Read Pochuri Naga KHONYOKÜÜTHELE 34 Bible Online

KHONYOKÜÜTHELE 34 - Pochuri Naga bible

KHONYOKÜÜTHELE 34

¹Jüti sanü Mosa tü Moab anyuo vünüh Nebo Küzhi, Pisga rügi vü kuo, jüma tü Jeriko küwiejie wuovü. Thinü VÜWA nüh azhih jüla aveh, Gilead vünüh Dan küju ma kütsa,

²Neftali aveh, Efraim zhih thi Manase, Judah zhih aveh wa nü Zhietu Juhküjiwa küju,

³Negebwa, thi kütake, jüma tü aluophi rhuri nyuküji Jeriko nyuo Zoar küju.

⁴ Thinü VÜWA nüh Mosa vü, “Azhih hamatü hi nüh Abraham, Isaac thi Jacob vü küshiemthuoh. Hi nüh noh küthsoküzhiri vü tsü naveh; ti küzamthuoh. Hi nüh noh notha nüh küüngumthuoh, thitü noh nü jüla kari müwara,” ti küza.

⁵Jüti sanü VÜWA zhü müzhe taji VÜWA siepewa Mosa tü jüla nüh Moabzhih vünüh süm.

⁶Thi Betpeor küwiejie Moab zhih anyuo vünüh VÜWA nüh ma chowum; thitü nosü küju nga ma küchohwu azhie nyi küsü nga müthsü.

⁷Mosa tü ma süküm vü ma mahvi müzake nü mükekethuoh; ma notha tü müküphrü, nyutü ma rhuoh kükhra nga temtsuo.

⁸Thi Israel nyiri tü Mosa kenüh Moab kütakeri vünüh rülo cherake krie; jüti sanü Mosa kenüh kükrie thi küshükheke rülori tü jum.

⁹Jüti küsa vü Nun tsa Joshua tü kümahtsa sietse nüh pro, küpakenühnyunü Mosa ake tü ma rügivü thsuoke kütsü kenüh; jükenüh Israel nyiri tü ma zhü küna, thi VÜWA nüh Mosa vü azhükütsü kümjie sa.

¹⁰ Jüsevü thuoüji Israel vü Mosa kümjie setsaküthsü VÜWA nüh künyitohnyitoh sie küthsüra müshu nüh sam,

¹¹VÜWA nüh ma küze nü ma nüh Egypt zhih vü, Faroah vü, ma sieperi aveh vü thi ma zhih aveh vü athsoshiri thi aküngori aveh küsa nyiküsü nga ma üta münyie,

¹²thi kükhra kümzho aveh, küji thi küükrükükra küüroh Mosa nüh Israel aveh notha vü küsa ma kümjie shumru nüh sam.