Read Pochuri Naga KHONYOKÜÜTHELE 11 Bible Online

KHONYOKÜÜTHELE 11 - Pochuri Naga bible

KHONYOKÜÜTHELE 11

¹“Jükenüh nohri tü VÜWA nohri Saküüwuowa kümze naveh, thi ma nüh küüzari, ma zhühkheri thi ma zhühkhori thi ma nüh azhükütsüri tsotho aveh vü müzhe naveh.

²Thi nosü nohri müshenonoluo (hi tü nohri tsari müjie küthsüri nyutü müjie künguri vü küza müküveh kenüh), VÜWA nohri Saküüwuowa saküükato müshenonoluo, ma küji, ma kümzho ake thi ma pie thsuo küüze,

³ ma thsoshiri thi ma küürohri ma nüh Egypt kajiwa Faroah vü küsari thi ma zhih aveh vü küsari;

⁴ Egypt rienyiri vü küsari mari rawuhri vü thi mari rawuhkhekari vü küsa; mari nüh noh seri vü zhekütse vü ma nüh Kümru Juhküji ma nyiehrivü küülüwu, thi nosü küju VÜWA nüh mokümjie mari zorie tse nüh;

⁵thi azhie hala müjie ruküju vü ma nüh reza vünüh nohri vü mowa sanüh;

⁶ ma nüh Eliab atsa, Reuben azhü künyi Dathan thi Abiram masü vü mowa sanüh; mokümjie azhihwa nüh ma poga nü masü, thi masü zhehlori aveh, mari juhthsüzheh aveh, thi rho küveh zanyo mari ase nyi kütse aveh Israelri aveh azavü nüh müzhu khehm;

⁷küpakenühnyunü VÜWA nüh küüroh küji küsa aveh nohri notha nüh ngu khehthuoh.

⁸“Jükenüh nohri tü khra taji nohri nüh wa vi nta kütse azhihwa vü tura na küsa kenüh hi nüh nosü nohri vü azhükütsüri müzhe luo,

⁹VÜWA nüh noh pari thi mari küshukürari vü tsü nta küshieküsa azhihwa vü tünüjuh thi awejuh liküveh azhihwa vü nohri tü rhosuo na küsa kenüh.

¹⁰Küpakenühnyunü nohri nüh tu nü vi nta kütse azhihwa tü nohri nüh shuteküru Egypt zhih kümjie nyu, jüla thuoüji wirüzah aphahri kümjie nohri atsü zhuhke nü nohri ajih nüh tsewa taji ajuh zü;

¹¹thitü nohri nüh vi nta sanü kütse azhih thuoüji aküzhi thi anyuo zhih, thi atülü vünüh küturu tsorüjuh küzhu azhih küsü,

¹²azhih jüma tü VÜWA nohri Saküüwuowa nüh küüjehte küsü; mahvi küsate vünüh mahvi sehkhe küju VÜWA nohri Saküüwuowa nüh ma notha jüma rügivü saküpeh huo sa.

¹³ “Thi nosü hi nüh nohri vü azhükütsüri küna thuoüji: VÜWA nohri Saküüwuowa kümzeluo, thi nohri luoveh aveh vi thi nohri kürholi aveh vi ma kütsü saluo ta küsari küna thuoüji,

¹⁴ma zale vü ma nüh nohri azhih vü atsorü tsü naveh, atso kürükhuwa nga thi asevü kürüwa nga küsazihwa nyu, jüta küsa vünüh nohri tü nohri atsuo, nohri akhah thi nohri vüjuh vizhuhra naveh.

¹⁵Thi noh nyihnyihri kenüh ma nüh apra noh zhuhri vü tsü naveh, jüti sanü nohri tü tsanü müwara naveh.

