Read Pochuri Naga LUKE 4 Bible Online

LUKE 4 - Pochuri Naga bible

LUKE 4

¹Jütiküsavü Jisu tü Kümtse Sietse nüh ma pro taji Jordan rügu vünüh shele ru, thinü Kümtse Sietsenüh ma küchü nü

²reza vü wa taji rülo zürake Tsuore nüh ma küümüra. Thi jüma tsothovü ma tü zanyo küsü nga mütsa, thitü rülo jümari jukümü sevü thuoüji ma tü avo rüma tewa.

³Thinü Tsuore nüh ma vü, “Noh tü Saküüwuowa Tsa wie thuoüji aloh hama vü azhü tsü taji alohse küüje luo,” ti küza.

⁴ Jisu nüh rüle taji, “Hakümjie rhüsaveh, nyiri tü lohse vünüh mpa mürhora ta rhü saveh,” ti küza.

⁵Jüsevü Tsuore nüh nothaküükhro küsü vünüh masie azhie kümüsie küsü vü kuo taji azhih vü kajipe aveh küjo ma kütsa taji,

⁶ma vü, “Hi nüh kükhra thi küthola aveh vi no tsü naveh, küpakenühnyunü jüri aveh hi vü tsümüthuoh thi hi nüh eh kümüsheri vü tsütsüti.

⁷Jükenüh noh nüh hi khurü thuoüji jüri aveh no zhi sanaveh,” ti küza.

⁸Thitü Jisu nüh ma rüle taji, hakümjie rhüsa veh, “Noh Saküüwuowa mpa khurü naveh, thi ma küüro mpa sanavehta rhü sa veh,” ti küza.

⁹Jüsevü nga ma sie Jerusalem vü walehü taji Kükhurüzhe luomuo rügivü küütsie nü ma vü, “Noh tü Saküüwuowa Tsa thuoüji, noh mpa harügi vünüh tsuotsawaluo,

¹⁰küpakenühnyunü hakümjie rhü sa veh, ma nüh mazhüleri küze taji no rükie naküveh kenüh.

¹¹Thi no tsuotsawa aloh rügi vünüh no müküüche nüh mari nüh no küruote naveh,” ti küza.

¹² Thinü Jisu nüh rüle taji ma vü, “Noh VÜWASaküüwuowa kümütevüh nyu ta rhüsaveh,” ti küza.

¹³Thi Tsuore nüh ma kümüte aveh jukümüsevü tsazhiküsü kenüh ma jamü taji tewa.

¹⁴Jütisanü Jisu tü Sietse kükhra vünüh shele Galilee vü teru, thinü ma zhükewa tü anyu natonahuo avehnyuotewa.

¹⁵Thi ma nüh künazizhe vünüh mari sosie, jüütiküsavü aveh nüh ma siake.

¹⁶Jüsevü ma tü ma rhoküsüra nyu Nazareth vü ru nü mawule vü kümüjie Sabbath ti küji Judahri kümünyie rülovü künazizhe vü wa taji Zhütsazhü chie nti süra.

¹⁷Thinü Isaya setsaküthsüwa lasi ma tsü. Ma nüh vi taji shatu ünü azhü hamari rhüküsala ngura.

¹⁸“VÜWA Sietse hi vü pevehthuoh, küpakenühnyunü kümükhuori vü zhühthe kümühie küza üta hi rüka müthuoh, küsi sa küvehri vizhu üta thi nothaküüjur sakümühietsü üta, thi nyuri nüh mürhü küvehri sakürüzi tsü üta.

¹⁹Thi VÜWA nüh hiri noküümze mavi wa nga vi nyuri vü küza üta ma nüh hi küze müthuoh,” ti küza.

²⁰Jütisanü ma nüh lasiwa khehmü taji külieluo taji akütsüküünawa vü tsümü nü shupetewa; thi künazizhe lovü küperi aveh ma vü rephoke khehtewa.

²¹Jütiküsavü ma nüh ma po pohka taji mari vü, “Nohsü nohri küüna vünüh Zhütsazhüwa sajumüthuoh,” ti küza.

²²Thinü mari tü ma phratekümühie nü ma po vünüh küümze zhüri shuküru kenüh ngo she; taji, “Hatü Josef tsa nyu ülo?” ti sa.

²³Jütiküsavü ma nüh mari vü, “Künyito vünüh küzana nü nohri tü hi vü küthsüzhü hama künanah, Nahzi küthsüwa noh mpa no sakümühie luo, thi Kapernaum vü momowa sanüh noh mpa no nyu vü nga saluo ta küza naveh,” ti küza.

