Read Pochuri Naga LUKE 19 Bible Online

LUKE 19 - Pochuri Naga bible

LUKE 19

¹Jütisanü ma tü Jeriko ju nü anyu vehthuoh wa.

²Thinü anyu jüla nyi küsü Zekia ti küsa akhrükükhrüh nyirhieri küsü peveh.

³Ma nüh Jisu tü thawa nüh ti sanü no nti pharu, thitü nyi küzhile kenüh thi ma kru kümülu kenüh müngura nüh sa.

⁴Jükenüh ma tü atüvü zhüwa taji ampathso rügivü kuo, küpakenühnyunü ma tü jülevü kütse kenüh.

⁵Jütiküsavü Jisu tü azhie jüla ruju nü toke taji mavü no nü, “Zekia shiti turu luo, nosü hi tü noh zhevü mpe üji mümühiethuoh,” ti küza.

⁶Thinü ma tü shiti turu taji lozhe she nü ma siemütu.

⁷Jütiküsavü anyi küpari nüh jü ngu nü jazhi taji, “Ma tü kükhiemuora küze sa nta kuowathuoh,” ti küza.

⁸Thinü Zekia nüh tsie taji VÜWA vü, “Halie, VÜWA, hi nüh eh zhi küzhila vi kümükhuori tsümü naveh, thi hi nüh rie taji nyurazhi wuori müramüwie ketünga jüzake müzü vi nyuri tsümülewie naveh,” ti küza.

⁹Thinü Jisu nüh, “Nosü küülolewa azhe ha lovü rupevehthuoh, küpakenühnyunü ma nga Abraham tsa küsa kenüh.

¹⁰ Küpakenühnyunü anyi Tsawa tü kümiekümüri phah thi külole nta küru kenüh,” ti küza.

¹¹Mari nüh jü küna küveh vü ma tü küüzhühie zhüküza, küpakenühnyunü ma tü Jerusalem shenyi tetsethuohthi Saküüwuowa kükaji shita tekütsethuoh kenüh.

¹²Jütisanü ma nüh, zanyoküthsü kümüsieri küsü tü kajira kükhra wa viru nti küsa kenüh anyu leküsuovü wa.

¹³Jütiküsavü ma nüh ma siepe türakeri ji taji raka küsüsü vi mari tsü nü, “Nohri hamari vi nü hi müjieküru küju nü asü sala luo,” ti küza.

¹⁴Thitü ma nyuri nüh ma mükülo kenüh ma se vünüh shiti azhüle vi küze taji, “Hiri nü anyi hama nüh hiri kajiwa thama küüsa,” ti küza.

¹⁵Jütisanü ma tü kükaji kükhra vi taji nü ru ünü ma nüh raka vi siepe tsüküsari ma raka vi asü sataji künyiarari küthsüngü kenüh jümari sie ma vü ru üti azhütsü.

¹⁶Thinü apowa nüh ru ma tüvü tsie taji, “Küsosiewa, raka no nüh hi kütsü vi nü asü küsa vünüh türake küütsa ngurathuoh,” ti küza.

¹⁷Thinü ma nüh ma vü, “Mühie shethuoh, no siepe kümühiewa, küpakenühnyunü noh zanyo küza vü nga künyitsa kenüh, nyuküji türake nyia vü kükhraküüvi naveh,” ti küza.

¹⁸Thi akünyiawa ru taji, “VÜWA, noh nüh raka hi kütsü vinü asü küsa vünüh münga küütsa ngura thuoh,” ti küza.

¹⁹Thinü ma nüh ma vü, “Noh nü nyuküji münga nyia vü kükhra küüvi nathuoh,” ti küza.

²⁰Jüsevü küpawa ru taji, “VÜWA, halie no raka, hi nüh athsü nüh tieh küthi sataji vitse,” ti küza.

²¹Küpakenühnyunü noh tü arükütüri sakümü kenüh hitü no krü, küpakenühnyunü no zhi mükünyuri nga notü vi tsetse ti thi noh nüh müküzhuhri vü nga mawie tsetse ti, ti küza.

²²Thinü ma nüh ma vü, “Noh siepe kümüsüwa, hi nüh no zhü vünüh no müshe müsümünathuoh, noh tü arükütüri ta thsü thi eh zhih mükünyuri nga vi thi hi nüh müküzhuhri nga mawie tse la,” ti küza.

²³Thinü noh tü mokenüh eh pesa vi apesa küsazhe vü müsalo? jüta thuoüji hi shele küru vü azakütsa nga ngurananü, ti sa.

