Read Pochuri Naga KHONYOKÜÜTHELE 4 Bible Online

KHONYOKÜÜTHELE 4 - Pochuri Naga bible

KHONYOKÜÜTHELE 4

¹Jüsevü Mosa nüh Israelri vü, O Israelri, hi nüh nohri vü küsosie zhühkheri thi azhühkhori vü nohri müshe thse luo, thi jümari saluo; jüta thuoüji nohri tü rhora naveh, thi VÜWA, nohri para Saküüwuowa nüh azhih kütsüwa lovü tu nü jüma vira naveh.

² Thi nohri tü VÜWA nohri Saküüwuowa zhü müzhe na küsa kenüh hi nüh azhükütsüri vü küthsephrewa nyu, nyutü vizhuküjawa nyu.

³ Baal-Peor vü VÜWA nüh mowa sanüh nohri notha nüh ngumthuoh; küpakenühnyunü VÜWA nohri Saküüwuowa nüh thathari nüh Peor vü Baalwa senyi nüh nohri azavü nüh zorie khehküm kenüh.

⁴Thitü nohri thari nüh VÜWA nohri Saküüwuowa vü küjehphoke nüh aveh nosü küju rhoveh.

⁵Halie, VÜWA eh Saküüwuowa nüh hi vü azhükütsü üta hi nüh azhühkheri thi azhühkhori vi nohri sosiekütsüri nohri nüh wa nü vi nta sakütse azhih vü jümari sataji müzhe naveh.

⁶Nohri tü jümari müzhe luo thi saluo; küpakenühnyunü jümari tü anyiri notha vü nohri zanyoküthsü thi küthsükümshi sana küveh kenüh, thi mari nüh azhühkhe hamari künara thuoüji mari nüh nohri tü akuoh aküji hamatü zanyoküthsü thi küthsükümshi nyiri tsawiethuoh ta sanaveh.

⁷Küpakenühnyunü VÜWA hiri Saküüwuowa tü hiri nüh ma küji vü hiri shehnyi küveh üta akuoh küji mokümjie küsawa nyiaza nüh hiri shehnyiveh lo?

⁸Thi hi nüh nosü khonyo vi nohri tüvü küthse üta khielota künyitsa zhühkhe thi zhühkhori küpeh akuoküji aküji khiela pehveh lo?

⁹Azhü mpa nüh zhüluo, nohri kürholi vi küriehzisheh luo, noh nothari nüh ngukümri müküma nüh sana küsa kenüh, thi jümari tü nohri kürho küju noh luovehri vünüh temwa nüh sana küsa kenüh noh tsari thi noh tsara tsari vü sosie kütsü saluo.

¹⁰Nohri nüh Horeb vü VÜWA nohri Saküüwuowa tüvü kütsie rülo vü VÜWA nüh hi vü, nyiri tü eh zhü küüna na küsa kenüh mari hi vü saküüsezhuh luo, mari tü azhih vü kürho küju hi krükütse peh huo na küsa kenüh, thi jüma vi ma tsari küüsosie naküsa kenüh, ti küza.

¹¹ Thinü nohri tü shehnyiru nü aküzhi jih vü tsie kheh, jüti küsa vü aküzhiwa tü aküzowa nüh thi akülu thi atsoküzo nüh külüwute nü peh, thi anyih ju nü atülüwa azhila vü peh.

¹²Jüti küsa vü VÜWA nüh anyih azhila vünüh nohri vü azhüküüza künarathuoh, thitü ajikhi küünara wie küchie nüh nohri tü zanyoküsü nga müngu.

¹³ Nohri sa üta ma nüh azhükütsü ma kütsathuozhüwa nga nohri vü phrahzhu tsümthuoh, jüma tü, azhükütsü türakeri; thi ma nüh jüma tü alokhie rügivü rhüke.

¹⁴ Nohri nüh tu nü vina saküveh azhihvü jümari sana küsa kenüh VÜWA nüh jüma tsotho vü azhühkheri thi azhühkhori vi hi nüh nohri sosie üta azhütsü.

