Read Pochuri Naga KHONYOKÜÜTHELE 12 Bible Online

KHONYOKÜÜTHELE 12 - Pochuri Naga bible

KHONYOKÜÜTHELE 12

¹VÜWA, noh para Saküüwuowa nüh noh zhiri küsa nta vi nohri kütsü azhihwa vü noh azhihri rügi vü kürho küju nohri azhüzhü sheh nü azhühkheri thi azhühkhori sana küsa hamari.

²Nohri nüh müküüpeh nüh küsa akuohri ma nyiazari küüroh küsape azhie aveh küzorie satsa wie naveh, küzhiho kümüsieri rügivü nga, küzhihori rügivü nga thi athsohrhu kümzhi kükhu vü küpeh aveh zorie kheh naveh;

³ mari kükhurüperi phrüjamütü naveh; ma tovühri ferie thi mari kükhurüvü tovühri anyih nüh tsomtüluo; mari nüh tsorhe khrüke nü nyiaza sataji khurü küvehri chühriejam naveh; thi ma nyori azhie jüla nüh zorieja naveh.

⁴Thitü VÜWA nohri Saküüwuowa vü thuoüji jüta müsara.

⁵Thitü VÜWA nohri Saküüwuowa nüh ma nyowa sana küsa kenüh nohri akuoh aveh vünüh rüka taji azhie phah nü jüla nüh ma küpehpe sanaveh, thi nohri nga jüla wa naveh,

⁶thi nohri tü nohri kütso kükhurüri, küsahthuori, türake sanü küsü küthseri, zanyo küthse viküruri, nohri küphrahzhu kükhurüri aloküzhe küthseri, noh mieshümiesari kütsa khu thi noh nyihnyihri kütsa khu küthseri jüla viru naveh;

⁷thi nohri tü VÜWA nohri Saküüwuowa tüvü nüh ashietsanaveh, noh nga thi nohri zhehlori nga nohri ake nüh küsa VÜWA nohri Saküüwuowa nüh nohri tsiakütsü vü lozhe naveh.

⁸Nohri tü nosü papa küsa momokümjie vünüh sakhe taji papa notha vü katoveh ünüh jükümjie müsara lethuoh;

⁹küpakenühnyunü nohri VÜWA nohri Saküüwuowa nüh kümnyie kütsü thi nohri küüvi nta küsawa vü müjie ruküju kenüh.

¹⁰Thitü nohri tü Jordan kari wa nü VÜWA nohri Saküüwuowa nüh nohri küüpeh nta azhih tsüküsawa vü rho thuoüji, thi nohri mükieshe nü pehküveh nohri mükünongüri aveh vünüh kümnyie ngura nü luoveh kürüzih ti rho thuoüji,

¹¹VÜWA nohri Saküüwuowa nüh azhie rüka nü jüla ma nyowa sa thuoüji hi nüh nohri vü azhükütsü aveh jüla viru naveh: nohri kütso kükhurüri, nohri küsahthuori, türake sanü küsü küthseri, zanyoküthse viküruri, nohri küphrahzhu kükhurüri, jüma tü noh nüh VÜWA vü küphrahzhu.

¹²Thi nohri nga, nohri tsa nyimpari nga nyimzari nga, nohri siepepari nga thi nohri siepevühri nga, thi nohri anyu vü küpeh Levüri, mari tü mari müthoh nyutü suope mükünyie kenüh mari nga ti nohri sie nü VÜWA nohri Saküüwuowa tüvü lozhe naveh.

¹³Nohri tü nohri nüh azhie küngu aveh vü kütso kükhurü müsanüh sana küsa kenüh azhüzhüluo;

¹⁴Thitü VÜWA nüh akuoh küsü khiemawa vünüh azhie rüka naveh ünüh jüla nüh nohri kütso kükhurü sanaveh; thi hi nüh azhükütsü aveh jüla nüh sakheh naveh.

¹⁵“Jüta wie ketünga nohri nüh asa küzake tsangüveh ünüh VÜWA nohri Saküüwuowa nüh tsia nü nohri kütsü müzhe taji nohri anyu küsüküsü vü nga nüh fethetsa mhieveh; kümtse saluo, ma mpa nüh nguzuosa nga satü thi asühvosa nga satü tsaluo.

¹⁶ Azüh thuoüji ajuh küüsho kümjie azhih vü küshojam naveh.

