Read Pochuri Naga LUKE 8 Bible Online

LUKE 8 - Pochuri Naga bible

LUKE 8

¹Küsuomüwa nüh ma tü Saküüwuowa kajipe Zhüthe Kümühie vi taji anyu küji vü nga thi küzah vü nga küza wa. Thi türakünyiri nga ma se nyiwa.

²Thi nyimzari wuori: sietse kümüsüwa nüh mürü taji tekütseri thi küna vünüh saküümühieri: Maria, Magdalene ta küjiwa, sietse kümüsü türü zheküjatüwa,

³thi Joana, Chuza vüvüh, Herod kütsüküünawa, thi Susana, thi küpari hozake nga, thi mari azhi vi taji Jisu thi ma sehnyiri küükrari hozake nga nyiwa.

⁴Thi anyi riekhuo anyunyu vünüh ma vü ru nü, ma nüh küzhühie zhü phrate mari sosie:

⁵Mahtsü küzhuhri küsü ma mahtsü zhuh nti wa, zhuhküwavü wuori tsuotsa lekhuji vü tewa nü ajih nüh nyinyamü, thi rügivü prükütse müwari nüh khrütsamü.

⁶Wuori tsuotsa aloh rügivü tewa, thi shoshuhrutü azhihkürüpah kenüh wazhü tewa.

⁷Thi wuori thuoüji rüzhü zavü tsuotsake tewa, thinü rüzhü masü kürü shoru nü arüzhü nüh kethemü.

⁸Thi wuori thuoüji azhih kümühievü tsuotsake nü shozhuru, thi arhu jümari tü avi müzaza pe. Ma nüh azhü hamari phra nü zia taji, “Nohri khüna pehküvehri nü küünaluo,” ti küza.

⁹Thinü ma sehnyiri tü küzhühie zhü jüma ma zhünyo tü mowa lo? ti küna.

¹⁰Thinü ma nüh, nohri vü thuoüji Saküüwuowa kajipeküsheri thsü üti tsümüthuoh, thitü küpari vü thuoüji küüzhühie vünüh küza veh, jükenüh mari tüno wie ketünga müngura, thi küna wie ketünga mari tü müthsüra.

¹¹Thi küüzhühie zhüwa tü hama; “Mahtsüwa tü Saküüwuowa zhü.

¹²Tsuotsa lekhuji vü teküwari thuoüji, azhü jümari künarataji mütsotü nüh küülole müngu nüh Tsuore nüh rutaji mari luoveh lovü nüh viteküwari.

¹³Thi aloh zavü teküwari thuoüji, zhü jümari küünaravü lozhe taji vi thitü rüzo luoveh lovü müwuke nüh tsotho pike mpa tsotü nü kümüra ru ünü mürateküwari wiethuoh.

¹⁴Thi rüzhüza lovü tsuotsaketeküturi thuoüji, zhü jümari künara thitü tsotho pike wa taji azhih vü kümünguri, künyirhie thi loküzheri nüh we taji aviwa mümühiera nüh sakümü kümüjie wiethuoh.

¹⁵Thi azhih kümühie vü küturi thuoüji, zhü jümari künara taji küzhütsanyitsa vünüh thi luovehtsa vünüh küjephoke taji küzhike nü avi küperari kümüjie wiethuoh,” ti küza.

¹⁶“Nyi küsü nga anyih tso taji zanyoku nüh sote samüveh, nyutü zekhu lovü sa müveh, thitü kütipe rügivüsaveh, jütathuoüji azheh jülovü küturi nüh küwie jümangu naveh.

¹⁷“Küpakenühnyunü vi müküthsü nüh küthi sana küsa zanyo küsü nga münyie, thi küthi küsari tü küüthsü kheh naveh thi küwie vü vizhutsükheh naveh.

¹⁸“Jükenüh noh nüh mokümjie künaveh nüh kümühieti künaluo, küpakenühnyunü thari nüh luohzhe tse veh nüh jümari nü tsüpheh le naveh, thitü mükünyieri thuoüji ma nüh müshe lozhe tse ta ketünga vitewa le naveh,” ti küza.

