Read Pochuri Naga LUKE 6 Bible Online

LUKE 6 - Pochuri Naga bible

LUKE 6

¹ Sabbath ti küji Judahri kümünyierülo küsü ma sehnyiri sie taji khuozhiza vehthuoh tse ünü ma sehnyiri tü nyura khuozhi shi taji ake nüh mülo nü vikuotsa.

²Thinü Farisiri wuori nüh, “Kümünyierülo vü mokenüh nohri Khonyo mükünyu saveh lo?” ti küza.

³Thinü Jisu nüh, “Nohri tü David nüh avo rüma kümüvü ma thi ma se nyikütseri nüh mowa sanüh müchie ülo?” ti küza.

⁴ Mokümüjie ma tü Saküüwuowa azheh lovü tu nü levüri wie küchie nüh kütsale mükünyu VÜWA vü kütsülohsewa vi tsa thi ma se nyikütseri nga mütsü ülo? ti küza.

⁵Thinü ma nüh mari vü, “Nyi Tsawa thuoüji kümünyierülo nyia vüwa,” ti küza.

⁶Jüsevü kümünyierülo küpavü wa taji künazizhe vünüh nyuri sosie veh ünü nyi küsü ake azhie wuovü küsü jüla pela.

⁷Jütiküsavü Khonyo küsosieri thi Farisiri nüh maphratekümüsü na küsa kenüh kümünyierülo vü ma küna sakümühie tsüna ünü nyu nüh ti no pe.

⁸Thitü ma nüh mari müshe thsü tajinü ake küsüwavü, “Ra hala tsie luo,” ti küza, thinü ma tü sürataji wa jüla tsie.

⁹Jütiküsavü Jisu nüh mari vü, hi nüh nohri vü künanah veh, “Kümünyierülo vü zanyo kümühieküsale ünü kümüsü küsale lo; akürho küülole leh ünü küzotheleh ülo?” ti küna.

¹⁰Jütisanü ma nüh küprüle aveh vü no taji ake küsüwavü, “Noh ke tü mühie luo,” ti küza. Thi ma nüh küchuo küze ünü ma ke tü mühie teru.

¹¹Thitü anyi jümari tü khieloti arüshu taji Jisu vü mowasaji mühie nathuohlo ti mari kürüchie.

¹²Jüsevü Jisu tü küzhiho vünüh kükhuo sa nti tewanü arüza ajü mükütuothuoh nüh Saküüwuowa vü kükhuo sa pe.

¹³Thi thoru ünü ma sehnyiri ji taji jü vünüh mari türakünyi rüka taji povüküsari ti ji.

¹⁴Jümari tü; Simon, ma nüh Pitor ti jikütsüwa, thi manü Andrew, thi Jems, Johan, Filip thi Bartholomi,

¹⁵thi Mathi Thomas, Jems Alfius atsa, Simon Kümüsheküthsewa ti küjiwa,

¹⁶Judas Jems tsa thi Judas Iskariot, Jisu rekütsüwa.

¹⁷Jütisanü ma tü mari sie azhie kütake küsü vü tseturu tsie nü jüvü ma nüh sosie taji ma se künyiri nga hozake thi Judea aveh vünüh thi Jerusalem thi Tair thi Sidom azhih vü juküji nato vünüh riekhuo küji küsü maküsosie zhü küna nti thi mari künari saküümühie ntiru khe.

¹⁸Thi mükümtse sietse nüh mürütekütseri nga sakümühie tsü kheh.

¹⁹Thi anyi riekhuo aveh ma pah nti sa, küpakenühnyunü mavünüh kükhra shuru taji mari sakümühie küveh kenüh.

²⁰Jüti sataji ma tü toke nü ma sehnyiri vü no nü, nohri kümükhuori kümüngatsahri; küpakenühnyunü Saküüwuowa kajipe tü nohri zhi küsakenüh.

²¹Nohri khinyi rümaküvehri kümüngatsahri, küpakenühnyunü nohri müwara naküveh kenüh. Nohri khinyi krieküvehri kümüngatsahri, küpakenühnyunü nohri tü kükhri naküveh kenüh.

²² Anyi Tsawa kenüh nyuri nüh nohri mürhü, thi nohri müchieke nüh sa, thi nohri küjo thi nohri mümühie ta nohri anyo ja ti küsari kümüngatsahri!

²³Nohri jürülovü lozheluo, thi külozhe kenüh joke luo, küpakenühnyunü halie, rügivü nohri suope ji sheh küvehkenüh. Jükümjie mari lahnyiri wie nga setsaküthsürivü sakütsü kenüh.

²⁴Thitü nyirhieri vünü kümüzü ru thuoüji amüngu kümüseri, küpakenühnyunü nohri thuoüji azhih vü loküra ngu kümüthuoh kenüh.

²⁵“Nohri khinyi müwa küvehri vü kümüzü ru thuoüji nohri amngukümsüri, küpakenühnyunü nohri tü rüma naküvehthuoh kenüh. Nohri khinyi kükhri küvehri vü kümüzü ru thuoüji amngukümsüri sanathuoh, küpakenühnyunü nohri tü lorü nü krie naküvehthuoh kenüh.

²⁶“Nyuri nüh nohri phratekümühie sheh kütseri vü kümüzü ru thuoüji nohri amngukümsüri, küpakenühnyunü mari lahnyiri nga jükümjie setsaküthsü küzhüjahri vü jüüta küsa kenüh.

