Read Pochuri Naga KHONYOKÜÜTHELE 31 Bible Online

KHONYOKÜÜTHELE 31 - Pochuri Naga bible

KHONYOKÜÜTHELE 31

¹Jüti sanü Mosa tü mükütuo wie thuoh nüh azhü hamari Israelri aveh vü phrahte.

² Thi ma nüh mari vü, “Hi tü nosü mahvi müzake nü mükeke khruomthuoh; hi nga müsarathuoh. VÜWA nüh hi vü, Noh nü Jordan kari müwarathuoh, ta küza.

³VÜWA noh Saküüwuowa nüh noh tüvü kariwa naveh; noh tüvü akuoküjiri ma nüh zoriem naveh, jüta küsa vünüh noh nüh mari vira naveh; thi VÜWA nüh küüza kümjie Joshua nüh noh tüvü kariwa naveh.

⁴ Thi VÜWA nüh Amorri kajiwa Sihon thi Og thi mari zhih küzorie vü küsa kümjie satsü naveh,

⁵VÜWA nüh mari vi nohri tsü naveh, thi hi nüh noh vü azhükütsü kümjie hi nüh azhükütsü jümari müzhe nü mari vü satsü naveh.

⁶Müzho luo thi luoveh ji luo, mari mükrü tüm nyutü mükrü sheh tüm: küpakenühnyunü VÜWA noh Saküüwuowa nüh noh siewa naveh, ma tü noh küsazihwa nyu, nyutü noh küjawa nyu;” ti küza.

⁷Thi Mosa nüh Joshua ji taji Israelri aveh küngu vünüh, “Müzho luo thi luoveh ji luo; noh nüh anyi hama sie nü VÜWA nüh küshie taji mari pari tsü nta küsa azhihwa vü siewa naveh; thi noh nüh jüla mari sietu nü jüma küüvi naveh.

⁸VÜWA nüh noh tüvü wa naveh; ma tü noh küsazihwa nyu, nyutü küjawa nyu; mükrü tüm nyutü luoveh müzah tümluo,” ti küza.

⁹Jüti sanü Mosa nüh khonyo hama rhü taji vi VÜWA kütsathuoku kükha Levi atsa navüri thi Israel kükhruori vü tsü.

¹⁰ Thi Mosa nüh mari vü azhütsü taji, mahvi türüawa, tsüküm mahvi tsotho küteke küsa aphrüri akhu vü,

¹¹ma nüh azhie rüka na küsa vü Israelri aveh VÜWA noh Saküüwuowa tüvü ru thuoüji mari küünara vünüh Israel aveh tüvü nüh khonyo hama chiezhu naveh.

¹²Nyiri saküsezhuh luo, nyimpari, nyimzari, atsa kürünguori thi priru kürhori aveh noh nyuri vü saküsezhuh luo, jüti sanü mari nüh künara taji VÜWA noh Saküüwuowa kükrü thsüra thi khonyohama zhühthori azhüküzhü ti sa,

¹³thi ma tsari jüma müküthsüri nüh jüma künara thi thsüra taji Jordan kari wa nü vi na küsa azhihwa vü kürho küju nü VÜWA noh Saküüwuowa krü na küsa kenüh.

¹⁴Thinü VÜWA nüh Mosa vü, “Halie, noh tü müsü üji mükümhie rülori shehnyi vehthuoh; Joshua ji nü nohsü kürü müza juhthsü nazizheh lovü tu luo, hi nüh ma vü küüroh wulehwa küche nü ma tsü naveh ünüh,” ti küza. Jüti küüza vü Mosa thi Joshua masü tü küshülü juhthsüzheh lovü tu.

¹⁵Thinü VÜWA nüh juhthsüzheh lovü akülu tovüh turu, thi akülu tovühwa tü turu juhthsüzheh lehpie vü toke.

¹⁶Thinü VÜWA nüh Mosa vü, halie, noh tü noh pari vü nyizehtewa na savehthuoh; thi anyi hamari tü sühra nü mari azavü wa na küsa azhih vü müküthsü nyiazari sie küüphroküphrieh sanü hi jamnathuoh, thi hi nüh mari sie tsathuo küsawa phrüriem nathuoh.