¹⁵Jükenüh nohri riehzi sheh luo. Horeb vü anyih vünüh VÜWA nüh nohri sie küjüle vü nohri tü atso küsü nga müküngu kenüh,

¹⁶ nohri tü nohri mpa nüh arhie muomuo, ma mpa nüh nyimpara tso nyutü nyimzara tsorhe rheke nü khurü taji nohri mpa nohri samkümne nüh sana küsa kenüh azhüzhüluo,

¹⁷ azhih vü asa küthse muomuo wie nga, amürhü vü prükütse aküsa küpe müwa küthse muomuo wie nga,

¹⁸azhih rügi vü zhukütse küthse muomuo wie nga, azhih kükhu ajuh lovü anga küthse muomuo wie nga.

¹⁹Noh nothari thajüwu vü no taji nohri shohke nü nohri nüh arünyi asa, awutsiri thi atülü vü küperi ngu nü VÜWA nüh vi atülü kükhuvü nyiri aveh kütsüri khurü thi jümara küüroh müsanüh sana küsa kenüh azhüzhüluo.

²⁰ Thitü VÜWA nüh nosü kümjie nohri vi ma zhi wie ta küsa nyiri sana küsa kenüh Egypt vünüh amürü kütsoku vünüh nohri siera thi siezhura.

²¹ Thitü jüma nyiehvü nüh nohkeri nüh VÜWA tü hi vü arüshu, thi hi tü Jordan müküükari ta thi nohri küüvi nta VÜWA nohri Saküüwuowa nüh azhih kümhie vi nohri kütsüwa lovü hi müküütu ta küshiem.

²²Küpakenühnyunü hi tü azhih hala nüh müsü üji mükümhie kenüh, hi tü Jordan mükükarirathuoh; thitü nohri thuoüji kariwa naveh thi azhih kümhiewa vira naveh.

²³Nohri mpa nüh azhüzhüluo, VÜWA nohri Saküüwuowa kütsathuozhü nohri sie sasa küvehwa kümam nü VÜWA nohri Saküüwuowa nüh nohri kükhewa atso muomuo wie nga mükhrüke nüh sana küsa kenüh azhüzhüluo.

²⁴ Küpakenühnyunü VÜWA nohri Saküüwuowa thuoüji tso küürara anyihwa wiethuoh küsa kenüh, thi noküüma Saküüwuowa wiethuoh.

²⁵Nohri nüh noh tsari ngura thi noh tsari nüh noh azhüri ngura nü azhih jüla rhosuotewa taji mükütüküzü atso muomuo wie nga khrüke nü nohri sakümne, thi VÜWA nohri Saküüwuowa notha vü zanyokümsü sanü ma luoveh saküraküpre taji ma rü saküshu thuoüji,

²⁶nohri tü Jordan kariwa nü vina küsa azhihwa vünüh shita küümie kheh na küsa kenüh hi nüh nosü azhih thi atülü ji nü eh pohvü küüsa nti saveh, nohri tü jüla kürhosuowa nyu, thitü pokah khe wie naveh.

²⁷ Thi VÜWA nüh nohri tü anyi küpari azavü zheküvohrie küzem naveh, jüti sanü VÜWA nüh nohri tü jam taji, thi nohri tü pike mpa nüh nyura zavü küürho naveh.

²⁸Nohri tü jüla nüh zanyo müküngu, müküünara, ashie mükütsa thi zanyo arhe müküthsü anyira ke nüh küsa athsoh thi aloh nyiazari küükhurü naveh.

²⁹ Thitü jüla nüh noh nüh VÜWA nohri Saküüwuowa phah naveh, thi mükütüküzü nohri nüh noh luovehri aveh thi noh kürhori aveh vi ma se phah thuoüji ma phahra naveh.

³⁰Nohri nüh kümnomna vü peh, thi asevü hamari aveh nohri vü teru ti thuoüji nohri tü VÜWA nohri Saküüwuowa vü sheleru nü ma zhüküna naveh,

³¹küpakenühnyunü VÜWA nohri Saküüwuowa tü küümze küpro Saküüwuowa; ma tü nohri küjawa nyu, nyutü küzoriewa nyu, nyutü noh pari vü küshie nü küsa kütsathuozhüwa küümawa nyu.

