Read Pochuri Naga LUKE 15 Bible Online

LUKE 15 - Pochuri Naga bible

LUKE 15

¹Jütiküsavü rülo küsü akhrü kükhrühri thi kükhiemuori hozake ma zhü küna nti ma se nyiru.

²Thinü Farisiri thi Khonyo küsosieri nüh jazhi taji, “Anyi hama tü kükhiemuori sieke thi mari sie kütsazhu sa veh lie,” ti küza.

³Jükenüh ma nüh küüzhühie hama mari vü küza:

⁴Nohri anyi wuori nüh nyihzhü müzake peh taji jümari azhie vünüh küsü kümiemü thuoüji gura kenüh tüguri areza vü samü nü kümie kümüwa müjieküphara küjunü mphatü le naveh lo?

⁵Thi ma nüh jüma phara thuoüji lozhe taji jüma vi ma safürügivü sanü,

⁶azhe vü rujura thuoüji ma füri thi ma zhephruri jizhuh taji, “Hi sie lozheluo, küpakenühnyunü eh nyihzhükümiekümüwa küngurathuoh kenüh.”

⁷Jükenüh hi nüh küza naveh, jükümjie eh luoveh mükhaphrü ketünga azhümünyie ta küsa kükhiemuori küsü luoveh khaphrü thuoüji künyitsari gura kenüh tügu nyia vünüh rügivü tü lozhe naveh.

⁸Jümpa mükünyu krevühri küsü nüh tuli türake penü küsü kümiemü thuoüji ma tü müjie küphara küjunü aküla tso nü azhe rhü taji mphatümü naveh lo?

⁹Thi ma nüh jüma phara thuoüji ma füri thi ma zhephruri jizhuh nü, “Hi sie lozheluo, küpakenühnyunü eh tuli kümiekümüwa küngurathuoh kenüh,” ti küza.

¹⁰Jükenüh hi nüh küza naveh, kükhiemuori küsü luovehkükhaphrü kenüh Saküüwuowa zhühleri nga lozhe nü küza.

¹¹Jüsevü nga ma nüh, khanavü nyi küsü tü atsa nyimpari künyi peh;

¹²thinü kürünguowa nüh ma pa vü ru nü, “Eh pa, zanyo ehsuoperi hi tsüluo,” ti khuo. Thinü ma nüh küsuo nü tsümü.

¹³Rülo pike asevü kürünguowa tü ma zhiri vi nü anyu aleküsuo vü tewa, jüla nüh tsosütsorü taji makünyirhie aveh saküramü.

¹⁴Jütisanü ma zanyo aveh saküramü ünü anyu jüvü kümükhuojih küji ru nü ma tü thotsa she tewa.

¹⁵Jükenüh ma tü anyu jüla nyi küsü vü wa nyipe ünü ma nüh ma küze taji awu kühuo.

¹⁶Thinü ma tü awushie aküfü lovü kütüwa nga tsangü, thitü nyi küsü nga ma vü zanyo küsü nga mütsü.

¹⁷Jütiküsavü asevü thuoüji ma mpa ma se thsüra taji, “Eh pasieperi tü kütsaküzhu zhile thi küüluo nga peveh, thi hitü hala nüh khehthe na savehthuoh,” ti ma mpa ma jüle.

¹⁸Hi süra nü tse eh pa vü tewa le taji ma vü, “Eh pa, hi tü Saküüwuowa tüvü nga thi noh tüvü nga khiemuomüthuoh,

¹⁹hi tü no tsa ta küsa nga müjitsethuoh, thinü hi vi nosiepe küsü kümüjie nga küsamü luo,” ti küza.

²⁰Jüti sataji ma tü süra nü tse le ma pa vü wa. Thitü azhe ru müküju kületsuo vü kütse vünüh mapa nüh ma ngu taji ma no kümüze she nü zhüwa ma khekethi kümetsü.

²¹Thinü ma tsanüh ma vü, “Eh pa, hi tü Saküüwuowa atüvü nga thi noh tüvü nga khiemuo müthuoh. Hi tü khinyi nü no tsa ta nga müjitsethuoh,” ti küza.

²²Thitü ma pa nüh ma sieperi ji taji nü, “Shishiti wa thsümünyi kümühietsari viru ma küvü luo, thi tühjükhe thi jiküükruvüh viru thsetsüluo,” ti küza.

²³Thi wa taji mieshüzah kümühietsawa fethe luo, hiri kütsazhu sanü lozhe naveh,

²⁴küpakenühnyunü eh tsa hamatü sümüthuoh ti sa ünü rhosheleruthuoh, kümiemüthuoh ti ünü nguralethuoh. Jüti sataji kütsazhuwa tü sate.

²⁵Jütiküsavü ma jie tü azhu vü wa nü azhe shenyi ru ünü aza küsa thi akütsi khi künara.

²⁶Thinü ma nüh sieperi küsü ji nü mowa saveh lo? ti küna.

²⁷Thinü siepewa nüh, “No nü shele teru pevehthuoh thi no nü mühie lozhe nü ru peküveh kenüh no pa nüh mieshüzah kümühie küsü fethe nü tsazhuveh lie,” ti küza.

²⁸Thitü ma jie tü ma rüshu she kümü kenüh azhe lovü mütu nti sa, jükenüh ma pa nüh ru taji ma künyi.

²⁹Thitü ma nüh ma pa vü, “Halie, mahvi hathake sieperi kümüjie no kenüh küro thi no zhü nga mükürü wie, thitü noh tü mowa hi tsü lo? Nyihnyih küsüwienga vi hi tsü taji eh füri sie kütsazhu nga müsa.

³⁰Thitü no tsa hama thuoüji no künyirhie aveh küüphroküphrieri sie nü saküra khehmü, thi jüti sataji ma zhe vü shele ru ünü mieshüzah kümühietsawa fethe,” ti küza.

³¹Thinü ma pa nüh ma vü, “Eh tsa noh nü tsotho aveh vü hisie peh veh, thi zanyo küzake eh ke pehveh nüh aveh no zhi wie.

³²Thinü hiri tü tsotho hama sanü mülozheji mümühie, küpakenühnyunü noh nü tü sümüthuoh ti sa ünü rholeküru kenüh, ma tü kümie müthuoh ti sa ünü künguralethuoh kenüh,” ti küza.