²⁴Jisu nüh küzale taji, “Hi nüh nohri vü küzatoke naveh, setsaküthsüri ma mpa ma nyu vünü küchieke münyie,” ti küza.

²⁵ Thitü hi nüh zhütsa vünüh küza naveh, “Elijah tsothovü Israelri azhie vü tünyivühri hozake pe, jütiküsavü mavi küche thi asa türo thajüwu khehte tewanü azhie jüla aveh kümükhuoji küji pekümü kenüh,

²⁶Elijah tü tünyivüh küpari vü müküze nüh Zarefat, Sidon azhih vü tünyivühri küsü vü küze.

²⁷ Thi Elishah setsaküthsüwa tsothovü Israelri azhie vü wupie künari hozake peh, thitü Naman, Siriawa mpa küchienüh nyi küsü nga mümütsera nüh samü,” ti küza.

²⁸Thinü künazizhe vü küperi nüh hama thsüra taji mari aveh arüshu sheh.

²⁹Thi mari süra nü anyu vünüh ma zhejamü taji ma apothuohvü küchieja küülothe naküsa kenüh ma shoh küzhihokürügi mari anyu saküsape vü sietewa.

³⁰Thitü ma tü nyiri azavü nüh khophieshuwa nü ma mpa ma müshe vü tewa.

³¹Jüsevü ma tü Galilee nyuküji Kapernaum vü tetsuo nü matü Sabbath ti küji Judahri kümünyie rülovü mari sosiepeh.

³²Thinü ma zhüwa tü kükhra peh she kümü kenüh mari tü ma küsosiezhü küna ngo she.

³³Jüla kükhurüzhe vü mükümtse sietse nüh sietekütsewa nyi küsü pehveh ünü ma tü zia kümüsiesheh taji,

³⁴“Halie, Jisu Nazareth, noh tü hiri vü mowa sa nti lo? Noh tü hiri zorie nti tse ülo? Noh tü Saküüwuowa kümtsewa ta küsa hi nüh thsü veh,” ti küza.

³⁵Thitü Jisu nüh ma phra taji ma vü, “Noh zoti peh luo, thi ma vünüh shuteraluo,” ti küza. Thinü sietsekümüsüwa tü nyiri azavü ma küjie küzehmü taji nü ma vü zanyo küsü nga müsanüh ma vünüh shuteru.

³⁶Jütiküsavü mari aveh tü ngo taji küsü nüh küsüvü, “Hatü mowa zhü thuoh lo? Küpakenühnyunü azhükükhra kümüzho vünüh mükümtseri sietse vü azhütsü thuoüji shuteruveh nü,” ti küza.

³⁷Jütiküsavü azhie jüma natonahuo aveh vü zhüle jüma küzanyuo tewa.

³⁸Jüsevü ma tü süra taji künazizhe jamü nü Simon azhevü wa. Thinü Simon anyi tü mühi ze la. Thinü mari tü ma sakümühietsü üti ma vü khuo.

³⁹Jütiküsavü ma tü wa nü ma kütuovü tsie taji kümühiwa phra, thinü kümühiwa tü ma vünüh tewa, thi ma tü müküzhikewiethuoh nüh süra zanyo küche nü mari tsü.

⁴⁰Jüsevü rünyi kuotetu thuohnü küna küpapa na kütseri sie ma vü ru, thi ma nüh ma ke mari vü thsuoke nü sakümühie tsükhe.

⁴¹Thi sietse kümüsüri nga zia taji, “Noh tü Saküüwuowa Tsa wiethuoh,” ti sanü mari vünüh shuteru. Thitü ma nüh mari jüti müphratetümü üti küza nü khetemü, küpakenühnyunü ma tü Khrista ta küsa thsüküvehthuoh kenüh.

⁴²Thi thoru ünü azhie jüma jamü taji küüzo vü tewa. Thinü nyiri nüh ma ngu nü ma pharu taji ma müküze nti ma khete petewa,

⁴³thitü ma nüh mari vü, “Hi tü azhie küpa vü nga wataji Saküüwuowa kajipe zhüle kümühiewa müküzaji mümühie, küpakenühnyunü hi tü küüro hama kenüh küüze kenüh” ti küza.

⁴⁴Jütisanü ma tü Judea azhih vü künazizheri vü sosie petewa.