Read Pochuri Naga LUKE 9 Bible Online

LUKE 9 - Pochuri Naga bible

LUKE 9

¹Jüsevü ma nüh türakünyiri jizhuh taji mükümtse sietse aveh nyia vü thi künari sakü mühie na küsa kenüh kükhra thi küsara vi mari tsü.

²Jüti sataji Saküüwuowa kaji zhühle vi sosie thi künari sakümühie üti tseshu küze.

³Thi ma nüh mari vü, nohri tsewa na küsa kenüh zanyoküsü nga müvi tümü: akütsüh nga müvitümü, achükhu nga müvitümü, lohse nga müvitümü.

⁴Nohri azhe khiela wa naveh nüh müjie teküwa küju nü jüla pe luo.

⁵ Thitü mükütüküzü azhie khiekhiela nohri müsiethsenüh sanaveh nüh nohri tewaluo nti küsa vü mari müküle thsoshi küjokütsana küsa kenüh nohri ji vü azhitho nga kükojamü taji tewaluo.

⁶Jütisanü mari tü porie anyunyu vü wa taji zhüle kümühiewa küza thi azhie aveh vü sakümühie wa.

⁷Jütiküsavü Herod kükhra küviwa nüh zanyo momowa saveh thuoh nüh aveh künara nü mümüshera thuoh nüh rüza, küpakenühnyunü wuori nüh küüza, Johan Baptist tü aküsü vünüh rholemüthuoh ta küza,

⁸wuori nüh Elijah shele ru peveh ta, thi wuori nüh khanavü setsaküthsü küsü rholeru pevehthuoh, ta küüza kenüh.

⁹Herod nüh, “Johan tü hi nüh ma lü thuohmütüthuoh, thinü hi nüh ma zhüku künara küvehwatü thawathuoh lo?” ti sanü ma no nti phah.

¹⁰Povüküsari tü shele ru mari nüh momowa sanüh ma vü küza kheh. Jütisanü ma nüh mari sie Bethsaida ti küsavü tewa.

¹¹Anyi shiejiwa nüh mari tse ta küsa thsü ünü mari asenyi tewa, thi ma nüh mari sieke taji Saküüwuowa kajipe zhüku mari vü küza, thi samükümühieji mükümühieri sakümühie tsü.

¹²Jütiküsavü rünyi kuotewa thuoh nüh ma sehnyiri tü runü ma vü, “Nyi riekhuowa tü anyunyu vü küzemü taji kütsaküzhu thi apeze küüphamü luo, küpakenühnyunü hiri tü hatü anyu kükietuo vü pekümüthuoh kenüh,” ti küza.

¹³Thitü ma nüh mari vü, “Nohri zanyo vi mari kütsaluo,” ti küza. Thinü mari nüh, “Hiri tü alohse münga thi anga künyi anyiavü pemüvehthuoh, hiri wa taji hamari aveh kenüh müsü thuoüji mütserathuoh,” ti küza.

¹⁴Küpakenühnyunü nyimpari mpa nüh anyie münga kümüjie peküveh kenüh. Thinü ma nüh mari vü, “Nyi tünyienyie kümüjie arefürefü vünüh mari saküpe luo,” ti küza.

¹⁵Thinü mari tü jü müzhe taji mari saküshupeh.

¹⁶Jüti sataji ma nüh alohse münga; thi anga künyi ti ake vünüh vi nü thajüwu no taji tsia jümari anyia vü thse, thi zokhuo nü vi küzhiluo anyiri vü tsü üti ma sehnyiri vü tsü.

¹⁷Mari aveh vi tsa taji müwa kheh. Thi tsatu küsa amahseri phataji akhuo türakünyi vizhuhra.

¹⁸Rülo küsü Jisu ma mpa kükhuo sapeveh ünü ma sehnyiri ma vü ru, thinü ma nüh mari vü, “Nyiri tü hi thawa tasaveh lo?” ti küna.

¹⁹Thinü mari nüh ma vü, “Wuori nüh noh tü Johan Baptist ta, wuori nüh Elijah ta, thi wuori nüh noh tü khanavü setsaküthsü küsü rhoshele süra peveh ta küzaveh,” ti rületsü.

²⁰ Jütiküsavü Jisu nüh mari vü, “Nyu thuoüji nohri nü hitü thawa ti saveh lo?” ti küna. Thinü Pitor nüh ma vü, “Noh thuoüji Saküüwuowa Khrista wie thuoh,” ti rületsü.

