Read Pochuri Naga LUKE 3 Bible Online

LUKE 3 - Pochuri Naga bible

LUKE 3

¹Tiberius Kaisar nüh takrü küsa mavi türa müngaawa, Pontius Pilate tü Judea azhih vü kümükhrüwa sapeh veh, Herod nüh Galilee vü takrüwa saveh, thi ma nü Filip nüh Eturia natonahuo vü thi Trakhoniti vü takrü saveh, Lisania nüh Abilene nüh takrü saveh,

²thi Annas ri Kaifa masü nüh levü kümüsie sa veh. Jütiküsa tsothovü Saküüwuowa zhü Johan Zekharia atsareza vü peküvehwa vü ru.

³Jütiküsavü Johan tü Jordan rügu natonahuo vü wanü, kükhiemuo noküja luoveh kükhaphrü ajuküvü vi nyuri sosie.

⁴Setsaküthsüwa Isaya lasi lovü rhüküsa kümüjie, Reza vü nyi küsü zia wie taji, VÜWA lekhuji küche luo, ma lerari sakümüsho luo,

⁵Azhih kürünyie aveh vü kükato luo, thi küzhiho kümüsieri nga thi kürünyieri nga sakükatoluo, thi küükhori nga sakümüsho luo, thi lekhuji küünyikürüri nga saküücho luo,

⁶thi nyiri aveh Saküüwuowa küülole ngu naveh.

⁷Jükenüh ma nüh ajuvü nta ma vü küru anyi riakhuowavü, nohri arehji kuori, nohri thawa nüh arüküshu ru na saküvehwa vünüh te üta küza lo?

⁸Luoveh kükhaphrüwa avi peh luo. Thi nohri mpa nohri müshevünüh hiri nga Abraham tü hiri pa kümüjie wiethuoh ti müphrate tümü, küpakenühnyunü hi nüh nohri vü küza naveh, Saküüwuowa tü aloh hamari vünüh nga Abraham atsari satsüra naveh.

⁹Khinyi wienga amüvüwa tü athso totso vü sawieveh, jükenüh athso küsüküsü nga avi kümühie müküperi thuoüji zathuoh nü anyih lovü thsemü naveh.

¹⁰Jütiküsavü anyi riekhuowa nüh ma vü, “Thinü hiri tü mowa müsaji mümühie lo?” ti küna.

¹¹Thinü ma nüh mari vü, “Thawa nüh satsaküüzhuvüh künyi peveh nüh küsü nga mükünyiewa sie küsuo luo, thawa nüh ashie peveh nüh mükünyiewa sie küsuotsaluo,” ti küza.

¹² Akhrüküviri nga ajuvü nta ma vü ru nü, “Küsosiewa, hiri tü moti sana lo?” ti küna.

¹³Thinü ma nüh mari vü, akhrü nohri vü vi üta küzaküsa anyia vü müvi tümü ti küza.

¹⁴Thopahiri nga ma küna taji, “Thinü hiri tü moti sana lo?” ti küna. Thinü ma nüh mari vü, “Nohri nyuri sakükrü nü nyurazhi müvitümü, nyutü rie nü nyuri phrate müsünü nyura zhi müvi tümü, jütanyunü nohri keme wienga wale ti müsheluo,” ti rületsü.

¹⁵Nyiri tü Khrista ru na ta küsa tsotüküveh kümüjie, mari mpa mari zhie vünüh künaluo taji, “Johan hama tü Khrista thuoh ünüh,” ti sa.

¹⁶Johan nüh mari aveh vü rüle taji, “Hi thuoüji aju vünüh nohri baptis sa veh, thitü eh nyia vünüh küji küsü tse, hi thuoüji ma jiküükruvüh li nga mületse, ma thuoüji Kümtse Sietse vünüh thi anyih vünüh nohri baptis sanaveh.

¹⁷Ma rahewa tü ma ke vü peveh. Ma tsuo he kümtse naküsa kenüh, thi amütha atsahri tü vüwa ma luo lovü thse naveh, thitü aguri thuoüji viwa mükünera anyih lovü nüh tsomünaveh,” ti küza.

¹⁸Jükümjie küüthozhü hozake vi taji ma nüh Zhühthe Kümühiewa vi nyiri vü küza.

¹⁹Thitü Johan nüh Herod kajiwa tü ma nü vüvüh Herodia küza kenüh nga thi Herod nüh zanyokümüsü küsari kenüh nga ti ma saküzükrütsü.

²⁰Zanyokümüsü küsa jümari mpa mükünyu Johan nga renü küsizhe lovü thsemü.

²¹Jisu thi nyiri aveh baptis samü taji kükhuo saveh ünü, thajüwu tü sarie tsü.

²²Thi Kümtse Sietse tü mükhrietü kümüjie satsa vü taji ma rügi vü turu, thi rügi vünüh azhü phraturu taji, “Noh thuoüji eh Tsa küümze tsahwa wiethuoh, hi nüh novü eh loküzhetsawa wiethuoh,” ti küza.

²³Jisu tü ma küüro küsate vü ma mahvi cherake thuoh, nyiriwuo vünüh thuoüji ma tü Josef tsa, jümatü Heli atsa,

²⁴Mathat tsa, Levi tsa, Melkhi tsa, Janai tsa, Josef tsa,

²⁵Matathia tsa, Amos tsa, Nahum tsa, Esli tsa, Nagai tsa,

²⁶Mat tsa, Matathia tsa, Semein tsa, Josek tsa, Joda tsa,

²⁷Joanan tsa, Rhesa tsa, Zerubbabel tsa, Shealtiel tsa, Neri tsa,

²⁸Melkhi tsa, Addi tsa, Kosam tsa, Elmadam tsa, Er tsa,

²⁹Joshua tsa, Eliezer tsa, Jorim tsa, Mathat tsa, Levi tsa,

³⁰Simon tsa, Judah tsa, Josef tsa, Jonam tsa, Eliakim tsa,

³¹Milia tsa, Mena tsa, Matatha tsa, Natham tsa, David tsa,

³²Jesse tsa, Obed tsa, Boaz tsa, Salmon tsa, Nashon tsa,

³³Aminadab tsa, Admi tsa, Arni tsa, Hezron tsa, Perez tsa, Judah tsa,

³⁴Jacob tsa, Isaac tsa, Abraham tsa, Tera tsa, Nahor tsa,

³⁵Serug tsa, Reu tsa, Peleg tsa, Eber tsa, Shela tsa,

³⁶Kainan, Arphaxad tsa, Shem tsa, Noah tsa, Lamek tsa,

³⁷Methusela tsa, Enok tsa, Jared tsa, Mahalalil tsa, Kenan tsa,

³⁸Enosh tsa, Seth tsa, Adam tsa, Saküüwuowa tsa.