²⁷“Thitü hi nüh eh zhüküna küvehri vü küza naveh, nohri mükünongüri kümüze luo, thi no kümürhüri vü kümühie saluo.

²⁸Tsia no küümzeri tsüluo, nohri phraküümüsüri kenüh kükhuo saluo.

²⁹Thari nüh no nakie je naveh nüh kürele küpa wuo vü nga tsüluo, thi thawa nüh no thsü vi nta nüh noh satsaküüzhuvüh nga tsümü luo.

³⁰Nyi küsüküsü nga satü no vü zanyo khuoküruwa tsüluo, thi thawa nüh noh zanyo vitewa naveh nüh mükhuole tümü luo.

³¹Thi nyuri nüh nohri vü mokümjie sathuoüji nohri lozheveh nüh, nohri nga jükümjie nyuri vü satsüluo.

³²“Mükütüküzü noh nüh no küümzeri mpa kümüzethuoüji no kümühie tü mowa lo? Küpakenühnyunü kükhiemuori wie nga mari küümzeri kümüze küvehkenüh.

³³Thi noh nüh no vü kümühie küsari vü mpa kümühie sathuoüji no kümühie tü mowa lo? Küpakenühnyunü kükhiemuori wie nga jükümjie saküveh kenüh.

³⁴Thi noh nüh küngurari vü mpa küüna thuoüji no kümühietü mowa lo? Küpakenühnyunü kükhiemuori wie nga jüzake ngule naküsa kenüh kükhiemuori vü küünanati.

³⁵Thitü no mükünongüri kümüze luo thi mari vü kümühie saluo, thi mari vü zanyo küüna luo, thitü ngule nati mümüngu tümü, jütathuoüji no jisuowa tü jisheh na thi noh tü Kümüsietsawa tsa sara naveh, küpakenühnyunü ma thuoüji kümüna vi nyuri mükütsüngüri vü nga thi zanyokümükari vü nga azhünyi küveh kenüh.

³⁶Nohri Pawa nüh küümze küpro kümüjie nohri nga küümze pro luo.

³⁷“Nyuri müküle mphatümü, jütathuoüji nyuri nga nomüküle küphawanyu, nyuri müshe mümüsütümü, jütathuoüji nyuri nga no müshe kümüsüwanyu, noh nyuri müküle nojatsüluo, jütathuoüji nyuri nga no müküle nojatsü naveh.

³⁸Zanyo vi nyuri tsüluo, jütathuoüji nyuri nga no tsü lenaveh, küto mühie sheh, teke, küjike thi müzhiechü taji nohri athsü lovü nga thsetsü naveh. Noh nüh kütokütsüvünüh nyuri nga kütotsüle naveh,” ti küza.

³⁹Jüsevü nga ma nüh küüzhühiezhü küsü küza hünü; nothaküüjuri nüh nothaküüjura le küjora naveh lo? Jütathuoüji masü khürünga apothuoh vü müküluketümü navehlo?

⁴⁰Asehnyiwa tü küsosiewa nyia vü ji müveh, thitü küsüküsünga sosie kümühie müthuoüji küsosiewa kümüjie samünathuoh.

⁴¹Noh mpa no notha lovü kümüneh kütüwa müthsü nüh noh nü notha lovü kümüneh tüküvehwa no veh lo?

⁴²Nyutü no notha lovü kümüneh kütüwa münokhu nüh nonü vü, “Eh nü, no notha lovü kümüneh tüküvehwa hi küükhejamüjie ta küzara mühie veh lo?” Noh küthseküsawa, no notha lovü kümüneh kütüwa khezhukhumü luo, jütathuoüji noh nü notha lovü kümünehkütüwa ngu kümtsera naveh.

⁴³“Küpakenühnyunü arhu kümühietü avi kümüsü küpewanyu, nyutü arhu kümüsü tü avi kümühieküpewanyu;

⁴⁴ küpakenühnyunü arhu küsüküsü nga ma vi vünüh thsüra veh. Jichuo tü rüzhü thso vünüh laramüveh.

⁴⁵ Anyi kümühieri tü mari luoveh kümühie lovü nüh kümühieshuveh, thi anyi kümüsüri tü mari luoveh kümüsü lovü nüh kümüsü shuveh, küpakenühnyunü luoveh lovü mowa tü veh nüh apo vünüh phrazhuzhuti.

⁴⁶“Nohri mokenüh hi vü VÜWA, VÜWA ti ji nü hi nüh sa üti küsari müsa lo?

⁴⁷Thari nüh hi vü ru nü eh zhü küna taji jümari sanaveh nüh hi nüh jümara khuke mokümjie nüh küjokütsanaveh.

⁴⁸Jümari tü nyi küsü nüh azhih chüküshe taji alokrü vünüh azhefo lojuke küru kümüjie wiethuoh. Jümatü ajujiru taji jüma küshüke wie ketünga azhewa sakümüzhosheh kümüthuoh kenüh müküshüchie.

⁴⁹Thitü thari nüh küna taji müsanüh sanaveh nüh jümathuoüji azhefo müloju thuoh nüh azhih rügivü azheh küsakümüjie wiethuoh. Jüti sataji ajujiru ünü azhewaküshüke, thitü samükümüzho kenüh shitaküshüchiemü taji kria sheh kümü kümüjie wiethuoh,” ti küza.