²¹Thitü ma nüh mari vü nyi küsü vü nga müküza tümü üti azhü tsü nü mari khe taji,

²²“Anyi Tsawa tü rüle hozake vünüh münomüna naveh, thi kükhruori thi levü küjiri thi Khonyo küsosieri nüh kule naveh, thi fethemü naveh, thitü rülo kücheawa thuoüji rholesüra tewa naveh,” ti küza.

²³Jü küzakümü sevü ma nüh mari aveh vü, “Anyi thari nüh eh se nyi naveh nüh jümari nü mari mpa mari kule taji rülo aveh vü mari khieluothso kha taji eh se nyi luo,” ti küza.

²⁴Thari nüh ma kürho müshie tse nüh kümiewie naveh, thitü thari nüh eh kenüh ma kürho kümie naveh nüh külolewie naveh.

²⁵Küpakenühnyunü nyi küsü nüh azhih aveh vi ma zhi saraketünga ma kürholi kümie müthuoüji mowa künyia peveh lo?

²⁶Thi anyi küsüküsü nga eh kenüh thi eh zhü kenüh zükrüm thuoüji, anyi Tsawa nga jükümjie ma kütholathovü thi Pawa kütholathuohvü thi rügizhülekümtseri kütholathovü vi taji küturu vü anyi jüma zhüku phrate zükrüm naveh.

²⁷Thitü hi nüh nohri vü küzatoke naveh, “Hala tsieküveh anyiwuori thuoüji Saküüwuowa kajipe müjie küngu küju nü aküsü künguwanyu ta küsa peveh,” ti küza.

²⁸Hama küza kümüsevü rülo tüzeawa ma nüh Pitor thi Johan thi Jems sie nü kükhuo sa nti küzhiho vü tewa.

²⁹Wa taji ma khuoküveh vü, ma tsowa tü khaphrü tewa, thi ma thsümünyi tü müjihuothethe nü tewa.

³⁰Thinü halie, nyi künyi: Mosa thi Elijah masü tü masie jüle pe.

³¹Masü tü rügi thajüwu atso saturu nü ma Jerusalem vünüh ma Pa kümüshewa sajumü taji azhih sieporie mü naküsa zhü kürüchie.

³²Jütiküsavü Pitor thi ma siepeküvehri tü zengü kenüh zetewa, jütisanü zesüra ünü ma kütholathovü thi nyikünyi ma sie tsieküveh ngu.

³³Masü nüh ma jamü taji teküwa sevü, Pitor nüh Jisu vü, “Küsosiewa, hiri hala peküveh kümühie küsüthuoh, hiri aphrü küche hala sanaveh: küsü no kenüh, küsü Mosa kenüh thi küsü Elijah kenüh,” ti küza, thitü matü mowa küzaveh nüh mazhünyo thsü nü hama müküza.

³⁴Ma hama küza peveh ünü, akülu küsü turu taji mari külüwu tewa, mari akülu lovü tetu ünü mari tü krüsheke tewa.

³⁵ Thinü akülu vünüh azhü phraturu taji, “Hama tü eh Tsa, hi nüh ma Kürükawa, ma zhü künaluo,” ti küza.

³⁶Azhüwa phratuomü ünü Jisu tü ma mpa kütsiela ngu. Thitü mari nüh momowa ngu nüh jüma rülovü nyiküsü vü nga müküza nüh zoti peh.

³⁷Rülo jüma nyia mari küzhiho vünüh turu ünü anyiri akhuo küsü ma mütu.

³⁸Thinü halie, nyiri riekhuo azhie vünüh zia taji, “Küsosiewa, eh tsa noh tü üti hi nüh no vü khuoveh, hi tü eh tsa hama mpa wie.

³⁹Thi halie, sietse kümüsüwa nüh ru ma mürü thuoüji matü zhürüluo wienga kriete wawati, thi khielota ma viküzenü apo vünüh amahshie shu nü ma panyapanya müwie ketünga ma müja nta sasati.

⁴⁰Thi hi nüh no sehnyiri vü zhejatü üti khuo, thitü mari tü müsara nüh samü,” ti küza.

