Read Pochuri Naga KHONYOKÜÜTHELE 22 Bible Online

KHONYOKÜÜTHELE 22 - Pochuri Naga bible

KHONYOKÜÜTHELE 22

¹ “Noh tü noh nü shüvotsa nyutü ma nyihzhü kuotse teküwa no nü mükükra nüh müküngu kümjie sanü müküthieküzie tüm; jüma sie sheleru noh nü vü tsümümji mümhie.

²Mükütüküzü noh nü tü noh küshenyi vü pehmveh, nyutü mükütüküzü noh nüh avü müthsü nüh sam ti thuoüji noh tü jüma sieru noh zheh vü sataji noh nü nüh müjie phahküru küju nü noh vü sala taji ma vü kütsü sanaveh.

³Ma rawuh nga jüta sanaveh; ma thsümnyi nga jüta sanaveh; noh nü zanyo kümieküm aveh küngura vü jüüta vünüh sa kheh wie naveh; noh tü noh nü mükükra nüh saküm müsara.

⁴“Noh tü noh nü rawuh nyutü shüvotsa lehkhuji vü küluzeh küveh ngu taji müshoke nüh thorieh temwa tüm; noh tü jüma shohke mütsüji mümhie.

⁵“Nyimzari küsü nüh nyimpara sürie ta küsa küsü nga küvüwa nyu, nyutü nyimpari küsü nüh nyimzara sürie ta küsa küsü nga küvüwa nyu; küpakenühnyunü thari nüh hakümjie sanaveh ünüh VÜWA noh Saküüwuowa vü akükre küsü küsa kenüh.

⁶“Mükütüküzü noh tü amüwa phra athsoh rügi vü nyutü azhih vü muomuo saluo atsa khuzhu küsa saluo nyutü rügi vü küpeh saluo, avühwa tüküveh vü noh tü avühwa nga thi aphra lovü kütü aveh nga ti vitemwara;

⁷noh nüh atsari nü vitewa wie ketünga avühwa thuoüji küze küm müsaji mümhie; jüta küsa vünüh noh tü mhie naveh, thi noh tü rho suo naveh.

⁸“Noh zheh rügivü nüh nyiri tsuotsa ru nü noh zheh rügivü nüh azüh mükülehwa thama noh vü küüru kenüh noh zheh kürüthe küsa vü natonato vü künyuote sanaveh.

⁹ “Noh rhelivizhuh vü mahtsü künyi müzhuhkerhie tüm, atsü noh nüh küthsewa thi rhelivi küpewa masü khürü nga avi küpe aveh kümtsezhehwa kenüh mükato nüh samjisü.

¹⁰“Noh tü shüvotsa thi arawuh masü hurü nü sie müküroh tüm.

¹¹“Noh tü saküneh alo külohzüwa nüh torhie taji thsümnyi küvüvüh nyu.

¹² “Noh tü noh thsü küto vü apohte müzü vü athsühu küpe nü jüma nüh noh mpa noh kühiete sanaveh.

¹³“Mükütüküzü nyi küsü nüh avüvüh vi nü ma vü tu taji ma zhejam,

¹⁴thi küzükrü kürho vi nü ma phramsü taji anyo kümsü vi ma müte nü ma vü, Hi nüh nyimza hama vi, thi hi tü ma shehnyi ru ünü ma tü mükürüsa thsoshi münyiela nüh sam; ti küza.

¹⁵Mükütüküzü nüh ha üta sam thuoüji nyimzawa pa zah masü nüh ma mükürüsa thsoshiwa vi nü anyujiwa kükhruori vü akheri vü ru naveh;

¹⁶Jüti sanü nyimzawa pa nüh kükhruori vü, hi nüh eh tsa nyimzawa anyi hama tsü nü ma vüvüh küüsa, tü ma nüh ma zhejaveh;

¹⁷tinü halie, ma nüh eh tsavühwa vü küzükrü zhü phra kükekemthuoh, ma nüh, Hi tü noh tsa nyimzawa vü mükürüsa thsoshi müngu,” ta küza. Thitü halie, hamari tü eh tsa nyimzawa mükürüsa thsoshiri, ti küza. Jüti sanü ma pa thi ma zah nüh anyujiwa kükhruori tüvü thsümnyiri vi shie naveh.

