Read Pochuri Naga KHONYOKÜÜTHELE 18 Bible Online

KHONYOKÜÜTHELE 18 - Pochuri Naga bible

KHONYOKÜÜTHELE 18

¹Levira navü, jüma tü Levi akuoh aveh thuoüji Israel vünüh suohpe nyutü aka küvi müsara; mari thuoüji VÜWA vü anyih vünüh kükhurüri thi khemta ma nüh aka küviwa nyu; VÜWA nüh mari vü phrahteke küsa kümjie VÜWA nüh mari akawa sanaveh.

² Mari thuoüji ma jienüri azhievü nüh aka küviwa nyu; VÜWA nüh mari vü phrahteke küsa kümjie VÜWA nüh mari akawa sanaveh.

³“Thi anyiri nüh küsahthuo. Kükhurü küsa vünüh navüri nüh küngulehri hamari, ma mpa nüh shüvotsa saluo nyutü nyihzhü saluo arha, akhake thi amüwi ti vi nü navüwa vü tsü naveh.

⁴Nohri amütha avi küpe khuwa, nohri khah, nohri vüjuh thi nohri nyihzhü küneh küvi ma tsü naveh.

⁵Küpakenühnyunü VÜWA noh Saküüwuowa nüh ma nga thi ma tsa nyimpari nga nohri akuoh aveh vünüh VÜWA nyo vünüh küütsie thi anasa küsa nta küsuokürho rüka kümthuoh kenüh.

⁶“Thi mükütüküzü Leviri küsü nüh Israel vünüh noh nyu wuori vü ma kürhope vünüh ru, thi ma kümshe aveh thse nü VÜWA nüh azhie rüka na küsape vü ru nta thuoüji ru mhieveh,

⁷thi ma nga ma fü Leviri nüh VÜWA tüvü tsie nü anasa küsa kümüjieh VÜWA ma Saküüwuowa nyo vünüh sara naveh.

⁸Ma jienü nüh, zhu nü kütsü küngu nyieh vünüh mari tü suope zarike satsa wie naveh.

⁹“Noh tü VÜWA noh Saküüwuowa nüh azhih vi noh tsü nta küsa vü ru thuoüji akuoküji jümari nüh akükre küsari müzhe nta sanü küthsüvüh nyu.

¹⁰ Nohri azhievü nyi küsü nga atsa nyimpari nga satü nyimzari nga satü tso nü kükhurüvüh nyu, mahtsazhü küphra müsara, nyutü tühmazhüküphra müsara, nyutü tühmakürho müsara;

¹¹ nyutü lazhuküüje müsara, nyutü tühshitühma müsara, nyutü amahzhie müsara, nyutü asühmari müsara.

¹²Thathari nüh zanyo hamari sanaveh ünüh VÜWA vü kükre küsa kenüh; küpakenühnyunü VÜWA noh Saküüwuowa tüvü kükre müke küsari tü noh tü vünüh mari zhezhuja küveh kenüh.

¹³ Noh tü VÜWA noh Saküüwuowa tüvü müshekümsü küpehvüh nyu.

¹⁴Akuohji noh nüh mari zhih vi nta saküveh hamari thuoüji nyiazazhü küphrari thi mahtsazhü küphrari nüh küüza küna, thitü nohri thuoüji jükümjie sana küsa VÜWA noh Saküüwuowa nüh noh müküüsa.

¹⁵ “VÜWA noh Saküüwuowa nüh noh ke nüh noh jienüri azhievü nüh hi kümjie küsa setsaküthsü küsü küshu naveh, thi noh tü ma zhü küna naveh.

¹⁶Horeb vü müza kümhu vünüh noh nüh müngu taji, hi tü müsü nüh sana küsa kenüh VÜWA eh Saküüwuowa jikhi müküüna le tüm jie, nyutü hi anyih küji hama müküüngu le tüm jie; ta khuo.

¹⁷Thi nüh VÜWA nüh hi vü, ‘Mari nüh küüzari tü küüza leh wiethuoh,’ ta küza.

¹⁸Hi nüh mari jienüri azhie vünüh noh kümjie küsa setsaküthsü küsü vizhutsü naveh; thi hi nüh ma po lovü eh zhüri thsetsü taji hi nüh azhükütsü aveh mari vü phrahtetsü naveh.

¹⁹ Thi ma nüh eh nyo vünüh ma nüh küüza thathari nüh eh zhüri müküna nüh sanaveh ünüh hi mpa nüh ma no naveh.

²⁰Thitü setsaküthsüwa tü eh nyo vünüh hi nüh phrahte üta azhükütsü küsü wie nga phrahte, nyutü thawa nüh nyiaza küpara nyo vünüh phrahte naveh ünüh setsaküthsü jüma tü sü naveh.

²¹“Thi noh nüh noh luoveh vünüh, ‘VÜWA nüh müküüzazhü khiela nüh hiri tü thsüra na lo?’

²²Setsaküthsüwa nüh VÜWA nyo vünüh phrahte nü azhü jüma tü müsanüh sam nyutü azhütsa nyu nüh sam ti thuoüji jüma nü VÜWA nüh müküüza azhü küsüthuoh; ma mpa nüh rhiezanü phrahte küveh wiethuoh, tinü noh ma mükrü tümluo” ti küza.