⁴¹Thinü Jisu nüh, “Halie, kütsotü küzülari thi mükünyu vünüh rhoküveh akuori, hi tü küthakele küzhike nü nohri siepe na lo? Noh tsa sie nü havü ra,” ti küza.

⁴²Jütisanü ma nüh sietse ünü sietse kümüsüwa nüh ma viküze nü ma panyapanya tsü. Thitü Jisu nüh mükümtse sietse phra taji tsawa sakümühie taji vishele ma pa tsümü.

⁴³Thinü nyiri aveh nüh Saküüwuowa kükhra küji ngu taji ngo sheh.

⁴⁴Thitü Jisu nüh küsari aveh müshe nü mari ngo veh ünü ma nüh ma sehnyiri vü, “Azhü hama tü nohri khüna lovü saluo; küpakenühnyunü anyi Tsawa tü nyira ke vü rethsemünathuoh,” ti küza.

⁴⁵Thitü mari tü azhü hama müthsüra nüh samü, hamatü mari müküüthsü nta küsa kenüh küthi müthuoh, thi mari tü azhü hama ma vü küna le na küsa krütewa.

⁴⁶ Jüti küsavü thawa nüh küüji naveh nüh ti küsa mari azhie vü kürüluo shuteru.

⁴⁷Thitü Jisu nüh mari kümüshe thsüra nü ma nüh kürünguori küsü sieru ma kütuo vü sataji,

⁴⁸mari vü, “Thari nüh kürünguo hama eh nyo vünüh siekenaveh nüh hi sieke wievehthuoh, thi thari nüh hi sieke veh nüh hi küüzewa siekeveh, küpakenühnyunü nohri azhie vü thawa nüh küzatsahwa nüh jüma nüh küjitsahwa sanaveh,” ti küza.

⁴⁹Thinü Johan nüh, “Küsosiewa, nyi küsü noh nyo vünüh mükümtse sietse zheja la nü hiri nüh ngu, thi ma tü hiri kürü mükütse kenüh müsatümü üti hiri nüh ma khemüthuoh,” ti küza.

⁵⁰Thitü Jisu nüh ma vü, “Mükhetümü, küpakenühnyunü nohri mükünongü samüküvehri thuoüji nü hiri wuovü wiethuoh,” ti küza.

⁵¹Jütiküsavü ma sie rügivü tekükuo tsotho shenyiteruünü ma Jerusalem vü küwa müshepeke pehuo.

⁵²Thinü azhüleri ma tüvü küze taji Samariari anyuküsü vü küze nü ma kenüh küche nti tewa.

⁵³Thitü ma nüh Jerusalem vü küwa müshepeke pehuokümü kenüh nyiri nüh ma müsieke nti sa.

⁵⁴ Jütiküsavü ma sehnyiri Jems thi Johan nüh jü ngu ünü masü nüh, “VÜWA, noh tü hisü nüh rügivünüh anyih khuo taji anyi hamari küütsothe nokümüshe ünü nyu lo?” ti küna.

⁵⁵Thitü ma nüh süle masü no nü phra.

⁵⁶Thinü mari tü tsele anyu küpa vü tewa.

⁵⁷Thinü mari lekhuji vü tse ünü nyi küsü nüh ma vü, “Noh khiekhievü wa naveh nüh hi nüh no se nyiwa naveh,” ti küza.

⁵⁸Thinü Jisu nüh ma vü, “Jiperüri nga mari mpa mari azhepeveh, thi rügivü prükütse müwari nga aphra peveh, thitü anyi Tsawa thuoüji ma lü küüthipe nga münyie luo,” ti küza.

⁵⁹Ma nüh küpawa vü, “Eh se nyi luo,” ti küza. Thitü ma nüh hi küze nü eh pa küüchowu khumü luo, ti küza.

⁶⁰Thitü Jisu nüh, “Aküsüri mpa nüh küsüri küüchowumü luo,” ti küza, thitü nohri thuoüji wa nü Saküüwuowa kajipewa kenüh sosieluo.

⁶¹ Jümasevü nga küpari küsü nüh, “VÜWA, hi nü no senyi naveh, thitü hi küze taji eh zhe vü peküvehri sieküüjüle khu luo,” ti khuo.

⁶²Jisu nüh ma vü, nyi küsü nga mieshü mükhu küjehke taji asevü sühle küno tü Saküüwuowa kajipe kenüh tseveh ta küsa müphratera.