³²“Thi khinyi teküwa rülori künaluo; jümari tü nohri tüvü peh wieveh, Saküüwuowa nüh anyiri sanü azhih rügivü küsa vünüh nosü küju, thi zanyo hakümjie küsa aküji sathuoh ünü nyu nüh nyutü künara thuoh ünü nyu nüh azhih küpote küsü vünüh wa küpote küsüwa vü küju künaluo.

³³Nohri nüh künara nü rho küveh üta nyiaza khi anyih zhila vünüh azhü phrahte nü küünara anyi wuori pehru ülo?

³⁴Nyutü noh nothari vünüh VÜWA nohri Saküüwuowa nüh nohkeri nüh zanyo aveh Egypt vü saküru üta nyiaza wuori akuoh küpara zhie vünüh kümte vünüh, athsoshi vünüh, aküngo vünüh, arie vünüh, ake kükhra vünüh, apie thsuoküüze vünüh thi saküüngothse vünüh ma mpa ma kenüh wa nü müte nü akuoh küpara zhievü nüh akuoh küsü küvizhu pehveh ülo?

³⁵ VÜWA thuoüji Saküüwuowa, ma wie küchie nüh ma nyieh vü küpa münyie ta küsa nohri küüthsü na küsa kenüh nohri vü thuoüji kütsamthuoh.

³⁶Nohri sakükato na küsa kenüh ma nüh atülü vünüh ma jikhi nohri saküüna, thi ma nüh azhih vünüh nohri vü ma nyih küji küüngu, thi nohri tü anyih zhila vünüh ma zhü künara.

³⁷Thi küpakenühnyunü ma tü nohri pari kümze küm kenüh mari sevü mari küshukürari rüka nü ma kükhra vünüh ma mpa nüh nohri sie taji Egypt vünüh vizhu,

³⁸nosü hakümjie nohri vituru nü mari zhih vi nohri tsü taji nohri suope küüsa nta akuoküjiri nohri nyiehvü nüh ji thi khra ti küsari zhejam;

³⁹jükenüh nosü thsü nü VÜWA thuoüji Saküüwuowa, atülü kümsie vü thi azhih kükhu vü küpehwa; ma wie küchie nüh küpa münyie ti küsa thsüluo.

⁴⁰Tinü nohri tü ma azhühkheri thi ma nüh azhükütsüri nosü hi nüh nohri vü tsüküvehri müzhe luo, nohri tü nohri sevü kütse atsari kenüh mhie na küsa kenüh, thi VÜWA nohri Saküüwuowa nüh küsuokürho nohri vü kütsü azhihwa vü nohri kürho rülowa tü suo na küsa kenüh,” ti küza.

⁴¹ Jüti küsa vü Mosa tü Jordan zhieshu tuwuovü anyuji küche athuo sasa,

⁴²anyi fethe kümri tü jüla zhütewa na küsa kenüh, küütü vünüh mükünoluongü vünüh müküthsü vünüh nyu nü mazhephruwa zothem thuoüji zhü anyuji hamari vü teküwa vünüh ma kürho küülole sana küsa kenüh:

⁴³Reuben kuohri kenüh Bezer reza vü küzhiho kütake vü, Gad kuohri kenüh Gilid vü Ramot, thi Manase kuohri kenüh Bashan vü Golan, ti hamari sanaveh.

⁴⁴Khonyo hamatü Mosa nüh Israel tsari tüvü küthse;

⁴⁵Egypt vünüh tsezhu küru vü Mosa nüh pohvüri, azhühkheri thi azhühkho hamari vi Israel tsari vü küza,

⁴⁶hamatü Mosa thi Israel tsari nüh Egypt vünüh tsezhu küru vü mari nüh kücharawa Heshbon vü küpeh Amorri kajiwa Sihon zhih, Jordan tuwuovü Betpeor nyuo kürühwie wuovü nüh küza.

⁴⁷Thi mari nüh ma zhih thi Bashan kajiwa Og zhih ti vitewa, Amorri kaji hamasü tü Jordan zhieshu tuwuovü rho;

⁴⁸Aroer vünüh, jüma tü Arnon nyuo pohte küju, thi Sirion (Sion) küzhi küju (Jümatü Hernon küzhiho),

⁴⁹jüsevü nga Jordan zhieshu wuovü Araba vünüh Araba juhküji Pisga küzhi rüsheküwa kükhu küju.