Read Pochuri Naga LUKE 21 Bible Online

LUKE 21 - Pochuri Naga bible

LUKE 21

¹Jütisanü ma tü toke nü no ünü, nyirhieri tü zanyovi zanyoküvizhuhku lovü küthsela ngu ra.

²Thi ma nüh tünyi küthotsavühri küsü pesa künyiküthse ngu.

³Thinü ma nüh, “Hi nüh nohri vü küzatoke naveh, küpari nyia vünüh tünyi küthotsavüh hama nüh küüzhithseveh,” ti küza.

⁴Küpakenühnyunü küpari thuoüji aküzhi aze vünüh viru thseveh, thitü tünyivüh hama thuoüji ma küthotsa aze vünüh makürho vü küpe aveh vi thse veh, ti küza.

⁵Jüsevü aloh aküzü thi Saküüwuowa vü aküte sanü vi Kükhurüzhewa saküzü she küsa ma sehnyi wuori nüh haluo peveh ünü Jisu nüh,

⁶“Nohri nüh ngu küveh hamari tü müzorie nüh aloh küsü wienga khakeluo taji müküpeh tsotho küsü ru naveh,” ti küza.

⁷Thinü mari nüh ma vü, “Küsosiewa, hamari tü küsiesaru nathuoh lo? Thi hamari saru na küsavü thsoshi mokümjie ru naveh lo?” ti küna.

⁸Jüti küüna vü ma nüh mari vü, “Nohri mümüra nüh sana küsa kenüh azhüzhüluo, küpakenühnyunü nyiri hozake wie nga eh nyo vünüh ru naveh, hi thuoüji Khrista wiethuoh, thi tsotho thuoüji shenyi müthuoh, ta küzaru naveh, thitü mari ase münyi tümü.

⁹Thi nohri tü arieküsa thi küüjakünya künara naveh, thitü mükrütümü, küpakenühnyunü hamari nüh apo müsaji mümühie, thitü asekhe thuoüji küsükeri vünüh küsawa nyu,” ti küza.

¹⁰Jüsevü nga ma nüh mari vü, “Kuo küsü nüh kuoküsü sie saluo naveh, thi kaji küsü nüh kaji küsü münongü nüh sanaveh;

¹¹khielota mükhrü küzhü naveh, thi azhie luo wie vü kümükhuoji thi asahna ru naveh, thi rügi vünüh küükrükükra hozake thi thsoshi küji ru naveh.

¹²Thitü zanyo hamari atüvü mari nüh nohri re taji kümnomna tsü naveh, jütisanü nohri re künazizheri thi küsizheri vü thse naveh, thi eh nyo kenüh nohri re kajiri thi atakrüri vü siewa naveh.

¹³Hamatü nohri kenüh apovü küsa tsotho küsü sanaveh.

¹⁴Mowa rüle tsü naveh nüh ti küütü vünüh müshetsaza mütsetümü luo, thitü nohri luoveh tom ti sanü pehluo.

¹⁵Küpakenühnyunü hi nüh nohri mükünongüri aveh nüh nohri siemüküüproluora nyutü mükütsiera apo thi akütshü vi nohri tsü naveh.

¹⁶Jü mpanyunü azahpari mpa nga, noh jienü, thi no küshuküra thi no füri wie nga nüh nohri retsü wie naveh, thi mari nüh nohri wuori thuoüji nyuri nga nüh küüfethe naveh.

¹⁷Thi eh nyo kenüh nyiri hozake nüh nohri mürhü naveh.

¹⁸Thitü nohri ashe küsü wie nga küümiewa nyu.

¹⁹Nohri küüzhike vünüh nohri kürho akünyiawa ngu naveh.

²⁰“Thitü arieri ru nü Jerusalem mükieshe mü thuoüji ma zoriemü naküsa tsotho jumthuoh ti küsa thsüluo.

²¹Jütiküsavü Judea vü küperi tü zhü küzhiho vü tewaluo, thi thari nüh nyuküji jü lovü peh naveh nüh shutewaluo, thi thari nüh alievü peveh nüh alovü mükütu le tümü luo.

²² Küpakenühnyunü jümatü kümnomna rülo khanavü rhüküsari saju na küsawie thuoh.

²³Jie jüma rülo vü atsakümori thi atsa künü küvehritü küzakele nga kho naveh nüh! Küpakenühnyunü azhih nyia vü lokürü ru naküveh kenüh thi anyi hamari nyia vü zhühkha ru naveh.

²⁴Mari tü nyusuowa nüh rethe naveh, thi wuori thuoüji aküsi saakuo aveh vü wa naveh; thi mükütsotüri tsothowa müjieküju nü mükütsotüri ajih nüh Jerusalem nyitemünaveh,” ti küza.

²⁵“Jümpa mükünyu rünyi, asah thi wutsiri vünüh thsoshisaru naveh, thi azhih vü akuoh aveh vü lokürü ru naveh, thi juküji akhi thi ma küüshü nüh nyiri saküüngothse naveh.

²⁶Thi azhih hala kükrü thsoshi jüri ru na küsa müshe taji nyiri aveh krü nü mükümüshera sanaveh, küpakenühnyunü rügivü kükhrari küzhüjamüna küsa kenüh.

²⁷ Jütiküsavü nyi Tsawa tü kükhra vi kütholathovü küji sa akülu vünüh kütse mari nüh ngu naveh.

²⁸Zanyo hamari saluo nta küsavü nohri alü toke taji rügivünoluo, Küpakenühnyunü jüvütü nohri küülole shenyi kümüthuoh kenüh,” ti küza.

²⁹Jüsevü ma nüh küüzhühiezhü küsü küza taji, “Jichuorhu thi athsorhu küpari aveh nga noluo;

³⁰nyawa shiteru thuoüji küzhesa shenyimüthuoh ta küsa nohri mpa nüh ngu thi thsüraveh.

³¹Jükümjie hamari sateküru nohri ngu thuoüji Saküüwuowa kükaji shenyimüthuoh ta küsa thsüluo.

³²“Hi nüh nohri vü küzatoke naveh, hamari müjie küsaju nü khinyi kürho hamari müpeh nüh küsawa nyu.

³³Thajüwu thi azhih thuoüji ratewa naveh, thitü eh zhü thuoüji kürawa nyu.

³⁴“Thitü kütsosükürho thi kümüshe thi khinyi kürho kümünguri nüh nohri luoveh sakürüpomü taji apiehjü küsakhe kümüjie zhürüluo mükümüshe vünüh müküüru nüh sana küsa kenüh huo peh luo;

³⁵küpakenühnyunü jümatü azhih nyia rhoküvehri aveh vü runaküveh kenüh.

³⁶Thitü zanyo hamari aveh sana küsavü jümari kari na küsakükhra peh nü nyi Tsawa atüvü sie naküsa kenüh tsotho aveh vü huope thi kükhuo sa pe luo,” ti küza.

³⁷Jütisanü Jisu tü rülo aveh Kükhurüzhe vünüh sosiepeh, thitü rüza vü thuoüji ma tü Olive Küzhiho vü tewapepeti.

³⁸Thi rüne thomütho vünüh ma zhü küna nti nyiri aveh tü Kükhurüzhe vü ruru ti.