Read Pochuri Naga LUKE 18 Bible Online

LUKE 18 - Pochuri Naga bible

LUKE 18

¹Jüsevü ma nüh mari thachutemüwa nüh khuopehuo na küsakenüh mari vü küüzhühiezhü küsü küza.

²Ma nüh mari vü, nyu küji küsü vü nyura shihküsari Saküüwuowa nga mükrü thi nyiri nga müchieke ti küsari küsü peh.

³Thi anyu jüla tünyivühri küsü nga peveh, thinü ma tü ma vü ru pehuo taji, “No eh po vi taji hi tü hi mükünongüwa nyia vü raküükhrajie,” ti khuopehuo.

⁴Thitü tsotho pike azhie nüh thuoüji müsatü nti ma kule, jütisanü ase vü thuoüji ma mpa ma jüle taji, “Hi tü Saküüwuowa nga mükrü thi nyiri wie nga müchiekewie ketünga,

⁵tünyivüh hama nüh hi saküjakünya pehuo küveh kenüh hi nüh ma po vitsüwie naveh, jütanyu thuoüji ma tü ruleruza taji hi saküüsüro pehuo naküveh kenüh,” ti küza.

⁶Thinü VÜWA nüh, ashiküsa mükünyitsawa nüh küüza künaluo.

⁷VÜWA tü ma nüh rüka küsari nüh rüza rüne krietaji peküvehri apo müvi nüh sanaveh lo? Ma nüh mari küükra münümü naveh lo?

⁸Hi nüh küza naveh, ma nüh shita mari kükra tsü naveh. Thitü jütawie ketünga nyi Tsawa küru vü azhih vü kütsotü pela nü ma nüh ngu naveh lo? ti küna.

⁹Hama sevü nga ma nüh anyi wuori mari mpa nyitsa ta sataji mari tsotü thi küpari thuoüji müküchiekeri vü küüzhühiezhü hama küza.

¹⁰Nyi künyi tü kükhuo sa nti Kükhurüzhe vü wa, nyiküsü thuoüji Farisiri thi küpawa thuoüji akhrükükhrühri.

¹¹Farisiwa tü ma mpa süra tsie taji hakümjie khuo, Saküüwuowa, hi thuoüji küpari kümüjie nyuri sakükrünü nyurazhi vi kütsa, mükümüshori, müsarüla nyutü akhrükükhrühri kümüjie mükünyu kenüh nomüna she.

¹²Hi tü Zhia küsü vü künyi keri assa sa veh, thi hi nüh ngu küveh aveh küüsuo türake sanü küsü tsüveh.

¹³Thitü akhrükükhrühwa thuoüji kületsuo vü tsie taji, ma notha wienga thajüwu wuovü kütoke mümühie thuoh nüh ma tüso fe nü, “Saküüwuowa, ha hi kükhiemuowa wie nga nokümüze tsümo,” ti khuo.

¹⁴Hi nüh nohri vü küza naveh, “Anyi hama thuoüji küpawakümüjie nyu nü ma thuoüji müshomü taji ma zhe vü tewathuoh; küpakenühnyunü anyi thari nüh mari mpa ma sa kürünyie tse veh nüh jümari thuoüji sakümüsietsü naveh,” ti küza.

¹⁵Thi mari tü ma nüh küüpa nti kürünguori nga ma vü sieru, thitü ma sehnyiri nüh jü ngu nü mari phra.

¹⁶Thitü Jisu nüh mari ma vü jike taji, “Kürünguori mükhetü hi vü küüru luo, küpakenühnyunü mari tü Saküüwuowa kajipe azhi küsa kenüh.

¹⁷Hi nüh nohri vü küzatsanaveh, nyi küsüküsü nga kürünguori kümüjie Saküüwuowa kajipe müküvi nü jülovü mütura,” ti küza.

¹⁸Jüsevü küjiri küsü nüh ma vü küna taji, “Küsosie Kümühiewa, küsuokürho vi eh zhi sana küsakenüh hi tü mowa müsaji mümühie lo?” ti küna.

¹⁹Thinü Jisu nüh ma vü, “Mokenüh noh tü hi kümühiewati ji veh lo? Saküüwuowa wie küchie nüh nyi küsü nga mümühie,” ti küza.

²⁰ Noh tü azhü tsüküsari thsüveh nü, nyihvünyipa küüphroküphrie müsatümü, müfethetümü, mürühutümü, kürie povü müsatümü, no pa thi noza siakeluo, ti küza.