¹⁹Jütiküsavü ma zah thi ma nüri ma vü ru, thitü anyi riekhuowa kenüh mari ma vü mütura nüh sa.

²⁰Thinü nyiri nüh ma vü, “Noh zah thi noh nüri nüh noh mütunthe ta ru anyula vü tsieveh lie,” ti küza.

²¹Thitü ma nüh mari vü, “Eh zah thi eh nüri thuoüji thari nüh Saküüwuowa zhü küna taji sanaveh nüh jümari wiethuoh,” ti küza.

²²Rülo küsü ma tü ma sehnyiri sie taji juhie küsülovü tu nü mari vü, “Hiri hie suozü tuwuovü tewa nüh raluo,” ti sanü tewa.

²³Thi mari hie tse ünü ma tü ze tewa. Thinü tsomürhü suozü vü saru nü mari juhie tü aju nüh proteru taji küsükümühie satewa.

²⁴Jütiküsavü mari tü wa taji ma müchüke nü, “Küsosiewa, küsosiewa, hiri tü süna savehthuoh,” ti küza. Thinü ma tü süra taji amürhü thi juküshü küvehriphra, thinü letewa taji zohm ti petewa.

²⁵Jütiküsavü ma nüh mari vü, “Nohri kütsotü khielapeveh lo?” ti küza. Thinü mari tü krü taji küsü nüh küsü vü, hatü thawa nü mürhü thi aju vü nga azhütsü taji mari tü ma zhü künaveh thuoh lo? ti sa.

²⁶Jüti sataji mari tü Galilee kürüwie anyu Jerasen ti küsavü ruju.

²⁷Thi ma tü ajuküüwe vü shuru ünü, nyuküji vünüh küru tsotho hothake mükümtse sietse nüh sie taji tekütse thsümünyi nga müvü nüh küsa azheh vü mürho nüh rükuza vü mpa kürho küsü mütu.

²⁸Jüma tü Jisu ngu ünü, zia taji küluzetewa nü ma vü, “Jisu, Saküüwuowa Kürügitsawa Tsa, no hi vü mowa sa ntilo? Noh hi samükümnomna tümü luo,” ti küza.

²⁹Ma nüh hama küüza thuoüji küpakenühnyunü, ma nüh mükumütse sietsewa tü anyiwa vünüh shuteru üti azhükütsü kenüh. Sietse kümüsü jümatü khana vü nüh ma vü pe taji ma mürü tekütse thuoh kenüh, thi kühuori sataji ma huoküüpe, thi mürüli thi ajih kükhetevüh nüh ma pheh, thitü küthothuoh taji sietse mükümtsewa nüh ma sie reza vü tewawati küsa kenüh.

³⁰Jütiküsavü Jisu nüh ma nyo küna ünü ma nüh, “Ehnyo thuoüji mükümtse sietse hozake kütüwa,” ti küza. Küpakenühnyunü mükümtse sietse hozake ma lovü tekütu kenüh.

³¹Thi mari vi pothuoh küshe tsatsa lovü müthse tümü üti ma vü khuo.

³²Jütiküsa tsotho vü awu shieji küsü aküzhi wuovü zanyo chütsa peveh, jütiküsavü mari awu za vü küze üti ma vü khuo. Thinü ma nüh wa üti küza.

³³Jüti küüzavü mari tü anyiwa vünüh shuteru taji awuri vü tewa, thi awuri tü apothuoh vü zhüluowa taji suozü lovü nüh kürhothe khehmü.

³⁴Awu huoküvehri nüh jü ngu tajinü zhüwa nyuküji vünga thi anyuküza vü nga küza khe.

³⁵Thinü mokümjie samüthuoh nüh ti nyiri tü no nti wa, thinü mari tü Jisu vü ru nü ma vünüh mükümtse sietse shuteküwa watü athsü mphie taji ma müshe mütsahnü Jisu ajih vü shuküpela ngu nü mari tü krü she.

³⁶Jü künguri nüh mokümjie anyiwa tü mükümtse sietse vünüh sakümühiera nüh wa nü nyiri vü küza.

