Read Pochuri Naga KHONYOKÜÜTHELE 32 Bible Online

KHONYOKÜÜTHELE 32 - Pochuri Naga bible

KHONYOKÜÜTHELE 32

¹Künaluo, O thajüwuri, hi nüh küza naveh ünüh; thi azhihwa tü eh po vü azhüwa küüna luo.

²Eh küsosie tü tsokürü kümjie kürütsuo luo, Eh zhüküphra tü aküzo kümjie kütsaluo, are rügi vü zhüküzhü ti atsoh kürüke kümjie, thi apra rügivü atsoh küürhüke kümjie.

³Küpakenühnyunü hi tü VÜWA nyo zhüchüh naküveh kenüh. Hiri Saküüwuowa vü aküji phrahte naveh!

⁴lokrüwa, ma küüroh tü jutsa; küpakenühnyunü ma lehkhuji aveh tü müsho. Küzhütsa thi müküleh mükünyie Saküüwuowa küsü, kümsho thi kükato thuoüji ma.

⁵Mari tü ma vü müküleh vünüh sam, mari tü ma tsari nyuthuoh, küpakenühnyunü mari tü azhührhü peküm kenüh; mari tü müküleh thi müküükhuh wuhle.

⁶Jükenüh nohri tü VÜWA müthoh saveh ülo, nohri küzheri thi müshemküthsü nyiri? Ma tü nohri apa nohri saküüjewa, ma nüh noh sa thi noh küsazhuwa nyu ülo?

⁷Kürüwi rülori müsheke luo, mahvi hothake teküwari müshenoluo; nohri apa künaluo, ma nüh noh kütsanaveh; nohri kükhruori vü mari nüh nohri vü küza naveh.

⁸ Kümsie Tsawa nüh akuoküjiri vü aka küvi kütsü vü, anyira tsa nyimpari ma nüh saküüpa vü, Saküüwuowa tsa nyimpari küürüh müzhe nü ma nüh anyiri azhie küte nü tsü.

⁹Thitü VÜWA suope thuoüji ma nyiri, Jacob tü ma kütuohke kütsü rülie.

¹⁰Ma nüh shünyiza azhih vünüh ma phahra, thi jikhi sanü küja vünüh, ma nüh ma mükiete, ma nüh ma vite; ma notha ashohlo kümjie ma nüh ma sa.

¹¹Khujorü nüh ma phra küüke kümjie, ma tsa nyiehvü ma küsa heke, aküsa künyi küta nü, mari re ma küsa künyi vünüh mari vü taji,

¹²VÜWA mpa nüh ma leh küjotsü, thi ma vü aliera nyiaza münyie.

¹³Ma nüh azhih vü azhie kümsie vü küükuo, thi ma tü azhuh vünüh küngura tsa; alokrü vünüh ma nüh awejuh küümje, thi anyih küükha lokrü vünüh avüjuh küümje.

¹⁴Mieshü vünüh tünüjuh küsuo tsa, thi anyihnyih vünüh tünüjuh zhu naveh, nyihzhüzah thi nyihzhüvo küthü, Bashan mieshüri thi nyihsüri, hiemtha kümhietsawa,

¹⁵Thitü Jeshurun tü thüsheh tewa, thi ajih nüh müshü; noh tü thüthuoh, jiwathuoh, noh satsa küriehthuoh; thinü ma tü ma küsa Saküüwuowa kulem, thi ma küülolewa lokrüwa riesa.

¹⁶Müküthsü nyiazari vi nü ma küke taji noküüjizhi; akükre müke vi nü mari nüh ma rüsaküshu taji ma mükülo sam.

¹⁷ Saküüwuowa mükünyu sietse kümsüri vü mari tü küsahthuo sa, mari nüh müküthsütsatsa nyiazari vü, kümnü vünüh küturu nyiaza kürütheri vü, nohri pari nüh piketü mükükrütsatsa.

¹⁸Nohri tü nohri küwuo Lokrüwa mümshe wiethuoh nüh sam, thi nohri tü noh wuokütsü Saküüwuowa kümam.

¹⁹VÜWA nüh jüma ngu, thi mari kulem, küpakenühnyunü ma tsa nyimpari thi nyimzari nüh arüsaküüshu kenüh.

²⁰Thinü ma nüh, hi nüh mari vünüh eh nyieh küthim naveh, mari sehkhe tü mota sanaveh ünüh hi nüh no naveh, küpakenühnyunü mari tü müküleh vü teküwa wuhle küsa kenüh, küzhütsa mari vü mükünyie tsari.

²¹ Mari nüh nyiaza[3] mükünyu vi hi küke nü hi noküüjizhi; mari nüh anguo vi eh rüsaküüshu. Jükenüh anyi mükünyuri vi nü hi nüh mari küke taji noküüjizhi naveh; aküzhe kuohjiri vi nü hi nüh mari arüsaküshu naveh.

²²Küpakenühnyunü eh rüküshu nüh anyih küsü tsothuoh, thi jüma nüh Küsürazhie küsheh küju tso, azhih zoriem thi jüma nyiehvü nga, thi aküzhiri ajupewa rügivü anyih thsem.

²³Thi hi nüh mari rügivü kümsü sakümprohke tsü naveh; hi nüh eh shüchuri mari rügi vünüh küze naveh;

²⁴Mari tü kürüma vünüh jam nathuoh; tso küüsa thi kümzhi sahna kümsü nüh shita mari saküra naveh; thi hi nüh samwa ahaküze nüh mari sie küüruoluo naveh, azhitho vü kümzhi zanyo zhukütse vi.

²⁵Alie vünüh anyuchuwa nüh sakümie naveh, thi azhih lovü nüh sakükrüphake naveh, vizari nga thi mükürüsari zorie taji, atsa tühnü künüwa tü alü küpruwa sie taji.