¹⁸Jüti küsa vü anyuji jümawa kükhruori nüh nyimpa jüma sieru nü ma kürhietsü naveh;

¹⁹thi mari nüh nyimpa jümawa vü rakasa müzake ame vi nü nyimzawa pa vü tsü naveh, küpakenühnyunü ma nüh anyo kümsü vi nü Israel mükürüsa vü thseküm kenüh; jüti sanü nyimzawa tü vi ma vüvüh sanaveh; ma kürho küju matü nyimzawa zheküjawa nyu.

²⁰Thitü azhüazhü nüh jüma tü azhütsa ta sanü nyimzawa vü ma mükürüsa thsoshi müngura nüh sam thuoüji,

²¹ma pa thi ma zah nüh nyimzawa sie nü ma pa zheh mükhie vü sieshuru taji ma nyujiwa nyiri nüh aloh vi nü ma vehthem naveh, küpakenühnyunü ma nüh ma pa zheh vünüh küüphroküphrie sanü Israel vü aküzhe küüroh sakümthuoh kenüh; jüta küsa vünüh nohri tü nohri azhie vünüh kümsüwa tü sakümtsera naküveh kenüh.

²²Mükütüküzü nyi küsü nüh nyura vüvüh siezehla nü ngum thuoüji masü khürü nga zothejam naveh; jüta küsa vünüh Israel vü kümsüwa saküümtse sanaveh.

²³“Mükütüküzü mükürüsa küsü tü avüpa sa nta künake küsa vü nyi küsü nüh anyujiwa vünüh ma siezehm thuoüji,

²⁴masü khürü nga anyujiwa shiehku vü siewa nü aloh nüh masü khürü vehthem naveh, nyimzawa nga vehthem naveh, küpakenühnyunü ma nüh anyujiwa vü pehwie ketünga ma nüh ma kükra üta azhümüküzie kenüh, nyimpawa nga vehthe naveh, küpakenühnyunü ma nüh ma zhephruwa vüvüh künake küsawa phrürie kümtüthuoh kenüh; jüta küsa vünüh nohri azhievü kümsüwa sakümtse naveh.

²⁵“Thitü areza vünüh nyi küsü nüh avüpa sawa nta karü küsa vüh küsü shoh nü siezehm thuoüji nyimpawa mpa nüh küüsü naveh.

²⁶Thitü nyimzawa vü thuoüji ma nüh küsüra kümhie sakümsü mükünyie kenüh kümnomna müküsa kenüh noh tü ma vü nü zanyo küsü nga küsawa nyu, küpakenühnyunü ashih hama thuoüji nyi küsü nüh ma zhephruwa pa nü zotheküm kümjie wiethuoh;

²⁷küpakenühnyunü ma nüh nyimzawa vü reza vünüh küru kenüh, thi nyimzawa nüh ma küükrana küsa kenüh azhü zie thuoüji nyi küsü nga nüh ma kükra na küsa mükünyie kenüh.

²⁸ “Mükütüküzü nyi küsü nüh mükürüsa nyimpari nüh ma küna nü karrü müküsa re nü wurie ma siezeh taji masü ngutera thuoüji,

²⁹nyimpawa nüh nyimzawa pa vü raka tünyieke tsü naveh, thi nyimzawa tü vi ma vüvüh sanaveh, küpakenühnyunü nyimzawa nüh ma vüpawa vü sie karrü küsawa phrürie kümtüthuoh kenüh; ma kürho jü ma tü nyimzawa zheküjawa nyu.

³⁰ “Nyi küsü nga ma pa vüvüh küzawa nyu, nyutü ma pa vüvüh sieküzehwa nyu.