Read Pochuri Naga KHONYOKÜÜTHELE 5 Bible Online

KHONYOKÜÜTHELE 5 - Pochuri Naga bible

KHONYOKÜÜTHELE 5

¹Jüsevü Mosa nüh Israelri aveh ji zhuh nü mari vü, künaluo, O Israelri, nosü hi nüh nohri küünara vünüh azhühkhe thi azhühkho nohri vü küüza, nohri tü jümari thsüra nü kümhie ta jümari sanaveh.

²Horeb vünüh VÜWA hiri Saküüwuowa nüh hiri sie kütsathuozhü sa.

³VÜWA nüh kütsathuozhü hama hiri pari vü kütsathuozhü müsanüh nosü hiri hala rhoküvehri aveh vü sie sa.

⁴Anyih azhila vünüh VÜWA nüh aküzhi vünüh künyihto nohri sie jüle,

⁵jüma tsotho vü hi nüh VÜWA zhü vi küza nti VÜWA thi nohri azhievü tsie; küpakenühnyunü nohri tü anyih kükrü kenüh aküzhi vü mükhru. Ma nüh,

⁶Hi tü Egypt zhih nohri nyura tükha küsa zheh vünüh nohri küvizhu VÜWA.

⁷Hi wie küchie nüh nohri tü nyiaza küpa küsü nga küsawa nyu.

⁸ Nohri mpa nohkeri nüh atso, nyutü atülü rügivü zanyo küthse, nyutü azhih kükhuvü zanyo küthse, nyutü azhih kükhuvü ajuh lovü kütü küsü nga kükhrükewa nyu;

⁹ jümari vü müküngie tsuora, nyutü jümari vü akütsü samtsüra, küpakenühnyunü hi VÜWA nohri Saküüwuowa, hi tü noküüma Saküüwuowa, apara müküleh kenüh atsa wuhle küche thi müzü küju nga hi kümrhüri vü kümnomna tsütsüti,

¹⁰thitü hi küümzeri thi hi nüh azhükütsüri kümzhe anyienyieri vü thuoüji mükükhaphrükhale küümze kütsaveh.

¹¹ Nohri tü müjuju vünüh VÜWA nohri Saküüwuowa nyo müvi tüm: küpakenühnyunü ma nyo müjuju vünüh küviri vü VÜWA tü ma müküleh küüzhikewa nyu.

¹² VÜWA nohri Saküüwuowa nüh nohri vü azhükütsü üta Kümnyirülowa müzhe luo, thi jüma tü kümtse vünüh saluo.

¹³ Rülo türo thuoüji küroh naveh, thi nohri küüroh aveh sanaveh;

¹⁴thitü rülo türüawa thuoüji VÜWA nohri Saküüwuowa vü kümnyirülo; jüma rülovü nohri nga, nohri tsa nyimpari nga, nyimzari nga, nohri siepepari nga, nohri siepevühri nga, nyutü nohri shüvotsa, nohri rawuh, nyutü nohri mieshümiesa, nyutü nohri kheri lovü turu pehküveh küzehri nga jüma rülovü küüroh küsü nga küsawa nyu, jüti sanü nohri siepepawa nga, nohri siepevüh nga thi nohri nga kümnyie sanaveh.

¹⁵Nohri tü Egypt zhih vü siepe küsü saru ti küsa müsheluo, thi VÜWA nohri Saküüwuowa nüh ma ke kümzho thi ma pie thsuo küze nü jüla nüh nohri vizhu; jükenüh VÜWA nohri Saküüwuowa nüh kümnyirülo sa üta azhütsü.

¹⁶ VÜWA nohri Saküüwuowa nüh azhükütsü üta noh pa noh zah siakeluo; jüta küsa vünüh nohri kürho rülowa tü suora naveh, thi VÜWA nohri Saküüwuowa nüh tsüküveh azhihwa vü noh tü mhiera naveh.

¹⁷ Noh nyuri küfethevüh nyu.