²⁶Hi nüh “Hi nüh kületsuo vü saküvohrie naveh, anyiri azavü mari mükümshera sanü hi nüh khetem tü naveh,” ta küza mhieveh.

²⁷Mükünongüri nüh arüsaküüshu hi nüh mükükrütüla, mari mükünongüri nüh müshezihm jisü, mari nüh, “Eh keri thuoüji khraram, VÜWA nüh hama aveh müküroh,” ta küza mhieveh.

²⁸Küpakenühnyunü mari tü kümshe kürütsora kuohji, thi mari vü zanyokümshethsü münyie.

²⁹Mükütüküzü mari nüh kümahtsa tüla mari tü hama thsüra naveh, mari sevü sehkhe ngura naveh!

³⁰Mokümjie küsü nüh anyie türake zhe na lo, thi künyi nüh anyie türake zheküprüra na lo, mari lokrü nüh mari müküzhu küju nü, thi VÜWA nüh mari müjie küja küju nü?

³¹küpakenühnyunü mari lokrü thuoüji hiri Lokrü kümjie nyu, hiri mükünongüri nüh mari mpa wienga aleri sam.

³²Küpakenühnyunü mari rhelivi rhu tü Sodom rhelivi rhu, Thi Gomorrah zhuhri vünüh; ma rheliviri tü kümzhi rhelivi, ma khrüri tü kham;

³³ma khahri tü arehsü kümzhi, arehsü müre kümne mütse kümsü.

³⁴Hamatü aluovü hi vü samveh ülo? eh künyirhieku lovü fete müsa ülo?

³⁵ Amüthoh küsa thuoüji eh zhi, thi küthuole nga, ma mphari künyicho vü, mari ngukümsü rülo tü shenyi küvehthuoh kenüh, thi mari küpohka tü shita tetsethuoh.

³⁶ Küpakenühnyunü VÜWA nüh ma nyiri thsütoh naveh, thi ma sieperi vü küüze peh naveh, ma kükhrari teküwa ma nüh küngu vü, thi kümnyie mükünyie vü, ma mpa nüh nyura kükhu vü küpehri luo nyutü rüzi nü kürhori saluo.

³⁷Jüti küsa vü ma nüh, Mari nyiazari khiela pehveh lo, mari nüh kümnyi lokrüwa,

³⁸thari nüh mari küsahthuori küthü tsamtü lo, thi mari nüh küzhu kükhurü küsa zhumtü lo? Mari tü sühra nü noh küükraluo, mari tü noh kütotewa küsaluo!

³⁹“Halie khinyi hi, hi wienga, ma, thi eh nyiehvü nyiaza küpa münyie; Hi nüh zothe thi hi nüh sakürhole; hi nüh sakümsamna thi sakümhie; thi eh ke vünüh vitewa na küsa nyiküsü nga münyie luo.

⁴⁰Küpakenühnyunü hi nüh atülü vü eh ke khroke, thi küshie, hi nüh küsuokürho rhoküveh üta,

⁴¹Mükütüküzü hi nüh eh nyu küüriehwa küzah thuoüji, thi eh ke tü kümshowa vünüh jüma küjeh thuoüji, hi mükünongüri vü hi nüh amüthoh sanaveh.

⁴²Eh shüchuri tü azüh zhuküümshe hi nüh satsü naveh, thi eh nyuchuwa nüh asazhü küürehrie naveh, rehtheküm thi aküsi küsari azüh vünüh, mükünongüra lüshe küsuo vünüh,” ti sa.

⁴³ Ma nyiri siakeluo, O noh kuohjiri; ma vü künyietsuo luo, nyiazari aveh, küpakenühnyunü ma nüh ma siepera züh müthoh küsa kenüh, thi ma nüh ma mükünongüri vü amüthoh saveh, thi ma nyira zhih kenüh müküleh nojatsüveh, ti sa.

⁴⁴Mosa tü ru taji Nun tsa Joshua masü nüh azah hama zhühnyori kümuo chie nü Israel nyiri nüh küünara satsü.

⁴⁵Thi Mosa nüh Israelri vü azhü hamari aveh phrahte jum ünü,

⁴⁶ma nüh mari vü, hi nüh nosü nohri vü küüza zhüri vi nohri rügivü saluo, jüti sanü nohri nüh nohri tsari vü azhü jümari tsüra naveh, thi mari tü khonyo hama zhüri kümhie ta müzhera naveh.

⁴⁷Küpakenühnyunü jüma tü nohkeri nüh azhühnyo mükünyie nyu, thitü jüma tü nohri kürholi, thi jüma kenüh nohri Jordan kari wa nü vi na küsa azhihwa vü rhosuo naküveh kenüh.

⁴⁸ VÜWA nüh jüma rülo vü Mosa vü,

⁴⁹Moab zhih vü Jeriko kürüwie wuovü küpeh Abarim küzhi, Nebo küzhi rügivü kuo taji hi nüh vi Israel nyiri küüvi nta kütsü Kanan noküze luo,

⁵⁰thi noh nüh kükuo küzhi rügi vünüh süm nü Hor küzhi rügi vünüh noh jie Aron süm taji ma nyiri vü viküwa kümjie noh tü noh nyiri vü viküwa sanaveh,

⁵¹küpakenühnyunü Zin reza vü Meribatkadesh ajuhri vü Israel nyira zavü nüh noh kütsotü phrüriem; thi Israel nyiri azavü noh nüh hi tü mütham ta müküsiake kenüh.

⁵²Noh tü azhih noh tüvü küpehwa ngu naveh; thitü noh tü jüla müwara, hi nüh vi taji Israel nyiri vü kütsüwa vü mütura.