Read Pochuri Naga LUKE 2 Bible Online

LUKE 2 - Pochuri Naga bible

LUKE 2

¹Jütiküsa tsothovü Augustus Kaesar nüh Romri azhih avehvü anyo rhü nti azhütsü.

²Quirinius nüh Siria azhih vü küji saküveh vü anyo kürhü jü nüh apokhu sa.

³Thi nyiri aveh nga papa nyu vünüh anyowa rhü nti tewa.

⁴Thi Josef nga Nazareth anyu küji Galilee vünüh tse Judea David anyuküji Bethlehem vü wa, küpakenühnyunü ma tü David küthsoküzhiri küsa kenüh.

⁵Ma tü ma nüh za nti küna küsa atsakümowa Maria nga sietaji rhü nti wa.

⁶Masü jüla peveh ünü Maria tü atsaküwuo tsotho juteru.

⁷Thi Maria tü atsa nyimpa apokhuwa wuo taji athsü nüh küzhu taji aseshuh khu lovü küze sa, küpakenühnyunü küzeri azheh vü ape mükünyiethuoh kenüh.

⁸Thi azhie jüla areza vü nyihzhükühuori arüza vü mari nyihzhü huope veh.

⁹VÜWA zhühleri mari vü ru, thi VÜWA kümühiewa mari vü wieke tsü ünü mari tü krütewa.

¹⁰Jütiküsavü rügizhülewa nüh mari vü, “Mükrütümü luo, küpakenühnyunü halie, nyiri aveh vüru na küsa loküzhe küji zhüle kümühiewa vi nohri vü tse.

¹¹Khrista ti küsa VÜWA Küülolewa David anyu küji vünüh nosü wuo nohri tsüsavehthuoh.

¹²Thi hama nüh nohri kenüh thsoshi sanaveh: Atsawa athsüküsü nüh küzhu taji seshuh khu lovü küze sala nü ngu naveh,” ti küza.

¹³Jütiküsavü müküzhikewiethuoh nüh rügi zhüleri küriekhuo küsü arefü sataji Saküüwuowa siake taji,

¹⁴“Saküüwuowa kümüsietsawa kümühiewa saluo, thi nyiri azhih vü rhoküveh ma nüh külori kütsarüwa saluo,” ti siake.

¹⁵Jüti sataji rügizhülewa tü mari vünüh thajüwu vü tekuo ünü nyihzhükühuori mari mpa jüle taji, “Ra, Bethlehem vü wa taji VÜWA nüh zanyo hiri vü küza küthsüküsari no ünüh,” ti sa.

¹⁶Mari tü pre nü wa ünü Maria thi Josef thi Tsawa tü seshuh khu lovü küze sala nü ngu.

¹⁷Mari nüh Tsawa ngu ünü shientüvü rügizhülewa nüh ma zhüke momowa küza nüh jüri vi masü vü küza.

¹⁸Thinü mari aveh nga nyihzhükühuori nüh küüza künanü ngo she.

¹⁹Thitü Maria thuoüji azhü jüri aveh müküma nüh ma luovehlovü müshe pe wie.

²⁰Jüti satajinü nyihzhükühuori tü rügizhülewa nüh mari vü küüza üta künara thi ngura taji Saküüwuowa kümühie phrate thi ma siake taji shele tewa.

²¹Thi rülo tüze jumü taji ma hu rhemü ünü ma müjiekümo vünüh rügizhülewa nüh kütsü kümüjie ma nyo tü Jisu thoh.

²²Mosa Wule kümüjie mari saküümütse tsothowa ju teru ünü VÜWA kevü thse nti Jerusalem vü sieru.

²³VÜWA wule vü rhüküsa kümüjie, nyimpari küsüküsü nga küwuo khuwa thuoüji VÜWA vü kümtsewa ta ji naveh.

²⁴Thi VÜWA wule vü rhüküsa kümüjie müzhe nü ato mükhrietü künyi nyutü azhemükhrietü künyi viküsahthuoh kütsü sanaveh.

²⁵Jütsothovü nyi küsü Simeon ti küsawa Jerusalem vü peh, anyi hama tü künyitsari küsü thi Saküüwuowa krünü Israel müshe saküürünyiwa wuo thi Kümtse Sietse nüh ma lü vü peh.

²⁶VÜWA Khrista müjie küngu küju nü ma küüsüwa nyu ta Kümtse Sietse nüh ma vü küza küthsü sa veh.