²⁴Jüti satajinü ma nüh ma kütuo vü peküvehri vü, “Maraka vimü taji türake peküvehwa vü tsümü luo,” ti küza.

²⁵Thinü mari nüh ma vü, “VÜWA, ma tü raka türake pevehnü,” ti küza.

²⁶Hi nüh küza naveh, “Thari nüh peveh nüh jümari vünüh tsüphe naveh, thitü mükünyiewa vü thuoüji ma ke vü peküvehwa nga vishele tewa naveh,” ti küza.

²⁷Thitü hi mükünongüri hi nüh kükaji kümari thuoüji sie havü ru nü eh tü vünüh mari fethemü luo, ti küza.

²⁸Thi ma nüh hama küzaju kümüsevü mari atüvü tse Jerusalem vü tewa.

²⁹Thinü ma tü Olive küzhiho vü Bethfage thi Bethani anyu masü shenyi küruvü ma sehnyiri künyi küze nü

³⁰masü vü, nohsü atüvü anyu nguküveh vü thi nohsü jüla kütuvü, khanavü nyi küsü nga nüh müküpesa arawuh za küsü hute küsala ngu naveh, thinü jüma letaji sieru luo.

³¹Thi anyi wuori nüh, mokenüh jüma kuli leveh lo ta küna thuoüji nü, “VÜWA nüh müviji mümühie nüh saveh lie,” ti küza luo, ti küza.

³²Thinü masü tü tsewa ünü masü vü küüza kümüjie ngura.

³³Jütiküsavü masü tü arawuh kuliwa leveh ünü avüri nüh müsü vü, “Nohsü tü mokenüh arawuh kuli leveh lo” ti küza.

³⁴Thinü masü nüh, “VÜWA nüh müviji mümühie nüh saveh lie,” ti küza.

³⁵Jütisanü masü nüh jüma sie Jisu vü ru, jüti sataji mari athsümünyi vi arawuh seru rügivü shieke taji Jisu jüma rügivü küüshupe.

³⁶Ma nüh jü rügivü shupe taji küwavü, mari athsümünyi vi lekhuji vü shieke.

³⁷Thi ma tse Olive küzhiho kükhu vü shenyi wa ünü ma sehnyiri aveh ma küüro küji aveh küngu kenüh lozhe nü zia taji Saküüwuowa siake.

³⁸Thi VÜWA nyo vi nü kütse Kajiwa kümüngatsahwa Rügivü kümühietsahwa thi küthola kümüsietsahwa saluo, ti küza.

³⁹Thinü ariakhuo vü kütse Farisiri wuori nüh, “Küsosiewa, noh sehnyiri phraküüzohmü luo,” ti küza.

⁴⁰Thinü ma nüh rüle taji, “Hi nüh küza naveh, hamari nüh zo ta petewawie ketünga alohri nga nüh zia zhu terunaveh,” ti küza.

⁴¹Jütisanü ma tü anyuküji jüma shenyiru ünü jüma kenüh krie taji,

⁴²“Mükütüküzü noh nüh nosü kümühiewa kenüh mowa müviji mümühie nüh küthsütüla mühieveh nü, thitü khinyi nü jümari tü no notha vünüh küthi mütüthuoh.

⁴³Thi tsotho küsü ru taji no mükünongüri ru nü azie aküsanü no mükieshe nü no huote naveh, thi awuowuo vünüh chiru naveh.

⁴⁴Jütisanü nohri azhe jieru nü no nga thi no tsari nga netekheh naveh, thi aloh küsü nga müjuke nü küpewanyu, küpakenühnyunü noh tü hi nüh no vü kürumüküthsü kenüh,” ti küza.

⁴⁵Jüsevü ma tü Kükhurüzhe vü tu taji zanyo zhuküvehri zhezhuja nü mari vü,

⁴⁶“Eh zhe tü kükhuo zhe küüsanaveh, ta rhü saveh, thitü nohri nüh hama vi taji rühukütsara zhe küsamüthuoh,” ti küza.

⁴⁷ Thi ma tü rülo aveh Kükhurüzhe vünüh nyuri sosie peh. Jütiküsavü levü küjiri thi Khonyo küsosieri thi nyiri azhie vü kükhra küviri nüh ma fethe nti phah.

⁴⁸Thitü mari tü rüle mphara nüh samü, küpakenühnyunü nyiri nüh ma zhü küsü nga müja nti küna pehuo küveh kenüh.