Read Pochuri Naga KHONYOKÜÜTHELE 23 Bible Online

KHONYOKÜÜTHELE 23 - Pochuri Naga bible

KHONYOKÜÜTHELE 23

¹“Nyimpari thawa nüh amüja za naveh ünüh nyutü atsa küsa rütha rhethuo naveh ünüh ma thuoüji VÜWA kümhu vü mütura.

²“Alietsa küsa nga VÜWA kümhu vü mütura; wuhle tührake küju ma küthsoküzhi küsü nga VÜWA kümhu vü nyi mtura.

³ “Amonri nyutü Moabri küsü nga VÜWA kümhu vü mütura; wuhle türake küju hamari anyi thuoüji anyi küsü nga VÜWA kümhu vü küsuokürho mütura;

⁴ küpakenühnyunü nohri nüh Egypt vünüh tsezhu küru vü lohse thi ajuh vi nü ru lehkhuji vünüh mükümtu kenüh, jümpa mükünyu mari tü noh küümzü nta Mesopotamia vü Pethor ta küsawa vünüh Beor tsa Balaam müsanü sieküru kenüh.

⁵ Jüta wie ketünga VÜWA noh Saküüwuowa tü Balaam zhü müküna; thi kümzüwa tü khaphrü le nü noh kenüh kütsiawa satsü le, küpakenühnyunü VÜWA noh Saküüwuowa nüh noh küümze kenüh.

⁶Noh tü küsuokürho mari zahzhüküka thi kümhie mphah tüm.

⁷“Noh tü Edomri nyi küsü nga mümrhüra, küpakenühnyunü ma tü noh nü küsa kenüh; noh tü Egyptri nyi küsü nga mümrhüra, küpakenühnyunü noh tü priwa nü jüla kürhori küsa kenüh.

⁸Wuhle kücheawa atsari wuo mari kütsüri thuoüji VÜWA kümhuwa vü tura naveh.

⁹“Nohri arie zhewa nü kürünape vü küpeh vü noh tü azanyo mükümhie aveh vünüh mükiehtuo üji mümhie.

¹⁰“Mükütüküzü nohri azhievü nyi küsü nüh aküzeh vünüh akrujuh[2] küshu samla thuoüji ma tü kürünape alovü müpeh nüh alievü tewa naveh;

¹¹thitü münüleh teru thuoüji ma tü juhküzüm nü rühnyi tetu thuoüji kürünape lovü teturu mhievehthuoh.

¹²“Noh tü kürünape alievü azhie kümnyipe küsü sanü jüla wa sanaveh;

¹³jüla küwa vü azhietsüh küpe viwa nü ku thuoüji azhiehtsüh nüh chühke taji ku luo, thi kum thuoüji küzüphohm le luo.

¹⁴Küpakenühnyunü noh külole nta thi noh mükünongüri vi noh tüvü tsü na küsa kenüh VÜWA noh Saküüwuowa tü noh kürünape azhievü tsewaveh, ma tü noh kürünape vü zanyo mükümtse ngu nü ma tü küzüle tewajisü, jükenüh noh kürünape tü mümtha üji mümhie.

¹⁵“Mükütüküzü tühkha küsü nüh ma Vüwa vünüh zhü noh vü teru thuoüji ma vü mütsüle tüm;

¹⁶ma tü nohri azhievü ma nüh anyu kürüka ma külotsawa vü küürholuo, thi ma mümrü tümluo.

¹⁷ “Israel tsavühri nga saluo thi Israel tsa nyimpari nga saluo kükhurüzheh küüphroküphrie müsara.

¹⁸Noh tü phrahzhu küsa ame küthuo küsüküsü kenüh nga küüphroküphrieh kümsa ame nyutü ashuh nüh kümlie ame VÜWA noh Saküüwuowa zheh vü vimüturura; küpakenühnyunü hamasü khürü nga VÜWA noh Saküüwuowa tüvü kükre küsa kenüh.

¹⁹ “Noh tü noh jünüwa vü azahkütsa vünüh küünawa nyu, ame vünüh luo, kütsaküzhu vünüh luo nyutü zanyo küsüküsü vünüh nga luo zahkütsa küviwa nyu.

²⁰Alienyiri vü thuoüji azahkütsa vünüh küünaluo; thitü noh nü vü thuoüji azahkütsa vünüh müküüna tümluo; jüta thuoüji noh nüh wa nü azhih vi nta kütsewa vü VÜWA noh Saküüwuowa nüh tsiatsü naküveh kenüh.

²¹“Noh nüh VÜWA noh Saküüwuowa vü küphrahzhu küsa vü noh tü jüma müsanüh küsawa nyu, jüma tü noh vü kükhiemuo; küpakenühnyunü VÜWA noh Saküüwuowa nüh jüma tü noh vünüh vi tsa wie naküveh kenüh.

²²Thitü noh nüh küshie müsa thuoüji jüma tü noh vü kükhiemuo münyie.

²³Noh po vünüh mowa küshie küzemthuoh ünüh noh tü azhüazhü nü jüma müsaji mümhie, küpakenühnyunü noh tü noh mpa apashe vünüh noh po vünüh mowa küshie nüh VÜWA noh Saküüwuowa vü küshietsü kümthuoh kenüh.

²⁴“Noh nüh noh zhephruwa rhelivizhuh vü tse küwa vü noh kütsara mükütsara tsaluo.

²⁵Noh tü noh zhephruwa khuohzhiza kütoke vü tseküwa vü noh kenüh nü shitsaluo, thitü noh hira nüh thuonaküveh kenüh ji noh zhephruwa khuozhi ato kütoke müjie tüm.