Read Pochuri Naga LUKE 24 Bible Online

LUKE 24 - Pochuri Naga bible

LUKE 24

¹Jütisanü Jüasekhe rüne thomütho vünüh mari nüh küche küsa zanyo arheküünguri thi avüjuri vi nü rüku vü wa.

²Thinü rüku kükhietelohwa tü küprijakümü ngura.

³Jütisanü mari tü rüku lovü tu nü noh tü kümowatü müngu nüh samü.

⁴Jüti sataji mari tü amüshe kürüza sataji peveh ünü, nyi künyi thsümünyi rierieta küsa vü nü mari kütuovü tsie küpela ngu.

⁵Thi mari tü krü she kümüthuoh kenüh mari nyiavü künyia nü azhih vü tetsuo, thinü masü nüh marivü, “Mokenüh aküsüri azavü akürhowa phah tse lo?

⁶Ma nü hala münyiethuoh, rhoshele tewathuoh, ma nüh Galileevü küpevü nohri vü mowa küza nüh müsheluo.

⁷Nyi Tsawa tü re taji kükhiemuora ke vü thsemü nü zekemü naveh, thi rülo kücheawa vü rholesüra naveh, ta ma nüh küza,” ti küza.

⁸Jüti küüza vü mari tü ma zhüwa müshekera taji,

⁹rüku vünüh tsezhuwa nü azhü hamari aveh viwa türaluokeri vü thi küpari aveh vü nga küza.

¹⁰Thi wa povüküsari vü küüza nyimza jümari tü Maria Magdalene thi Joana thi Maria Jems za thi nyimza küpari nga wa.

¹¹Thitü makeri’a nüh hamatü müshe kühuophie taji mari mütsotü nüh samü.

¹²Thitü Pitor tü süra taji zhü rüku vü wa nü kükietsuo taji rüku lovü nono ünü rükuthsüri mpa küpela ngu, thi momowa samüthuoh nüh timüshe ma ngo taji ma zhe vü shele tewa.

¹³Jüma rülo vü nyi künyi tü Jerusalem vünüh mile türü kükiatuo anyu Emaus ti küsavü wa nti wa.

¹⁴Jütiküsavü masü tü zanyo momowa samüthuoh nüh haluotse.

¹⁵Masü tü jüti haluo taji jüle tse ünü Jisu nüh tsemasü vü shenyi ru nü masü vü nyitewa.

¹⁶Thitü ma müküüthsü nti küsa kenüh masü notha tü saküpa mütü.

¹⁷Jütisanü ma nüh masü vü, “Nohsü tü tsemüngu nü momowa jüle tse lo?” ti küna. Thinü masü tü lorü taji tsietewa.

¹⁸Jütiküsavü masü nyi küsü Kleopa ti küsawa nüh mavü, “Küze tse Jerusalem vü küruri azhie nüh noh mpa nüh sütathuohtü momowa samüthuoh nüh müküthsüwiesanathuoh,” ti rületsü.

¹⁹Thinü ma nüh masü vü, “Mo zhükuwa lo?” ti küna. Thinü masü nüh ma vü, Jisu Nazareth, setsaküthsüri, Saküüwuowa thi nyiri aveh atüvü küüro vü nga thi azhü vü nga kükhrasheri küsü zhüku lie.

²⁰Levü küjiri thi sierhüri nüh re taji kümüshemüsüvü thsemü nü zothemü üta sanü zekemü.

²¹Thitü ma tü Israelri kürhesawawie tü nti hiri tü tsotüveh. Thi jü mpa mükünyu hakümjie sakümü nga nosü rülo küchethuoh.

²²Jümpa mükünyu hiri refü nyimzari wuori nga nüh shierüne kümüto rüku vü wa taji ru hiri vü küzaküüngo she.

²³Mari wa ma kümo müngu nüh samü, thi mari tü rügizhüleri ngu thi ma nüh küüza, “Ma nü rholetewathuoh ti küza ta ru küza.”

²⁴Hiri kürü peküveh wuori nga rüku vü wa nü nyimzari nüh küzaküveh kümüjie ngu ta, thitü ma kümo nü müngu ta, ti küza.

²⁵Thinü ma nüh masü vü, “Amüshe müküjuri thi setsaküthsüri nüh küüza mükütsotüri!

²⁶Khrista tü hari vünüh münomüna nü ma kütholathovülovü kütu leh nyu ülo?” ti küza.

