Read Pochuri Naga LUKE 5 Bible Online

LUKE 5 - Pochuri Naga bible

LUKE 5

¹Nyiri nüh ma chiluo taji Saküüwuowa zhü künaküvehvü Ma tü Gennesaret suozü nato vü tsieveh.

²Thinü juhie künyi suozü nato vü samü taji angakütieri thuoüji wa taji mari aneh müthaja küveh ngu.

³Juhie jümasü küsüwa tü Simon azhi, thinü ma tü Simon vü juhiewa pike julo vü küchieke üti küza nü ma jülovü tu shupe nü nyuri sosie.

⁴Thi ma zhüküzatuomü nü Simon vü, “Aneh küsükerijake nü tie na küsa kenüh aküsheh vü pike wa üti küza.”

⁵ Thinü Simon nüh ma vü, “Küsosiewa, küza tsotho hiri tü tieruthuohtü küsü nga mütiera nü. Thitü no zhü kenüh hi nüh anehwa küsükeri jake naveh,” ti küza.

⁶Jütisanü mari tü anehwa vehjake ünü anga müküüzarawura, thi aneh nga vü khrihtewa nti sa.

⁷Thinü refüri juhie küpa lovü peküvehri nga ra nü mari kükra üti ake nüh lahe nü ji. Thinü mari tü runü angari khu juhie künyi lovü thse ünü juhie künyitü aju lovü retewa nti sa.

⁸Jütiküsavü Simon Pitor tü jü ngu nü khotsütsuo Jisu ajih vü ze nü ma vü, “Halie eh VÜWA, hi vünüh tsekaritewaluo, hi tü kükhiemuori nü,” ti küza.

⁹Küpakenühnyunü ma thi ma siekütseri aveh tü anga jükütiezhu ngu nü khielota küngo kenüh.

¹⁰Thi mari mpa mükünyu ma sie kütse: Jems thi Johan, Zebedee tsa künyi nga ngo sheh. Thinü Jisu nüh Simon vü, “Mükrütümü luo, nosü nüh tuvü thuoüji noh tü nyiri kürewa küsanathuoh,” ti küza.

¹¹Jütisanü mari juhie viru küüwe vü samü nü mari zanyo aveh jamü nü ma senyitewa.

¹²Jüsevü ma tü wa anyuküji küsü vü peveh ünü wupie nakümüsüri küsü jüla ru nü Jisu ngu ünü matüvü kükietsuo ze taji ma vü, “VÜWA, noh kümüshe thuoüji noh tü hi sakümühierana nü,” ti küza.

¹³Thinü ma tü ma ke thsuowa ma pa taji ma vü, “Eh kümüshewiethuoh, noh mühiemü luo,” ti küza. Jütiküsavü müküzhikewiethuoh nüh ma wupie künawatü shiti mühietewa.

¹⁴Thi ma nüh nyi küsü vü nga müküzatümü luo, thitü wa nü levüwa vü kütsanü nyiri nüh thsünaküsa kenüh Mosa nüh azhükütsü kümüjie noh saküümütse kükhurü saluo, ti küza.

¹⁵Thitü mükhetera nüh ma zhühlewa tü küzhiküzhia nyuotewa nü nyiri hozake ma zhü küna nti thi mari künasaküümühie nti ru khe.

¹⁶Thitü ma tü jüla nüh reza vü tewa taji khuope tewa.

¹⁷Jüsevü rülo küsü ma nüh sosie veh ünü Farisiri thi Khonyo küsosieri Galilee thi Judea thi Jerusalem nyuri vünüh rukhe nü ma nato awuowuo mükieshe peh, jütiküsavü sakümühie na küsa kenüh VÜWA kükhra ma vü peh.

¹⁸Thinü halie, wiechu küsüri küsü aze rügivüküüze nü kharu, mari tü ma kha taji Jisu atüvü azhelovü wa nti sa,

¹⁹thitü azhe lovü khatu naküsa anyi riekhuowa kenüh aleküsü nga mpie nüh sa, jükenüh ma kha taji azheh rügivü kuo nü azhe phrüphie nü ma aze vü küze taji Jisu atüvü kürüsheke küze.