³⁷Thinü Jeresen anyu natonahuo vü küperi aveh nüh Jisu tümari vünüh tewa üti küza, küpakenühnyunü mari tü khieloti kükrü kenüh, jütisanü ma tü juhie lovü tunü tewa.

³⁸Ma vünüh mükümtse sietse shuteküwa watü ma senyiwa nti khuo, Thitü Jisu nüh tewa üti ma vü küza taji,

³⁹“Noh shele no zheh vü tewaluo, thi Saküüwuowa nüh küzake no vü sa tsüthuoh nüh wa küza luo,” ti küza. Thinü ma tü wa taji Jisu nüh küüro küji küsa jümari anyuküji aveh vü küzawa.

⁴⁰Jüsevü Jisu tü shele ru ünü anyi riekhuowa tü ma huoküveh kenüh mari aveh lozhe nü ma siethse.

⁴¹Jütiküsavü ma nyo Jairus ti küsawa künazizhe vü levüri küsü ru nü Jisu ajih vü küluze taji ma zhehvü ra üti khuo.

⁴²Ma tü atsarülari mavi türakünyi kükhruo küsü peveh ünü sü nta küsa vü pe, ma tü atsa hama mpa wie. Ma küwavü nyiri aza vünüh chiluo taji wa.

⁴³Jütiküsavü nyi küsü nga nüh samükümühiera mavi türakünyi azüh litekütsevühri küsü,

⁴⁴ma se vünüh ru taji ma thsühu pa, thinü müküzhikewiethuoh nüh azüh likütsewa tü letewa.

⁴⁵Jütiküsavü Jisu nüh, “Thawa nüh hi pa lo?” ti sa. Nyiri nüh müküzazhu nüh sakümüvü Pitor nüh, “Küsosiewa, anyi riekhuowa nüh no mükieshe taji chiluo tsenü,” ti küza.

⁴⁶Thitü Jisu nüh, “Nyi küsü nüh hi pah wiethuoh, küpakenühnyunü hi vünüh kükhra shuteküwa hi nüh thsüküveh kenüh,” ti küza.

⁴⁷Thinü nyimzawa tü müküthi rawie thuoh nüh khekheti küshü taji ru ma tüvü küluze taji nyiri aveh tü vünüh mokümjie ma tü Jisu pa nü shiti mühiera nüh nyiri vü küza.

⁴⁸Thinü Jisu nüh ma vü, “Eh tsevüwa, no kütsotü mpa nüh sakümühie müthuoh, noluoveh rüzi nü waluo,” ti küza.

⁴⁹Ma jüti küza peküvehvü, nyi küsü alevüwa azhe vünüh ru taji, “Noh tsa rülawa tü sümüthuoh nüh, Küsosiewa samüküjakünya le tümü luo,” ti küza.

⁵⁰Thitü Jisu nüh jü thsüra taji ma vü, “Luoveh müzahtümü, tü kütsotü mpa tsotüluo, jüta thuoüji atsarülawa tü mühiera naveh,” ti rületsü.

⁵¹Jüti sataji ma tü ma zhe vü ru ünü, Pitor thi Johan, thi Jems, thi ma pari ma za küchie nüh nyi küsü nga ma se nyimüküütu nti khe.

⁵²Thi aveh ma ke nüh krie thi külu pelakhe, thitü ma nüh, “Mükrietümü, küpakenühnyunü ma tü sümüveh thitü zeküveh wie,” ti küza.

⁵³Mari tü ma sükümü thsüto küveh kenüh ma riesa.

⁵⁴Thitü ma nüh ma ke sho nü ji taji, “Rülawa, süraluo,” ti küza.

⁵⁵Thinü ma kürhowa tü shele ru taji ma tü müküzhikewiethuoh nüh tesüra, jüsevü Jisu nüh zanyo vi ma kütsa üti küza.

⁵⁶Jütiküsavü ma pa ma zari tü ngo she, thitü jüma nyiküsü nga müküzatümü üti Jisu nüh mari khehtemü.