¹⁸Nyutü noh tü muomuo kürhovüh nyu.

¹⁹ Nyutü noh tü kürühuvüh nyu.

²⁰ Nyutü noh zhephruwa mükünongü vünüh kürie küzhühja pohvü küsa vüh nyu.

²¹ Nyutü noh zhephruwa vüvüh mümngu tüm; thi noh zhephruwa zheh, azhuh, nyutü ma siepepawa, nyutü ma siepevühwa, ma shüvotsa, nyutü ma rawuh, nyutü noh zhephruwa tsokrü küsüküsü nga küvingüvüh nyu.

²² Azhü hamari tü VÜWA nüh aküzhi vü anyih azhila vünüh akülu vünüh, zokümthsüthsü vünüh, jikhi küzie vünüh, nohri kümhu aveh vü küza; thi ma nüh küthsephre müsa. Thi ma nüh alokhie künyi rügivü rhüke nü jümasü vi hi tsü.

²³Aküzhi vü anyih julowu küveh vü aküzo azhila vünüh nohri tü ajikhi künara ünü akuoh vü alüri thi nohri sierhüri tü eh kütuoh vü ru;

²⁴thi nohri nüh, Halie, VÜWA hiri Saküüwuowa nüh hiri vü ma kütholathovü thi ma küji kütsamthuoh, ma jikhi nga anyih azhila vünüh künarathuoh; thi nosü hiri tü Saküüwuowa nüh nyiri sie jüle nü khinyi küju nga anyiri tü rhoküveh ngu vehthuoh.

²⁵Jükenüh hiri tü mokenüh sü na lo? küpakenühnyunü anyih küji hama nüh hiri tsothem naveh; mükütüküzü hiri nüh VÜWA hiri Saküüwuowa jikhi künara lehü thuoüji hiri tü süm wie nathuoh.

²⁶Küpakenühnyunü asatsa vünüh rhokütse thawa nüh rhoküveh Saküüwuowa jikhi anyih azhila vünüh hiri üta künara nü hiri nüh khinyi nga rhoküveh kümjie küsa pehveh lo?

²⁷Shehnyi wa nü VÜWA hiri Saküüwuowa nüh küza na küsari aveh küna nü VÜWA hiri Saküüwuowa nüh küza na küsari aveh vi hiri vü küza le luo; jüta thuoüji hiri tü küna nü jüma sanaveh, ti küza.

²⁸Thinü nohri nüh hi vü küüza, VÜWA nüh nohri zhü künara nü ma nüh hi vü, Anyi hamari nüh noh vü küüza zhüri hi nüh künarathuoh; mari nüh küüza aveh tü kükato vünüh küzaveh.

²⁹O, mari tü tsotho aveh vü nga amüshe hama vü peh huo nü hi krü thi hi nüh azhükütsüri aveh müzhera ti thuoüji mari nga thi mari tsari nga rho mhiera na nü!

³⁰Wa nü mari vü, ‘Nohri juhthsüzheh vü shele waluo,’ ti küza luo.

³¹Thitü noh thuoüji eh kütuoh vü tsiela luo, hi nüh azhih nohri vü tsü nü nohri küüvi na küsa vü mari küümzhe na küsa kenüh vi taji mari sosie na küsa azhükütsü aveh, azhühkhe aveh thi azhühkho aveh vi noh vü küza naveh ünüh, ti küza.

³²Jükenüh VÜWA nohri Saküüwuowa nüh nohri vü azhükütsü üta sana küsa kenüh azhümzhüji mümhie; nohri tü azhie wuovü nga thi azhu wuovü nga kürele küwavüh nyu.

³³Nohri rho na küsa kenüh VÜWA nohri Saküüwuowa nüh nohri vü azhükütsü lehkhuji vü kütse sanaveh, jüta thuoüji nohri tü mhiera naveh thi nohri nüh azhih vi nohri zhi sana saküvehwa vü rhosuora naveh.