Read Pochuri Naga LUKE 7 Bible Online

LUKE 7 - Pochuri Naga bible

LUKE 7

¹Ma zhü hamari küzathuoh taji nyira khüna vü thseju kümü sevü ma tü Kapernaum vü tewa.

²Jüvü thopahiri müzake nyia nüh küjiri küsü tü ma küümze sheh siepe küsü peveh ünü na taji küsükümühie sateru.

³Thinü ma tü Jisu zhüku künara taji Judahri; sierhü wuori ma vü küze nü ru ma siepewa sakümühie tsü üti khuo.

⁴Thi mari Jisu vü wa nü wurie ma zhieke taji, “Noh hama kenüh sakütsüle wie lie,

⁵küpakenühnyunü ma tü hiri akuoh kümüze shemü, thi ma nüh künazizhe nga sa hiri tsü,” ti küza.

⁶Thinü Jisu nüh mari se nyiwa. Ma tse azhe shenyi tse ünü, thopahiri küjiwa tü ma füri ma vü küze taji, VÜWA, no ru münomüna müpetümü, hi tü no eh zhelovü turu üta küsa nga mütse nüh samü.

⁷Jükenüh hi tü no vü ru nta küsa nga mütse nüh samü, tinü no zhü tsü taji eh siepewa tü küümühieluo.

⁸Küpakenühnyunü e kükhuvü thopahiri peveh thi hi nga küjira kükhuvü küperi, thi hi nüh nyi küsü vü, “Waluo ta thuoüji wawati, thi küpawa vü, ra, ta thuoüji ruruti, thi eh siepewa vü hama saluo, ta thuoüji ma nüh jüma sasati,” ti küza.

⁹Jisu nüh azhü hama küthsüravü ma ngo sheh nü kürelema senyikütse anyi riekhuowa vü, “Hi nüh nohri vü küzanaveh, hi nüh Israel azhie vü nga kütsotü hakümjie müngu” ti küza.

¹⁰Thinü ma nüh küüzeri shele azhe vü ru ünü siepewatü mühie la nü ngu.

¹¹Jüti sataji müküzhikewiethuohnü ma tü tse Nain ti küsa nyuküji vü tewa, thinü ma sehnyiri thi anyi shieji küsüma vü nyiwa.

¹²Thi ma tü tse nyuküji jüma ashieku shenyi wa ünü, halie, tünyivühri tsa küsü sü taji kharu, aküsü jüma azah tü atsa jüma mpa, thi nyuküji jüla nüh nyiri khieloti nyimzawa se nyi ru.

¹³Jütisakütsevü VÜWA nüh nyimzawa ngu ma luoveh nanü ma vü, “Mükrietümü,” ti küza.

¹⁴Thinü ma tü ru nü kümoküthsekuwa pah ünü kümokhakütseri tü tsietewa. Thinü ma nüh, “Vizawa, hi nüh no vü küzaveh, süraluo,” ti küza.

¹⁵Jüti küüza vü aküsüwa tü süra shupe taji azhüphrate wa. Jütisanü ma nüh vi ma za tsümü.

¹⁶Thi mari krü sheke taji mari Saküüwuowa siake nü hiri azhie vü setsaküthsü küji küsü shuru pevehthuoh, thi Saküüwuowa nüh ma nyiri no vehthuoh, ti küza.

¹⁷Thinü ma zhülewa tü Judea azhih aveh vü thi jüma natonahuo aveh vü nyutewa.

¹⁸Johan Baptist sehnyiri nüh zanyo hari aveh ma vü küza.

¹⁹Thinü Johan tü ma sehnyiri nyi künyi ma vü jike nüVÜWA vü küze taji, “Noh tü ru nta küsawa thuohnü hiri tü küpa huo na lo?” ti küsawa küna üti küze.

²⁰Thi nyi jümari Jisu vü ru taji mari nüh ma vü? “Johan Baptist nüh hiri no vü küüze thuoüji, noh tü ru nta küsawa thuoh ünü hiri tü küpa küühuo na lo? ta küsawa küna üta küzelie,” ti küza.

²¹Jütiküsa tsothovü ma tü aküna müküzüküzükünari thi küna kümüsü akürho thi sietsekümüsüri, thi nothaküüjuri aveh sakümühie tsü.

²²Thinü ma nüh mari vü, “Nohri nüh momowa ngu thuoh nüh wataji Johan vü küza luo: Nothaküüjuri zanyo nguramüthuoh, ajih kümüsüri letseramüthuoh, wupie künari mütseramüthuoh, khünakürüpori azhükünaramüthuoh, aküsüri rhosüra le müthuoh, kümükhuori vü Zhüthe Kümühie küüza vi mari zhi samüthuoh.

²³Thi nyi küsüküsü nga hi mütsotü nüh müküsawanü kümüngatsahwa sanaveh,” ti küza.

²⁴Thinü Johan zhüleküviri tewa ünü ma tü Johan zhüku anyi riekhuowa vü küza taji, nohri mowa no nti reza vü walo? Amürhü nüh amüshüh he küünga no nti wa ülo?

²⁵Thinü nohri tü mowa no nti wa lo? Nyiri thsümünyiküüzhu küvü no nti wa ülo? Halie, thsümünyi jükümjie amekükhra küvüri thi nyirhieri thuoüji kajiri azhe vü peveh.

