Read Pochuri Naga LUKE 22 Bible Online

LUKE 22 - Pochuri Naga bible

LUKE 22

¹ Jütiküsavü Tsekükari ahzhi müthse nüh alohse rükütsa khu shenyi teru.

²Thinü levü küjiri thi Khonyo küsosieri tü mokümjie ma fethe naveh nüh ti lekhuji phah, thitü mari tü nyiri krü kümü sa.

³Jütiküsavü Judas Iskariot ti küjiwa türakünyiri azhienüh küsüwa vü Tsuore tetu.

⁴Jütiküsavü ma tü wa taji levü küjiri thi arienyiküjiri sie jüle nü Jisu retsü nti küsa rowa vi marivü küza.

⁵Thinü mari tü lozheke taji pesa vi ma tsünati kürathuohmü.

⁶Thinü ma nga nyie üti küsa azhüwa tsü, thi nyiri mükünyie vünüh ma retsü nti lekhuji phah.

⁷Jütiküsavü Ahzhi müthse nüh Lohse kütsa nyihzhü küfethe rülo ru ünü,

⁸ma tü Pitor thi Johan masü küze taji Tsekükari mari nüh tsana küsawa küche üti küze.

⁹Thinü masü nüh, “Noh tü hisü khiela nüh jüma küche üti lo?” ti küna.

¹⁰Thinü ma nüh masü vü, “Halie, nosü nyuküji vü küwa vü nyi küsü aju losüza kha taji ru nohsü siemütu naveh, tinü nosü ma khiela tu naveh nüh jüla nyitu luo,” ti küza.

¹¹Thi azhe vüwa vü, küsosiewa nüh no vü, “Eh sehnyiri sie tsekükari khuwa tsana küsa küzeri azhe khiela pevehlo? ti künaluo.

¹²Jütathuoüji azhe kürieke rügivü küshothuoh küjiküsü kücheju küsa küjo nosü kütsanaveh nüh,” ti küza.

¹³Jütisanü masü tü wa ünü masü vü küüzakümüjie ngura nü jüla nüh tsekükari kütsaküzhuküche.

¹⁴Jütisanü tsothowa juru ünü ma tü ma sehnyiri sie nü kütsazhupe vü shupe, thi ma sehnyiri nga ma sie shupe.

¹⁵Thi ma nüh mari vü, “Hi kümnomna atüvü nohri sietsekükari khu kütsawa tsa ngü she peh veh;

¹⁶küpakenühnyunü Saküüwuowa kükaji vünüh müjieküsaju nü hi tü jüma mütsalethuoh ti hi nüh nohri vü küzaveh,” ti küza.

¹⁷Jütisanü ma nüh ahuowa vi taji tsia tsü kümüsevü, “Hama vi nü nohri mpa nohri azhie vünüh küsuo zhu luo,

¹⁸küpakenühnyunü hi nüh nohri vü küza naveh, Saküüwuowa kükaji müjie küju nü nosü vünüh tuvü hi tü akha hama küzhule nyuthuoh,” ti küza.

¹⁹Jüsevü ma nüh lohsewa nga vi taji tsia tsükümü sevü ma nüh zokhuo nü vi mari tsü taji, “Hama tü eh satsa nohri kenüh tsükümüwa. Hi kümüshe kenüh hama saluo,” ti küza.

²⁰Jükümjie kümüsheshie tsa kümüsevü ahuo hama nga nohri kenüh lizhuküru e zü vünüh tsathuohkütsü kürüthewa wiethuoh, ti küza.

²¹ Thitü halie hi retsü na küsawa ake nga hi sie kütsazhupe hama rügivü peh veh.

²²Küpakenühnyunü küütü vünüh kücheküsa kümüjie nyi Tsawa tü wa wie naveh; thitü jie, ma retsüna küsa nyiwa thuoüji saranathuoh, ti küza.

²³Thinü mari tü jüma thawa nüh sanasaveh nüh ti küsünüh küsü küna.

²⁴Thi thawa nüh küüji naveh nüh ta küsa nga mari azhie vü küproluozhu teru.

²⁵Thinü ma nüh mari vü, “Mükütsotüri tü mari kajiri nüh mari nyia vü avü küüsasati, thi mari nyia vü kükhra küviri nüh kükhruori küüsasati.

²⁶ Thitü nohri tü jüüta küüsawa nyu, jüütanyunü nohri azhie vü küjitsawa nüh küzatsahwa küüsaluo, thi sierhüwa nüh siepewa küüsaluo.

²⁷Thinü shupe nü tsazhuküpewa küüji ünü nyuri kütsüküna küpewa küüji lo? Jümatü tsazhuküpewa küüji tünü? Thitü hi wienga nohri azhie vü nyuri kütsüküünawa sa wieveh,” ti küza.

²⁸Hi kümüra aveh vü nga nohri nüh hi sietse wie;

²⁹eh Pa nüh kükaji vi hi kütsü kümüjie, hi nga kükaji vi nohri tsüveh.

³⁰Küpakenühnyunü nohri nga hi sie taji eh kajipe vünüh ashietsa thi zhu, thi kajipe rügivü peh nü Israel kuo türa künyiri ashi sanaveh, ti küza.

³¹“Simon, Simon, halie, zhuküürotsari nüh atsuo aguri wieküpa kümü kümüjie nohri aveh müte nü kümüsüwatü kümühiewa vünüh saküpamü nta Tsuore nüh khuomüthuoh.

³²Thitü noh kütsotüwa mü kümie naküsa kenüh hi nüh noh kenüh kükhuo sa thuoh; thi noh nüh noh luoveh khaphrürale thuoüji no füri luoveh nga sakükhaphrü mütsuji mümühie,” ti küza.

³³Thinü Pitor nüh ma vü, “VÜWA, hi tü no küsizhe vünga wa tü thi aküsü vü nga wa tü no se nyiwa wie naveh,” ti küza.

³⁴Thinü Jisu nüh Pitor vü, “Pitor, hi nüh no vü küzanaveh, no hi müthsü ta küchekeri müküürü atüvü nosü awi kükhuwa nyu,” ti rületsü.

³⁵Thinü Jisu nüh mari vü, “Hi nüh nohri rakaku, chükhu nyutü ajiküükruvüh ti müvü nüh nohri küüze vü nohri thotsamü ülo?” ti küna. Thitü mari nüh; “Nyu, zanyoküsü nga müthotsa,” ti rületsü.

³⁶Thinü ma nüh mari vü, “Thitü khinyi nü rakaku küperinga thi chükhu küperi nga vi luo, thi anyusuowa mükünyieri nü ma satsaküüzhuvüh zhu nü sü luo.

³⁷ Küpakenühnyunü hi nüh nohri vü küzawienathuoh nü hitü wuleküphrürieri vü chiekemüthuoh ta küsa khanavü zhütsazhü vü rhüküsawa hi vünüh müsajuji mümühie, eh kenüh mowa rhüsaveh nüh sajutsewie,” ti küza.

³⁸Jüti küüza vü ma sehnyiri nüh, “Halie, VÜWA, hala anyusuo künyi peh veh,” ti küza. Thinü ma nüh mari vü, “Jü künyi wale,” ti küza.

³⁹Thi ma mpa nüh sasati küsa kümüjie alievü tsezhuru nü Olive Küzhiho vü tewa, thinü ma sehnyiri tü ma se nyiru.

⁴⁰Jütiküsavü ma tü azhie jüla ruju ünü ma nüh marivü, “Nohri kümüra vü mütu nüh sana küsa kenüh kükhuo saluo,” ti küza.

⁴¹Jüti sataji ma tü mari vünüh tse kietuozaza wa khotsünü kükhuo sataji,

⁴²“Eh Pa, no kümüshe thuoüji ahuo hama hi kükari tsüluo, thitü eh müshe nyu nü no müshe vünüh saluo,” tikhuo.

⁴³Jütiküsavü rügizhüleri küsü rügivü nüh turu taji ma sakükhratsü.

⁴⁴Thi ma tü münomüna she küveh kenüh ma kükhuo khra she, thi ma rü shi tü azü küürütsuo kümüjie khieloti azhih vü rütsuo wa.

⁴⁵Jüti sataji ma tü kükhuo sanü süra ma sehnyiri vü wa, thinü mari tü lokürü kenüh zepelakhe.

⁴⁶Thinü ma nüh mari vü, “Nohri tü mokenüh ze veh lo? Kümüji müra vü mütu nüh sana küsa kenüh süra nü kükhuo saluo,” ti küza.

⁴⁷Jüti sataji ma tü mari siejüle peküvehvü Judas ti küji türakünyiri azhie vü küsüwa nüh anyi shieji küsüsie nü ru. Ma tü Jisu küme nti ma vü ru.

⁴⁸Thitü Jisu nüh ma vü, “Judas, noh tü küüme küsü vünüh nyi Tsawa zhutsa nti ülo?” ti küna.

⁴⁹Thinü mowa sanathuoh nti ma kütuo vü küperi nüh no peh. Jütiküsavü mari nüh, “VÜWA, hiri nyusuowa küüvi taji anyi hamari küüre mo?” ti khuo.

⁵⁰Jütisanü mari nyi küsü nüh anyu vi nü khakere ünü levü küjiwa siepe khüna azhie wuovü taja mü tü.

⁵¹Thitü Jisu nüh, “Jü wale thuoh,” ti küza. Thinü Jisu nüh jüma khüna pah nü sakümühietsüle.

⁵²Thinü Jisu nüh levü küjiri thi kükhurüzhe vü küjiri thi kükhruori ma re nta kütseri vü, “Nohri tü rühukütsari siesaluo na küsa kümüjie anyusuo thi thsoshi vi nü tse ülo?

⁵³Hi nüh rülotsotho Kükhurüzhe vü nohri sie pewie ketünga hi re nta müsa. Thitü nosü thuoüji nohri thi aküzowa kükhra tsotho thuoh,” ti küza.

⁵⁴Jütisanü mari tü ma re taji levü küjiwa azhe vü sietewa. Thi Pitor nga kükiethuohzah vünüh nyiwa.

⁵⁵Mari tü waju taji aluoji azhila vünüh anyih sanü mari aveh shupe nü küho, thi Pitor nga mari azavü nyi shupe.

⁵⁶Jütisapeküvehvü siepevühri küsü Pitor anyih kühoküpe ngu nü ma nophoke taji, “Anyi hama nga ma sietse lie,” ti küza.

⁵⁷Thitü ma tü kürü taji, “Nyimzawa, hi nü ma müthsülie,” ti rületsü.

⁵⁸Jümasevü pike peveh ünü anyi wuori nga ma ngu le taji, “Noh nga mari azhie nüh küsü wiethuoh,” ti küza. Thitü Pitor nüh, “Anyiwa, hi nü nyu lie,” ti rületsü.

⁵⁹Jüti sataji münühu küsü kümüjie peveh ünü nyiküsü ru wurie taji, “Zhütsa anyi hama nga ma se nyitsewie, küpakenühnyunü ma tü Galileeri küsü,” ti küza.

⁶⁰Thitü Pitor nüh, “Anyiwa, noh nüh mowa küzaveh nüh hinü müthsüti,” ti küza. Jüti sataji ma tü azhü phrapeveh ünü awi khuteru.

⁶¹Thinü Jisu nüh süle nü Pitor no. Jütiküsavü Pitor tü VÜWA nüh küüza azhü, “Nosü awi müjie kükhu atüvü küchekeri no hi müthsü ta kürü naveh,” ti küsawa müshekera.

⁶²Thinü ma tü alievü wa nü khieloti krie.

⁶³Jütiküsavü Jisu siteküvehri tü ma riesa thi ma fe tsü.

⁶⁴Jümpa mükünyu mari tü ma notha tietemü nü ma vü, “Thawa nüh no fe nüh hiri vü setsaküthsüzhü küza luo,” ti khuo.

⁶⁵Thi azhü kümüsü hozake vi ma phra nü ma rünyie.

⁶⁶Jütisanü thoru ünü levü küjiri thi Khonyo küsosieriti sie nü anyu vü kükhruori kümühu sehzhu, thinü mari tü ma sho kümühu jüla wa nü,

⁶⁷“Noh tü Messiah thuoüji hiri vü küza luo,” ti küza. Thitü ma nüh mari vü, “Hi nüh nohri vü küzawie ketünga nohri tü kütsotüwanyu,” ti rületsü.

⁶⁸Thi hinüh nohri vü künawie ketünga nohri tü rüle hi kütsüwanyu.

⁶⁹Thitü nosü vünüh tuvü thuoüji anyi Tsawa tü Saküüwuowa kükhrawa azhie wuovü shupenathuoh, ti küza.

⁷⁰Thinü mari aveh nüh, “Thinü noh tü Saküüwuowa Tsa ülo?” ti küna. Jütiküsavü ma nüh mari vü, “Nohri nüh küüzakümüjie hi tü jümawa wiethuoh,” ti rületsü.

⁷¹Thinü mari nüh, “Hiri tü povü küpa phah nü mowa sanalo? Hiri mpa ma po vünüh thsürathuohnü,” ti sa.