Read Pochuri Naga LUKE 16 Bible Online

LUKE 16 - Pochuri Naga bible

LUKE 16

¹Jisu nüh ma sehnyiri vü, nyirhieri küsü tü ma künyirhieri huo na küsa kenüh siepe küsü sa. Thinü ma nüh künyirhie ma zhi aveh zorie vehthuoh ta nyuri nüh ru nyirhiewa vü küza.

²Thinü ma nüh ru ma siepewa ji taji nü, noh khuke phrateru ehkhüna vü tumüthuohnü moti samü lo. Noh nüh kürokütseri kürüh taji hi tsümü luo, küpakenühnyunü nohtü eh zanyo kühuowa nosü vünüh tuvü thuoüji müküsanüh sanaküvehthuoh kenüh.

³Thinü ma zanyo kühuowa nüh ma mpa ma jüle taji, “Eh vüwa nüh hi tü ma zanyo kühuo küüro vünüh hi jamüna sathuohnü, hi tü azhih chü nta wie ketünga kükhramünyie, thi hi tü khrütsa nti ünü zükrü, ti sa.

⁴Hi nüh mota saji mühie naveh nüh hi nüh thsüvehthuoh! Eh küüro hama jamü thuoüji thari nüh mari azhe vü hi siekeranaveh nüh jümari vü afü sanaveh,” ti sa.

⁵Jüti satajinü ma nüh ma vüwa ashewi vü küvehri küsüsü nüh jiru taji apowa vü, “Noh tü eh vüwa shewiküzake vüveh lo?” ti küna.

⁶Thinü ma nüh, “Avüju ku müzake,” ti küza. Thinü ma nüh jüma vü, “Shupe nü no lasi vi taji shiti tünyieke ti rhü luo,” ti küza.

⁷Jütisanü ma nüh küpawa vü, “Noh nü küzake vü vehlo?” ti küna, thinü ma nüh, “Ahie küüto awe müzakevüveh,” ti küza. Thinü ma nüh ma vü, “No lasi vi nüzerake rhü luo,” ti küza.

⁸“Thinü siepe mükünyitsawa vüwa nüh ma ro thsü taji küsa kenüh ma siake, küpakenühnyunü azhih hama tsari tü mari tsothori vü aro thsü taji küüto tü aküwiewa tsari nyia vünüh mühie kümü kenüh,” ti küza.

⁹Jisu nüh küzalehü taji, “Hi nüh nohri vü küza naveh, nohri mpa nüh azhih vü künyirhie sie afü saluo, jütathuoüji jüma münyie nüh sakümüvü rhoküpehuo azhe vü nohri sieke nathuoh.

¹⁰Thari nüh zanyo küzah vü nyitsa raveh nüh aküji vü nga nyitsara naveh, thi thari nüh zanyo küzah vü münyitsa nüh küji vü nga münyitsara.

¹¹Jükenüh noh nüh mükünyitsa künyirhie vü müzhütsa thuoüji thawa nüh küzhütsa künyirhie vü no tsotü navehlo?

¹²Thi nyuri azhi vü nga no mütsotüra thuoüji thawa nüh zanyovi nohri ake vü thse taji vi no zhi küüsa naveh lo?

¹³ “Siepe küsü mürhü nü küpawa kümüzemü naveh, nyutü nyi küsü vü akürho tsü nü küpawa vü kulemü naveh. Noh tü Saküüwuowa thi künyirhie masü siepe müsarhiera,” ti küza.

¹⁴Farisiri künyirhie kümünguri nüh hari thsü taji azhükümüsü phra nü ma riesa.

¹⁵Thitü ma nüh mari vü, “Nohri thuoüji anyiri atüvü nohri mpa müshokütse wiethuoh, thitü Saküüwuowa nüh noh ri luoveh thsü veh, küpakenühnyunü nyiri azhie vü müsiekütsewa tü Saküüwuowa atüvü nü akükre kenüh,” ti küza.

¹⁶Johan müjie küru küju nü Khonyowa thi setsaküthsüritü peh ru, jüsevü nüh khinyi küju Saküüwuowa kükaji Zhühthe Kümühiewa phrate tse, thi nyiküsüküsü nga wurie jülovü tuveh.

¹⁷ Thitü Khonyo vü rhüküsa kütüke küsü kümiena küsanü thajüwu thi azhih küümie nüh küürüzikhe.

¹⁸Thari nüh ma vüvüh jamü nü küpa vi le veh nüh küüphroküphrie satsevehthuoh, thi thari nüh nyuri nüh jaküsa nyimzari vi naveh nüh küüphroküphrie sa vehthuoh.

¹⁹Nyirhieri küsü athsü akümo[3] thi alo külozü nüh küto thse nü rülotsotho lora nü kürhori peh.

²⁰Thi anyo Lazar ti küsa khrükütsari akhüma mpa küprori küsü wa ma kheri vü peveh ünü,

²¹nyirhiewa nüh ashietsaküütsuotsari nga khuotsangü nü peh, thi ashuri nga wa nü ma khüma thsopori müzhipe.

²²Jütiküsavü khrükütsawa tü sümü, thi rügizhüleri nüh ma viwa Abraham küso rügivü samü, thi nyirhiewa sümü nü viwa chowumü.

²³Thinü ma tü wa nü nyihsuozü vünüh münomüna she taji toke nü no küze ünü Abraham thi Lazar ma küsorügivü küpe leküsuo vünüh ngukera.

²⁴Jütiküsavü ma tü zia taji, “Eh pa Abraham, no hi kümüze nü Lazar küze taji ma tüjü viwa aju lovü tehke nü viru eh mizhi saküüji tsü jie, küpakenühnyunü hi tü anyihzhu hala nüh münomüna shepevehthuohnü,” ti küza.

²⁵Thitü Abraham nüh ma vü, “Eh tsa, noh tü müsheluo, notü no kürho vü zanyo kümühieri ngumüthuoh, thi lazar nga jükümjie zanyo kümüsüri ngumüthuoh, thitü khinyi thuoüji ma nü lora vehthuoh, thi no thuoüji münomünavehthuoh,” ti küza.

²⁶Jümpa mükünyu hiri azhievü akhithuoh küji küsüpemüthuoh, hawuovü nüh jüwuovü wa na küsa nga müsara thi jüwuovü nüh hiri wuovü ru na küsa nga nyi küsünga müsarathuoh.

²⁷Thinü ma nüh, “Eh pa Abraham hi nüh no vü khuoveh, thinü ma eh pa zhe vü küze luo,” ti küza,

²⁸küpakenühnyunü hi tü eh nüri nyi münga peveh, mari nga kümnomnape hala teru nga müthsü tinü ma küze taji mari vü küüza luo, ti khuo.

²⁹Thitü Abraham nüh, “Mosa thi setsaküthsüri mari siepeveh, mari mpa jümari vünüh küünamü luo,” ti küza.

³⁰Thinü ma nüh, “Nyu, eh pa Abraham, wuori aküsü vünüh mari vü wa thuoüji mari luoveh khaphrütüra naveh,” ti küza.

³¹Thitü ma nüh ma vü, “Mari tü Mosa thi setsaküthsürazhü nga müküna thuoüji nyi küsü nüh aküsü vünüh rhosürawie ketünga mari samüküütsotüra,” ti rületsü.