¹⁷Thi jüma rülo vü mari vü eh rüküshuwa juzhu taji hi nüh mari jam naveh thi mari vünüh eh nyieh vü küthim naveh thi hi nüh mari müzhum naveh; kümsüri thi küsührori khielota mari vü ru naveh, jüti sanü mari tü jüma rülo vü, Saküüwuowa nüh hiri azhievü peh müküveh kenüh kümsü hamari tü hiri vü rumveh ülo? ta sanaveh.

¹⁸Mari nüh kümsü küsa kenüh jüma rülovü hi tü eh nyieh vü küthi tsam wie naveh. Küpakenühnyunü mari nüh nyiaza küpa vü kürele teküwa kenüh.

¹⁹“Jükenüh azah hama rhü nü Israel nyiri vü sosieluo; azah hama nüh eh kenüh Israel nyiri vü pohvü küsü küsana küsa kenüh mari po lovü thsetsüluo.

²⁰Küpakenühnyunü hi nüh mari pari vü tsü nta küshie küsa tühnüjuh thi wejuh liküveh azhihwa vü mari sieru thuoüji mari tü tsanü müwara thi thüm thuoüji nyiaza küpa vü kürele tewa nü mari kütsü sa thi hi mam taji eh kütsathuozhüwa phrüriem naveh.

²¹Kümsü thi küsühro khielota mari vü küru vü azah hama nüh künyitoh pohvü satsü naveh (küpakenühnyunü jüma tü mari küthsoküzhira po lovü müküüma kürho sa naküveh kenüh); hi nüh mari tsü nti küshieküsa azhihwa vü müjie sieküru vünüh mari nüh azhühnyo mari nüh müshezhu küveh hi nüh thsüküveh kenüh,” ti küza.

²²Jükenüh Mosa nüh azah hama rülo vünüh rhü nü vi Israel nyiri sosie.

²³Thi VÜWA nüh Nun tsa Joshua vü wuleh küchetsü taji, “Müzho luo thi luoveh ji luo, küpakenühnyunü noh nüh Israel tsari sie nü hi nüh mari vü tsü nta küshie küsa azhihwa vü sieru naveh: Hi nüh noh sietse wie naküveh kenüh,” ti küza.

²⁴Jüti küsa vü Mosa nüh khonyo hama lasipha küsü lovü sehkhe küju rhüjum ünü,

²⁵Mosa nüh VÜWA kütsathuozhü küthseku kükha Leviri vü azhütsü taji,

²⁶“Khonyo lasipha hama vi taji VÜWA noh Saküüwuowa kütsathuozhü küthseku nato wuovü thse luo, jüti sanü jüla sataji nohri vü pohvü küsü küsana küsa kenüh.

²⁷Küpakenühnyunü küzakele nga noh tü azhümvi thi luoveh kho nüh hi nüh thsüveh; halie, hi nüh nohri sie rho küveh vünüh nohri tü nosü VÜWA sie wuluo nü azhü müvi thuoüji; hi süküm sevü thuoüji küzakele nga nathuoh lo!

²⁸Hi nüh azhü hamari mari khüna vü küzathse thi atülü thi azhih ji nü mari vü pohvü satsü na küsa kenüh noh kuohri kükhruori aveh thi küjiri tü hi vü saküüsezhuh luo.

²⁹Küpakenühnyunü hi süküm sevü thuoüji nohri tü müküleh müke satsam wie taji hi nüh nohri vü azhükütsüri vünüh kürele tewa nü kürule rülovü thuoüji kümsüwa tü nohri vü teru wie nathuoh, küpakenühnyunü VÜWA notha vü mowa nü mümhie nüh nohri tü sataji nohri ake nüh küürohwa nüh ma rüsaküshu taji ma mükülo samwie naküveh thuoh kenüh,” ti küza.

³⁰Jüti sanü mari nüh sehkhe müjie küsa küju nü azah hama zhühnyori Mosa nüh Israel kümhuwa aveh khüna vü küzathse: