Read Pochuri Naga LUKE 23 Bible Online

LUKE 23 - Pochuri Naga bible

LUKE 23

¹Jüti sataji mari aveh süra tsie nü ma sie Pilate atüvü ru.

²Jütisanü mari tü ma phramüsü taji, “Hiri tü anyi hama nüh hiri akuoh müra nü mükünyu lekhuji vü küzemü na küsa thi akhrü vi Romri Kajiwa mütsütümü üta hiri kükhe, jü mpa mükünyu ma tü ma mpa Khrista Kajiwa ta sanü ngura,” ti küza.

³Thinü Pilate nüh ma vü, “Noh tü Judahri Kajiwa wiethuoh lo?” ti küna. Thinü ma nüh, “Noh nüh künaküveh kümüjie wiethuoh,” ti rületsü.

⁴Thinü Pilate nüh levü küjiwa thi nyi shiejiri vü, “Nyi hamawa vü hi nü müküle küsü nga müngu,” ti küza.

⁵Jütiküsavü mari tü kümküsütsa zie taji, “Ma tü Judea azhih aveh vü thi Galilee azhih vünüh ru hala küjunyuri sosie nü küjakünyakhehmü wiethuoh,” ti küza.

⁶Pilate nüh hama küthsüra vü, “Nyi hamatü Galileeri ülo?” ti küna.

⁷Thinü ma tü Herod azhie vünüh ta küsa küthsüra vü ma Herod vü küzemü. Ma nga jüma tsothovü wa Jerusalem vü peküveh kenüh.

⁸Jütiküsavü Herod tü Jisu ngu ünü ma lozhe she. Küpakenühnyunü ma tü ma zhüku thsüra thi tsotho hothake vünüh ma no ngü teküru kenüh. Thinü ma nüh küngo thsoshi wuori sakütsanatü nti müshe.

⁹Jükenüh ma tü ma küüna hothakeza sa, thitü ma nüh zanyo küsü nga rülemütsü.

¹⁰Thi ma kütuovü küpe levü küjiri thi Khonyo küsosieritü mükütuowiethuoh nüh wurie ma phramüsü.

¹¹Jütisanü Herod tü ma rienyiri sie nü ma tü moma küsa kümüjie sanü ma riesa thi thsümünyi kümühie vi mavü thse taji Pilate vü küzemü le.

¹²Herod thi Pilate masü tü hama atüvü thuoüji afü müsa, thitü hama tsotho vünüh masü afü satewa.

¹³Jütiküsavü Pilate nüh levü küjiri, sierhüri thi nyiri jizhuh taji,

¹⁴“Nohri nüh Nyi hamatü nyuri saküümüsüwa ta ma re nü hi vü viru, thitü hi nüh nohri atüvü nüh kümühieta ma künawie ketünga nohri nüh ma vü mükülethsüküveh kümüjie ma müküle mpharalie,” ti küza.

¹⁵Jümpa mükünyu Herod wie nga ma müküle müküpharakenüh hiri vü küze saveh, tinü halie, küsülekümühie küsü nga ma nüh samüsa,

¹⁶Jükenüh hi nüh kümnomna vi ma tsümü taji maküzemü le naveh nüh, ti küza.

¹⁷Tsekükari khu kürüzhu Pilate nüh küsi küsariküsü küüshu ma ke vü peveh.

¹⁸Thinü mari nüh, “Nyi hama sietewa nü Barabas tsüluo,” ti aveh kürü zie pehuo.

¹⁹Barabas hamatü nyuküjiwa vü kükhra küviri siemükünoluongü sa thi anyi küfetheri küsü.

²⁰Jümasevü nga Pilate nüh Jisu küzemü nti küsü keri sale;

²¹thitü mari tü zie kürügi she taji, “Ma zekemü luo, mazekemü luo,” ti sa.

²²Akücheawa ma nüh shele mari vü, “Mokenüh lo? Ma nüh müküle mowa samü lo? Hi nüh ma vü müküle aküsükümühie mphara, jükenüh hi nüh kümnomna vi matsü nü küzemü naveh nüh,” ti küza.

²³Thitü mari tü wurie zie pehuo nü, “Ma tü müzekethuoüji mümühie,” ti sa. Jütisanü sekhevü thuoüji mari küzie jikhiwa nüh khrara.

²⁴Jütisanü mari kükhuo mkümüjie vünüh Jisu tü küsümüluo üti Pilate nüh mari vü tsümü.

²⁵Thi ma nüh kükhraküviri siemünoluongü nüh nyuriküfethe küsizhe lovü küpe mari nüh khuoküpewatsümü, thi Jisu thuoüji mari nüh kümüngu kümüjiesatsümü.

²⁶Jütisanü arienyiri nüh Jisu sho taji kütsevü Simon ti küsa Sairenri nyi küsü anyu vünüh kütse ngu nü mari tü ma re taji khieluothsowa kükha nü Jisu ase nyikümüzhe.

²⁷Jütiküsavü anyi shieji küsü thi nyimzari nüh Jisu nonü krie taji külu kütse kürefü küsü nga ma se nyitse.

²⁸Thitü Jisu nüh süle mari no nü, “Jerusalemvühri, nohri eh kenüh mükrietümü, thitü nohri mpa nohri kenüh thi nohri tsari kenüh krie luo,” ti küza.