¹⁶Tinü nohri luoveh müra nü kürele wa nyiaza küpari kütsü satemwa nüh sana küsa kenüh azhüzhüluo,

¹⁷jüta sam thuoüji VÜWA rüküshu tü nohri vü juzhuteru nathuoh, thi ma nüh atülüri khem nü atsoh mükürü nüh samtü nü azhihwa tü avi müküpe nüh samtü nathuoh, thi azhih kümhie VÜWA nüh nohri vü kütsüwa vünüh nohri tü shita pokah kümiem nathuoh.

¹⁸ “Jükenüh nohri tü eh zhü hamari vi nohri luoveh vü thi nohri kürholi vü thse luo; thi nohri jüma tü athsoshi küsü sanü nohri ake vü huke luo, thi noh nothari künyi azhievü adievü riekevü luo.

¹⁹Nohri tü jümari vi noh atsari sosie, noh zhehri lovü shuküpehvü jümari vi haluo luo, lehkhuji vü kütsevü nga, aküzeh vü nga thi küsühra vü nga jümari vi haluo luo.

²⁰Thi nohri zheh mükhietovüh thi nohri kheri vü rhüke naveh,

²¹thajüwu tü azhihwa nyiehvü küpeh küju nü VÜWA nüh küshie nü noh pari vü tsü nta küsa azhihwa vü nohri kürho mahvi thi nohri tsara kürho mahvi tü saküzhira na küsa kenüh.

²²Küpakenühnyunü mükütüküzü nohri nüh hi nüh nohri vü azhükütsü hamari aveh, VÜWA nohri Saküüwuowa küümze, ma lehkhuji aveh vü kütse thi ma vü küüpeke, hamari aveh kümhie ta saju ti thuoüji,

²³nohri tüvü pehküveh akuoh aveh VÜWA nüh zheja khehmtü nü nohri nyiehvü nüh küji thi kükhrari tü nohri nüh müküpeh nüh sanaveh.

²⁴ Nohri ampha nüh nyi küwa azhie aveh nohri azhi sanaveh; nohri azhih tü rezawa thi Lebanon thi rühguwa vünüh, Eufrates rühgu vünüh wa zhiehtu juhküji küju.

²⁵Nyi küsü nga nohri tüvü kütsierawa nyu; VÜWA nüh nohri vü küphrahzhu kümjieh VÜWA nohri Saküüwuowa nüh nohri kükrü thi kükrüshehke vi nohri nüh noh jihri nyiküwa aveh vü thsetsü naveh.

²⁶“Halie, hi nüh nosü noh türi vü kütsia thi kümzü küzeveh:

²⁷Kütsia thuoüji, VÜWA nohri Saküüwuowa nüh azhükütsüri hi nüh nosü vi nohri vü küzaküvehri mükütüküzü müzhera thuoüji kütsia nguveh,

²⁸thi kümüzü thuoüji, mükütüküzü nohri nüh VÜWA nohri Saküüwuowa nüh azhükütsüri müvi nüh hi nüh nosü nohri vü azhükütsü lehkhuji vünüh kürele taji nohri nüh müküthsü nyiaza sevü tewa thuoüji kümüzü vü naveh.

²⁹ Thi nohri nüh tunü vi nta kütse azhihwa vü VÜWA nohri Saküüwuowa nüh nohri sieru thuoüji Gerizim Küzhi vü akütsiawa phraketsüluo thi Ebal Küzhi vü kümzüwa phrake tsüluo.

³⁰Hamasü tü Jordan kariwa tuwuovü zhiehtu, rünyi kütupe wuovü Kananra Araba vü kürhori Gilgal, Moreh nguhzhe nahto wuovü pehmüveh ülo?

³¹küpakenühnyunü nohri tü Jordan kari nü VÜWA nohri Saküüwuowa nüh azhih vi nohri kütsüwa vi nta tu naveh; thi nohri nüh jüla rho nta jüma vira thuoüji,

³²nosü hi nüh nohri tüvü azhühkhori thi azhühkheri küthse aveh azhüzhü sheh nü sanaveh.