²¹Thinü anyiwa nüh, “Hi nüh hi kürünguo vünüh hamari aveh müzhe tetsethuoh,” ti küza.

²²Thinü Jisu nüh jü küünaravü ma nüh ma vü, “Khinyi nga noh tü zanyo küsü müju nüh sa veh. Noh zhiküpe aveh zhumü taji vi kümükhuori suomü luo, thi runü eh se nyi luo, jütathuoüji rügivü no künyirhie peranaveh,” ti küza.

²³Thitü ma tü hama küünaravü ma lorütewa, küpakenühnyunü ma tü nyirhie she kümü kenüh.

²⁴Jisu nüh ma nophoke tajinü, “Künyirhieri nüh Saküüwuowa kajipe lovü tu na küsa küzakelenga kho lo,” ti sa.

²⁵Künyirhieri küsü nüh Saküüwuowa kajipe lovü tuna küsanü ut nüh arüjeku lovü müri kütu nüh küürüzikhe.

²⁶Thinü azhü jü küthsü wuori nüh, “Thinü thawa külole nathuoh lo?” ti phrate.

²⁷Thitü Jisu nüh, “Nyiri kenüh thuoüji müsarawie ketünga Saküüwuowa kenüh thuoüji müküsara münyie,” ti küza.

²⁸Thinü Pitor nüh ma vü, “Halie, hiri tü hiri azhezhu aveh jamü taji noh se nyitsethuoh,” ti küza.

²⁹Jütiküsavü ma nüh mari vü, “Hi nüh nohri vü küzato naveh, nyi küsü wienga Saküüwuowa Kükaji kenüh ma zhe, nyutü avüvüh nyutü ajienü nyutü azahpari nyutü atsari jamü wieketü nga,

³⁰khinyi tsothovü kürhonga hozake ngura thi thuohtüvü kürho kenüh nga küsuokürho müküngura nyi küsü nga münyie,” ti küza.

³¹Jisu nüh ma sehnyi türakünyiri siekewa taji mari vü, “Halie, hiri tü Jerusalem vü khru nti savehthuoh, thi setsaküthsüri nüh anyi Tsawa kenüh rhü küsari aveh sajunathuoh,” ti küza.

³²Küpakenühnyunü ma vi Judahmükünyuri ake vü thsemünaveh, thi ma riesa thi ma saküzükrü she thi ma nyia vü amütse müshüke naveh.

³³Mari nüh ma fe nü zothemü naveh thi rülo kücheawa ma rhosürale naveh, ti küza.

³⁴Thitü mari tü azhü hamari küsü nga müthsüra nüh sa, azhü hama tü mari vünüh küthi kümü kenüh mari tü mürera nüh samü.

³⁵Jütisanü ma tü tse Jeriko shenyi ru ünü, nothaküüjuri küsü tü lekhuji natovü shupe taji khuotsa pela.

³⁶Thinü anyi shieji kuoküwa künara nü hatü mowa satse lo? ti küna.

³⁷Jütiküüna vü mari nüh ma vü, “Jisu Nazareth tse lie,” ti küza.

³⁸Thinü ma tü zia taji, “David Tsa Jisu, hi kümüze tsüluo,” ti küza.

³⁹Jütiküsavü apovü kütseri nüh ma phra taji, “Zoti pehluo,” ti küza. Thitü ma tü kümüsütsa zia taji, “David Tsa, hi kümüzetsüluo,” ti khuo.

⁴⁰Thinü Jisu tü tsie taji, “Nyi jüma ma vü sieru luo,” ti azhütsü. Jüti küsavü ma tü ma shenyi ru ünü ma nüh ma küna taji,

⁴¹“Noh tü hi nüh mowa no vü satsü üti lo?” ti küna, Jütiküsavü ma nüh, “VÜWA, hi tü zanyo küüngumo?” ti khuo.

⁴²Thinü Jisu nüh ma vü, “Noh kütsotü mpa nüh noh sakümühiemüthuoh nüh noh azanyo ngu luo,” ti küza.

⁴³Jüti küza ünü müküzhike wie thuoh nüh ma notha zanyo ngura taji Saküüwuowa siake nü ma se nyitewa, jüütiküsavü nyiri aveh nüh jü ngu nü Saküüwuowa siaketsü.