²⁶Thinü nohri tü mowa no nti wa lo? Setsaküthsüri no nti wa ülo? Jüma ah ta küsa küzara naveh. Küpakenühnyunü hi nüh küza naveh, ma tü setsaküthsüri nyia vünüh küji küsü.

²⁷Zhüku hakümjie rhüsaveh: Halie, hi nüh noh tüvü ehzhüleküvü wa küzethuoh, ma nüh noh tüvü no lekhujiwa küche naveh.

²⁸Hi nüh nohri vü küza naveh, “Nyimzari avo lovü nüh wuoküru nyi küsü nga Johan nyia vü müji; thitü Saküüwuowa kajipe lovü thuoüji küzatsawa nga ma nyia vü jiveh,” ti küza.

²⁹ Jütiküsavü nyiri aveh nüh thi akhrü kükhrüri aveh nüh Saküüwuowa tü müshoveh ti küsa phrate, küpakenühnyunü mari tü Johan Baptistwa nüh vi baptis küsa kenüh,

³⁰Thitü Farisiri thi Wule küsosieri nü ma vünüh baptis müküsa kenüh Saküüwuowa kümüshe kulemü.

³¹Thinü hi tü mowa vi khinyi kürho nyiri tü vikümüjie na lo?

³²Mari thuoüji kürünguori asüküsapevü shupe taji küsünüh küsü ji küveh kümüjie, “Hiri nüh nohri vü pilechu khu thuoh, thitü nohri nüh mütsi, hiri nüh külukütsathuoh, thitü nohri nüh mükrie.”

³³Küpakenühnyunü Johan Baptist tü ru nü lohse mütsa thi akha müzhu; thinü nohri nüh ma tü atsuore kümüsü sietse, ti phrate.

³⁴Thi anyi Tsawa thuoüji ru nü tsa thi zhu ünü nohri nüh, matü, halie, amüwi küjiwa thi zhuke küpewa, thi atheküviri thi kükhiemuora füwa ta.

³⁵Thitü thari nüh Saküüwuowa küthsüzhü tsotü müthuoh nüh mari nüh jüma tü zhütsa ta müshekümüshomüthuoh, ti küza.

³⁶Jüsevü Farisiri küsü nüh ma sietsazhu nti küjivü, ma tü Farisi wa zheh vü wa nü shiekütsape vü shupeh.

³⁷Thinü halie, Jisu tü Farisiwa zheh vünüh shietsa nti rupeveh ta küsa kükhiemuo vühri küsü nüh thsüra taji avüju mührü ku küsü vi Jisu vü ru.

³⁸Thi ru nü ma se vü ajih kütuo vünüh krie taji marütshü ma jih vü kürütsuoke taji ma lüshe nüh vinemü nü ma mpha kümetsü, thi avüju nüh ma mphakünetsü.

³⁹Jüti saküveh vü Farisiwa, Jisu sieru tsazhu küvehwa nüh ngu taji ma mpa ma jüle nü, “Anyi hama tü setsaküthsüri tüla nyimzawa tü mokümjie küsavühri thi kükhiemuori ta küsa thsü na nü,” ti sa.

⁴⁰Thinü Jisu nüh ma vü, “Simon hi tü no vü zanyoküsü küza ngüveh lie,” ti küza. Simon nüh ma vü, “Mowa lo Küsosiewa?” ti küna.

⁴¹Thinü Jisu nüh, “Pesa küünari nyi küsü tü ma shewi küvü nyi künyi pe, nyi küsü thuoüji raka müza münga, thi küpawa thuoüji tünyieke ti vü.

⁴²Thitü masü tü ma müthuohra nüh küsavü ma nüh masükhürü nojatsü, thinü masü thawa nüh maküümze khe na lo?” ti küna.

⁴³Simon nüh, “Aküzhi noküjatüwa nüh küüzhi maküümze na tünü,” ti rüle tsü. Thinü ma nüh ma vü, “Noh nüh khem ta küzatsüthuoh,” ti küza.

⁴⁴Jütiküsavü ma tü nyimzawa vü küprüke taji Simon vü, noh tü nyimza hama ngu veh thuoh ünü? Hi tü no zhehvü ru thuoh, thitü noh tü eh jih kükhrü nga aju mütsü, thitü nyimzawa hama thuoüji ma rüthsü eh jih vü küürütsuoke nü ma sheh nüh vi netü.

⁴⁵Noh tü eh jih nga mü küme, thitü ma thuoüji hi azhe ha lovü küturu te vünüh eh mpha müjie kümetuo wie.

⁴⁶Noh nü avüju vi eh lü nga müjie künetüwie, thitü ma thuoüji avüju vi eh mpha küne tü.

⁴⁷Jükenüh hi nüh no vü küza naveh, “Ma kükhiemuori aveh nojamütüthuoh, küpakenühnyunü hi kümüze shekekütsü kenüh, thitü nojazüla kütsüwa thuoüji kümüze züla,” ti küza.

⁴⁸Jütiküsavü ma nüh nyimzawa vü, “Noh kükhiemuori nojamütüthuoh,” ti küza.

⁴⁹Thinü ma sie kütsazhupe vü peküvehri nüh mari mpa jüle taji, “Nyira kükhiemuo nojatsü müthuoh ta küsa hatü thawa lo?” ti sa.

⁵⁰Jütiküsavü ma nüh nyimzawa vü, “Noh kütsotü mpa nüh no külolethuoh, noluoveh rüzi nü waluo,” ti küza.