Read Pochuri Naga KHONYOKÜÜTHELE 8 Bible Online

KHONYOKÜÜTHELE 8 - Pochuri Naga bible

KHONYOKÜÜTHELE 8

¹“Nohri tü rhora thi saküzhina küsa kenüh, thi VÜWA nüh noh pari vü tsü nta küshie küsawa vü tu thi azhih jüma vi na küsa kenüh hi nüh nosü nohri vü azhükütsüri azhüzhü sheh nü sanaveh.

²Thi ma tü noh saküürünyie nta thi noh müte, noh luoveh lovü mowa tüveh ünüh ta küsa thi noh tü ma nüh azhükütsü müzhera na ünü nyu nüh ta küsa thsü na küsa kenüh VÜWA nohri Saküüwuowa nüh mahvi zürake nohri siekütse müsheküpeh sanaveh.

³ Nyiri tü alohse vü mpa nüh rhora müveh, thitü VÜWA po vünüh shuküru aveh vünüh rhoraveh ta küsa nohri saküüthsüna küsa kenüh ma nüh nohri sakürünyietsü, thi nohri sakürümatsü nü nohri nga thi noh pari nga müküthsü manna vi taji nohri avo satsü.

⁴Mahvi zürake vü nohri thsümnyi tü vüthuotemwa thi noh jihri tü vüküm müsa.

⁵Jükenüh nohri luoveh lovü nüh thsüluo, nyi küsü nüh ma tsa saküükato üta VÜWA nohri Saküüwuowa nüh nohri sakükatoveh.

⁶Jükenüh nohri tü ma lehkhuji vü kütse vünüh thi ma kükrü vünüh VÜWA nohri Saküüwuowa zhükütsüri müzhe nü saluo.

⁷Küpakenühnyunü VÜWA nohri Saküüwuowa nüh azhih kümhie küsü vü siekütse kenüh, rühgu juh küli, ajuwi thi ajupra küshu, anyuo vü nga thi küzhiho vü nga küli,

⁸hiemtha thi atsuo kümhie küsho zhih, rhelivi, ampah rhu thi akatoh küpeh azhih, Olive thsoh thi awejuh küpeh azhih,

⁹alohse müzüla wiethuoh nüh kütsa azhih, jüla tü zanyoküsü nga küthohtsa mükünyie, azhih jüla tü alokrüri tü amürü, thi azhih jüma küzhiho vünüh asahwuo küchühzhura azhih küsü.

¹⁰Thi nohri tü tsanü müwara naveh, jüti sanü ma nüh azhih kümhie vi nohri kütsü kenüh nohri tü VÜWA nohri Saküüwuowa tsiatsü naveh.

¹¹ “Hi nüh nosü nohri vü azhükütsü ma Khonyori, ma zhühkhori thi ma zhühkheri mümzhe nüh küsa vünüh VÜWA nohri Saküüwuowa kümaküm müsanüh sana küsa kenüh azhüzhüluo;

¹²nohri tü tsanü müwaküm sevü, thi azheh kümhiehie sara nü jüma lovü tu kürhora vü,

¹³thi nohri mieshümiesa thi nohri nyihnyih zhira thuoüji, nohri rakasari thi sunari küzhira sevü, nohri nüh zanyo pehküvehri aveh zhite küru vü,

¹⁴jüti sanü nohri luoveh tü vike kümsietewa nü nohri tü nyura kükhu vü küpeh Egypt zhih vünüh nohri küvizhu VÜWA nohri Saküüwuowa thama küüma kenüh,

¹⁵aküji thi küngo reza, arehsü kükrükhreri thi shumathu küpeh, ajuh münyie nüh ajuh küürieh, alokhie lokrü vünüh nohkeri nüh ajuh küvizhuwa,

¹⁶sehkhe vü nohri kümhie küsana küsa kenüh nohri sakürünyie thi nohri kümte vünüh nohri pari nüh müküthsü ashie manna vi nü reza vünüh nohri kütsa.

¹⁷Eh kükhra thi eh ke kümzho vünüh künyirhie hama ngura ta nohri luoveh lovü nüh thama küüphrahte kenüh azhüzhüluo, ti küza.

¹⁸Noh tü VÜWA nohri Saküüwuowa küümavüh nyu, küpakenühnyunü nosü üta nohri pari vü küshie nü ma kütsathuozhüwa sakümzho taji nohri tü künyirhie küüngu nta akükhra tsü.

¹⁹Thi mükütüküzü nohri nüh VÜWA nohri Saküüwuowa kümam nü küpara nyiazari vü tewa mari kütsü sa thi jümari khurü tewa thuoüji hi nüh nosü künyitoh hamna tsü wie vehthuoh nü nohri tü pokah wie nathuoh.

²⁰Nohri tüvü nüh VÜWA nüh akuoküjiri tü pokahküm üta nohri nüh VÜWA nohri Saküüwuowa zhümküna thuoüji nohri nga pokahtsü naveh.