²⁷Kümtse Sietse nüh ma küchü nü sie Kükhurüzhevü ru, thinü Jisu zahpari nüh ma sie wulewa müzhe nü satsü nta turu ünü,

²⁸Simon nüh Jisu küruo nü Saküüwuowa kümüna tsü taji,

²⁹“VÜWA, khinyi nü no zhüwa müzhe taji no siepewa tü luoveh kürüzi vünüh küüzemü luo.

³⁰Küpakenühnyunü hi mpa eh notha nüh no Küülolewa küngurathuoh kenüh.

³¹Jümatü noh nüh küche taji nyiri aveh tüvü samütüthuoh.

³²Aküwie jüma vi Judahmükünyuri küthsü tsü naküsa kenüh, thi kütholathovüwa vi no nyiri Israelri tsümüthuoh.”

³³Thi ma zhüku jü küüza kenüh ma pari ma zah tü ngo.

³⁴Thi Simon nüh tsia mari tsü taji ma zah Maria vü, “Halie, Tsa hama kenüh Israelri hozake küülu nga sanaveh, thi küsürale nga sanaveh, thi thsoshi thuoüji nyiri hozake nüh ma phrakümüsü naveh.

³⁵Anyuchuwa nüh noh mpa noluoveh küshü üta sa wie naveh, thi jüma kenüh anyi hozake kümüshe nyuri nüh thsüra naveh,” ti küza.

³⁶Jütsothovü Anna ti küsa setsaküthsüvüh küsü peh, thi ma tü Asher kuo Fanuel atsa, ma tü khruo sheh kümüvüh küsü, thi ma kürüla vünüh nyimpa küsü vü mpa za thi mavi türü mpa nyi rho taji,

³⁷ma mavi zerake nü müzü küju ma mpa tünyi. Ma tü Kükhurüzhe mükari wiethuoh nüh jülovü peh nü rüzarüne khurü nü assa sa thi khuo ti sa peh.

³⁸Jütisanü ma tü jüma tsothovü kheti ru Saküüwuowa siake nü Jerusalem rhesa küsawa huoküperi aveh vü Tsawa zhüku vi küza pehuo.

³⁹Thi mari nüh VÜWA wule müzhe taji zanyo aveh sajukümüsevü shele Galilee vü mari mpa mari anyu Nazareth vü teru.

⁴⁰Thi Tsawa tü khruosüra nü sietse vünüh müzho ra, zanyoküthsü nüh pro, thi Saküüwuowa kümüze nga mavü peh.

⁴¹ Jüma tsothovü tü ma zahpari tü kütseshukari akhu kenüh mavi kürüzhu Jerusalem vü khrukhruti.

⁴²Thi ma mahvi türakünyi ju nü wulewa müzhe taji Jerusalem vü khru.

⁴³Akhuwa jukümü sevü ma pa thi ma zah tü shele teru, thitü Jisu thuoüji shelemüru nüh Jerusalem vü petewa, tü ma pa ma zah thuoüji müthsü nüh sa;

⁴⁴masü nüh kümüshe thuoüji ma jienüri thi afüri azavü tse tü nti sanü rülo küsü aletse tsetetsethuoh ünü masü tü ma phah,

⁴⁵thitü ma müngura nüh sakümü kenüh ma phah shele Jerusalem vü wa.

⁴⁶Thinü rülo küche ase vünüh ma tü Kükhurüzhe vü küsosieri aza vü shupe taji mari zhü küna thi mari vü zanyori küna ti sapela nü ngura.

⁴⁷Thari nüh ma zhü thsü nüh mari aveh ma nüh küthsürari thi kürüleri müshe nü ngo kheh.

⁴⁸Masü nyipari tü ru jü ngu ünü ngo sheh, thinü ma zah nüh ma vü, “Eh tsa, noh tü mokenüh hakümjie sa veh lo? no pa hisü tü luoveh tsaza taji no phatse nü,” ti küza.

⁴⁹Thinü ma nüh masü vü, “Nohsü mowa sa nti hi phah tse lo? Hi tü eh Pa zheh vü mpe üji mümühie ta küsa nosü tü müthsü ülo?” ti rületsü.

⁵⁰Thitü ma nüh mowa vi masü vü küzaveh nüh müthsü nüh sa.

⁵¹Jüti sataji ma tü masü sie taji Nazareth vü tetsuo, thi matü masü zhü küna, thi ma zah tü zanyo jüri aveh ma luoveh lovü sa.

⁵² Jütiküsavü Jisu tü küthsü nga küzhiküzhi wa thi satsa nga küjiküji wa, thi Saküüwuowa vü nga thi nyirivü nga küümze peh.