Read Pochuri Naga KHONYOKÜÜTHELE 19 Bible Online

KHONYOKÜÜTHELE 19 - Pochuri Naga bible

KHONYOKÜÜTHELE 19

¹ VÜWA noh Saküüwuowa nüh mari zhih vi noh kütsü akuoküjiri sakümiem nü noh nüh mari azhi vira nü mari nyujiri thi mari azhehri vü pehra thuoüji;

²VÜWA noh Saküüwuowa nüh azhih tsü nü nohri küüvi nta küsa vü noh tü anyuji küche athuo sasanaveh.

³Anyi zothekümri zhütewara na küsa kenüh VÜWA noh Saküüwuowa nüh azhih tsü nü noh küüvi na küsa nyokhiewa tü küüsuo küche saluo, thi aleh küche saluo, jüta thuoüji anyi küfetheri küsüküsü nga jümari vü zhütewara naveh.

⁴Khanavü masü mükünoluongü samru wie ketünga mükütüküzü nyi küsü nüh müküthsü vünüh ma zhephruwa zothem thuoüji ma tü jüla zhütewa nü ma kürholi külole naküsa kenüh anyiküfetheri kenüh hama tü kücheküsa wie.

⁵Nyi küsü nüh ma zhephruwa siewa nü reza vü athsoh je, thi jeküveh vünüh amüvüwa küzhowa taji ma zhephruwa rehthem thuoüji anyuji hamari küsü vü zhütewa nü ma kürholi külole naveh;

⁶jüta nyuthuoüji azüthüküm ashewiküthuowa nüh arholuo küsa kenüh ma rüküshu vü nü ma züh küluo taji anyi küzothewa zhewa nü aleh letsuo küm kenüh ma zhewa nü ma sepha taji ma fethe mhiem; ma tü khanavü nüh ma zhephruwa sie mükünoluongü samtsewie ketünga.

⁷Jükenüh hi nüh noh vü azhütsüveh nü noh tü anyuji küche athuo samsa üji mümhie.

⁸Thi VÜWA noh Saküüwuowa nüh noh pari vü küshie nü küüza kümjie vi nohri tsü taji noh rüterüshu tü sakükrazhutsü thuoüji,

⁹nohri tü hi nüh nosü noh vü azhükütsüri aveh kümhie ta saju nü VÜWA noh Saküüwuowa kümze thi küsuokürho ma lehkhuji vü tse peh huo taji ma nüh anyuji ha kücheri vü noh tü anyuji küpaküche thsephre le naveh;

¹⁰VÜWA noh Saküüwuowa nüh noh ke nüh aka kütsüwa azhih vünüh khieh müküsawa züh küthü nü nohri vü müküleh zühwa müküru nüh sana küsa kenüh.

¹¹“Thitü nyi küsü nüh ma zhephruwa mürhü taji ma huopela nü zothe nta küsawa sakümsamna taji ma küsüm, thi küzothewa tü zhü anyuji hamari küsü vü tewathuoüji,

¹²anyi jüma nyujiwa vünüh kükhruori küze nü mari nüh ma sieru taji amüthoh sa nta pehküvehri vü tsüm nü ma küüzothem naveh.

¹³Noh notha tü ma küümzewa nyu, thitü noh tü Israel vünüh müküleh müküsa züh küüthü sakümtse wie naveh, jüta küsa vünüh nohri tü mhiera naveh.

¹⁴ “Khanavü nüh sakütsü VÜWA noh Saküüwuowa nüh noh kütsü noh zhephruwa nüh shieküsa mükhaphrü tüm.

¹⁵“Nyi küsü nüh müküleh nyutü kükhiemuo küüroh saküm vü pohvü küsü mpa vünüh nü müküleh mütsüra; zhühtoh künyi nyutü küche vünüh mükülehkütsüra wie sanaveh.

¹⁶Mükütüküzü müküleh sakümwa vü phramsü nta mükülehküphah shuru thuoüji,

¹⁷refü küjakünya küveh künyi khürü nga VÜWA tüvü thi jüma tsothovü müpezheh vü küpeh navüri thi lesari tüvü tsie naveh;

¹⁸thi lesari nüh azhüzhü sheh nü kürü naveh, thitü azhüzhü nüh pohvüwa tü kürie pohvü sataji ma nü vü müküleh vünüh phramsüveh üji,

¹⁹ma nüh ma nü vü santa küsa kümshe kümjie nohri ma vü satsüluo; jüta sanü nohri azhievü nüh kümsüwa sakümtse naveh.

²⁰Jüti küsa vünüh küpari aveh tü jüma künara, thi krü nü nohri azhievü jükümjie kümsü küsalewa nyuthuoh;

²¹ Noh notha tü jüma noküümze küsawa nyu; kürholi küsü nüh kürholi küsü, notha küsü nüh notha küsü, aha küsü nüh aha küsü, ake küsü nüh ake küsü, ampha küsü nüh amphaküsü müthoh sa wie naveh.