¹⁷Nohri anyu vünüh türake sanü küsü küthse atsuoluo nyutü akhahluo, nyutü avüjuhluo, nyutü noh mieshümiesari kütsakhu küthse nyutü anyihnyih kütsakhu küthse, nyutü ma mpa nüh phrahzhunü küphrahzhu kükhurü küsüküsü nga saluo, nyutü lozhe nü küthse, nyutü akütsü viru küthse küsüküsü nga mütsara;

¹⁸thitü nohri nga thi nohri tsa nyimpari nga nyimzari nga, nohri siepepari thi siepevühri nga, thi Leviri nohri anyu vü küpehri nga ti VÜWA Saküüwuowa nüh rüka naküsa azhie VÜWA nohri Saküüwuowa tüvü nüh nohri tü tsanaveh, nohri ake nüh küsawa vünüh VÜWA nohri Saküüwuowa tüvü lozhe naveh.

¹⁹Nohri tü noh azhihri vü kürho küju nü Leviri kükulewa nyu ti küsa vünüh azhüzhüluo.

²⁰“VÜWA nohri Saküüwuowa nüh nohri vü phrakütsü kümjie nohri azhihwa saküji tsü nü nohri nüh, ‘Hi tü asa tsanaveh; ta thuoüji nohri nüh küzake tsangü veh ünüh tsaluo, küpakenühnyunü nohri nüh asa müngu thuokeküm kenüh.

²¹Mükütüküzü VÜWA nohri Saküüwuowa nüh ma nyo sa nta küsa azhie rüka küsawa nohri vünüh kiehtuole thuoüji hi nüh nohri vü azhükütsü kümjie VÜWA nüh nohri kütsü noh mieshüri nyutü noh nyihnyihri vünüh ma mpa nüh küsüküsü nga fethe taji nohri mpa noh nyuri vünüh nohri kütsangü zake tsaluo.

²²Nguzuosa nyutü sühvosa kütsa kümjie mükümtse saluo thi kümtse saluo zarike vünüh tsa mhieveh.

²³ Azüh mpa nüh mükütsa saluo; küpakenühnyunü azüh tü kürholi küsa kenüh, thi nohri tü kürholiwa asa sie mütsanyiera.

²⁴Nohri tü jüma kütsawa nyu; ajuh küüsho kümjie azhih vü küshojamü naveh.

²⁵VÜWA notha vü mowa nü kato veh ünüh nohri nüh sa thuoüji nohri vü nga thi noh serivü kütse noh tsari vü nga mhiera naveh; tinü nohri azüh mütsara.

²⁶Thitü kümütse zanyo nohri nüh kütsülehri, thi noh nüh tsü nta küphrahzhuri vi nü VÜWA nüh azhie kürüka vü waluo;

²⁷jüti sanü nohri kütso kükhurü tsüluo; asa nga thi azüh nga, VÜWA nohri Saküüwuowa kükhurüpe vü saluo; nohri nüh küsahthuo zühwa thuoüji VÜWA nohri Saküüwuowa kükhurüpe rügi vü züke naveh, thitü nohri ma satsa thuoüji tsaluo.

²⁸Nohri nüh VÜWA nohri Saküüwuowa nothavü mowa nü mhie thi kato nüh sa thuoüji nohri vü nga thi nohri sevü kütse nohri tsari vü nga mhie na küsa kenüh hi nüh küüza azhükütsü aveh vü nohri azhüzhü nü kükheke luo.

²⁹“Nohri nüh wa nü vi nta kütse akuohri nohri tüvü nüh VÜWA nohri Saküüwuowa nüh tehthuojam nü mari müküpeh nüh nohri nüh mari azhih vü rhotewa thuoüji,

³⁰nohri tüvü nüh mari zorie kümsevü nohri tü mari ase nyitemwa nüh sana küsa kenüh azhüzhüluo, thi mari nyiazari rülehri küna nü, ‘Mokümjie akuoh hamari nü mari nyiazari kütsü saveh lo? Hi nga mari kümjie sa mhieveh ünü,’ ta keküsa vüh nyu”; ti küza.

³¹Nohri tü VÜWA nohri Saküüwuowa vü jüta küsa vüh nyu; küpakenühnyunü VÜWA nüh kükre kümrhü aveh tü mari nüh ma nyiazari vü küsa kenüh; mari tü ma tsari nyimpari wie nga thi nyimzari wie nga anyih vünüh tso nü ma nyiazari tsütsüti.

³²Hi nüh nohri vü azhükütsü momowa nüh jümari aveh nohri azhüzhü nü sanaveh; jüma küthsephre nga müsa tüm thi jümawa vünüh vijaküm nga müsa tüm.