saküüwuowa kajipe tü mowa nüh vi kümüjie mühie veh lo?

²¹Jümatü nyimzari küsü nüh ahzhi vi ahie alakhu küche lovü thse nü müjie küshü küju nü küthiküsa kümüjie wiethuoh,” ti küza.

²²Jütisanü ma tü Jerusalem vü wa nti küwavü tsemüngunü anyu küza küji vü sosie wa.

²³Thinü wuori nüh ma vü, “VÜWA, külolena küsari tü züla naveh ülo?” ti küna. Jütiküsavü Jisu nüh,

²⁴nohri lepie kümünyiewa vünüh tu nti wurie luo, küpakenühnyunü hi nüh küza naveh, nyiri hozake wienga jülovü tu nti phah naveh thitü müsara nüh sanaveh.

²⁵Zheh vüwa nüh süra taji amükhie küsükeri khemü thuoüji noh tü anyulavü tsie nü amükhie kütü tajinü, VÜWA, amükhie sa hiri tsüluo ta sanaveh. Thitü ma nüh, “Noh tü khievü nüh tse nüh hi nü müthsü,” ta küza naveh.

²⁶Thitü nohri nüh ma vü, “Hiri tü noh tüvü nüh tsazhu, thi noh nüh hiri lekhuji vünüh sosie,” ti küza naveh.

²⁷Thitü ma nüh, hi nüh küza naveh, nohri khievü nüh tsenüh hi nü müthsü, nohri aveh zanyo kümüsü küsari, hi kari tewaluo, ta küza naveh.

²⁸ Thi nohri nüh Abraham thi Isaac thi Jacob thi setsaküthsüri Saküüwuowa kajipe vü küpe ngu nü krie thi aha hari naveh, thi no thuoüji jüla nüh zheja mü naveh.

²⁹Thi zhieshu vünüh thi zhietu vünüh thi zhieseh vü thi zhietü vünüh ru taji Saküüwuowa kaji kütsaküzhu pevü pe nathuoh.

³⁰Thi halie, aseri wuori apo vü tewa naveh, thi apori wuori asevü tewa naveh, ti küza.

³¹Jüma tsotho vü Farisiri wuori ru taji ma vü, “Noh hala nüh tewaluo, küpakenühnyunü Herod nüh no fethe nta saküveh kenüh,” ti küza.

³²Thinü ma nüh mari vü, “Wa taji jiperü jüma vü küzaluo, halie nosü thi thuohtü nüh mükümtse sietse zheja naveh thi künari sakümühie naveh, thi rülo kücheawa thuoüji eh küüro sajumünathuoh,” ti rületsü.

³³Jüwie ketünga hi tü nosü thi thuohtü thi jütü vü mütse wieji mümühie, küpakenühnyunü Jerusalem vünüh küchie nüh alievü nüh nü setsaküthsüri küfethewa nyu ta küza küsa kenüh.

³⁴“Halie, Jerusalem, Jerusalem, setsaküthsüri küfethewa, thi novü küüzeri aloh nüh küvehwa, awivüh nüh ma tsari jizhu taji aküsa kükhu lovü küthse kümüjie hi nüh küzakeri nga no tsari küüjizhu ngüveh lo? Thitü nohri nüh mamüthuoh.

³⁵Halie, nohri zhe tü kulemüthuoh. Hi nüh nohri vü küzanaveh, nohri nüh, VÜWA nyo vi nü kütsewa kütsiawa ta küsa müküüza küju nü nohri hi müngurathuoh,” ti küza.