²⁹Küpakenühnyunü halie, atsamükünyieri, thi atsamükümohtsahri, thi atünü müküünüsari kümüngatsahri ta küsa tsothori kütse kenüh!

³⁰ Jüma tsothovü tü mari nüh küzhiho kümüsieri vü, hiri nyia vü neh turu luo, thi küzhiho kürünyieri vü, hiri hiete luo ta küza naveh,

³¹Küpakenühnyunü mari nüh athso akürhowa vü nga hakümjie thuoüji aküsüwa vünü mowa sanathuoh lo?

³²Wule küzokhuori anyi künyi nga ma sie zothe nti sie wa.

³³Jütiküsavü mari tü azhie “Lürü” ti küsavü ru ju ünü ma zekemü, thi küzokhuo masü nyi küsünü ma zhie wuovü thi küpawa thuoüji azhu wuovü ti ma sienü zekemü.

³⁴ Jütiküsavü Jisu nüh, “Eh Pa mari nüh saküvehwa thsünü samüveh tinü mari müküle nojatsüluo,” ti khuo. Thinü mari tü aküze sanü ma thsümünyi küsuo ntisa.

³⁵ Thi nyiri ma kütuo vü tsie küvehri nüh no peh, thitü Judahri sierhüri tü azhükümüsü phra nü ma riesa, “Ma tü Saküüwuowa Khrista thi ma tü kürükawa thuoüji anyi küpari tü küloletsüveh thuoüji ma mpa maküülole luo,” ti küza.

³⁶Thi arienyiri nga küsuoju viru ma tsü taji ma riesanü,

³⁷“Noh tü Judahri Kajiwa thuoüji noh mpa no külole luo,” ti küza.

³⁸Thi ma lü anyia thso rügivü nga lasikhu, “Hama tü Judahri Kajiwa,” ti rhükesa.

³⁹Thinü wule küzokhuo künyi ma kütuo vü zeke küsa nyiküsü nüh ma vü, “Noh tü Khrista nyu ülo? Noh mpa nonga külole thi hisü nga külole luo,” ti küza.

⁴⁰Thitü küpawa nüh, “Noh nga müshekümüsü zarike vü peküküveh, noh tü Saküüwuowa mükrü ülo ti ma phra.

⁴¹Hisü thuoüji hakümjie azhühkha küngu le, hisü thuoüji hisü kümülie jisuo nguveh, thitü Nyi hama thuoüji zanyoküsü nga müküle müsa,” ti küza.

⁴²Jütisanü ma nüh Jisu vü, “Noh kaji saküruvü himüsheluo,” ti küza.

⁴³Jütiküsavü Jisu nüh ma vü, “Hi nüh no vü küzatoke naveh, nosü noh tü hi sie kürüzi pe vü penathuoh,” ti küza.

⁴⁴Jütisaküveh tsothovü tü bafe türoa wathuoh, thi tsotho jüla nüh bafe tügu küju azhie aveh müwie nüh zomopho tewa.

⁴⁵Rünyi nüh müwie nüh sateküwavü Kükhurüzhe vü athsü thuohküsawa nga kükri künyi satewa.

⁴⁶ Jütisanü Jisu tü zie kümüsie she taji, “Eh Pa, hi nüh eh sietse no ke vü thse veh thuoh,” ti küza. Thi ma nüh jüküzakümü sevü ma rütho küsahwa asekhe samü.

⁴⁷Jütiküsavü arienyiri müzake nyia nüh küjiwa tüjüma ngu taji Saküüwuowa siake nü, “Nyi hama tü kümtseri tsah lo,” ti sa.

⁴⁸Thi anyi riekhuowa jüma no nti küruri aveh nga jümari aveh ngu nü mari küso fe taji lorü nü tewa khe.

⁴⁹ Thi ma küthsüri aveh thi Galilee vünüh ma se nyiküru nyimzari kületsuoza vünüh hamari ngu kheh.

⁵⁰Jütiküsavü anyu kümühu vü sierhüri kümühie thi künyitsari Saküüwuowa Kükaji küru kühuori küsüma nyo Josef ti küsa Judahri anyu vü Arimathea ti küsariwie ketünga,

⁵¹ma tü mari kümüshe thi mari nüh küsari vü amüshemütsarü.

⁵²Ma tü Pilate vü wa nü Jisu kümo khuo.

⁵³Jütisanü ma tü ma kümo viwa nü alo külohzü nüh kütothsü vi ma küzhu taji aloh phieke nü rüku sa nta saküsa kümo küsü nga müjie küthsesa lovü thsemü.

⁵⁴Thi jürü lo tü Phrusih, zanyo küüche rülo, thi Sabbath ti küji Judahri kümünyierülo nga jutetsethuoh.

⁵⁵Jütiküsavü Galilee vünüh ma senyiküru nyimzari nga wanü rükuwa nga thi ma kümo nga mokümjie vünüh sahsaveh nüh mari nga ngu.

⁵⁶ Jütisanü mari tü shele azhe vü ru zanyo arheküünguri thi avüjuri küche. Sabbath ti küji Judahri kümünyierülo thuoüji Khonyo vünüh azhütsü küsa kümüjie müzhe taji münyie.