²⁷Mosa vünüh ru setsaküthsüri aveh küju ma nüh ma mpa makürho zhütsazhü vünüh rüle tsü kheh.

²⁸Mari tü mari nüh wa nti kütse anyuwa shenyi ru ünü matü anyu jüma kari aleküsuo vü wa nta küsa üta sa.

²⁹Thitü masü tü ma khe taji, “Noh tü hisü siepetewaluo, küpakenühnyunü münüle nga tetsethuoh thi rülo nga aküsuo vünüh tewathuoh,” ti küza. Thinü ma nga masüvü nyipe nti sanü tewa.

³⁰Jütisanü ma tü masü sie shietsaluo nti ashiekütsapevü pe ünü, ma tü alohse vi nü jüma nyia tsiatsü taji zokhuo nü masü tsü.

³¹Thinü masü notha tü pie taji ma thsüra. Thinü masü atü vünüh ma tü ratewa.

³²Jütiküsavü masü mpa kürüchie taji, “Ma nüh lekhujivü hisü siekürüchie nü zhütsazhüri hisü vü küzakütsevü hisü luoveh tü anyih kümüjie tsomütsü ülo?” ti sa.

³³Jüti sataji masü tü müküzhike wiethuoh nüh Jerusalem vü shele tewa, thinü türaluokeri thi mari refüri aveh sehzhu küpela ngu.

³⁴Thinü masü nüh, “VÜWA tü rholetewa tsah wiethuoh, thi Simon vü nga künguthuoh,” ti küza.

³⁵Thi lekhuji vünüh masü vü momowa sanüh küza, jümpa mükünyu alohse zokhuo kütsü vünüh ma nüh saküüthsü nga küza.

³⁶Mari jükümjie haluo küveh vü, Jisu mampa ru mari azhievü tsie.

³⁷Thinü mari tü kükhrih nü saküüngo she, thi mari tü zhehzhe nguvehtünyie ti müshe.

³⁸Thinü ma nüh mari vü, “Nohri tü mokenüh müküto nüh saveh lo?

³⁹Hi wiethuoh, thinü nohri eh keri thi eh jihri noluo. Hi pah taji noluo; küpakenühnyunü sietse tü hi kümüjie asa thi arümüpeh,” ti küza.

⁴⁰Ma tü jü küza mütajinü ma keri thi ma jiri mari vü kütsa.

⁴¹Jütawie ketünga mari tü loküzhe thi küngo aria vünüh mütsotü nüh peküveh vü ma nüh mari vü, “Nohri tü hala kütsaküzhu wuori peveh ülo?” ti küna.

⁴²Thinü mari nüh anga nyihküükhro sükhri küsü vi matsü.

⁴³Thi ma nüh jüma vi taji mari atüvü nüh tsa.

⁴⁴Jütisanü ma nüh mari vü, “Mosa Khonyo vü nga thi setsaküthsüri nüh kürhü vü nga thi Küriehiri lasivü nga eh zhüku rhüküsa aveh müsaju ji mümühie ta küsa hi nüh nohri siepeküveh vünüh nohri vü küüza ehzhü hamari,” ti küza.

⁴⁵Thi ma nüh mari luoveh saphie tsü taji zhütsazhüwa küüthsü taji

⁴⁶mari vü, “Jümatü hakümjie rhüsaveh, Messiah tü münomüna taji rülo kücheawa aküsü vünüh rholenaveh,

⁴⁷thi Jerusalem vünüh sate taji akuoh aveh vü luovehkükhaphrü thi kükhiemuo noküja ma nyo vünüh küzanaveh.

⁴⁸Thi nohri tü hamari povü küsari.

⁴⁹ Thi halie, eh Pa nüh azhü tsü küsawa hi nüh nohri vü tsünaveh, thitü rügi vünüh kükhrawa nohri vü müjieküru küjunü nyuküjiwa vünüh huope luo,” ti küza.

⁵⁰ Jütisanü ma nüh mari sie alievü wa taji Bethani küju siewa nü ma ke thsuo küze taji tsia mari tsü.

⁵¹Thi ma nüh tsia mari tsüküveh vü ma tü rügivü sietekuo taji mari vünüh porietewa.

⁵²Jütisanü mari tü khieloti lozhe nü ma khurü taji loküzhewa nüh pro nü shele Jerusalem vü teru.

⁵³Thi mari tü mükütuo thuoh nüh Kükhurüzhe vü pehuo taji Saküüwuowa siake pehuo.