²⁰Thinü Jisu nüh mari kütsotü ngu taji künawa vü, “Noh kükhiemuo noja tsümüthuoh nüh,” ti küza.

²¹Thinü Khonyo küsosieri thi Farisiri tü küüzhe vünüh kürüchie taji, “Azhümüküchie küphra hatü Saküüwuowa mpa küchie nüh thawa nüh kükhiemuo nojaramühieveh lo?” ti sa.

²²Jisu nüh mari kürüchie küveh thsüra taji mari vü, “Nohri tü mokenüh nohri mpa nohri luoveh vünüh jükümjie müshe veh lo?

²³Noh kükhiemuori nojatsü müthuoh nüh ti küüzawa ri süranü tsetewaluo ti küphrate khiemawa küürüzi lo?” ti küna.

²⁴Thitü azhih vü nyiri kükhiemuo nojatsü na küsa anyi tsawa kükhra peveh ta küsa nohri küüthsü na küsa kenüh ma nüh wiechuküsüwa vü, “Hi nüh no vü küzaveh nosüra no ze kha taji tse no zheh vü waluo,” ti küüza wie.

²⁵Jütiküsavü müküzhike wiethuoh nüh mari tüvü süra taji ma ze kha nü Saküüwuowa siake taji ma zheh vü tewa.

²⁶Thinü mari aveh ngo sheke nü zohm ti petewa, jüsevü mari aveh Saküüwuowa siake taji; “Nohsü hiri zanyo küzhühjukürüthe hozake nguthuoh,” ti küza.

²⁷Hamasevü ma tü alievü wa ünü akhrü kükhrühriküsü ma nyo Levi ti küsa ma küüro vü pela taji mavü, “Eh se nyiluo,” ti ji.

²⁸Thinü ma tü zanyo aveh jamü taji süra nü ma se nyitewa.

²⁹Thinü Levi nüh kütsazhu küji küsü ma zheh vünüh Jisu kenüh küche, thinü akhrü kükhrühri hozake thi nyiküpari nga mari sie kürü kütsazhu sa.

³⁰Jütiküsavü Farisiri thi Khonyo küsosieri nüh ma sehnyirisie küproluo nü, “Nohri mokenüh akhrü kükhrühri thi kükhiemuori sie kütsaküzhu sa veh lo?” ti phrate.

³¹Jisu nüh rüle taji mari vü, “Kümütsari thuoüji nahziküthsüri müviketünga azhümünyie, thitü künari kenüh wie.

³²Hi tü künyitsari ji nti müru, thitü kükhiemuori luovehküükhaphrü nti küru wie,” ti küza.

³³Thinü mari nüh ma vü, “Johan sehnyiri thi Farisiri sehnyiri tü assa sapehuo thi kükhuo sa pehuohuoti, thitü noh nü tsazhu pehpehti,” ti küza.

³⁴Thitü Jisu nüh mari vü, “Kümünyutepawa nüh mari sietsazhu peküvehvü küzehri tü küükhehpe naveh lo?” ti küna.

³⁵Thitü arülo ru naveh, thi mari vünüh kümünyutepawa tü sietewa naveh, jürülo vünüh assa sanaveh, ti küza.

³⁶Jüsevü nga Jisu nüh küzhühiezhü küza taji, “Nyiküsü nga athsü kürüthe zokhri nü kürüwi vü khieke müveh, jütathuoüji kürüwiwa nüh kürüthewa siekritewa naveh, thi kürüthewa tü kürüwiwa sie zarike müsarathuoh.

³⁷Thi nyi küsüwienga akha kürüthe vi sahuleh huokürüwi vü zhi müveh, jüta thuoüji akha kürüthewa nüh sahulehuo kürüwiwa vüphumü nü küshomü naveh, thi jüti sanü sahulehuowa tü zoriemü naveh.

³⁸Jükenüh akha kürüthe tü sahulehuo kürüthe lovü müzhiji mümühie.

³⁹Thi nyi küsü nga akha kürüwi zhupe taji kürüthe müngumüveh, küpakenühnyunü ma tü kürüwiwa tü mühiemü ta küüza kenüh,” ti küza.